אידיש
1
אוּן צוּ דֶעם מַלְאַךְ פוּן דֶער קְהִילָה אִין סַארְדֶעס שְׁרַייבּ: דָאס דָאזִיקֶע זָאגְט דֶער, וָואס הָאט דִי זִיבְּן גֵייסְטֶער פוּן גָאט אוּן דִי זִיבְּן שְׁטֶערְן: אִיךְ קֶען דַיינֶע מַעֲשִׂים; דוּ הָאסְט אַ נָאמֶען, אַז דוּ לֶעבְּסְט, אוּן בִּיסְט טוֹיט.
2
וַואך אוּן בַּאפֶעסְטִיק דָאס אִיבֶּערִיקֶע, וָואס אִיז גֶעוֶוען גְרֵייט צוּ שְׁטַארְבְּן; וָוארִים אִיךְ הָאבּ נִישְׁט גֶעפוּנֶען דַיינֶע מַעֲשִׂים גַאנְץ פַאר מַיין גָאט.
3
גֶעדֶענְק דֶערִיבֶּער וִוי אַזוֹי דוּ הָאסְט מְקַבְּל גֶעוֶוען אוּן גֶעהֶערְט, אוּן הִיט עֶס אוּן טוּ תְּשׁוּבָה. אוֹיבּ אָבֶּער דוּ וֶועסְט נִישְׁט אַכְטוּנְג גֶעבְּן, וֶועל אִיךְ קוּמֶען וִוי אַ גַנָב, אוּן דוּ וֶועסְט נִישְׁט וִויסְן אִין וָואסֶער שָׂעָה אִיךְ וֶועל קוּמֶען אִיבֶּער דִיר.
4
דוּ הָאסְט אָבֶּער אִין סַארְדֶעס עֶטְלֶעכֶע נֶעמֶען, וָואס הָאבְּן נִישְׁט בַּאפְלֶעקְט זֵייעֶרֶע מַלְבּוּשִׁים; אוּן זֵיי וֶועלְן גֵיין מִיט מִיר אִין וַוייסְן, וָוארִים זֵיי זֶענֶען זוֹכֶה.
5
דֶער, וָואס אִיז מְנַצֵחַ, וֶועט אַזוֹי אָנְגֶעטָאן וֶוערְן אִין וַוייסֶע מַלְבּוּשִׁים, אוּן אִיךְ וֶועל בְּשׁוּם־אוֹפְן נִישְׁט אוֹיסְמֶעקְן זַיין נָאמֶען פוּן דֶעם סֵפֶר־הַחַיִּים, אוּן אִיךְ וֶועל מוֹדֶה זַיין זַיין נָאמֶען פַאר מַיין פָאטֶער אוּן פַאר זֵייעֶן מַלְאָכִים.
6
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת.
7
אוּן צוּ דֶעם מַלְאַךְ פוּן דֶער קְהִילָה פוּן פִילַאדֶעלְפְיֶע שְׁרַייבּ: דָאס דָאזִיקֶע זָאגְט דֶער, וָואס אִיז הֵיילִיק, דֶער, וָואס אִיז וָוארְהַאפְטִיק, דֶער, וָואס הָאט דֶעם שְׁלִיסְל פוּן דָוִד, דֶער, וָואס עֶפֶענְט, אוּן קֵיינֶער וֶועט נִישְׁט פַארְשְׁלִיסְן, אוּן וָואס פַארְשְׁלִיסְט, אוּן קֵיינֶער עֶפֶענְט נִישְׁט:
8
אִיךְ קֶען דַיינֶע מַעֲשִׂים - זֶע, אִיךְ הָאבּ גֶעשְׁטֶעלְט פַאר דִיר אַ גֶעעֶפְנְטֶע טִיר, וָואס קֵיינֶער קָאן נִישְׁט פַארְשְׁלִיסְן - וָוארִים דוּ הָאסְט אַ קְלֵיינֶעם כּוֹחַ, אוּן הָאסְט גֶעהַאלְטְן מַיין וָוארְט, אוּן נִישְׁט פַארְלֵייקֶענְט מַיין נָאמֶען.
9
זֶע, אִיךְ וֶועל גֶעבְּן פוּן דֶעם פַארְזַאמְלוּנְג פוּן שָׂטָן, פוּן יֶענֶע, וָואס זָאגְן, אַז זֵיי זֶענֶען יִידְן, אוּן זֶענֶען עֶס נִישְׁט, נַייעֶרְט זָאגְן לִיגְנְט - זֶע, אִיךְ וֶועל מַאכְן, אַז זֵיי זָאלְן קוּמֶען אוּן זִיךְ בּוּקְן פַאר דַיינֶע פִיס, אוּן זָאלְן וִויסְן, אַז אִיךְ הָאבּ דִיךְ לִיבּ.
10
מַחְמַת דוּ הָאסְט גֶעהַאלְטְן דָאס וָוארְט פוּן מַיין גֶעדוּלְדִיקַייט, וֶועל אִיךְ אוֹיךְ דִיךְ הִיטְן פוּן דֶער שָׂעָה פוּן נִסָיוֹן, וָואס וֶועט קוּמֶען אִיבֶּער דֶער גַאנְצֶער וֶועלְט צוּ פְּרוּאוְון דִי, וָואס וָואוֹינֶען אוֹיף דֶער עֶרְד.
11
אִיךְ קוּם בַּאלְד; הַאלְט שְׁטַארְק דָאס, וָואס דוּ הָאסְט, כְּדֵי קֵיינֶער זָאל נִישְׁט צוּנֶעמֶען דַיין קְרוֹין.
12
דֶער, וָואס אִיז מְנַצֵחַ, דֶעם וֶועל אִיךְ מַאכְן פַאר אַ זַייל אִין דֶעם הֵיכָל פוּן מַיין גָאט, אוּן עֶר וֶועט מֶער נִישְׁט אַרוֹיסְגֵיין פוּן דָארְטְן; אוּן אִיךְ וֶועל אוֹיף אִים אוֹיפְשְׁרַייבְּן דֶעם נָאמֶען פוּן מַיין גָאט, אוּן דֶעם נָאמֶען פוּן דֶער שְׁטָאט פוּן מַיין גָאט, דָאס נַייעֶ יְרוּשָׁלַיִם, וָואס נִידֶערְט אַרָאפּ פוּן הִימְל, פוּן מַיין גָאט, אוּן מַיין אֵייגֶענֶעם נַייעֶם נָאמֶען.
13
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת.
14
אוּן צוּ דֶעם מַלְאַךְ פוּן דֶער קְהִילָה אִין לַאאָדִיקְיֶע שְׁרַייבּ: דָאס דָאזִיקֶע זָאגְט דֶער אָמֵן, דֶער גֶעטְרַייעֶר אוּן וָוארְהַאפְטִיקֶער עֵדוּת, דֶער אָנְהֵייבּ פוּן דֶער בַּאשַׁאפוּנְג פוּן גָאט.
15
אִיךְ קֶען דַיינֶע מַעֲשִׂים, אַז דוּ בִּיסְט נִישְׁט קַאלְט, אוֹיךְ נִישְׁט הֵייס; הַלְוַואי וָואלְטְסְטוּ גֶעוֶוען קַאלְטְן, אָדֶער הֵייס!
16
בְּכֵן, וַוייל דוּ בִּיסְט לֶעבְּלֶעךְ, נִישְׁט הֵייס, אוֹיךְ נִישְׁט קַאלְט, וֶועל אִיךְ דִיךְ אוֹיסְשְׁפַּייעֶן פוּן מַיין מוֹיל.
17
וָוארוּם דוּ זָאגְסְט: אִיךְ בִּין רַייךְ, אוּן הָאבּ דֶערְוָוארְבְּן עַשִׁירוּת, אוּן נֵייטִיק מִיךְ אִין גָארְנִישְׁט, אוּן וֵוייסְט נִישְׁט, אַז דוּ בִּיסְט גָאר עֶלְנְט, אוּן אוּמְגְלִיקְלֶעךְ אוּן אָרֶעם, אוּן בְּלִינְד, אוּן נַאקֶעט.
18
בְּכֵן, רָאט אִיךְ דִיר, צוּ קוֹיפְן בַּיי מִיר גָאלְד, גֶעלַייטֶערְט דוּרְךְ פַייעֶר, כְּדֵי דוּ זָאלְסְט וֶוערְן רַייךְ; אוּן וַוייסֶע מַלְבּוּשִׁים, כְּדֵי דוּ זָאלְסְט דִיךְ בַּאקְלֵיידְן, אוּן כְּדֵי דִי בּוּשָׁה פוּן דַיין נַאקֶעטְקַייט זָאל נִישְׁט אַנְטְפְּלֶעקְט וֶוערְן; אוּן אוֹיגְנְזַאלְבּ צוּ זַאלְבְּן דַיינֶע אוֹיגְן, כְּדֵי דוּ זָאלְסְט קֶענֶען זֶען.
19
אַלֶע, וָואס אִיךְ הָאבּ לִיבּ, מוּסְר אִיךְ אוּן שְׁטְרָאף; זַיי דֶערִיבֶּער אֵייפֶערִיק אוּן טוּ תְּשׁוּבָה.
20
זֶע, אִיךְ שְׁטֵיי בַּיי דֶער טִיר אוּן קְלַאפּ אָן; אוֹיבּ עֶמִיצֶער הֶערְט מַיין קוֹל אוּן טוּט עֶפֶענֶען דִי טִיר, וֶועל אִיךְ אַרַיינְקוּמֶען צוּ אִים, אוּן וֶועל עֶסְן מִיט אִים, אוּן עֶר מִיט מִיר.
21
דֶער, וָואס אִיז מְנַצֵחַ, דֶעם וֶועל אִיךְ גֶעבְּן, אַז עֶר זָאל זִיךְ אַנִידֶערְזֶעצְן מִיט מִיר אוֹיף מַיין שְׁטוּל, אַזוֹי וִוי אוֹיךְ אִיךְ הָאבּ מְנַצֵחַ גֶעוֶוען אוּן הָאבּ מִיךְ אַנִידֶערְגֶעזֶעצְט מִיט מַיין פָאטֶער אוֹיף זַיין שְׁטוּל.
22
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת.