אידיש
1
בְּכֵן, דִי זְקֵנִים צְוִוישְׁן אַייךְ בִּין אִיךְ מַזְהִיר, אִיךְ, וָואס בִּין אוֹיךְ אַ זָקְן אוּן אַן עֵדוּת פוּן דִי לַיידְן פוּן מָשִׁיחַ, וִוי אוֹיךְ אַ טֵיילְנֶעמֶער אִין דֶער הֶערְלֶעכְקַייט, וָואס וֶועט אַנְטְפְּלֶעקְט וֶוערְן:
2
פִיטֶערְט גָאטְס סְטַאדֶע, וָואס אִיז אַייךְ אָנְפַארְטְרוֹיט, אוּן הָאט הַשְׁגָחָה אִיבֶּער אִיר, נִישְׁט דוּרְךְ צְוַואנְג, נַייעֶרְט וִוילִיק, לוֹיט דֶעם רָצוֹן פוּן גָאט, אוֹיךְ נִישְׁט אִין שֶׁענְדְלֶעכְן פַארְדִינְסְט, נַייעֶרְט מִיט חֵשֶׁק;
3
אוֹיךְ נִישְׁט וִוי בַּאהֶערְשֶׁער פוּן גָאטְס נַחֲלָה, נַייעֶרְט מַאכְט אַייךְ פַאר בַּיישְׁפִּילְן פוּן דֶער סְטַאדֶע.
4
אוּן בְּעֵת דֶער הוֹיפְּט־פַּאסְטוּך וֶועט אַנְטְפְּלֶעקְט וֶוערְן, וֶועט אִיר מְקַבְּל זַיין דִי קְרוֹין פוּן הֶערְלֶעכְקַייט, וָואס פַארְוֶועלְקְט נִישְׁט.
5
אַזוֹי אוֹיךְ, אִיר יִינְגֶערֶע, זַייט אוּנְטֶערְטֶענִיק דִי זְקֵנִים. גוּרְט אַייךְ אַלֶע אָן מִיט הַכְנָעָה צוּ דִינֶען אֵיינֶער דֶעם אַנְדֶערְן; וָוארִים גָאט אִיז קֶעגְן דִי שְׁטָאלְצֶע, גִיט אָבֶּער חֵן צוּ דִי עַנָוִוים.
6
בְּכֵן, דֶערְנִידֶערִיקְט אַייךְ אוּנְטֶער דֶער מֶעכְטִיקֶער הַאנְט פוּן גָאט, כְּדֵי עֶר זָאל אַייךְ דֶערְהֵייבְּן מִיט דֶער צַייט.
7
וַוארְפְט אַרוֹיף אוֹיף אִים אַלֶע אַייעֶרֶע דַאגוֹת, מַחְמַת עֶר זָארְגְט פַאר אַייךְ.
8
זַייט נִיכְטֶער, זַייט וַואך, אַייעֶר בַּאדְרֶענְגֶער, דֶער שָׂטָן, גֵייט אַרוּם וִוי אַ בּרוּמֶענְדִיקֶער לֵייבּ, אוּן זוּכְט, וֶועמֶען עֶר זָאל קֶענֶען פַארְצוּקְן.
9
אִים זָאלְט אִיר זִיךְ שְׁטַארְק אַנְטְקֶעגְנְשְׁטֶעלְן אִין אַייעֶר אֶמוּנָה, וַוייל אִיר וֵוייסְט, אַז דִי זֶעלְבֶּע יְסוּרִים וֶוערְן דֶערְפִילְט אִין אַייעֶרֶע בְּרִידֶער אִין דֶער וֶועלְט.
10
אוּן דֶער גָאט פוּן יֶעדְן חֶסֶד, וָואס הָאט אַייךְ בַּארוּפְן צוּ זַיין אַ אֵייבִּיקֶער הֶערְלֶעכְקַייט אִין מָשִׁיחַ, וֶועט אַייךְ אַלֵיין, נָאכְדֶעם וִוי אִיר הָאט גֶעלִיטְן אַבִּיסְל, מַאכְן שְׁלֵימוּתְדִיק, אַייךְ בַּאפֶעסְטִיקְן אוּן שְׁטַארְקְן.
11
אִים גֶעהֶערְט דִי הֶערְשַׁאפְט אוֹיף אֵייבִּיק אוּן אֵייבִּיק. אָמֵן.
12
דוּרְךְ סִילְוַואנוּס, אוּנְדְזֶער גֶעטְרַייעֶן בְּרוּדֶער, וִוי אִיךְ רֶעכְן אִים, הָאבּ אִיךְ אַייךְ בְּקִיצוּר גֶעשְׁרִיבְּן, אוּן מַזְהִיר גֶעוֶוען אוּן עֵדוּת גֶעזָאגְט, אַז דָאס דָאזִיקֶע אִיז דֶער אֶמֶתֶער חֶסֶד פוּן גָאט; שְׁטֵייט אִין אִים פֶעסְט.
13
דִי קְהִילָה אִין בָּבֶל, וָואס אִיז אוֹיסְדֶערְוֵויילְט אִינְאֵיינֶעם מִיט אַייךְ, גְרִיסְט אַייךְ, אוּן אַזוֹי טוּט מַארְקוּס, מַיין זוּן.
14
גְרִיסְט אֵיינֶער דֶעם אַנְדֶערְן מִיט אַ קוּשׁ פוּן לִיבְּשַׁאפְט. שָׁלוֹם צוּ אַייךְ אַלֶע, וָואס זֶענְט אִין מָשִׁיחַ.