אידיש
1
אוּן אִיךְ הָאבּ גֶעזֶען אַ נַייעֶם הִימְל אוּן אַ נַייעֶ עֶרְד; וָוארִים דֶער עֶרְשְׁטֶער הִימְל אוּן דִי עֶרְשְׁטֶע עֶרְד זֶענֶען פַארְגַאנְגֶען, אוּן דֶער יַם אִיז מֶער נִישְׁטָא.
2
אוּן אִיךְ הָאבּ גֶעזֶען דִי הֵיילִיקֶע שְׁטָאט, אַ נַיי יְרוּשָׁלַיִם, אַרָאפְּנִידֶערְן פוּן דֶעם הִימְל פוּן גָאט, אָנְגֶעגְרֵייט וִוי אַ כַּלָּה, וָואס אִיז אוֹיסְגֶעפּוּצְט פַאר אִיר מַאן.
3
אוּן אִיךְ הָאבּ גֶעהֶערְט אַ הוֹיךְ קוֹל פוּן דֶעם שְׁטוּל אַרוֹיס, אַזוֹי צוּ זָאגְן: זֶע, דָאס מִשְׁכָּן פוּן גָאט אִיז מִיט דִי מֶענְטְשְׁן, אוּן עֶר וֶועט וָואוֹינֶען מִיט זֵיי, אוּן זֵיי וֶועלְן זַיין זַיין פָאלְק, אוּן גָאט אַלֵיין וֶועט זַיין מִיט זֵיי.
4
אוּן עֶר וֶועט אָפְּוִוישְׁן יֶעדֶע טְרֶער פוּן זֵייעֶרֶע אוֹיגְן; אוּן קֵיין טוֹיט וֶועט מֶער נִישְׁט זַיין, סֶע וֶועט אוֹיךְ נִישְׁט זַיין קֵיין טְרוֹיעֶר, קֵיין גֶעוֵויין, קֵיין פַּיין, מַחְמַת דִי עֶרְשְׁטֶע זַאכְן זֶענֶען פַארְגַאנְגֶען.
5
אוּן דֶער, וָואס אִיז גֶעזֶעסְן אוֹיף דֶעם שְׁטוּל, הָאט גֶעזָאגְט: זֶע, אִיךְ מַאךְ אַלְצְדִינְג נַיי. אוּן עֶר הָאט גֶעזָאגְט: שְׁרַייבּ, וָוארִים דִי דָאזִיקֶע רֵייד זֶענֶען בַּאגְלוֹיבְּט אוּן אֶמֶת.
6
אוּן עֶר הָאט צוּ מִיר גֶעזָאגְט: עֶס אִיז גֶעשֶׁען! אִיךְ בִּין דִי אַלֶף אוּן דִי תָּוו, דֶער אָנְהֵייבּ אוּן דֶער סוֹף. אִיךְ וֶועל גֶעבְּן דֶעם, וָואס אִיז דָארְשְׁטִיק, אוּמְזִיסְט פוּן דֶעם קְוַואל פוּן לֶעבֶּעדִיק וַואסֶער.
7
דֶער, וָואס אִיז מְנַצֵחַ, וֶועט יַרְשֶׁענֶען דִי דָאזִיקֶע זַאכְן; אוּן אִיךְ וֶועל זַיין זַיין גָאט, אוּן עֶר וֶועט זַיין מַיין זוּן.
8
אָבֶּער פַאר דִי שְׁרֶעקֶעוְודִיקֶער, אוּן אוּמְגְלוֹיבִּיקֶע, אוּן אוּמְוֶוערְדִיקֶע, אוּן רוֹצְחִים, אוּן נוֹאָפִים, אוּן כִּישׁוּף מַאכֶערְס, אוּן גֶעצְנְדִינֶערְס, אוּן אַלֶע לִיגְנֶער - זֵייעֶר טֵייל וֶועט זַיין אִין דֶעם טַייךְ, וָואס בְּרֶענְט מִיט פַייעֶר אוּן שְׁוֶועבְּל. דָאס אִיז דֶער צְוֵוייטֶער טוֹיט.
9
אוּן עֶס אִיז גֶעקוּמֶען אֵיינֶער פוּן דִי זִיבְּן מַלְאָכִים, וָואס הָאבְּן גֶעהַאט דִי זִיבְּן בֶּעקְנְס, וָואס זֶענֶען גֶעוֶוען בַּאלָאדְנְט מִיט דִי זִיבְּן לֶעצְטֶע מַכּוֹת, אוּן עֶר הָאט גֶערֶעדְט מִיט מִיר, אַזוֹי צוּ זָאגְן: קוּם אַהֶער, אִיךְ וִויל דִיר וַוייזְן דִי כַּלָּה, דָאס וַוייבּ פוּן דֶעם לַאם.
10
אוּן עֶר הָאט אִין דֶעם גֵייסְט מִיךְ אַוֶועקְגֶעפִירְט צוּ אַ גְרוֹיסְן אוּן הוֹיכְן בַּארְג, אוּן הָאט מִיר גֶעוִויזְן דִי הֵיילִיקֶע שְׁטָאט יְרוּשָׁלַיִם אַרָאפְּנִידֶערְן פוּן דֶעם הִימְל פוּן גָאט
11
מִיט דֶער הֶערְלֶעכְקַייט פוּן גָאט; אִיר לִיכְטִיקַייט אִיז גֶעוֶוען עֶנְלֶעךְ צוּ זֵייעֶר אַ טַייעֶרְן שְׁטֵיין, וִוי דָאס וָואלְט גֶעוֶוען אַ יַאסְפִּיס, קְלָאר וִוי קְרִיסְטָאל.
12
אוּן זִי הָאט גֶעהַאט אַ גְרוֹיסֶע אוּן הוֹיכֶע מוֹיעֶר מִיט צְוֶועלְף טוֹיעֶרן, אוּן בַּיי דִי טוֹיעֶרן צְוֶועלְף מַלְאָכִים, אוּן דֶערְוֹיף זֶענֶען גֶעוֶוען אָנְגֶעשְׁרִיבְּן נֶעמֶען, וָואס זֶענֶען דִי נֶעמֶען פוּן דִי צְוֶועלְף שְׁבָטִים פוּן דִי בְּנֵי־יִשְׂרָאֵל.
13
אִין מִזְרַח זֶענֶען גֶעוֶוען דְרַיי טוֹיעֶרן, אוּן אִין צָפוֹן דְרַיי טוֹיעֶרן, אוּן אִין דָּרוֹם דְרַיי טוֹיעֶרן, אוּן אִין מַעֲרָב דְרַיי טוֹיעֶרן.
14
אוּן דִי מוֹיעֶר פוּן דֶער שְׁטָאט הָאט גֶעהַאט צְוֶועלְף פוּנְדַאמֶענְטְן, אוּן אוֹיף זֵיי צְוֶועלְף נֶעמֶען פוּן דִי צְוֶועלְף שְׁלִיחִים פוּן דֶעם לַאם.
15
אוּן דֶער, וָואס הָאט גֶערֶעדְט מִיט מִיר, הָאט גֶעהַאט פַאר אַ מָאס אַ גָאלְדִינֶע רוּט, צוּ מֶעסְטְן דִי שְׁטָאט אוּן דִי טוֹיעֶרן פוּן אִיר אוּן אִיר מוֹיעֶר.
16
אוּן דִי שְׁטָאט לִיגְט פִיר־עֶקִיג, אוּן דִי לֶענְג פוּן אִיר אִיז אַזוֹי גְרוֹיס וִוי דִי בְּרֵייט. אוּן עֶר הָאט גֶעמָאסְטְן דִי שְׁטָאט מִיט דֶער רוּט, צְוֶועלְף טוֹיזְנְט אַקֶער; דִי לֶענְג אוּן דִי בְּרֵייט אוּן דִי הֵייךְ פוּן אִיר זֶענֶען גְלַייךְ.
17
אוּן עֶר הָאט גֶעמָאסְטְן אִיר מוֹיעֶר, הוּנְדֶערְט פִיר אוּן פֶערְצִיק אֵיילְן, לוֹיט דֶער מָאס פוּן אַ מֶענְטְשְׁן, דָאס אִיז, פוּן אַ מַלְאַךְ.
18
אוּן דָאס בּוֹיוֶוערְק פוּן אִיר מוֹיעֶר אִיז גֶעוֶוען יַאשְׁפִּיז, אוּן דִי שְׁטָאט אִיז גֶעוֶוען רֵיין גָאלְד, עֶנְלֶעךְ צוּ לוֹיטֶערְן גְלָאז.
19
דִי פוּנְדַאמֶענְטְן פוּן דֶער שְׁטָאט־מוֹיעֶר זֶענֶען גֶעוֶוען בַּאצִירְט מִיט אַלֶערְלֵיי סָארְט טַייעֶרֶע שְׁטֵיינֶער: דֶער עֶרְשְׁטֶער פוּנְדַאמֶענְט אִיז יַאשְׁפִּיז, דֶער צְוֵוייטֶער סַאפִּיר, דֶער דְרִיטֶער אַגַאט, דֶער פֶערְטֶער סְמַארַאגְד,
20
דֶער פְיפְטֶער אָנִיקְס, דֶער זֶעקְסְטֶער סַארְדִיס, דֶער זִיבֶּעטֶער כְרִיסָאלִיט, דֶער אַכְטֶער בֶּערִיל, דֶער נַיינְטֶער טָאפַּאז, דֶער צֶענְטֶער כְרִיזָאפְּרַאס, דֶער עֶלֶעפְטֶער הִיאַצִינְט, דֶער צְוֶועלֶעפְטֶער אַמֶעטִיסְט.
21
אוּן דִי צְוֶועלְף טוֹיעֶרן זֶענֶען גֶעוֶוען צְוֶועלְף פֶּערְל; יֶעדֶער אֵיינֶער פוּן דִי פַארְשִׁידֶענֶע טוֹיעֶרן אִיז גֶעוֶוען פוּן אֵיין פֶּערְל; אוּן דִי גַאס פוּן דֶער שְׁטָאט אִיז גֶעוֶוען לוֹיטֶער גָאלְד, וִוי דוּרְכְזִיכְטִיק גְלָאז.
22
אוּן אִיךְ הָאבּ אִין אִיר נִישְׁט גֶעזֶען קֵיין הֵיכָל; וָוארִים גָאט, דֶער הַאר, דֶער אַלְמֶעכְטִיקֶער, אוּן דָאס לַאם, זֶענֶען אִיר הֵיכָל.
23
אוּן דִי שְׁטָאט הָאט נִישְׁט נֵייטִיק גֶעהַאט, נִישְׁט דִי זוּן, נִישְׁט דִי לְבָנָה, צוּ שַׁיינֶען אוֹיף אִיר; וָוארִים דִי הֶערְלֶעכְקַייט פוּן גָאט הָאט זִי בַּאלוֹיכְטְן, אוּן אִיר לִיכְט אִיז דָאס לַאם.
24
אוּן דִי אוּמוֹת וֶועלְן גֵיין אִין אִיר לִיכְט, אוּן דִי מְלָכִים פוּן דֶער עֶרְד וֶועלְן אִין אִיר אַרַיינְבְּרֶענְגֶען זֵייעֶר הֶערְלֶעכְקַייט.
25
אוּן אִירֶע טוֹיעֶרן וֶועלְן מֶער קֵיינְמָאל נִישְׁט פַארְשְׁלָאסְן וֶוערְן בַּייטָאג - וָוארִים דָארְט וֶועט מֶער נִישְׁט זַיין קֵיין נַאכְט;
26
אוּן זֵיי וֶועלְן אַרַיינְבְּרֶענְגֶען אִין אִיר דִי הֶערְלֶעכְקַייט אוּן דֶעם פְּרַאכְט פוּן דִי אוּמוֹת;
27
אוּן סֶע וֶועט אִין אִיר מֶער קֵיינְמָאל נִישְׁט אַרַיינְגֵיין קֵיין אוּמְרֵיינֶע זַאךְ, אָדֶער דֶער, וָואס טוּט אוּמְוֶוערְדִיקַייט אוּן לִיגְנְט, נַייעֶרְט נָאר דִי, וָואס זֶענֶען פַארְשְׁרִיבְּן אִין דֶעם סֵפֶר פוּן לֶעבְּן פוּן דֶעם לַאם.