אידיש
1
בַּאלִיבְּטֶע, גְלוֹיבְּט נִישְׁט יֶעדְן גֵייסְט, נַייעֶרְט פְּרוּאוְוט דִי גֵייסְטֶער, צִי זֵיי זֶענֶען פוּן גָאט; מַחְמַת אַ סַך פַאלְשֶׁע נְבִיאִים זֶענֶען אַרוֹיסְגֶעגַאנְגֶען אִין דֶער וֶועלְט אַרַיין.
2
אִין דֶעם דֶערְקֶענְט אִיר דֶעם גֵייסְט פוּן גָאט: יֶעדֶער גֵייסְט, וָואס אִיז מוֹדֶה, אַז יֵשׁוּעַ הַמָשִׁיחַ אִיז גֶעקוּמֶען אִין דֶעם פְלֵיישׁ, אִיז פוּן גָאט;
3
אוּן יֶעדֶער גֵייסְט, וָואס אִיז נִישְׁט מוֹדֶה אִין יֵשׁוּעַ, אִיז נִישְׁט פוּן גָאט. אוּן דָאס אִיז דֶער גֵייסְט פוּן דֶעם קֶעגְנֶער פוּן מָשִׁיחַ, פוּן דֶעם, וָואס אִיר הָאט גֶעהֶערְט, אַז עֶר קוּמְט; אוּן אַצִינְד אִיז עֶר שׁוֹין אִין דֶער וֶועלְט.
4
אִיר זֶענְט פוּן גָאט, קִינְדֶער מַיינֶע, אוּן אִיר הָאט זֵיי בַּייגֶעקוּמֶען; מַחְמַת דֶער, וָואס אִיז אִין אַייךְ, אִיז גְרֶעסֶער וִוי דֶער, וָואס אִיז אִין דֶער וֶועלְט.
5
זֵיי זֶענֶען פוּן דֶער וֶועלְט, דֶערִיבֶּער רֶעדְן זֵיי פוּן דֶער וֶועלְט, אוּן דִי וֶועלְט הֶערְט זֵיי.
6
מִיר זֶענֶען פוּן גָאט; דֶער, וָואס קֶען גָאט, הֶערְט אוּנְדְז; דֶער, וָואס אִיז נִישְׁט פוּן גָאט, הֶערְט אוּנְדְז נִישְׁט. אִין דֶעם דֶערְקֶענֶען מִיר דֶעם גֵייסְט פוּן אֶמֶת אוּן דֶעם גֵייסְט פוּן טָעוּת.
7
בַּאלִיבְּטֶע, לָאמִיר לִיבּ הָאבְּן אֵיינֶער דֶעם אַנְדֶערְן; וָוארִים לִיבְּשַׁאפְט אִיז פוּן גָאט, אוּן יֶעדֶער אֵיינֶער, וָואס הָאט לִיבּ, אִיז גֶעבּוֹירְן גֶעוָוארְן פוּן גָאט, אוּן קֶען גָאט.
8
דֶער, וָואס הָאט נִישְׁט לִיבּ, קֶען נִישְׁט גָאט; וָוארִים גָאט אִיז לִיבֶּע.
9
אִין דֶעם אִיז דִי לִיבְּשַׁאפְט פוּן גָאט אַנְטְפְּלֶעקְט גֶעוָוארְן אִין אוּנְדְז, וָואס גָאט הָאט גֶעשִׁיקְט זַיין בֶּן־יָחִיד אִין דֶער וֶועלְט אַרַיין, כְּדֵי מִיר זָאלְן דוּרְךְ אִים לֶעבְּן.
10
אִין דֶעם אִיז לִיבְּשַׁאפְט: נִישְׁט דָאס, וָואס מִיר הָאבְּן לִיבּ גֶעהַאט גָאט, נַייעֶרְט וָואס עֶר הָאט אוּנְדְז לִיבּ גֶעהַאט, אוּן הָאט גֶעשִׁיקְט זַיין זוּן צוּ זַיין דִי פַארְגֶעבּוּנְג פַאר אוּנְדְזֶערֶע זִינְד.
11
בַּאלִיבְּטֶע, אוֹיבּ גָאט הָאט אוּנְדְז אַזוֹי לִיבּ גֶעהַאט, בַּאדַארְפְן מִיר אוֹיךְ לִיבּ הָאבְּן אֵיינֶער דֶעם אַנְדֶערְן.
12
קֵיינֶער הָאט קֵיינְמָאל נִישְׁט גֶעזֶען גָאט; אוֹיבּ מִיר הָאבְּן לִיבּ אֵיינֶער דֶעם אַנְדֶערְן, פַארְבְּלַייבְּט גָאט אִין אוּנְדְז, אוּן זַיין לִיבְּשַׁאפְט וֶוערְט שְׁלֵימוּתְדִיק אִין אוּנְדְז.
13
אִין דֶעם וֵוייסְן מִיר, אַז מִיר בְּלַייבְּן אִין אִים, אוּן עֶר אִין אוּנְדְז, מַחְמַת עֶר הָאט אוּנְדְז גֶעגֶעבְּן פוּן זַיין גֵייסְט.
14
אוּן מִיר הָאבְּן גֶעזֶען אוּן זָאגְן עֵדוּת, אַז דֶער פָאטֶער הָאט גֶעשִׁיקְט דֶעם זוּן צוּ זַיין דֶער גוֹאֵל פוּן דֶער וֶועלְט.
15
דֶער, וָואס וֶועט מוֹדֶה זַיין, אַז יֵשׁוּעַ אִיז דֶער בֶּן־אֱלֹהִים, גָאט פַארְבְּלַייבְּט אִין אִים, אוּן עֶר אִין גָאט.
16
אוּן מִיר הָאבְּן דֶערְקֶענְט אוּן גֶעגְלוֹיבְּט אִין דֶער לִיבְּשַׁאפְט, וָואס גָאט הָאט פַאר אוּנְדְז. גָאט אִיז לִיבֶּע, אוּן דֶער, וָואס בְּלַייבְּט אִין לִיבְּשַׁאפְט, פַארְבְּלַייבְּט אִין גָאט, אוּן גָאט פַארְבְּלַייבְּט אִין אִים.
17
מִיט דֶעם אִיז דִי לִיבְּשַׁאפְט אִין אוּנְדְז גֶעמַאכְט גֶעוָוארְן גַאנְץ, כְּדֵי מִיר זָאלְן הָאבְּן בִּטָחוֹן אִין דֶעם יוֹם־הַדִין; מַחְמַת אַזוֹי וִוי עֶר אִיז, פּוּנְקְט אַזוֹי זֶענֶען מִיר אִין דֶער דָאזִיקֶער וֶועלְט.
18
עֶס אִיז נִישְׁטָא קֵיין פַּחַד אִין לִיבְּשַׁאפְט, נַייעֶרְט שְׁלֵימוּתְדִיקֶע לִיבְּשַׁאפְט טְרַייבְּט אַרוֹיס דֶעם פַּחַד, מַחְמַת פַּחַד הָאט שְׁטְרָאף; אוּן דֶער, וָואס הָאט מוֹרֶא, אִיז נִישְׁט גֶעוָוארְן שְׁלֵימוּתְדִיק אִין לִיבְּשַׁאפְט.
19
מִיר הָאבְּן לִיבּ, מַחְמַת עֶר הָאט אוּנְדְז קוֹדֶם לִיבּ גֶעהַאט.
20
אוֹיבּ עֶמִיצֶער זָאגְט: אִיךְ הָאבּ לִיבּ גָאט, אוּן הָאט פַיינְט זַיין בְּרוּדֶער, אִיז עֶר אַ לִיגְנֶער; וָוארִים דֶער, וָואס הָאט נִישְׁט לִיבּ זַיין בְּרוּדֶער, וֶועמֶען עֶר הָאט גֶעזֶען, קֶען נִישְׁט לִיבּ הָאבְּן גָאט, וֶועמֶען עֶר הָאט נִישְׁט גֶעזֶען.
21
אוּן דִי דָאזִיקֶע גֶעבָּאט הָאבְּן מִיר פוּן אִים, אַז דֶער, וָואס הָאט לִיבּ גָאט, זָאל אוֹיךְ לִיבּ הָאבְּן זַיין בְּרוּדֶער.