אידיש
1
אוּן אִיךְ הָאבּ גֶעזֶען, עֶרְשְׁט דָאס לַאם שְׁטֵייט אוֹיף דֶעם בַּארְג צִיּוֹן, אוּן מִיט אִים הוּנְדֶערְט פִיר אוּן פֶערְצִיק טוֹיזְנְט, וָואס הָאבְּן זַיין נָאמֶען אוּן דֶעם נָאמֶען פוּן זַיין פָאטֶער אָנְגֶעשְׁרִיבְּן אוֹיף זֵייעֶרֶע שְׁטֶערְנְס.
2
אוּן אִיךְ הָאבּ גֶעהֶערְט אַ קוֹל פוּן הִימְל, וִוי דָאס קוֹל פוּן אַ סַך וַואסֶערְן, אוּן וִוי דָאס קוֹל פוּן אַ שְׁטַארְקְן דוּנֶער; אוּן דָאס קוֹל, וָואס אִיךְ הָאבּ גֶעהֶערְט, אִיז גֶעוֶוען וִוי דָאס קוֹל פוּן הַארְפְנְשְׁפִּילֶער, וָואס שְׁפִּילְן אוֹיף זֵייעֶרֶע הַארְפְן.
3
אוּן זֵיי זִינְגֶען אַ נַייעֶם גֶעזַאנְגפַאר דֶעם שְׁטוּל אוּן פַאר דִי פִיר חַיוֹת אוּן דִי זְקֵנִים. אוּן קֵיינֶער הָאט זִיךְ נִישְׁט גֶעקֶענְט אוֹיסְלֶערְנֶען דֶעם גֶעזַאנְג, אוֹיסֶער דִי הוּנְדֶערְט פִיר אוּן פֶערְצִיק טוֹיזְנְט,
4
דִי דָאזִיקֶע זֶענֶען עֶס, וָואס זֶענֶען נִישְׁט פַארְאוּמְרֵיינִיקְט גֶעוָוארְן מִיט וַוייבֶּער, וָוארִים זֵיי זֶענֶען אַזוֹי וִוי יוּנְגְפְרוֹיעֶן. דִי דָאזִיקֶע זֶענֶען עֶס, וָואס גֵייעֶן נָאךְ דֶעם לַאם, וְואוּהִין נָאר סֶע גֵייט. דִי דָאזִיקֶע זֶענֶען אוֹיסְגֶעקוֹיפְט גֶעוָוארְן פוּן צְוִוישְׁן מֶענְטְשְׁן, וִוי בִּכּוּרִים פַאר גָאט אוּן פַאר דֶעם לַאם.
5
אוּן אִין זֵייעֶר מוֹיל אִיז נִישְׁט גֶעפוּנֶען גֶעוָוארְן קֵיין לִיגְן, וָוארִים זֵיי זֶענֶען אָן אַ פֶעלֶער.
6
אוּן אִיךְ הָאבּ גֶעזֶען אַן אַנְדֶערְן מַלְאַךְ פְלִיעֶן אִין מִיטְן הִימְל, וָואס הָאט גֶעהַאט אַן אֵייבִּיקֶע בְּשׂוּרָה אָנְצוּזָאגְן פַאר דִי, וָואס וָואוֹינֶען אוֹיף דֶער עֶרְד, אוּן פַאר יֶעדֶער אוּמָה, אוּן שֵׁבָט, אוּן לָשׁוֹן, אוּן פָאלְק.
7
אוּן עֶר הָאט גֶעזָאגְט מִיט אַ הוֹיךְ קוֹל: הָאט מוֹרֶא פַאר גָאט, אוּן גִיט אִים אָפּ כָּבוֹד, וָוארִים דִי צַייט פוּן זַיין מִשְׁפָּט הָאט גֶענֶעעֶנְט; אוּן דִינְט דֶעם, וָואס הָאט גֶעמַאכְט הִימְל אוּן עֶרְד, דֶעם יַם אוּן דִי קְוַואלְן וַואסֶער.
8
אוּן אַן אַנְדֶערֶער, אַ צְוֵוייטֶער מַלְאַךְ אִיז נָאכְגֶעקוּמֶען, וָואס הָאט גֶעזָאגְט: גֶעפַאלְן, גֶעפַאלְן אִיז בָּבֶל דִי גְרוֹיסֶע, וָואס הָאט גֶעמַאכְט אַלֶע אוּמוֹת אָנְטְרִינְקֶען מִיט דֶעם וַויין פוּן דֶעם גְרִימְצָארְן פוּן אִיר זְנוּת.
9
אוּן אַן אַנְדֶערֶער מַלְאַךְ, אַ דְרִיטֶער, אִיז נָאכְגֶעקוּמֶען נָאךְ זֵיי, וָואס הָאט גֶעזָאגְט מִיט אַ הוֹיךְ קוֹל: אוֹיבּ עֶמִיצֶער דִינְט דֶער חַיָה אוּן אִיר אָפְּבִּילְד, אוּן בַּאקוּמְט אַ צֵייכְן אוֹיף זַיין שְׁטֶערְן, אָדֶער אוֹיף זַיין הַאנְט,
10
וֶועט עֶר אוֹיךְ טְרִינְקֶען פוּן דֶעם וַויין פוּן גָאטְס גְרִימְצָארְן, וָואס אִיז אוֹיסְגֶעגָאסְן, נִישְׁט גֶעמִישְׁט אִין דֶעם בֶּעכֶער פוּן זַיין צָארְן; אוּן עֶר וֶועט גֶעפַּיינִיקְט וֶוערְן מִיט פַייעֶר אוּן שְׁוֶועבְּל אִין דֶעם אָנְגֶעזִיכְט פוּן דִי הֵיילִיקֶע מַלְאָכִים, אוּן אִין דֶעם אָנְגֶעזִיכְט פוּן דֶעם לַאם.
11
אוּן דֶער רוֹיךְ פוּן זֵייעֶר פַּיינִיקוּנְג גֵייט אַרוֹיף אוֹיף אֵייבִּיק אוּן אֵייבִּיק; אוּן דִי, וָואס דִינֶען דֶער חַיָה אוּן אִיר אָפְּבִּילְד, הָאבְּן נִישְׁט קֵיין רוּ טָאג אוּן נַאכְט, אוּן וֶוער סֶע נֶעמְט אָן דֶעם צֵייכְן פוּן אִיר נָאמֶען.
12
דָא אִיז דִי גֶעדוּלְדִיקַייט פוּן דִי הֵיילִיקֶע, דִי, וָואס הִיטְן דִי גֶעבָּאטְן פוּן גָאט אוּן דִי אֶמוּנָה פוּן יֵשׁוּעַ.
13
אוּן אִיךְ הָאבּ גֶעהֶערְט אַ קוֹל פוּן הִימְל, אַזוֹי צוּ זָאגְן: שְׁרַייבּ: וָואוֹיל אִיז דִי טוֹיטֶע, וָואס שְׁטַארְבְּן אִין דֶעם הַאר פוּן אִיצְטְמָאל אָן. יָא, זָאגְט דֶער גֵייסְט, כְּדֵי זֵיי זָאלְן רוּעֶן פוּן זֵייעֶרֶע מִיאוּנְגֶען; וָוארִים זֵייעֶרֶע מַעֲשִׂים גֵייעֶן נָאךְ מִיט זֵיי.
14
אוּן אִיךְ הָאבּ גֶעזֶען, עֶרְשְׁט אַ וַוייסֶער וָואלְקְן, אוּן אוֹיף דֶעם וָואלְקְן הָאבּ אִיךְ גֶעזֶען זִיצְן אֵיינֶעם, עֶנְלֶעךְ צוּ אַ בֶּן־אָדָם, וָואס הָאט גֶעהַאט אוֹיף זַיין קָאפּ אַ גָאלְדִינֶע קְרוֹין, אוּן אִין זַיין הַאנְט אַ שַׁארְף סֶערְפּ.
15
אוּן אַן אַנְדֶערֶער מַלְאַךְ אִיז אַרוֹיסְגֶעקוּמֶען פוּן דֶעם הֵיכָל, אוּן הָאט גֶעשְׁרִיגְן מִיט אַ הוֹיךְ קוֹל צוּ דֶעם, וָואס אִיז גֶעזֶעסְן אוֹיף דֶעם וָואלְקְן: שִׁיק אַרוֹיס דַיין סֶערְפּ אוּן שְׁנַייד; וָוארִים דִי צַייט פוּן שְׁנִיט הָאט גֶענֶעעֶנְט, וָוארִים דֶער שְׁנִיט פוּן דֶער עֶרְד אִיז צַייטִיק.
16
אוּן דֶער, וָואס אִיז גֶעזֶעסְן אוֹיף דֶעם וָואלְקְן, הָאט אַ וַוארְף גֶעטָאן זַיין סֶערְפּ אוֹיף דֶער עֶרְד, אוּן דִי עֶרְד אִיז גֶעשְׁנִיטְן גֶעוָוארְן.
17
אוּן אַן אַנְדֶערֶער מַלְאַךְ אִיז אַרוֹיסְגֶעקוּמֶען פוּן דֶעם הֵיכָל אִין הִימְל, אוּן אוֹיךְ עֶר הָאט גֶעהַאט אַ שַׁארְף סֶערְפּ.
18
אוּן אַן אַנְדֶערֶער מַלְאַךְ אִיז אַרוֹיסְגֶעקוּמֶען פוּן דֶעם מִזְבֵּחַ, דֶער, וָואס הָאט גֶעהַאט מַאכְט אִיבֶּער פַייעֶר; אוּן עֶר הָאט גֶערוּפְן מִיט אַ הוֹיךְ קוֹל צוּ דֶעם, וָואס הָאט גֶעהַאט דָאס שַׁארְפֶע סֶערְפּ, אַזוֹי צוּ זָאגְן: שִׁיק אַרוֹיס דַיין שַׁארְף סֶערְפּ אוּן זַאמְל צוּנוֹיף דִי הֶענְגְלֶעךְ פוּן דִי וַויינְשְׁטָאקְן אוֹיף דֶער עֶרְד, וָוארִים אִירֶע וַויינְטְרוֹיבְּן זֶענֶען אִינְגַאנְצְן צַייטִיק.
19
אוּן דֶער מַלְאַךְ הָאט אַ וַוארְף גֶעטָאן זַיין סֶערְפּ צוּ דֶער עֶרְד אוּן הָאט אַיינְגֶעזַאמְלְט דֶעם וַויינְשׁטָאק פוּן דֶער עֶרְד, אוּן הָאט אִים אַרַיינְגֶעוָוארְפְן אִין דֶעם גְרוֹיסְן וַויינְקֶעלְטֶער פוּן גָאטְס גְרִימְצָארְן.
20
אוּן דֶער וַויינְקֶעלְטֶער אִיז גֶעטְרֶעטְן גֶעוָוארְן אוֹיסֶער דֶער שְׁטָאט, אוּן עֶס אִיז אַרוֹיסְגֶעקוּמֶען בְּלוּט פוּן דֶעם וַויינְקֶעלְטֶער, בִּיז צוּ דִי צוֹימֶען פוּן דִי פֶערְד, אַזוֹי וַוייט וִוי טוֹיזְנְט זֶעקְס הוּנְדֶערְט אַקֶער.