אידיש
1
אוּן בְּעֵת עֶר הָאט גֶעעֶפְנְט דִי זִיבֶּעטֶע זִיגְל, אִיז גֶעקוּמֶען אַ שְׁטִילְקַייט אִין הִימְל אַרוּם דֶעם מֶשֶׁך פוּן אַ הַאלְבֶּער שָׂעָה.
2
אוּן אִיךְ הָאבּ גֶעזֶען דִי זִיבְּן מַלְאָכִים, וָואס שְׁטֵייעֶן פַאר גָאט; אוּן עֶס אִיז זֵיי גֶעגֶעבְּן גֶעוָוארְן זִיבְּן שׁוֹפְרוֹת.
3
אוּן אַן אַנְדֶערֶער מַלְאַךְ אִיז גֶעקוּמֶען אוּן אִיז גֶעשְׁטַאנֶען בַּיי דֶעם מִזְבֵּחַ, אוּן עֶר הָאט גֶעהַאט אַ גָאלְדִינֶע פַייעֶרְפַאן; אוּן עֶס אִיז אִים גֶעגֶעבְּן גֶעוָוארְן אַ סַך קְטוֹרֶת, כְּדֵי עֶר זָאל עֶס צוּגֶעבְּן צוּ דִי תְּפִילוֹת פוּן אַלֶע קְדוֹשִׁים אוֹיף דֶעם גָאלְדִינֶעם מִזְבֵּחַ, וָואס אִיז גֶעוֶוען פַאר דֶעם שְׁטוּל;
4
אוּן דֶער רוֹיךְ פוּן דֶעם קְטוֹרֶת מִיט דִי תְּפִילוֹת פוּן דִי קְדוֹשִׁים זֶענֶען אַרוֹיפְגֶעגַאנְגֶען פַאר גָאט פוּן דֶעם מַלְאָכְס הַאנְט.
5
אוּן דֶער מַלְאַךְ הָאט גֶענוּמֶען דִי פַייעֶרְפַאן, אוּן עֶר הָאט זִי אָנְגֶעפִילְט מִיט דֶעם פַייעֶר פוּן דֶעם מִזְבֵּחַ, אוּן זִי אַ וַוארְף גֶעטָאן אוֹיף דֶער עֶרְד; אוּן סֶע זֶענֶען גֶעקוּמֶען דוּנֶערְן, אוּן קוֹלוֹת, אוּן בְּלִיצְן, אוּן אַן עֶרְדְצִיטֶערְנִישׁ.
6
אוּן דִי זִיבְּן מַלְאָכִים, וָואס הָאבְּן גֶעהַאט דִי זִיבְּן שׁוֹפְרוֹת, הָאבְּן זִיךְ אָנְגֶעגְרֵייט צוּ בְּלָאזְן.
7
אוּן דֶער עֶרְשְׁטֶער הָאט גֶעבְּלָאזְן: אוּן עֶס אִיז גֶעקוּמֶען הָאגְל אוּן פַייעֶר, אוֹיסְגֶעמִישְׁט מִיט בְּלוּט, אוּן זֵיי זֶענֶען גֶעוָוארְפְן גֶעוָוארְן אוֹיף דֶער עֶרְד. אוּן אַ דְרִיטֶער טֵייל פוּן דֶער עֶרְד אִיז פַארְבְּרֶענְט גֶעוָוארְן, אוּן אַ דְרִיטֶער טֵייל פוּן דִי בֵּיימֶער אִיז פַארְבְּרֶענְט גֶעוָוארְן, אוּן דָאס גַאנְצֶע גְרִינֶע גְרָאז אִיז פַארְבְּרֶענְט גֶעוָוארְן.
8
אוּן דֶער צְוֵוייטֶער מַלְאַךְ הָאט גֶעבְּלָאזְן: אוּן עֶס אִיז גֶעוֶוען וִוי אַ גְרוֹיסֶער בַּארְג, וָואס בְּרֶענְט מִיט פַייעֶר, וָואלְט אַרַיינְגֶעוָוארְפְן גֶעוָוארְן אִין יַם אַרַיין; אוּן אַ דְרִיטֶער טֵייל פוּן דֶעם יַם אִיז גֶעוָוארְן בְּלוּט.
9
אוּן עֶס אִיז גֶעשְׁטָארְבְּן אַ דְרִיטֶער טֵייל פוּן דִי לֶעבֶּעדִיקֶע בַּאשֶׁעפֶענִישְׁן אִין יַם, אוּן אַ דְרִיטֶער טֵייל פוּן דִי שִׁיפְן אִיז צֶעשְׁטֶערְט גֶעוָוארְן.
10
אוּן דֶער דְרִיטֶער מַלְאַךְ הָאט גֶעבְּלָאזְן: אוּן אַ גְרוֹיסֶער שְׁטֶערְן אִיז גֶעפַאלְן פוּן הִימְל, וָואס הָאט גֶעבְּרֶענְט וִוי אַ פַאקְל, אוּן עֶר אִיז גֶעפַאלְן אוֹיף דֶעם דְרִיטְן טֵייל פוּן דִי טַייכְן אוּן אוֹיף דִי קְוַואלְן וַואסֶער.
11
אוּן דֶער נָאמֶען פוּן דֶעם שְׁטֶערְן וֶוערְט אָנְגֶערוּפְן וֶוערְמוּט; אוּן אַ דְרִיטֶער טֵייל פוּן דִי וַואסֶערְן אִיז גֶעוָוארְן וֶוערְמוּט; אוּן אַ סַך מֶענְטְשְׁן זֶענֶען גֶעשְׁטָארְבְּן פוּן דִי וַואסֶערְן, מַחְמַת זֵיי זֶענֶען גֶעמַאכְט גֶעוָוארְן בִּיטֶער.
12
אוּן דֶער פֶערְטֶער מַלְאַךְ הָאט גֶעבְּלָאזְן: אוּן אַ דְרִיטֶער טֵייל פוּן דֶער זוּן הָאט גֶעקְרִיגְט אַ זֶעץ, אוּן אַ דְרִיטֶער טֵייל פוּן דֶער לְבָנָה, אוּן אַ דְרִיטֶער טֵייל פוּן דִי שְׁטֶערְן, כְּדֵי דֶער דְרִיטֶער טֵייל פוּן זֵיי זָאל פַארְפִינְצְטֶערְט וֶוערְן, אוּן דֶער טָאג זָאל נִישְׁט שַׁיינֶען אִין זַיין דְרִיטְן טֵייל, אוּן דִי נַאכְט אוֹיף דֶעם זֶעלְבְּן אוֹפְן.
13
אוּן אִיךְ הָאבּ גֶעזֶען, אוּן אִיךְ הָאבּ גֶעהֶערְט אַן אָדְלֶער פְלִיעֶן אִין מִיטְן הִימְל, אוּן זָאגְן מִיט אַ הוֹיךְ קוֹל: וֵויי, וֵויי, וֵויי צוּ דִי, וָואס וָואוֹינֶען אוֹיף דֶער עֶרְד, פוּנְוֶועגְן דִי אַנְדֶערֶע קוֹלוֹת פוּן דֶעם שׁוֹפָר פוּן דִי דְרַיי מַלְאָכִים, וָואס דַארְפְן נָאךְ בְּלָאזְן.