אידיש
1
נָאכְדֶעם הָאבּ אִיךְ גֶעהֶערְט וִוי סֶע וָואלְט גֶעוֶוען אַ הוֹיךְ קוֹל פוּן אַ גְרוֹיסְן הַמוֹן אִין הִימְל, אַזוֹי צוּ זָאגְן: הַלְּלוּיָהּ! דִי יְשׁוּעָה אוּן הֶערְלֶעכְקַייט אוּן מַאכְט גֶעהֶערְן צוּ אוּנְדְזֶער גָאט.
2
וָוארִים אֶמֶת אוּן רֶעכְטְפַארְטִיק זֶענֶען זַיינֶע מִשְׁפָּטִים; וָוארִים עֶר הָאט גֶעמִשְׁפָּט דִי גְרוֹיסֶע זוֹנָה, וָואס הָאט פַארְדָארְבְּן דִי עֶרְד מִיט אִיר זְנוּת, אוּן עֶר הָאט זִיךְ נוֹקֵם גֶעוֶוען אִין אִיר פַאר דֶעם בְּלוּט פוּן זַיינֶע קְנֶעכְט.
3
אוּן אַ צְוֵוייט מָאל הָאבְּן זֵיי גֶעזָאגְט: הַלְּלוּיָהּ! אוּן אִיר רוֹיךְ גֵייט אַרוֹיף אוֹיף אֵייבִּיק אוּן אֵייבִּיק;
4
אוּן דִי פִיר אוּן צְוַואנְצִיק זְקֵנִים אוּן דִי פִיר חַיוֹת זֶענֶען אַנִידֶערְגֶעפַאלְן אוּן הָאבְּן זִיךְ גֶעבּוּקְט צוּ גָאט, וָואס זִיצְט אוֹיף דֶעם שְׁטוּל, אוּן הָאבְּן גֶעזָאגְט: אָמֵן. הַלְּלוּיָהּ!
5
אוּן אַ קוֹל אִיז אַרוֹיסְגֶעקוּמֶען פוּן דֶעם שְׁטוּל, אַזוֹי צוּ זָאגְן: לוֹיבְּט אוּנְדְזֶער גָאט, אַלֶע זַיינֶע קְנֶעכְט, אִיר וָואס הָאט מוֹרֶא פַאר אִים, דִי קְלֵיינֶע אוּן דִי גְרוֹיסֶע.
6
אוּן אִיךְ הָאבּ גֶעהֶערְט וִוי סֶע וָואלְט גֶעוֶוען דָאס קוֹל פוּן אַ גְרוֹיסְן הַמוֹן אוּן וִוי דָאס קוֹל פוּן אַ סַך וַואסֶערְן, אוּן וִוי דָאס קוֹל פוּן שְׁטַארְקֶע דוּנֶערְן, אַזוֹי צוּ זָאגְן: הַלְּלוּיָהּ! וָוארִים דֶער הַאר, אוּנְדְזֶער גָאט, דֶער אַלְמֶעכְטִיקֶער, הֶערְשְׁט.
7
לָאמִיר זִיךְ פְרֵייעֶן אוּן פְרֵיילֶעך זַיין, אוּן אִים אָפְּגֶעבְּן כָּבוֹד, וָוארִים גֶענֶעעֶנְט הָאט דִי חַתוּנָה פוּן דֶעם לַאם, אוּן זַיין כַּלָּה הָאט זִיךְ אָנְגֶעגְרֵייט.
8
אוּן עֶס אִיז אִיר גֶעגֶעבְּן גֶעוָוארְן, אַז זִי זָאל זִיךְ אָנְטָאן אִין פַיינֶער לַייוְונְט, לִיכְטִיק אוּן לוֹיטֶער; וָוארִים דִי פַיינֶע לַייוְונְט זֶענֶען דִי רֶעכְטְפַארְטִיקֶע מַעֲשִׂים פוּן דִי קְדוֹשִׁים.
9
אוּן עֶר הָאט צוּ מִיר גֶעזָאגְט: שְׁרַייבּ: וָואוֹיל אִיז דִי, וָואס זֶענֶען גֶעבֶּעטְן גֶעוָוארְן צוּ דֶעם חַתוּנָה־מָאלְצַייט פוּן דֶעם לַאם. אוּן עֶר הָאט צוּ מִיר גֶעזָאגְט: דָאס זֶענֶען אֶמֶתֶע רֵייד פוּן גָאט.
10
אוּן אִיךְ בִּין אַנִידֶערְגֶעפַאלְן פַאר זַיינֶע פִיס, זִיךְ צוּ בּוּקְן פַאר אִים. אוּן עֶר הָאט צוּ מִיר גֶעזָאגְט: זֶע, דוּ טָארְסְט עֶס נִישְׁט טָאן! אִיךְ בִּין אַ מִיטְקְנֶעכְט מִיט דִיר אוּן דַיינֶע בְּרִידֶער, וָואס הָאבְּן דָאס עֵדוּת פוּן יֵשׁוּעַ. בּוּק דִיךְ פַאר גָאט, וָוארִים דָאס עֵדוּת פוּן יֵשׁוּעַ אִיז דֶער גֵייסְט פוּן נְבוּאָה.
11
אוּן אִיךְ הָאבּ גֶעזֶען דֶעם הִימְל אוֹיפְגֶעעֶפְנְט, עֶרְשְׁט אַ וַוייס פֶערְד. אוּן דֶער, וָואס אִיז אוֹיף אִים גֶעזֶעסְן, אִיז גֶערוּפְן גֶעוָוארְן גֶעטְרַיי אוּן וָוארְהַאפְטִיק, אוּן אִין רֶעכְטְפַארְטִיקַייט טוּט עֶר מִשְׁפָּטְן אוּן מִלְחָמָה הַאלְטְן.
12
אוּן זַיינֶע אוֹיגְן זֶענֶען וִוי אַ פְלַאם פוּן פַייעֶר, אוּן אוֹיף זַיין קָאפּ זֶענֶען אַ סַך קְרוֹינֶען; אוּן עֶר הָאט אוֹיפְגֶעשְׁרִיבְּן אַ נָאמֶען, וָואס קֵיינֶער קֶען נִישְׁט, אוֹיסֶער עֶר אַלֵיין.
13
אוּן עֶר אִיז אָנְגֶעטָאן אִין אַ מַלְבּוּשׁ, בַּאשְׁפְּרִיצְט מִיט בְּלוּט, אוּן זַיין נָאמֶען וֶוערְט אָנְגֶערוּפְן: דָאס וָוארְט פוּן גָאט.
14
אוּן דִי חַיָלוֹת אִין הִימְל זֶענֶען אִים נָאכְגֶעגַאנְגֶען אוֹיף וַוייסֶע פֶערְד, בַּאקְלֵיידְט אִין פַיינֶער לַייוְונְט, וַוייס אוּן לוֹיטֶער.
15
אוּן פוּן זַיין מוֹיל גֵייט אַרוֹיס אַ שַׁארְפֶע שְׁוֶוערְד, כְּדֵי מִיט אִיר צוּ שְׁלָאגְן דִי אוּמוֹת; אוּן עֶר וֶועט הֶערְשְׁן אִיבֶּער זֵיי מִיט אַ רוּט פוּן אַייזְן: אוּן עֶר טְרֶעט דֶעם וַויינְקֶעלְטֶער פוּן דֶעם גְרִימְצָארְן פוּן גָאט, דֶעם אַלְמֶעכְטִיקְן.
16
אוּן אוֹיף זַיין מַלְבּוּשׁ אוּן אוֹיף זַיין דִיךְ אִיז גֶעוֶוען בַּיי אִים אָנְגֶעשְׁרִיבְּן אַ נָאמֶען: מֶלֶךְ פוּן מְלָכִים אוּן הַאר פוּן הַארְן.
17
אוּן אִיךְ הָאבּ גֶעזֶען אַ מַלְאַךְ שְׁטֵיין אִין דֶער זוּן, אוּן עֶר הָאט גֶעשְׁרִיגְן מִיט אַ הוֹיךְ קוֹל אוּן גֶעזָאגְט צוּ אַלֶע פֵייגְל, וָואס פְלִיעֶן אִין מִיטְן הִימְל: קוּמְט, אוּן זַאמְלְט אַייךְ צוּנוֹיף צוּ דֶעם גְרוֹיסְן מָאלְצַייט פוּן גָאט,
18
כְּדֵי אִיר זָאלְט עֶסְן דָאס פְלֵיישׁ פוּן מְלָכִים, אוּן דָאס פְלֵיישׁ פוּן הוֹיפְּטְלַייט, אוּן דָאס פְלֵיישׁ פוּן גִיבּוֹרִים, אוּן דָאס פְלֵיישׁ פוּן פֶערְד אוּן פוּן דִי, וָואס זִיצְן אוֹיף זֵיי, אוּן דָאס פְלֵיישׁ פוּן אַלֶע מֶענְטְשְׁן, סַיי פְרַייעֶ אוּן סַיי קְנֶעכְט, סַיי קְלֵיין אוּן גְרוֹיס.
19
אוּן אִיךְ הָאבּ גֶעזֶען דִי חַיָה אוּן דִי מְלָכִים פוּן דֶער עֶרְד אוּן זֵייעֶרֶע חַיָלוֹת פַארְזַאמְלְט אִינְאֵיינֶעם, מִלְחָמָה צוּ הַאלְטְן קֶעגְן אִים, וָואס אִיז גֶעזֶעסְן אוֹיף דֶעם פֶערְד, אוּן קֶעגְן זַיין חַיִל.
20
אוּן דִי חַיָה אִיז גֶענוּמֶען גֶעוָוארְן, אוּן מִיט אִיר דֶער פַאלְשֶׁער נָבִיא, וָואס הָאט גֶעמַאכְט דִי צֵייכְנְס פַאר אִיר, מִיט וֶועלְכֶער עֶר הָאט אָפְּגֶענַארְט דִי, וָואס הָאבְּן אָנְגֶענוּמֶען דֶעם צֵייכְן פוּן דֶער חַיָה אוּן דִי, וָואס הָאבְּן זִיךְ גֶעבּוּקְט צוּ אִיר אָפְּבִּילְד; זֵיי בֵּיידֶע זֶענֶען אַרַיינְגֶעוָוארְפְן גֶעוָוארְן לֶעבֶּעדִיקֶערְהֵייט אִין דֶעם טַייךְ פוּן פַייעֶר, וָואס בְּרֶענְט מִיט שְׁוֶועבְּל.
21
אוּן דִי אִיבֶּערִיקֶע זֶענֶען גֶעטֵייט גֶעוָוארְן מִיט דֶער שְׁוֶוערְד פוּן דֶעם, וָואס אִיז גֶעזֶעסְן אוֹיף דֶעם פֶערְד, דִי שְׁוֶוערְד וָואס אִיז אַרוֹיסְגֶעקוּמֶען פוּן זַיין מוֹיל; אוּן אַלֶע פֵייגְל זֶענֶען גֶעוָוארְן זַאט מִיט זֵייעֶר פְלֵיישׁ.