אידיש
1
אוּן דֶער עִיקָר פוּן דֶעם, וָואס מִיר זָאגְן, אִיז אָט־דָאס: מִיר הָאבְּן אַזַא כֹּהֵן־גָדוֹל, וָואס הָאט זִיךְ אַנִידֶערְגֶעזֶעצְט בַּיי דֶער רֶעכְטֶער הַאנְט פוּן דֶעם כִּסֵא־הַכָּבוֹד אִין דִי הִימְלֶען,
2
אַ דִינֶער פוּן דֶעם מִקְדָשׁ, אוּן פוּן דֶעם אֶמֶתְן מִשְׁכָּן, וָואס דֶער הַאר הָאט אוֹיפְגֶעשְׁטֶעלְט, אוּן נִישְׁט קֵיין מֶענְטְשׁ.
3
וָוארִים יֶעדֶער כֹּהֵן־גָדוֹל וֶוערְט בַּאשְׁטִימְט מַקְרִיב צוּ זַיין מְנָחוֹת אוּן זְבָחִים; דֶערִיבֶּער אִיז עֶס נֵייטִיק, אַז אוֹיךְ דֶער דָאזִיקֶער כֹּהֵן־גָדוֹל זָאל הָאבְּן עֶפֶּעס מַקְרִיב צוּ זַיין.
4
דֶערִיבֶּער, אוֹיבּ עֶר וָואלְט גֶעוֶוען אוֹיף דֶער עֶרְד, וָואלְט עֶר בִּכְלַל נִישְׁט גֶעוֶוען קֵיין כֹּהֵן, מַחְמַת עֶס זֶענֶען פַארְאַנֶען דִי וָואס זֶענֶען מַקְרִיב קָרְבָּנוֹת עַל־פִּי תּוֹרָה.
5
זֵיי דִינֶען דָאס, וָואס אִיז אַן אָפְּבִּילְד אוּן אַ שָׁאטְן פוּן דִי הִימְלִישֶׁע זַאכְן, אַזוֹי וִוי מֹשֶׁה אִיז בַּאפוֹילְן גֶעוָוארְן פוּן גָאט, בְּעֵת עֶר הָאט גֶעהַאלְטְן אִין מַאכְן דָאס מִשְׁכָּן. וָוארִים זֶע, זָאגְט עֶר, אַז דוּ זָאלְסְט אַלְצְדִינְג מַאכְן לוֹיט דֶער גֶעשְׁטַאלְט, וָואס אִיז דִיר גֶעוִויזְן גֶעוָוארְן אוֹיף דֶעם בַּארְג.
6
אַצִינְד אָבֶּער הָאט עֶר דֶערְגְרֵייכְט אַ מֶער דֶערְהוֹיבֶּענֶערֶע עַבוֹדָה מִיט דֶעם, וָואס עֶר אִיז אוֹיךְ דֶער מֵלִיץ פוּן אַ בֶּעסֶערְן בּוּנְד, וָואס אִיז אוֹיפְגֶעשְׁטֶעלְט גֶעוָוארְן אוֹיף בֶּעסֶערֶע הַבְטָחוֹת.
7
וָוארִים אוֹיבּ יֶענֶער עֶרְשְׁטֶער בּוּנְד וָואלְט גֶעוֶוען אָן אַ חִסָרוֹן, דֶעמָאלְט וָואלְט מֶען נִישְׁט גֶעזוּכְט קֵיין סִיבָּה פַאר אַ צְוֵוייטְן.
8
וָוארִים בְּעֵת עֶר מוּסְרְט זֵיי, זָאגְט עֶר: זֶע, דִי טֶעג קוּמֶען, זָאגְט גָאט, אוּן אִיךְ וֶועל שְׁלִיסְן אַ נַייעֶם בּוּנְד מִיט דֶעם הוֹיז פוּן יִשְׂרָאֵל אוּן מִיט דֶעם הוֹיז פוּן יְהוּדָה,
9
נִישְׁט לוֹיט דֶעם בּוּנְד, וָואס אִיךְ הָאבּ גֶעמַאכְט מִיט זֵייעֶרֶע אָבוֹת אִין דֶעם טָאג, וֶוען אִיךְ הָאבּ זֵיי אָנְגֶענוּמֶען בַּיי דֶער הַאנְט, זֵיי אַרוֹיסְצוּפִירְן פוּן דֶעם לַאנְד מִצְרַיִם; וָוארִים זֵיי זֶענֶען נִישְׁט גֶעבְּלִיבְּן אִין מַיין בּוּנְד, אוּן אִיךְ הָאבּ זֵיי נִישְׁט גֶעאַכְטֶעט, זָאגְט גָאט.
10
וָוארִים דָאס אִיז דֶער בּוּנְד, וָואס אִיךְ וֶועל מַאכְן מִיט דֶעם הוֹיז פוּן יִשְׂרָאֵל נָאךְ יֶענֶע טֶעג, זָאגְט גָאט: אִיךְ וֶועל אַרַיינְגֶעבְּן מַיין תּוֹרָה אִין זֵייעֶר פַארְשְׁטַאנְד, אוּן אוֹיף זֵייעֶר הַארְץ וֶועל אִיךְ זִי אוֹיפְשְׁרַייבְּן; אוּן אִיךְ וֶועל זַיין זֵייעֶר גָאט, אוּן זֵיי וֶועלְן זַיין מַיין פָאלְק.
11
אוּן זֵיי וֶועלְן נִישְׁט לֶערְנֶען אִיטְלֶעכֶער זַיין חַבָר, אוּן אִיטְלֶעכֶער זַיין בְּרוּדֶער, אַזוֹי צוּ זָאגְן: קֶענְט גָאט! וָוארִים אַלֶע וֶועלְן מִיךְ קֶענֶען, פוּן דֶעם קְלֶענְסְטְן בִּיז דֶעם גְרֶעסְטְן פוּן זֵיי.
12
וָוארִים אִיךְ וֶועל פַארְגֶעבְּן זֵייעֶר זִינְד. אוּן זֵייעֶר חֵטְא וֶועל אִיךְ מֶער נִישְׁט גֶעדֶענְקֶען.
13
מִיט דֶעם, וָואס עֶר זָאגְט: אַ נַייעֶם בּוּנְד, הָאט עֶר דֶעם עֶרְשְׁטְן אַלְט גֶעמַאכְט; אוּן דָאס, וָואס וֶוערְט אַלְט אוּן פַארְעֶלְטֶערְט, אִיז נָאעֶנְט צוּם פַארְשְׁוִוינְדְן.