אידיש
1
נָאכְדֶעם הָאבּ אִיךְ גֶעזֶען, עֶרְשְׁט אַ טִיר אִיז גֶעשְׁטַאנֶען אָפְן אִין הִימְל, אוּן דָאס עֶרְשְׁטֶע קוֹל, וָואס אִיךְ הָאבּ גֶעהֶערְט, וִוי פוּן אַ שׁוֹפָר, הָאט גֶערֶעדְט מִיט מִיר, אוּן גֶעזָאגְט: קוּם אַרוֹיף אַהֶער, אוּן אִיךְ וֶועל דִיר וַוייזְן דָאס, וָואס מוּז שְׁפֶּעטֶער גֶעשֶׁען.
2
אוּן גְלַייךְ בִּין אִיךְ גֶעוֶוען אִין דֶעם גֵייסְט. אוּן זֶע, עֶס אִיז גֶעוֶוען אַוֶועקְגֶעשְׁטֶעלְט אַ שְׁטוּל אִין הִימְל, אוּן אֵיינֶער אִיז גֶעזֶעסְן אוֹיף דֶעם שְׁטוּל;
3
אוּן דֶער, וָואס אִיז גֶעזֶעסְן, הָאט גֶעהַאט אוֹיף זִיךְ דָאס אוֹיסְזֶען וִוי פוּן אַ יַאשְׁפִּיז אוּן אַ סַארְדִיס שְׁטֵיין; אוּן אַ רֶעגְנְבּוֹיגְן אִיז גֶעוֶוען אַרוּם דֶעם שְׁטוּל, וִוי דָאס אוֹיסְזֶען פוּן אַ סְמַארַאגְד.
4
אוּן אַרוּם אוּן אַרוּם דֶעם שְׁטוּל זֶענֶען גֶעוֶוען פִיר אוּן צְוַואנְצִיק שְׁטוּלְן; אוּן אוֹיף דִי שְׁטוּלְן הָאבּ אִיךְ גֶעזֶען זִיצְן פִיר אוּן צְוַואנְצִיק זְקֵנִים, אָנְגֶעטָאן אִין וַוייסֶע מַלְבּוּשִׁים, אוּן אוֹיף זֵייעֶרֶע קֶעפּ קְרוֹינֶען פוּן גָאלְד.
5
אוּן פוּן דֶעם שְׁטוּל אַרוֹיס גֵייעֶן בְּלִיצְן אוּן קוֹלוֹת אוּן דוּנֶערְן. אוּן זִיבְּן פַייעֶר־פַאקְלֶען הָאבְּן גֶעבְּרַאכְט פַאר דֶעם שְׁטוּל, וָואס זֶענֶען דִי זִיבְּן גֵייסְטֶער פוּן גָאט;
6
אוּן פַאר דֶעם שְׁטוּל וִוי סֶע וָואלְט גֶעוֶוען אַ יַם פוּן גְלָאז, גְלַייךְ וִוי קְרִיסְטָאל. אוּן אִין דֶער מִיט פוּן דֶעם שְׁטוּל, אוּן אַרוּם אוּן אַרוּם דֶעם שְׁטוּל, פִיר חַיוֹת פוּל מִיט אוֹיגְן פוּן פָארְנְט אוּן פוּן הִינְטְן.
7
אוּן דִי עֶרְשְׁטֶע חַיָה אִיז גֶעוֶוען וִוי אַ לֵייבּ, אוּן דִי צְוֵוייטֶע חַיָה וִוי אַן אָקְס, אוּן דִי דְרִיטֶע חַיָה הָאט גֶעהַאט אַ פָּנִים פוּן אַ מֶענְטְשְׁן, אוּן דִי פֶערְטֶע חַיָה אִיז גֶעוֶוען וִוי אַ פְלִיעֶנְדִיקֶער אָדְלֶער.
8
אוּן דִי פִיר חַיוֹת, וָואס יֶעדֶע אֵיינֶע פוּן זֵיי הָאט גֶעהַאט זֶעקְס פְלִיגְל, זֶענֶען פוּל מִיט אוֹיגְן אַרוּם אוּן אַרוּם אוּן אִינֶעוֵויינִיק. אוּן זֵיי הָאבְּן טָאג אוּן נַאכְט נִישְׁט קֵיין רוּ, אוּן זָאגְן: הֵיילִיק, הֵיילִיק, הֵיילִיק אִיז גָאט, דֶער הַאר, דֶער אַלְמֶעכְטִיקֶער, וָואס אִיז גֶעוֶוען אוּן וָואס אִיז אוּן וָואס וֶועט קוּמֶען.
9
אוּן בְּעֵת דִי חַיוֹת הָאבְּן אָפְּגֶעגֶעבְּן הֶערְלֶעכְקַייט, אוּן כָּבוֹד, אוּן דַאנְקְלוֹיבּ, צוּ אִים וָואס זִיצְט אוֹיף דֶעם שְׁטוּל, וָואס לֶעבְּט אוֹיף אֵייבִּיק אוּן אֵייבִּיק,
10
פַאלְן אַנִידֶער דִי פִיר אוּן צְוַואנְצִיק זְקֵנִים פַאר אִים, וָואס זִיצְט אוֹיף דֶעם שְׁטוּל, אוּן דִינֶען זִיךְ צוּ אִים, וָואס לֶעבְּט אוֹיף אֵייבִּיק אוּן אֵייבִּיק, אוּן וַוארְפְן זֵייעֶרֶע קְרוֹינֶען פַאר דֶעם שְׁטוּל, אוּן זָאגְן:
11
רָאוּי בִּיסְטוּ, אוּנְדְזֶער הַאר אוּן אוּנְדְזֶער גָאט, צוּ בַּאקוּמֶען דִי הֶערְלֶעכְקַייט אוּן דֶעם כָּבוֹד אוּן דִי שְׁטַארְקַייט; וָוארִים דוּ הָאסְט בַּאשַׁאפְן אַלְצְדִינְג, אוּן דוּרְךְ דַיין וִוילְן זֶענֶען זֵיי גֶעוֶוען אוּן זֶענֶען בַּאשַׁאפְן גֶעוָוארְן.