אידיש
1
פֶּעטְרוֹס, אַ שְׁלִיחַ פוּן יֵשׁוּעַ הַמָשִׁיחַ, צוּ דִי אוֹיסְדֶערְוֵויילְטֶע, וָואס זֶענֶען תּוֹשָׁבִים פוּן דֶער צֶעשְׁפְּרַייטוּנְג אִין פָּאנְטוּס, גַאלַאטְיֶע, קַאפַּאדָאקְיֶע, אַסְיֶע אוּן בִּיטִינְיֶע,
2
לוֹיט נָאךְ דֶער הַשְׁגָחָה פוּן גָאט, דֶעם פָאטֶער, אִין הֵיילִיקוּנְג פוּן דֶעם גֵייסְט, צוּ גֶעהָארְכְזַאמְקַייט אוּן שְׁפְּרֶענְגוּנְג פוּן דֶעם בְּלוּט פוּן יֵשׁוּעַ הַמָשִׁיחַ: חֶסֶד צוּ אַייךְ אוּן שָׁלוֹם זָאלְן זַיין גֶעמֶערְט.
3
גֶעלוֹיבְּט אִיז גָאט, דֶער פָאטֶער פוּן אוּנְדְזֶער הַאר יֵשׁוּעַ הַמָשִׁיחַ, וָואס הָאט אוּנְדְז לוֹיט זַיין גְרוֹיס רַחֲמִים וִוידֶער אַמָאל גֶעבּוֹירְן צוּ אַ לֶעבֶּעדִיקֶער הָאפֶענוּנְג, דוּרְךְ דֶעם תְּחִיַת־הַמֵתִים פוּן יֵשׁוּעַ הַמָשִׁיחַ,
4
פַאר אַ יְרוּשָׁה וָואס אִיז אוּמְפַארְדַארְבְּלִיך, אוּמְבַּאפְלֶעקְט, וָואס וֶוערְט נִישְׁט פַארְוֶועלְקְט, אוּן וָואס אִיז בַּאהַאלְטְן פַאר אַייךְ אִין הִימְל,
5
אִיר, וָואס וֶוערְט פוּן דֶער מַאכְט פוּן גָאט בַּאשִׁיצְט דוּרְךְ אֶמוּנָה פַאר אַ יְשׁוּעָה, וָואס אִיז אָנְגֶעגְרֵייט אַנְטְפְּלֶעקְט צוּ וֶוערְן אִין דֶער לֶעצְטֶער צַייט.
6
טוּט אַייךְ דֶערְמִיט שְׁטַארְק פְרֵייעֶן, הַגַם אִיר זֶענְט אוֹיף אַ קוּרְצֶער צַייט, אוֹיבּ נֵייטִיק, טְרוֹיעֶרִיק גֶעוָוארְן דוּרְךְ פַארְשִׁידֶענֶע נִסָיוֹנוֹת,
7
כְּדֵי דֶער בַּאוַוייז פוּן אַייעֶר אֶמוּנָה, וָואס אִיז אַ סַך טַייעֶרֶער פוּן גָאלְד, וָואס פַארְגֵייט, הַגַם סֶע וֶוערְט אוֹיסְגֶעפְּרוּאוְוט דוּרְךְ פַייעֶר, זָאל אַייךְ זַיין צוּם לוֹיבּ אוּן הֶערְלִיכְקַייט אוּן כָּבוֹד בַּיי דֶער אַנְטְפְּלֶעקוּנְג פוּן יֵשׁוּעַ הַמָשִׁיחַ.
8
הַגַם אִיר הָאט אִים נִישְׁט גֶעזֶען, הָאט אִיר אִים לִיבּ, אוּן הַגַם אִיר טוּט אִים אַצִינְד נִישְׁט זֶען, דָאךְ טוּט אִיר אִין אִים גְלוֹיבְּן, אוּן טוּט אַייךְ שְׁטַארְק פְרֵייעֶן מִיט אַן אוּמְדֶערְצֵיילְבַּארֶער אוּן הֶערְלֶעכֶער שִׂמְחָה;
9
אוּן אִיר דֶערְגְרֵייכְט דֶעם תַּכְלִית פוּן אַייעֶר אֶמוּנָה, דִי יְשׁוּעָה פוּן אַייעֶרֶע נְשָׁמוֹת.
10
פוּנְוֶועגְן דֶער דָאזִיקֶער יְשׁוּעָה הָאבְּן חוֹקֵר־וְדוֹרֶשׁ גֶעוֶוען דִי נְבִיאִים, וָואס הָאבְּן נְבִיאוֹת גֶעזָאגְט פוּנְוֶועגְן דֶעם חֶסֶד, וָואס דַארְף קוּמֶען אוֹיף אַייךְ.
11
זֵיי הָאבְּן גֶעפָארְשְׁט וָואסֶערֶע אוֹפְן, אָדֶער וָואסֶער צַייט דֶער גֵייסְט פוּן מָשִׁיחַ, וָואס אִיז גֶעוֶוען אִין זֵיי, הָאט אָנָגֶעדַייט, בְּעֵת עֶר הָאט פָארוֹיס עֵדוּת גֶעזָאגְט אוֹיף דִי עִינוּיִים פוּן מָשִׁיחַ, אוּן דִי גְדוּלוֹת, וָואס וֶועלְן קוּמֶען נָאךְ זֵיי.
12
פַאר זֵיי אִיז דָאס אַנְטְפְּלֶעקְט גֶעוָוארְן, אַז נִישְׁט פַאר זִיךְ אַלֵיין, נַייעֶרְט פַאר אַייךְ הָאבְּן זֵיי גֶעדִינְט מִיט דִי דָאזִיקֶע זַאכְן, וָואס זֶענֶען אַצִינְד אָנְגֶעזָאגְט גֶעוָוארְן צוּ אַייךְ דוּרְךְ דִי, וָואס הָאבְּן מְבַשֵׂר גֶעוֶוען פַאר אַייךְ דִי בְּשׂוּרָה טוֹבָה דוּרְךְ דֶעם רוּחַ־הַקוֹדֶשׁ, וָואס אִיז גֶעשִׁיקְט גֶעוָוארְן פוּן הִימְל; וָואס אִין זֵיי בַּאגֶערְן אַרַיינְצוּקוּקְן מַלְאָכִים.
13
בְּכֵן, גוּרְט אָן דִי לֶענְדְן פוּן אַייעֶר פַארְשְׁטַאנְד, זַייט נִיכְטֶער, אוּן לֵייגְט אַייעֶר גַאנְצֶע הָאפֶענוּנְג אוֹיף דֶעם חֶסֶד, וָואס דַארְף פַאר אַייךְ גֶעבְּרַאכְט וֶוערְן בַּיי דֶער אַנְטְפְּלֶעקוּנְג פוּן יֵשׁוּעַ הַמָשִׁיחַ.
14
וִוי גֶעהָארְכְזַאמֶע קִינְדֶער, זָאלְט אִיר אַייךְ נִישְׁט צוּפַּאסְן צוּ אַייעֶרֶע פְרִיעֶרְדִיקֶע תַּאֲווֹת אִין דִי צַייטְן פוּן אַייעֶר אוּמְוִויסְנְקַייט;
15
נַייעֶרְט גְלַייךְ וִוי דֶער, וָואס הָאט אַייךְ בַּארוּפְן, אִיז הֵיילִיק, זָאלְט אִיר אַלֵיין אוֹיךְ זַיין הֵיילִיק אִין יֶעדְן שְׁטֵייגֶער פוּן לֶעבְּן,
16
מַחְמַת סֶע שְׁטֵייט גֶעשְׁרִיבְּן: אִיר זָאלְט זַיין הֵיילִיק, וָוארִים אִיךְ בִּין הֵיילִיק.
17
אוּן אוֹיבּ אִיר רוּפְט צוּ אִים וִוי צוּ אַ פָאטֶער, וָואס טוּט מִשְׁפָּטְן אָן נְשִׂיאַת־פָּנִים, לוֹיט יֶעדְן מֶענְטְשְׁנְס מַעֲשִׂים, זָאלְט אִיר פַארְבְּרֶענְגֶען מִיט מוֹרֶא דִי צַייט פוּן אַייעֶר פַארְוַויילְן.
18
וָוארִים אִיר וֵוייסְט, אַז נִישְׁט מִיט פַארְדַארְבְּלֶעכֶע זַאכְן, מִיט זִילְבֶּער אָדֶער גָאלְד, זֶענְט אִיר אוֹיסְגֶעלֵייזְט גֶעוָוארְן פוּן אַייעֶר נִישְׁטִיקְן שְׁטֵייגֶער פוּן לֶעבְּן, וָואס אִיז אִיבֶּערְגֶעגַאנְגֶען פוּן אַייעֶרֶע אָבוֹת,
19
נַייעֶרְט מִיט דֶעם טַייעֶרְן בְּלוּט פוּן מָשִׁיחַ, וִוי פוּן אַ לַאם, אָן אַ מוּם אוּן אָן אַ פְלֶעק.
20
עֶר, וָואס אִיז גֶעוֶוען פָארוֹיסְבַּאשְׁטִימְט אֵיידֶער דֶער גְרוּנְטְפֶעסְטִיקוּנְג פוּן דֶער וֶועלְט, נָאר אִיז אַנְטְפְּלֶעקְט גֶעוָוארְן אוֹיף דֶעם סוֹף פוּן דִי צַייטְן פוּן אַייעֶרְטְוֶועגְן,
21
וָואס זֶענְט דוּרְךְ אִים מַאמִינִים אִין גָאט, וָואס הָאט אִים מְחַיֵה־מֵתִים גֶעוֶוען, אוּן הָאט אִים גֶעגֶעבְּן כָּבוֹד, אַזוֹי, אַז אַייעֶר אֶמוּנָה אוּן הָאפֶענוּנְג זָאל זַיין אִין גָאט.
22
הֶיוֹת אִיר הָאט גֶעלַייטֶערְט אַייעֶרֶע נְשָׁמוֹת דוּרְךְ אַייעֶר גֶעהָארְכְזַאמְקַייט פוּן דֶעם אֶמֶת אִין נִישְׁט קֵיין פַארְשְׁטֶעלְטֶער לִיבְּשַׁאפְט פוּן דִי בְּרִידֶער, זָאלְט אִיר עֶרְנְסְט לִיבּ הָאבְּן אֵיינֶער דֶעם אַנְדֶערְן פוּן הַארְצְן.
23
וָוארִים אִיר זֶענְט וִוידֶער אַמָאל גֶעבּוֹירְן גֶעוָוארְן, נִישְׁט פוּן קֵיין פַארְדַארְבְּלֶעכֶער זְרִיעֶה, נַייעֶרְט פוּן אוּמְפַארְדַארְבְּלֶעכֶער, דוּרְךְ דֶעם וָוארְט פוּן גָאט, וָואס לֶעבְּט אוּן בְּלַייבְּט.
24
וָוארִים יֶעדֶעס פְלֵיישׁ אִיז וִוי גְרָאז, אוּן יֶעדֶע פְּרַאכְט דֶערְפוּן אִיז וִוי דֶער בְּלוּם פוּן גְרָאז. דָאס גְרָאז פַארְוֶועלְקְט, אוּן דֶער בְּלוּם פַאלְט אַרָאפּ;
25
אָבֶּער דָאס וָוארְט פוּן גָאט בַּאשְׁטֵייט אוֹיף אֵייבִּיק. אוּן דָאס דָאזִיקֶע אִיז דָאס וָוארְט פוּן דֶער גוּטֶער בְּשׂוּרָה, וָואס אִיז אַייךְ אָנְגֶעזָאגְט גֶעוָוארְן.