אידיש
1
אוּן אִיךְ הָאבּ גֶעזֶען אִין דֶער רֶעכְטֶער הַאנְט פוּן דֶעם, וָואס אִיז גֶעזֶעסְן אוֹיף דֶעם שְׁטוּל, אַ סֵפֶר, בַּאשְׁרִיבְּן אִינֶעוֵויינִיק אוּן פוּן הִינְטְן, אוּן פַארְזִיגְלְט מִיט זִיבְּן זִיגְלֶעךְ.
2
אוּן אִיךְ הָאבּ גֶעזֶען אַ שְׁטַארְקְן מַלְאַךְ, וָואס הָאט אוֹיסְגֶערוּפְן מִיט אַ הוֹיךְ קוֹל: וֶוער אִיז זוֹכֶה צוּ עֶפֶענֶען דָאס סֵפֶר אוּן אָפְּצוּטָאן פוּן אִים דִי זִיגְלֶעךְ?
3
אוּן קֵיינֶער נִישְׁט אִין הִימְל, אָדֶער אוֹיף דֶער עֶרְד, אָדֶער אוּנְטֶער דֶער עֶרְד, אִיז בְּכּוֹחַ גֶעוֶוען צוּ עֶפֶענֶען דָאס סֵפֶר, אָדֶער צוּ קוּקְן אוֹיף אִים.
4
אוּן אִיךְ הָאבּ זֵייעֶר גֶעוֵויינְט, מַחְמַת סֶע הָאט זִיךְ נִישְׁט גֶעפוּנֶען קֵיינֶער, וָואס זָאל זוֹכֶה זַיין צוּ עֶפֶענֶען דָאס סֵפֶר, אָדֶער צוּ קוּקְן אוֹיף אִים.
5
אוּן אֵיינֶער פוּן דִי זְקֵנִים הָאט גֶעזָאגְט צוּ מִיר: וֵויין נִישְׁט, זֶע, דֶער לֵייבּ, וָואס אִיז פוּן דֶעם שֵׁבָט יְהוּדָה, דֶער וָוארְצְל פוּן דָוִד, הָאט מְנַצֵחַ גֶעוֶוען צוּ עֶפֶענֶען דָאס סֵפֶר אוּן זַיינֶע זִיבְּן זִיגְלֶעךְ.
6
אוּן אִיךְ הָאבּ גֶעזֶען אִין דֶער מִיט פוּן דֶעם שְׁטוּל אוּן דִי פִיר חַיוֹת, אוּן אִין דֶער מִיט פוּן דִי זְקֵנִים, אַ לַאם שְׁטֵיין גְלַייךְ וִוי סֶע וָואלְט גֶעוֶוען גֶעשָׁאכְטְן, אוּן סֶע הָאט זִיבְּן הֶערְנֶער אוּן זִיבְּן אוֹיגְן, וָואס זֶענֶען דִי זִיבְּן גֵייסְטֶער פוּן גָאט, אַרוֹיסְגֶעשִׁיקְט אוֹיף דֶער גַאנְצֶער עֶרְד.
7
אוּן סֶע אִיז גֶעקוּמֶען אוּן הָאט אַרוֹיסְגֶענוּמֶען דָאס סֵפֶר פוּן דֶער רֶעכְטֶער הַאנְט בַּיי דֶעם, וָואס אִיז גֶעזֶעסְן אוֹיף דֶעם שְׁטוּל.
8
אוּן בְּעֵת סֶע הָאט גֶענוּמֶען דָאס סֵפֶר, זֶענֶען דִי פִיר חַיוֹת אוּן דִי פִיר אוּן צְוַואנְצִיק זְקֵנִים אַנִידֶערְגֶעפַאלְן פַאר דֶעם לַאם, אוּן יֶעדֶער אֵיינֶער הָאט גֶעהַאט אַ הַארְף אוּן גָאלְדִינֶע בֶּעקְנְס פוּל מִיט קְטוֹרֶת, וָואס זֶענֶען דִי תְּפִילוֹת פוּן דִי קְדוֹשִׁים.
9
אוּן זֵיי הָאבְּן גֶעזוּנְגֶען אַ נַייעֶם גֶעזַאנְג, אַזוֹי צוּ זָאגְן: וֶוערְד בִּיסְטוּ צוּ נֶעמֶען דָאס סֵפֶר אוּן צוּ עֶפֶענֶען זַיינֶע זִיגְלֶעךְ, וָוארִים דוּ בִּיסְט גֶעשָׁאכְטְן גֶעוָוארְן, אוּן מִיט דַיין בְּלוּט הָאסְטוּ אוֹיסְגֶעקוֹיפְט פַאר גָאט פוּן יֶעדְן שֵׁבֶט, אוּן לָשׁוֹן, אוּן אוּמָה, אוּן פָאלְק,
10
אוּן הָאסְט זֵיי גֶעמַאכְט פַאר אוּנְדְזֶער גָאט אַ מְלוּכָה אוּן כֹּהַנִים, אוּן זֵיי וֶועלְן קֶענִיגְן אוֹיף דֶער עֶרְד.
11
אוּן אִיךְ הָאבּ גֶעזֶען, אוּן אִיךְ הָאבּ גֶעהֶערְט אַ קוֹל פוּן אַ סַך מַלְאָכִים אַרוּם אוּן אַרוּם דֶעם שְׁטוּל אוּן דִי חַיוֹת אוּן דִי זְקֵנִים; אוּן זֵייעֶר צָאל אִיז גֶעוֶוען צֶען טוֹיזְנְט מָאל צֶען טוֹיזְנְט, אוּן טוֹיזְנְטֶער פוּן טוֹיזְנְטֶער,
12
אוּן זֵיי הָאבְּן גֶעזָאגְט מִיט אַ הוֹיךְ קוֹל: רָאוּי אִיז דָאס לַאם, וָואס אִיז גֶעשָׁאכְטְן גֶעוָוארְן, צוּ בַּאקוּמֶען דִי מַאכְט, אוּן עַשִׁירוּת, אוּן חָכְמָה, אוּן שְׁטַארְקַייט, אוּן כָּבוֹד, אוּן הֶערְלֶעכְקַייט, אוּן בֶּענְטְשׁוּנְג.
13
אוּן יֶעדֶע בְּרִיאָה, וָואס אִיז אִין הִימְל, אוּן אוֹיף דֶער עֶרְד, אוּן אוּנְטֶער דֶער עֶרְד, אוּן אוֹיף דֶעם יַם, אוּן אַלְצְדִינְג, וָואס אִיז אִין זֵיי, הָאבּ אִיךְ גֶעהֶערְט זָאגְן: צוּ אִים, וָואס זִיצְט אוֹיף דֶעם שְׁטוּל, אוּן צוּ דֶעם לַאם, אִיז דִי בֶּענְטְשׁוּנְג, אוּן דֶער כָּבוֹד, אוּן דִי הֶערְלֶעכְקַייט, אוּן דִי מַאכְט אוֹיף אֵייבִּיק אוּן אֵייבִּיק.
14
אוּן דִי פִיר חַיוֹת הָאבְּן נָאכְגֶעזָאגְט: אָמֵן. אוּן דִי זְקֵנִים זֶענֶען אַנִידֶערְגֶעפַאלְן אוּן הָאבְּן זִיךְ גֶעבּוּקְט.