אידיש
1
וֶוער סֶע גְלוֹיבְּט, אַז יֵשׁוּעַ אִיז דֶער מָשִׁיחַ, אִיז גֶעבּוֹירְן גֶעוָוארְן פוּן גָאט; אוּן וֶוער סֶע הָאט לִיבּ דֶעם, וָואס הָאט אִים גֶעבּוֹירְן, הָאט אוֹיךְ לִיבּ דֶעם, וָואס אִיז פוּן אִים גֶעבּוֹירְן גֶעוָוארְן.
2
אִין דֶעם דֶערְקֶענֶען מִיר, אַז מִיר הָאבְּן לִיבּ דִי קִינְדֶער פוּן גָאט: בְּעֵת מִיר הָאבְּן לִיבּ גָאט אוּן זֶענֶען מְקַייָם זַיינֶע מִצְווֹת.
3
וָוארִים דָאס אִיז דִי לִיבְּשַׁאפְט צוּ גָאט, וָואס מִיר הַאלְטְן זַיינֶע מִצְווֹת; אוּן זַיינֶע מִצְווֹת זֶענֶען נִישְׁט שְׁוֶוער.
4
וָוארִים אַלְץ, וָואס אִיז גֶעבּוֹירְן גֶעוָוארְן פוּן גָאט, אִיז מְנַצֵחַ דִי וֶועלְט; אוּן דָאס אִיז דֶער נִצָחוֹן, וָואס הָאט מְנַצֵחַ גֶעוֶוען דִי וֶועלְט: אוּנְדְזֶער אֶמוּנָה.
5
אוּן וֶוער אִיז דֶער, וָואס אִיז מְנַצֵחַ דִי וֶועלְט, אוֹיבּ נִישְׁט דֶער, וָואס גְלוֹיבְּט, אַז יֵשׁוּעַ אִיז דֶער בֶּן־אֱלֹהִים?
6
דָאס אִיז דֶער, וָואס אִיז גֶעקוּמֶען דוּרְךְ וַואסֶער אוּן בְּלוּט, יֵשׁוּעַ הַמָשִׁיחַ; נִישְׁט מִיט דֶעם וַואסֶער אַלֵיין, נַייעֶרְט מִיט דֶעם וַואסֶער אוּן מִיט דֶעם בְּלוּט.
7
אוּן סֶע אִיז דֶער גֵייסְט, וָואס זָאגְט עֵדוּת, מַחְמַת דֶער גֵייסְט אִיז דֶער אֶמֶת.
8
וָוארִים עֶס זֶענֶען דְרַיי, וָואס זָאגְן עֵדוּת: דֶער גֵייסְט, אוּן דָאס וַואסֶער, אוּן דָאס בְּלוּט; אוּן דִי דְרַיי זֶענֶען אַיינְשְׁטִימִיק.
9
אוֹיבּ מִיר זֶענֶען מְקַבְּל דָאס עֵדוּת פוּן מֶענְטְשְׁן, אִיז דָאס עֵדוּת פוּן גָאט גְרֶעסֶער; וָוארִים דָאס אִיז דָאס עֵדוּת פוּן גָאט, אַז עֶר הָאט עֵדוּת גֶעזָאגְט פוּנְוֶועגְן זַיין זוּן.
10
דֶער, וָואס גְלוֹיבְּט אִין דֶעם בֶּן־אֱלֹהִים, הָאט דָאס עֵדוּת אִין זִיךְ; דֶער, וָואס גְלוֹיבְּט נִישְׁט גָאט, הָאט אִים גֶעמַאכְט פַאר אַ לִיגְנֶער, מַחְמַת עֶר הָאט נִישְׁט גֶעגְלוֹיבְּט אִין דֶעם עֵדוּת, וָואס גָאט הָאט עֵדוּת גֶעזָאגְט פוּנְוֶועגְן זַיין זוּן.
11
אוּן דָאס אִיז דָאס עֵדוּת, אַז גָאט הָאט אוּנְדְז גֶעגֶעבְּן אֵייבִּיק לֶעבְּן, אוּן דָאס דָאזִיקֶע לֶעבְּן אִיז אִין זַיין זוּן.
12
דֶער, וָואס הָאט דֶעם זוּן, הָאט דָאס לֶעבְּן; דֶער, וָואס הָאט נִישְׁט דֶעם בֶּן־אֱלֹהִים, הָאט נִישְׁט דָאס לֶעבְּן.
13
דִי דָאזִיקֶע זַאכְן הָאבּ אִיךְ אַייךְ גֶעשְׁרִיבְּן, כְּדֵי אִיר זָאלְט וִויסְן, אַז אִיר הָאט אֵייבִּיק לֶעבְּן, אִיר, וָואס גְלוֹיבְּט אִין דֶעם נָאמֶען פוּן דֶעם בֶּן־אֱלֹהִים.
14
אוּן דָאס אִיז דֶער בִּטָחוֹן, וָואס מִיר הָאבְּן צוּ אִים, אַז אוֹיבּ מִיר בֶּעטְן עֶפֶּעס לוֹיט זַיין רָצוֹן, דֶערְהֶערְט עֶר אוּנְדְז.
15
אוּן אוֹיבּ מִיר וֵוייסְן, אַז עֶר דֶערְהֶערְט אוּנְדְז פוּנְוֶועגְן דֶעם, וָואס מִיר בֶּעטְן, וֵוייסְן מִיר, אַז מִיר הָאבְּן דִי בַּקָשׁוֹת, וָואס מִיר הָאבְּן אִים גֶעבֶּעטְן.
16
אוֹיבּ עֶמִיצֶער זֶעט זַיין בְּרוּדֶער זִינְדִיקְן אַ זִינְד, וָואס אִיז נִישְׁט צוּם טוֹיט, זָאל עֶר בֶּעטְן, אוּן גָאט וֶועט אִים גֶעבְּן לֶעבְּן פַאר דִי, וָואס זִינְדִיקְן נִישְׁט צוּם טוֹיט. עֶס אִיז פַארַאן אַ זִינְד, וָואס אִיז צוּם טוֹיט; נִישְׁט פוּנְוֶועגְן דֶעם זָאג אִיךְ, אַז עֶר זָאל בֶּעטְן.
17
יֶעדֶע אוּמְגֶערֶעכְטִיקַייט אִיז זִינְד; אוּן עֶס אִיז פַארַאן אַ זִינְד, וָואס אִיז נִישְׁט צוּם טוֹיט.
18
מִיר וֵוייסְן, אַז וֶוער סֶע אִיז גֶעבּוֹירְן גֶעוָוארְן פוּן גָאט, זִינְדִיקְט נִישְׁט; נַייעֶרְט דֶער, וָואס אִיז גֶעבּוֹירְן גֶעוָוארְן פוּן גָאט, הִיט זִיךְ אָפּ, אוּן דֶער בֵּייזֶער רִירְט אִים נִישְׁט אָן.
19
מִיר וֵוייסְן, אַז מִיר זֶענֶען פוּן גָאט, אוּן דִי גַאנְצֶע וֶועלְט לִיגְט אִין דֶער מַאכְט פוּן דֶעם בֵּייזְן.
20
אוּן מִיר וֵוייסְן, אַז דֶער בֶּן־אֱלֹהִים אִיז גֶעקוּמֶען, אוּן הָאט אוּנְדְז גֶעגֶעבְּן פַארְשְׁטֶענְדִיקַייט, אַז מִיר זָאלְן קֶענֶען אִים, וָואס אִיז וָוארְהַאפְטִיק; אוּן מִיר זֶענֶען אִין אִים, וָואס אִיז וָוארְהַאפְטִיק, אִין זַיין זוּן יֵשׁוּעַ הַמָשִׁיחַ. דֶער דָאזִיקֶער אִיז דֶער וָוארְהַאפְטִיקֶער גָאט, אוּן דָאס אֵייבִּיקֶע לֶעבְּן.
21
קִינְדֶער, הִיט אַייךְ פוּן אָפְּגֶעטֶער