אידיש
1
אוּן אִיךְ הָאבּ גֶעהֶערְט אַ הוֹיךְ קוֹל פוּן דֶעם הֵיכָל אַרוֹיס זָאגְן צוּ דִי זִיבְּן מַלְאָכִים: גֵייט אוּן גִיסְט אוֹיס דִי זִיבְּן בֶּעקְנְס פוּן דֶעם גְרִימְצָארְן פוּן גָאט אוֹיף דֶער עֶרְד.
2
אוּן דֶער עֶרְשְׁטֶער אִיז גֶעגַאנְגֶען אוּן הָאט אוֹיסְגֶעגָאסְן זַיין בֶּעקְן אוֹיף דֶער עֶרְד: אוּן עֶס אִיז גֶעוָוארְן אַ פַארְפֶּעסְטִיקְט אוּן בֵּייז גֶעשְׁוִויר אוֹיף דִי מֶענְטְשְׁן, וָואס הָאבְּן גֶעהַאט דֶעם צֵייכְן פוּן דֶער חַיָה אוּן וָואס הָאבְּן זִיךְ גֶעבּוּקְט צוּ אִיר אָפְּבִּילְד.
3
אוּן דֶער צְוֵוייטֶער הָאט אוֹיסְגֶעגָאסְן זַיין בֶּעקְן אִין דֶעם יַם אַרַיין: אוּן עֶס אִיז גֶעוָוארְן וִוי דָאס בְּלוּט פוּן אַ טֵייטְן, אוּן יֶעדֶעס לֶעבֶּעדִיקֶע בַּאשֶׁעפֶענִישׁ, וָואס אִיז גֶעוֶוען אִין יַם, אִיז גֶעשְׁטָארְבְּן.
4
אוּן דֶער דְרִיטֶער הָאט אוֹיסְגֶעגָאסְן זַיין בֶּעקְן אִין דִי טַייכְן אוּן אִין דִי קְוַואלְן וַואסֶער: אוּן עֶס אִיז גֶעוָוארְן בְּלוּט.
5
אוּן אִיךְ הָאבּ גֶעהֶערְט דֶעם מַלְאַךְ פוּן דִי וַואסֶערְן זָאגְן: רֶעכְטְפַארְטִיק בִּיסְטוּ, וָואס בִּיסְט אוּן בִּיסְט גֶעוֶוען, דוּ הֵיילִיקֶער, מַחְמַת דוּ הָאסְט אַזוֹי גֶעמִשְׁפָּט;
6
וָוארִים זֵיי הָאבְּן פַארְגָאסְן דָאס בְּלוּט פוּן קְדוֹשִׁים אוּן נְבִיאִים, אוּן בְּלוּט הָאסְטוּ זֵיי גֶעגֶעבְּן צוּ טְרִינְקֶען; זֵיי זֶענֶען עֶס וֶוערְט.
7
אוּן אִיךְ הָאבּ גֶעהֶערְט דֶעם מִזְבֵּחַ זָאגְן: יָא, הַאר גָאט, דוּ אַלְמֶעכְטִיקֶער, אֶמֶת אוּן רֶעכְטְפַארְטִיק זֶענֶען דַיינֶע מִשְׁפָּטִים!
8
אוּן דֶער פֶערְטֶער הָאט אוֹיסְגֶעגָאסְן זַיין בֶּעקְן אוֹיף דֶער זוּן: אוּן עֶס אִיז אִיר גֶעגֶעבְּן גֶעוָוארְן צוּ בְּרֶענֶען מֶענְטְשְׁן מִיט פַייעֶר.
9
אוּן מֶענְטְשְׁן זֶענֶען גֶעבְּרֶענְט גֶעוָוארְן מִיט גְרוֹיס הִיץ; אוּן זֵיי הָאבְּן גֶעלֶעסְטֶערְט דֶעם נָאמֶען פוּן גָאט, וָואס הָאט דִי מַאכְט אִיבֶּער דִי מַכּוֹת, אוּן זֵיי הָאבְּן נִישְׁט קֵיין תְּשׁוּבָה גֶעטָאן, אִים אָפְּצוּגֶעבְּן כָּבוֹד.
10
אוּן דֶער פְיפְטֶער הָאט אוֹיסְגֶעגָאסְן זַיין בֶּעקְן אוֹיף דֶעם טְרָאן פוּן דֶער חַיָה: אוּן אִיר מְלוּכָה אִיז פַארְפִינְצְטֶערְט גֶעוָוארְן: אוּן זֵיי הָאבְּן צֶעבִּיסְן זֵייעֶרֶע צוּנְגֶען פוּן וֵוייטִיק,
11
אוּן זֵיי הָאבְּן גֶעלֶעסְטֶערְט דֶעם גָאט פוּן הִימְל, צוּלִיבּ זֵייעֶרֶע וֵוייטִיקְן אוּן זֵייעֶרֶע גֶעשְׁוִוירְן, אוּן זֵיי הָאבְּן נִישְׁט קֵיין תְּשׁוּבָה גֶעטָאן אוֹיף זֵייעֶרֶע מַעֲשִׂים.
12
אוּן דֶער זֶעקְסְטֶער הָאט אוֹיסְגֶעגָאסְן זַיין בֶּעקְן אוֹיף דֶעם גְרוֹיסְן טַייךְ פְּרָת: אוּן זַיין וַואסֶער אִיז אוֹיסְגֶעטְרוּקְנְט גֶעוָוארְן, כְּדֵי אָנְצוּגְרֵייטְן דֶעם וֶועג פַאר דִי מְלָכִים פוּן דֶעם .
13
אוּן אִיךְ הָאבּ גֶעזֶען אַרוֹיסְקוּמֶען פוּן דֶעם מוֹיל פוּן דֶעם דְרַאכְנְשְׁלַאנְג, אוּן פוּן דֶעם מוֹיל פוּן דֶער חַיָה, אוּן פוּן דֶעם מוֹיל פוּן דֶעם פַאלְשְׁן נָבִיא, דְרַיי אוּמְרֵיינֶע גֵייסְטֶער, וִוי דָאס וָואלְטְן גֶעוֶוען פְרֶעשׁ.
14
וָוארִים זֵיי זֶענֶען גֵייסְטֶער פוּן רוּחוֹת, וָואס טְוּעֶן צֵייכְנְס, אוּן וָואס גֵייעֶן אַרוֹיס צוּ דִי מְלָכִים פוּן דֶער גַאנְצֶער וֶועלְט, כְּדֵי זֵיי אַיינְצוּזַאמְלֶען צוּ דֶער מִלְחָמָה פוּן דֶעם גְרוֹיסְן טָאג פוּן גָאט, דֶעם אַלְמֶעכְטִיקְן.
15
(זֶע, אִיךְ קוּם וִוי אַ גַנָב; וָואוֹיל אִיז דֶעם, וָואס וַואכְט, אוּן וָואס הִיט זַיינֶע קְלֵיידֶער, כְּדֵי עֶר זָאל נִישְׁט גֵיין נַאקֶעט אוּן מֶען זָאל נִישְׁט זֶען זַיין שַׁאנְד!)
16
אוּן זֵיי הָאבְּן זֵיי פַארְזַאמְלְט אִינְאֵיינֶעם אִין דֶעם אָרְט, וָואס וֶוערְט אָנְגֶערוּפְן אוֹיף הֶעבְּרֶעיִשׁ הַר־מְגִדוֹ.
17
אוּן דֶער זִיבֶּעטֶער הָאט אוֹיסְגֶעגָאסְן זַיין בֶּעקְן אִין דֶער לוּפְט: אוּן עֶס אִיז אַרוֹיסְגֶעקוּמֶען אַ הוֹיךְ קוֹל פוּן הֵיכָל פוּן דֶעם שְׁטוּל, אַזוֹי צוּ זָאגְן; עֶס אִיז גֶעשֶׁען!
18
אוּן סֶע זֶענֶען גֶעוֶוען בְּלִיצְן אוּן קוֹלוֹת אוּן דוּנֶערְן, אוּן עֶס אִיז גֶעוֶוען אַ גְרוֹיסֶע עֶרְדְצִיטֶערְנִישׁ, אַזַא וִוי ס׳אִיז נָאךְ נִישְׁט גֶעוֶוען, זִינְט סֶע זֶענֶען מֶענְטְשְׁן אוֹיף דֶער עֶרְד, אַזַא גְרוֹיסֶע עֶרְדְצִיטֶערְנִישׁ, אַזַא גֶעוַואלְטִיקֶע.
19
אוּן דִי גְרוֹיסֶע שְׁטָאט אִיז צֶעטֵיילְט גֶעוָוארְן אִין דְרַיי טֵיילְן, אוּן דִי שְׁטֶעט פוּן דִי אוּמוֹת זֶענֶען גֶעפַאלְן; אוּן בָּבֶל, דִי גְרוֹיסֶע, אִיז גֶעדֶענְקְט גֶעוָוארְן פַאר גָאט, אִיר צוּ גֶעבְּן דֶעם בֶּעכֶער וַויין פוּן דֶעם גְרִים פוּן זַיין צָארְן.
20
אוּן יֶעדֶע אִינְזְל אִיז אַנְטְרוּנֶען גֶעוָוארְן, אוּן דִי בֶּערְג זֶענֶען נִישְׁט גֶעפוּנֶען גֶעוָוארְן.
21
אוּן אַ גְרוֹיסֶער הָאגְל, יֶעדֶער שְׁטֵיין אַרוּם דֶער וָואג פוּן אַ צֶענְטְנֶער, אִיז גֶעפַאלְן פוּן הִימְל אוֹיף דִי מֶענְטְשְׁן. אוּן מֶענְטְשְׁן הָאבְּן גֶעלֶעסְטֶערְט גָאט, צוּלִיבּ דֶער פְּלָאג פוּן דֶעם הָאגְל; וָוארִים זַיין פְּלָאג אִיז גֶעוֶוען זֵייעֶר גְרוֹיס.