אידיש
1
אוּן נָאכְדֶעם הָאבּ אִיךְ גֶעזֶען פִיר מַלְאָכִים שְׁטֵיין בַּיי דִי פִיר עֶקְן פוּן דֶער עֶרְד, אוּן הַאלְטְן דִי פִיר וִוינְטְן פוּן דֶער עֶרְד, אַז קֵיין וִוינְט זָאל נִישְׁט בְּלָאזְן אוֹיף דֶער עֶרְד, אָדֶער אוֹיף דֶעם יַם, אָדֶער אוֹיף קֵיין שׁוּם בּוֹים.
2
אוּן אִיךְ הָאבּ גֶעזֶען אַן אַנְדֶערְן מַלְאַךְ אוֹיפְגֵיין פוּן דֶעם זוּנְאוֹיפְגַאנְג, וָואס הָאט דֶעם זִיגְל פוּן דֶעם לֶעבֶּעדִיקְן גָאט; אוּן עֶר הָאט גֶעשְׁרִיגְן מִיט אַ הוֹיךְ קוֹל צוּ דִי פִיר מַלְאָכִים, וֶועמֶען עֶס אִיז גֶעגֶעבְּן גֶעוָוארְן צוּ בַּאשֶׁעדִיקְן דִי עֶרְד אוּן דֶעם יַם,
3
אַזוֹי צוּ זָאגְן: בַּאשֶׁעדִיקְט נִישְׁט דִי עֶרְד, אוֹיךְ נִישְׁט דֶעם יַם, אוֹיךְ נִישְׁט דִי בֵּיימֶער, בִּיז מִיר וֶועלְן הָאבְּן פַארְזִיגְלְט דִי קְנֶעכְט פוּן אוּנְדְזֶער גָאט אוֹיף זֵייעֶרֶע שְׁטֶערְנְס.
4
אוּן אִיךְ הָאבּ גֶעהֶערְט דִי צָאל פוּן דִי, וָואס זֶענֶען גֶעוֶוען פַארְזִיגְלְט: הוּנְדֶערְט אוּן פִיר אוּן פֶערְצִיק טוֹיזְנְט, פַארְזִיגְלְט פוּן יֶעדְן שֵׁבָט פוּן דִי בְּנֵי־יִשְׂרָאֵל:
5
פוּן דֶעם שֵׁבָט יְהוּדָה זֶענֶען גֶעוֶוען פַארְזִיגְלְט צְוֶועלְף טוֹיזְנְט, פוּן דֶעם שֵׁבָט רְאוּבֵן צְוֶועלְף טוֹיזְנְט, פוּן דֶעם שֵׁבָט גָד צְוֶועלְף טוֹיזְנְט,
6
פוּן דֶעם שֵׁבָט אָשֵׁר צְוֶועלְף טוֹיזְנְט, פוּן דֶעם שֵׁבָט נַפְתָּלִי צְוֶועלְף טוֹיזְנְט, פוּן דֶעם שֵׁבָט מְנַשֶׁה צְוֶועלְף טוֹיזְנְט,
7
פוּן דֶעם שֵׁבָט שִׁמְעוֹן צְוֶועלְף טוֹיזְנְט, פוּן דֶעם שֵׁבָט לֵוִי צְוֶועלְף טוֹיזְנְט, פוּן דֶעם שֵׁבָט יִשָׂשׂכָר צְוֶועלְף טוֹיזְנְט,
8
פוּן דֶעם שֵׁבָט זְבוּלוּן צְוֶועלְף טוֹיזְנְט, פוּן דֶעם שֵׁבָט יוֹסֵף צְוֶועלְף טוֹיזְנְט, פוּן דֶעם שֵׁבָט בִּנְיָמִין זֶענֶען גֶעוֶוען פַארְזִיגְלְט צְוֶועלְף טוֹיזְנְט.
9
נָאכְדֶעם הָאבּ אִיךְ גֶעזֶען, עֶרְשְׁט אַ גְרוֹיסֶער הַמוֹן, וָואס קֵיינֶער הָאט אִים נִישְׁט גֶעקָאנְט אִיבֶּערְצֵיילְן, פוּן יֶעדֶער אוּמָה אוּן פוּן אַלֶע שְׁבָטִים, אוּן פֶעלְקֶער, אוּן לְשׁוֹנוֹת, שְׁטֵיין פַאר דֶעם שְׁטוּל אוּן פַאר דֶעם לַאם, אָנְגֶעטָאן אִין וַוייסֶע קְלֵיידֶער, אוּן פַּאלְמֶען אִין זֵייעֶרֶע הֶענְט;
10
אוּן זֵיי שְׁרַייעֶן מִיט אַ הוֹיךְ קוֹל, אַזוֹי צוּ זָאגְן: דִי יְשׁוּעָה גֶעהֶערְט צוּ אוּנְדְזֶער גָאט, וָואס זִיצְט אוֹיף דֶעם שְׁטוּל אוּן צוּ דֶעם לַאם!
11
אוּן אַלֶע מַלְאָכִים זֶענֶען גֶעשְׁטַאנֶען אַרוּם אוּן אַרוּם דֶעם שְׁטוּל אוּן אַרוּם דִי זְקֵנִים אוּן דִי פִיר חַיוֹת; אוּן זֵיי זֶענֶען אַנִידֶערְגֶעפַאלְן פַאר דֶעם שְׁטוּל אוֹיף זֵייעֶרֶע פֶּענִימֶער, אוּן הָאבְּן זִיךְ גֶעבּוּקְט צוּ גָאט,
12
אוּן גֶעזָאגְט: אָמֵן! בֶּענְטְשׁוּנְג, אוּן הֶערְלֶעכְקַייט, אוּן חָכְמָה, אוּן דַאנְקְלוֹיבּ, אוּן כָּבוֹד, אוּן שְׁטַארְקַייט, אוּן מַאכְט, גֶעהֶערְן צוּ אוּנְדְזֶער גָאט אֵייבִּיק אוּן אֵייבִּיק! אָמֵן.
13
אוּן אֵיינֶער פוּן דִי זְקֵנִים הָאט גֶעעֶנְטְפֶערְט אוּן צוּ מִיר גֶעזָאגְט: דִי דָאזִיקֶע, וָואס זֶענֶען אָנְגֶעטָאן אִין דִי וַוייסֶע קְלֵיידֶער, וֶוער זֶענֶען זֵיי אוּן פוּנְוַואנֶען קוּמֶען זֵיי?
14
אוּן אִיךְ הָאבּ גֶעזָאגְט צוּ אִים: מַיין הַאר, דוּ וֵוייסְט. אוּן עֶר הָאט צוּ מִיר גֶעזָאגְט: דָאס זֶענֶען דִי, וָואס קוּמֶען אַרוֹיס פוּן אַ גְרוֹיסֶער צָרָה, אוּן זֵיי הָאבְּן גֶעוַואשְׁן זֵייעֶרֶע קְלֵיידֶער, אוּן הָאבְּן זֵיי גֶעמַאכְט וַוייס אִין דֶעם בְּלוּט פוּן דֶעם לַאם.
15
דֶערִיבֶּער זֶענֶען זֵיי פַאר דֶעם שְׁטוּל פוּן גָאט, אוּן זֵיי דִינֶען אִים טָאג אוּן נַאכְט אִין זַיין הֵיכָל; אוּן דֶער, וָואס זִיצְט אוֹיף דֶעם שְׁטוּל, וֶועט אוֹיסְשְׁפְּרֵייטְן זַיין גֶעצֶעלְט אִיבֶּער זֵיי.
16
זֵיי וֶועלְן מֶער נִישְׁט הוּנְגֶערְן, אוּן אוֹיךְ מֶער נִישְׁט דָארְשְׁטְן; אוֹיךְ וֶועט דִי זוּן נִישְׁט פַאלְן אִיבֶּער זֵיי, אוֹיךְ נִישְׁט קֵיין שׁוּם הִיץ;
17
וָוארִים דָאס לַאם, וָואס אִיז אִין דֶער מִיט פוּן דֶעם שְׁטוּל, וֶועט זַיין זֵייעֶר פַּאסְטוּךְ, אוּן וֶועט זֵיי פִירְן צוּ קְוַואלְן פוּן לֶעבֶּעדִיק וַואסֶער; אוּן גָאט וֶועט אָפְּוִוישְׁן יֶעדֶע טְרֶער פוּן זֵייעֶרֶע אוֹיגְן.