אידיש
1
צוּ דֶעם מַלְאַךְ פוּן דֶער קְהִילָה אִין עֶפֶעזוּס שְׁרַייבּ: דָאס דָאזִיקֶע זָאגְט דֶער, וָואס הַאלְט דִי זִיבְּן שְׁטֶערְן אִין זַיין רֶעכְטֶער הַאנְט, וָואס גֵייט אִין דֶער מִיט פוּן דִי זִיבְּן גָאלְדִינֶע מְנוֹרוֹת:
2
אִיךְ קֶען דַיינֶע מַעֲשִׂים אוּן דַיין מִי אוּן דַיין גֶעדוּלְדִיקַייט, אוּן אַז דוּ קֶענְסְט נִישְׁט פַארְטְרָאגְן קֵיין רְשָׁעִים, אוּן הָאסְט אוֹיסְגֶעפְּרוּאוְוט דִי, וָואס רוּפְן זִיךְ שְׁלִיחִים, אוּן זֶענֶען עֶס נִישְׁט, אוּן הָאסְט זֵיי אוֹיסְגֶעפוּנֶען פַאר לִיגְנֶער;
3
אוּן דוּ הָאסְט גֶעדוּלְד, אוּן הָאסְט פַארְטְרָאגְן פוּן מַיין נָאמֶענְוֶועגְן, אוּן בִּיסְט נִישְׁט גֶעוָוארְן מִיד.
4
אִיךְ הָאבּ אָבֶּער קֶעגְן דִיר דָאס, וָואס דוּ הָאסְט פַארְלָאזְן דַיין עֶרְשְׁטֶע לִיבְּשַׁאפְט.
5
גֶעדֶענְק דֶערִיבֶּער פוּנְוַואנֶען דוּ בִּיסְט גֶעפַאלְן, אוּן טוּ תְּשׁוּבָה, אוּן טוּ דִי עֶרְשְׁטֶע מַעֲשִׂים. אוֹיבּ נִישְׁט, וֶועל אִיךְ קוּמֶען צוּ דִיר, אוּן וֶועל אַוֶועקְרוּקְן דַיין מְנוֹרָה פוּן אִיר אָרְט, סַיידְן דוּ וֶועסְט תְּשׁוּבָה טָאן.
6
דָאס אָבֶּער הָאסְטוּ, וָואס דוּ הָאסְט פַיינְט דִי מַעֲשִׂים פוּן דִי נִיקָאלַאאִיטְן, וֶועמֶען אוֹיךְ אִיךְ הָאבּ פַיינְט.
7
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת: דֶער, וָואס אִיז מְנַצֵחַ, דֶעם וֶועל אִיךְ גֶעבְּן צוּ עֶסְן פוּן דֶעם בּוֹים פוּן לֶעבְּן, וָואס אִיז אִין גָאטְס גַן־עֵדֶן.
8
אוּן צוּ דֶעם מַלְאַךְ פוּן דֶער קְהִילָה אִין סְמִירְנֶע שְׁרַייבּ: דָאס דָאזִיקֶע זָאגְט דֶער עֶרְשְׁטֶער אוּן דֶער לֶעצְטֶער, וָואס אִיז גֶעוֶוען טוֹיט אוּן אִיז וִוידֶער לֶעבֶּעדִיק גֶעוָוארְן:
9
אִיךְ וֵוייס פוּן דַיין טְרוֹיעֶר אוּן דַיין אָרֶעמְקַייט (דוּ בִּיסְט אָבֶּער רַייךְ) אוּן דִי לֶעסְטֶערוּנְג פוּן דִי, וָואס זָאגְן, אַז זֵיי זֶענֶען יִידְן, אוּן זֶענֶען עֶס נִישְׁט, נַייעֶרְט זֶענֶען אַ צוּזַאמֶענְטְרֶעף פוּן שָׂטָן.
10
הָאבּ נִישְׁט קֵיין מוֹרֶא פַאר דֶעם, וָואס דוּ וֶועסְט דַארְפְן לַיידְן. זֶע, דֶער שָׂטָן אִיז גְרֵייט טֵייל פוּן אַייךְ אַרַיינְצוּאוַוארְפְן אִין דֶער תְּפִיסָה, כְּדֵי אִיר זָאלְט גֶעפְּרוּאְוְוט וֶוערְן, אוּן אִיר וֶועט הָאבְּן צָרוֹת צֶען טֶעג. זַיי גֶעטְרַיי בִּיז צוּם טוֹיט, אוּן אִיךְ וֶועל דִיר גֶעבְּן דִי קְרוֹין פוּן לֶעבְּן.
11
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת: דֶער, וָואס אִיז מְנַצֵחַ, וֶועט נִישְׁט לַיידְן פוּן דֶעם צְוֵוייטְן טוֹיט.
12
אוּן צוּ דֶעם מַלְאַךְ פוּן דֶער קְהִילָה אִין פֶּערְגַאמוּם שְׁרַייבּ: דָאס דָאזִיקֶע זָאגְט דֶער, וָואס הָאט דִי שַׁארְפֶע צְוֵויי־שְׁנַיידִיקֶע שְׁוֶוערְד:
13
אִיךְ וֵוייס, וְואוּ דוּ וָואוֹינְסְט, דָארְט, וְואוּ ס׳אִיז דֶעם שָׂטָנְס טְרָאן; אוּן דוּ הַאלְטְסְט פֶעסְט מַיין נָאמֶען, אוּן הָאסְט נִישְׁט פַארְלֵייקֶענְט מַיין אֶמוּנָה, אֲפִילוּ נִישְׁט אִין דִי טֶעג פוּן אַנְטִיפַּאס, מַיין גֶעטְרַייעֶן עֵדוּת, וָואס אִיז גֶעהַרְגֶעט גֶעוָוארְן צְוִוישְׁן אַייךְ, וְואוּ דֶער שָׂטָן וואוֹינְט.
14
אִיךְ הָאבּ אָבֶּער טֵייל זַאכְן קֶעגְן דִיר, מַחְמַת דוּ הָאסְט דָארְטְן עֶטְלֶעכֶע, וָואס הַאלְטְן דִי לֶערְנוּנְג פוּן בִּלְעָם, וָואס הָאט גֶעלֶערְנְט בָּלָק צוּ וַוארְפְן אַ שְׁטְרוֹיכְלוּנְג פַאר דִי בְּנֵי־יִשְׂרָאֵל, צוּ עֶסְן דָאס, וָואס מֶען הָאט מַקְרִיב גֶעוֶוען צוּ אָפְּגֶעטֶער אוּן צוּ בַּאגֵיין זְנוּת.
15
אַזוֹי אוֹיךְ הָאסְטוּ טֵייל, וָואס הַאלְטְן פוּן דֶער לֶערְנוּנְג פוּן דִי נִיקָאלַאאִיטְן.
16
טוּ דֶערִיבֶּער תְּשׁוּבָה. אוֹיבּ נִישְׁט, קוּם אִיךְ צוּ דִיר אִינְגִיכְן, אוּן וֶועל מִלְחָמָה הַאלְטְן קֶעגְן זֵיי מִיט דֶער שְׁוֶוערְד פוּן מַיין מוֹיל.
17
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט זָאגְט צוּ דִי קְהִילוֹת: דֶער, וָואס אִיז מְנַצֵחַ, דֶעם וֶועל אִיךְ גֶעבְּן פוּן דֶעם פַארְבָּארְגֶענֶעם מָן, אוּן אִיךְ וֶועל אִים גֶעבְּן אַ וֵוייסְן שְׁטֵיין, אוּן אוֹיף דֶעם שְׁטֵיין אָנְגֶעשְׁרִיבְּן אַ נַייעֶם נָאמֶען, וָואס קֵיינֶער וֵוייסְט נִישְׁט, אוֹיסֶער דֶער, וָואס בַּאקוּמְט עֶס.
18
אוּן צוּ דֶעם מַלְאַךְ פוּן דֶער קְהִילָה אִין טִיאַטִירַא שְׁרַייבּ: דָאס דָאזִיקֶע זָאגְט דֶער בֶּן־אֱלֹהִים, וָואס הָאט אוֹיגְן וִוי אַ פְלַאם פוּן פַייעֶר, אוּן זַיינֶע פִיס זֶענֶען גֶעגְלִיכְן צוּ פָּאלִירְט מֶעשׁ:
19
אִיךְ קֶען דַיינֶע מַעֲשִׂים אוּן דַיין לִיבְּשַׁאפְט אוּן אֶמוּנָה אוּן דִינוּנְג אוּן גֶעדוּלְדִיקַייט, אוּן אַז דַיינֶע לֶעצְטֶע מַעֲשִׂים זֶענֶען מֶער, וִוי דִי עֶרְשְׁטֶע.
20
אִיךְ הָאבּ אָבֶּער עֶפֶּעס קֶעגְן דִיר, מַחְמַת דוּ לָאזְט דָאס וַוייבּ אִיזֶבֶל, וָואס רוּפְט זִיךְ אָן אַ נְבִיאָה, אוּן זִי לֶערְנְט אוּן פַארְפִירְט מַיינֶע קְנֶעכְט צוּ בַּאגֵיין זְנוּת, אוּן צוּ עֶסְן דָאס, וָואס מֶען הָאט מַקְרִיב גֶעוֶוען צוּ אָפְּגֶעטֶער.
21
אוּן אִיךְ הָאבּ אִיר גֶעגֶעבְּן צַייט, אַז זִי זָאל תְּשׁוּבָה טָאן; אוּן זִי וִויל נִישְׁט תְּשׁוּבָה טָאן אוֹיף אִיר זְנוּת.
22
זֶע, אִיךְ וַוארְף זִי אַרַיין אִין אַ גֶעלֶעגֶער, אוּן דִי, וָואס זֶענֶען מְזַנֶה מִיט אִיר, אִין אַ גְרוֹיסֶער צָרָה, אוֹיבּ זֵיי וֶועלְן נִישְׁט תְּשׁוּבָה טָאן אוֹיף זֵייעֶרֶע מַעֲשִׂים.
23
אוּן אִיךְ וֶועל שְׁלָאגְן אִירֶע קִינְדֶער מִיט דֶעם טוֹיט. אוּן אַלֶע קְהִילוֹת וֶועלְן וִויסְן, אַז אִיךְ בִּין דֶער, וָואס פָארְשְׁט דִי נִירְן אוּן דִי הֶערְצֶער; אוּן אִיךְ וֶועל גֶעבְּן יֶעדְן אֵיינֶעם פוּן אַייךְ לוֹיט אַייעֶרֶע מַעֲשִׂים.
24
אִיךְ אָבֶּער זָאג אַייךְ, דִי אִיבֶּערִיקֶע אִין טִיאַטִירַא, צוּ יֶענֶע, וָואס הָאבְּן נִישְׁט דִי דָאזִיקֶע לֶערְנוּנְג, וָואס קֶענֶען נִישְׁט דִי טִיפְקַייטְן פוּן דֶעם שָׂטָן (וִוי זֵיי זָאגְן), אִיךְ לֵייג אוֹיף אַייךְ נִישְׁט אַרוֹיף קֵיין שׁוּם אַנְדֶערֶע מַשָׂא.
25
דָאךְ דָאס, וָואס אִיר הָאט, הַאלְט פֶעסְט בִּיז אִיךְ קוּם.
26
אוּן דֶער, וָואס אִיז מְנַצֵחַ, אוּן דֶער, וָואס הִיט אָפּ מַיינֶע וֶוערְק בִּיז צוּם סוֹף, אִים וֶועל אִיךְ גֶעבְּן שְׁלִיטָה אִיבֶּער דִי אוּמוֹת.
27
אוּן עֶר וֶועט הֶערְשְׁן אִיבֶּער זֵיי מִיט אַ רוּט פוּן אַייזְן, וִוי דִי כֵּלִים פוּן דֶעם טֶעפֶּער וֶוערְן צֶעבְּרָאכְן אוֹיף פִּיצְלֶעךְ, אַזוֹי וִוי אִיךְ הָאבּ אוֹיךְ בַּאקוּמֶען פוּן מַיין פָאטֶער;
28
אוּן אִיךְ וֶועל אִים גֶעבְּן דֶעם מָארְגְנְשְׁטֶערְן.
29
דֶער, וָואס הָאט אַן אוֹיעֶר, זָאל הֶערְן, וָואס דֶער גֵייסְט טוּט זָאגְן צוּ דִי קְהִילוֹת.