אידיש
1
יְהוּדָה, אַ קְנֶעכְט פוּן יֵשׁוּעַ הַמָשִׁיחַ, אוּן אַ בְּרוּדֶער פוּן יַעֲקֹב, צוּ דִי וָואס זֶענֶען בַּארוּפְן, בַּאלִיבְּטֶע אִין גָאט דֶעם פָאטֶער, אוּן אָפְּגֶעהִיט פַאר יֵשׁוּעַ הַמָשִׁיחַ.
2
רַחֲמִים צוּ אַייךְ אוּן שָׁלוֹם אוּן לִיבְּשַׁאפְט זָאלְן זַיין גֶעמֶערְט.
3
בַּאלִיבְּטֶע, בְּשַׁעַת אִיךְ הָאבּ מִיר פִירְגֶענוּמֶען מִיט גַאנְצֶער פְלַייסִיקַייט אַייךְ צוּ שְׁרַייבְּן פוּן אוּנְדְזֶער גֶעמַיינְזַאמֶער יְשׁוּעָה, הָאבּ אִיךְ עֶס גֶעהַאלְטְן פַאר נֵייטִיק אַייךְ צוּ שְׁרַייבְּן אוּן אַייךְ דֶערְמַאנֶען, אַז אִיר זָאלְט קֶעמְפְן פַאר דֶער אֶמוּנָה, וָואס אִיז אֵיין מָאל פַאר אַלֶעמָאל אִיבֶּערְגֶעעֶנְטְפֶערְט גֶעוָוארְן צוּ דִי הֵיילִיקֶע.
4
וָוארִים סֶע הָאבְּן זִיךְ צוּ אַייךְ אַרַיינְגֶעשַׁארְט עֶטְלֶעכֶע מֶענְטְשְׁן, וָואס זֶענֶען פוּן לַאנְג פָארוֹיס פַארְשְׁרִיבְּן גֶעוָוארְן צוּ דֶעם דָאזִיקְן פְּסַק: רְשָׁעִים, וָואס פַארְבַּייטְן דֶעם חֶסֶד פוּן אוּנְדְזֶער גָאט אִין פַארְשַׁייטְקַייט, אוּן פַארְלֵייקֶענֶען אוּנְדְזֶער אֵיינְצִיקְן מוֹשֵׁל אוּן הַאר, יֵשׁוּעַ הַמָשִׁיחַ.
5
אִיצְט וִויל אִיךְ אַייךְ אָבֶּער דֶערְמַאנֶען, הַגַם אִיר וֵוייסְט אַלְצְדִינְג שׁוֹין פוּן פְרִיעֶר, אַז גָאט, בְּעֵת עֶר הָאט מַצִיל גֶעוֶוען דָאס פָאלְק פוּן דֶעם לַאנְד מִצְרַיִם, הָאט עֶר דֶערְנָאךְ פַארְטִילִיקְט דִי, וָואס הָאבְּן נִישְׁט גֶעגְלוֹיבְּט.
6
אוּן מַלְאָכִים, וָואס הָאבְּן נִישְׁט גֶעהִיט זֵייעֶר אֵייגֶענֶע מֶמְשָׁלָה, נַייעֶרְט הָאבְּן פַארְלָאזְט זֵייעֶר אֵייגְן וְואוֹינְאָרְט, הָאט עֶר גֶעהַאלְטְן אוּנְטֶער פִינְצְטֶערְנִישׁ אִין אֵייבִּיקֶע קֵייטְן פַאר דֶעם מִשְׁפָּט פוּן דֶעם גְרוֹיסְן טָאג.
7
פּוּנְקְט וִוי סְדוֹם אוּן עַמוֹרָה אוּן דִי שְׁטֶעט אַרוּם זֵיי, וָואס הָאבְּן אוֹיף אַן עֶנְלֶעכְן אוֹפְן וִוי דִי דָאזִיקֶע זִיךְ אִיבֶּערְגֶעגֶעבְּן צוּ זְנוּת אוּן זֶענֶען גֶעגַאנְגֶען נָאךְ פְרֶעמְדְן פְלֵיישׁ, זֶענֶען אַרוֹיסְגֶעשְׁטֶעלְט גֶעוָוארְן וִוי אַ מָשָׁל , בְּעֵת זֵיי לַיידְן שְׁטְרָאף פוּן אֵייבִּיקְן פַייעֶר.
8
אוֹיף אַן עֶנְלֶעכְן אוֹפְן זֶענֶען אוֹיךְ דִי דָאזִיקֶע בַּעֲלֵי־חַלוֹמוֹת מְטַמֵא דָאס פְלֵיישׁ, אוּן זֶענֶען מְבַטֵל הֶערְשַׁאפְטְן אוּן לֶעסְטֶערְן שְׂרָרוֹת.
9
דֶער שַׂר־מַלְאַךְ מִיכָאֵל אָבֶּער, בְּעֵת עֶר הָאט זִיךְ גֶעקְרִיגְט מִיט דֶעם שָׂטָן, אוּן זִיךְ מִתְוַוכֵּחַ גֶעוֶוען פוּנְוֶועגְן דֶעם לַייבּ פוּן מֹשֶׁה, הָאט עֶר זִיךְ נִישְׁט דֶערְוֶועגְט אַרוֹיסְצוּבְּרֶענְגֶען קֶעגְן אִים אַ לֶעסְטֶערְנְדִיקְן מִשְׁפָּט, נַייעֶרְט הָאט גֶעזָאגְט: גָאט זָאל דִיךְ שְׁטְרָאפְן.
10
דִי דָאזִיקֶע אָבֶּער לֶעסְטֶערְן דָאס, וָואס זֵיי קֶענֶען נִישְׁט, אוּן וָואס זֵיי פָארְשְׁטֵייעֶן בְּטֶבַע וִוי נַארִישֶׁע בְּהֵמוֹת, מִיט דֶעם פַארְדַארְבְּן זֵיי זִיךְ.
11
וֵויי אִיז צוּ זֵיי! וָוארִים זֵיי זֶענֶען גֶעגַאנְגֶען אִין דֶעם וֶועג פוּן קַיִן, אוּן זֶענֶען גֶעלָאפְן פַארְשַׁייט צוּלִיבּ גֶעצָאלְטְס אִין דֶעם טָעוּת פוּן בִּלְעָם, אוּן זֶענֶען אוּמְגֶעקוּמֶען אִין דֶער וִוידֶערְשְׁפֶּענִיקַייט פוּן קוֹרַח.
12
דָאס זֶענֶען דִי, וָואס זֶענֶען פַארְבָּארְגֶענֶע פֶעלְזְן אוֹיף אַייעֶרֶע לִיבְּשַׁאפְט־ סֶעוּדוֹת, בְּעֵת זֵיי עֶסְן מִיט אַייךְ, וָואס פִיטֶערְן זִיךְ אַלֵיין אָן מוֹרֶא; וָואלְקְנְס אָן וַואסֶער, אַרוּמְגֶעטְרִיבְּן פוּן וִוינְטְן; הַארְבְּסְט־בֵּיימֶער אָן פֵּירוֹת, צְוֵויי מָאל גֶעשְׁטָארְבֶּענֶע, אוֹיסְגֶערִיסֶענֶע מִיט דִי וָוארְצְלֶען;
13
וִוילְדֶע יַם־כְוַואלְיֶעס, וָואס שׁוֹימֶען אוֹיס זֵייעֶר אֵייגֶענֶע חַרְפָּה; וַואנְדֶערְנְדִיקֶע שְׁטֶערְן, פַאר וֶועמֶען דִי שְׁוַוארְצְקַייט פוּן טוּנְקֶעלְקַייט אִיז אוֹיפְבַּאוַוארְט גֶעוָוארְן אוֹיף אֵייבִּיק.
14
אוּן אוֹיף דִי דָאזִיקֶע הָאט אוֹיךְ חַנוֹךְ, דֶער זִיבֶּעטֶער פוּן אָדָם, נְבִיאוֹת גֶעזָאגְט, אַזוֹי צוּ זָאגְן: זֶע, גָאט אִיז גֶעקוּמֶען מִיט צֶען טוֹיזְנְטֶער פוּן זַיינֶע הֵיילִיקֶע,
15
אוֹיסְצוּפִירְן אַ מִשְׁפָּט אִיבֶּער אַלֶע, אוּן צוּ בַּאשְׁטְרָאפְן אַלֶע רְשָׁעִים פוּנְוֶועגְן אַלֶע זֵייעֶרֶע מַעֲשִׂים פוּן רִשְׁעוּת, וָואס זֵיי הָאבְּן רִשְׁעוּתְדִיק גֶעטָאן, אוּן פוּנְוֶועגְן אַלֶע הַארְטֶע רֵייד, וָואס גָאטְלָאזֶע רְשָׁעִים הָאבְּן גֶערֶעדְט קֶעגְן אִים.
16
דָאס זֶענֶען מוּרְמֶעלֶערְס, וָואס בַּאקְלָאגְן זִיךְ, וָואס גֵייעֶן נָאךְ זֵייעֶרֶע תַּאֲווֹת, אוּן זֵייעֶר מוֹיל רֶעדְט אוֹיפְגֶעבְּלָאזֶענֶע רֵייד, אוּן זֶענֶען נוֹשֵׂא־פָּנִים פוּן גֶעוִוינְס וֶועגְן.
17
אִיר אָבֶּער, בַּאלִיבְּטֶע, גֶעדֶענְקְט דִי רֵייד, וָואס זֶענֶען פְרִיעֶר גֶערֶעדְט גֶעוָוארְן דוּרְךְ דִי שְׁלִיחִים פוּן אוּנְדְזֶער הַאר יֵשׁוּעַ הַמָשִׁיחַ.
18
וָוארִים זֵיי הָאבְּן אַייךְ גֶעזָאגְט: אִין דֶער לֶעצְטֶער צַייט וֶועלְן אוֹיפְשְׁטֵיין אָפְּשְׁפֶּעטֶער, וָואס וֶועלְן גֵיין נָאךְ זֵייעֶרֶע אֵייגֶענֶע רִשְׁעוּתְדִיקֶע תַּאֲווֹת.
19
דָאס זֶענֶען דִי, וָואס מַאכְן אָפְּשֵׁיידוּנְגֶען, גַשְׁמִיוּתְדִיקֶע, וָואס הָאבְּן נִישְׁט דֶעם גֵייסְט.
20
אִיר אָבֶּער, בַּאלִיבְּטֶע, בּוֹיט אַייךְ אוֹיף אִין אַייעֶר הֵיילִיקְסְטֶער אֶמוּנָה, זַייט מִתְפַּלֵל אִין דֶעם רוּחַ־הַקוֹדֶשׁ;
21
הַאלְט אַייךְ אִין דֶער לִיבְּשַׁאפְט פוּן גָאט, אוּן וַוארְט אוֹיף דֶער בַּארֶעמְהַארְצִיקַייט פוּן אוּנְדְזֶער הַאר יֵשׁוּעַ הַמָשִׁיחַ פַאר אֵייבִּיק לֶעבְּן.
22
אוּן אוֹיף טֵייל, וָואס זֶענֶען אִין סָפֵק, הָאט רַחֲמָנוּת;
23
אוּן טֵייל זַייט מַצִיל, רַייסְט זֵיי אַרוֹיס פוּן דֶעם פַייעֶר; אוּן אוֹיף טֵייל הָאט רַחֲמָנוּת מִיר מוֹרֶא, אוּן מִיאוּסְט אַייךְ אוֹיךְ פַאר דֶעם גֶעוַואנְט, וָואס אִיז בַּאפְלֶעקְט פוּן דֶעם פְלֵיישׁ.
24
אוּן צוּ דֶעם, וָואס אִיז בִּיֵכוֹלְת אַייךְ אָפְּצוּהִיטְן פוּן שְׁטְרוֹיכְלוּנְג, אוּן אַייךְ צוּ שְׁטֶעלְן אָן אַ מוּם פַאר דֶעם פָּנִים פוּן זַיין הֶערְלֶעכְקַייט מִיט גְרוֹיס שִׂמְחָה,
25
צוּ דֶעם אֵיינְצִיקְן גָאט, אוּנְדְזֶער גוֹאֵל, דוּרְךְ יֵשׁוּעַ הַמָשִׁיחַ, אוּנְדְזֶער הַאר, זָאל זַיין כָּבוֹד, גְדוּלָה, מֶמְשָׁלָה אוּן גְבוּרָה פַאר אַלֶע צַייטְן, אַצִינְד אוּן אוֹיף אֵייבִּיק. אָמֵן.