אידיש
1
דֶערִיבֶּער מוּזְן מִיר זִין אַ סַך שְׁטַארְקֶער הַאלְטְן אִין דֶעם, וָואס מִיר הָאבְּן גֶעהֶערְט, כְּדֵי מִיר זָאלְן נִישְׁט אָפְּפַאלְן דֶערְפוּן.
2
וָוארִים אוֹיבּ דָאס וָוארְט, וָואס אִיז גֶערֶעדְט גֶעוָוארְן דוּרְךְ מַלְאָכִים, אִיז מְקוּיָם גֶעוָוארְן, אוּן יֶעדֶע עַבֵירָה אוּן וִוידֶערְשְׁפֶּענִיקַייט הָאט בַּאקוּמֶען אַ גֶערֶעכְטֶע פַארְגֶעלְטוּנְג,
3
וִויאַזוֹי וֶועלְן מִיר אַנטְרִינֶען, אוֹיבּ מִיר פַארְוָוארְלָאזְן אַזַא גְרוֹיסֶע יְשׁוּעָה? זִי, וָואס אִיז לְכַּתְּחִילָה גֶערֶעדְט גֶעוָוארְן דוּרְךְ דֶעם הַאר, אוּן בַּאשְׁטֶעטִיקְט גֶעוָוארְן פַאר אוּנְדְז דוּרְךְ דִי, וָואס הָאבְּן אִים גֶעהֶערְט,
4
בְּעֵת גָאט הָאט אוֹיךְ עֵדוּת גֶעזָאגְט דוּרְךְ צֵייכְנְס אוּן וואוּנְדֶער, אוּן דוּרְךְ פַארְשִׁידֶענֶע גְבוּרוֹת, אוּן דוּרְךְ מַתָּנוֹת פוּן דֶעם רוּחַ־הַקוֹדֶשׁ, לוֹיט זַיין אֵייגֶענֶעם רָצוֹן.
5
וָוארִים נִישְׁט צוּ מַלְאָכִים הָאט עֶר אוּנְטֶערְטֶענִיק גֶעמַאכְט דִי קוּמֶענְדִיקֶע וֶועלְט, וָואס פוּן אִיר רֶעדְן מִיר.
6
אֵיינֶער אָבֶּער הָאט עֶרְגֶעץ עֵדוּת גֶעזָאגְט, אַזוֹי צוּ זָאגְן: וָואס אִיז אַ מֶענְטְשׁ, וָואס דוּ טוּסְט אִים גֶעדֶענְקֶען? אוּן דֶער בֶּן־אָדָם, וָואס דוּ טוּסְט זִיךְ אוּמְקוּקְן אוֹיף אִים?
7
הָאסְט אִים גֶעמַאכְט אַבִּיסְל נִידֶערִיקֶער פוּן דִי מַלְאָכִים, אוּן אִים גֶעקְרוֹינְט מִיט הֶערְלֶעכְקַייט אוּן כָּבוֹד, אוּן הָאסְט אִים גֶעזֶעצְט אִיבֶּער דִי וֶוערְק פוּן דַיינֶע הֶענְט;
8
אַלְצְדִינְג הָאסְטוּ אוּנְטֶערְטֶענִיק גֶעמַאכְט אוּנְטֶער זַיינֶע פִיס. וָוארִים מִיט דֶעם, וָואס עֶר הָאט אוּנְטֶערְטֶענִיק גֶעמַאכְט אַלְצְדִינְג אוּנְטֶער אִים, הָאט עֶר גָארְנִישְׁט גֶעלָאזְן, וָואס אִיז אִים נִישְׁט אוּנְטֶערְטֶענִיק. דֶערְוַוייל אָבֶּער זֶעעֶן מִיר נָאךְ נִישְׁט, אַז אַלְצְדִינְג זָאל זַיין אוּנְטֶערְטֶענִיק אוּנְטֶער אִים.
9
מִיר זֶעעֶן אָבֶּער, יֵשׁוּעַ, וָואס אִיז גֶעמַאכְט גֶעוָוארְן אַבִּיסְל נִידֶערִיקֶער פוּן דִי מַלְאָכִים, פוּנְוֶועגְן דִי לַיידְן פוּן דֶעם טוֹיט, וָואס אִיז גֶעקְרוֹינְט מִיט הֶערְלֶעכְקַייט אוּן כָּבוֹד, כְּדֵי עֶר זָאל דוּרְךְ דֶעם חֶסֶד פוּן גָאט טוֹעֶם זַיין דֶעם טוֹיט פַאר אַלֶע מֶענְטְשְׁן.
10
וָוארִים אִים, פַאר וֶועמֶען עֶס אִיז אַלְצְדִינְג, אוּן דוּרְךְ וֶועמֶען עֶס אִיז אַלְצְדִינְג, הָאט עֶס גֶעפַּאסְט מִיט דֶעם בְּרֶענְגֶען אַ סַך זִין צוּ הֶערְלֶעכְקַייט, מַשְׁלִים צוּ זַיין דוּרְךְ עִינוּיִים דֶעם שַׂר פוּן זֵייעֶר יְשׁוּעָה.
11
וָוארִים סַיי דֶער, וָואס טוּט הֵיילִיקְן, אוּן סַיי דִי וָואס זֶענֶען גֶעהֵיילִיקְט, זֶענֶען אַלֶע פוּן אֵיינֶעם; צוּלִיבּ דֶעם שֶׁעמְט עֶר זִיךְ נִישְׁט זֵיי צוּ רוּפְן בְּרִידֶער,
12
אַזוֹי צוּ זָאגְן: אִיךְ וֶועל דֶערְצֵיילְן דַיין נָאמֶען צוּ מַיינֶע בְּרִידֶער, אִין דֶער מִיט פוּן קָהָל וֶועל אִיךְ דִיךְ לוֹיבְּן.
13
אוּן וִוידֶער: אִיךְ וֶועל הָאפְן צוּ אִים. אוּן וִוידֶער: זֶע, אִיךְ אוּן דִי קִינְדֶער, וֶועמֶען גָאט הָאט מִיר גֶעגֶעבְּן.
14
דֶערִיבֶּער, אַזוֹיוִוי דִי קִינְדֶער הָאבְּן אַ חֵלֶק אִין פְלֵיישׁ אוּן בְּלוּט, הָאט עֶר אוֹיךְ אוֹיף אַן עֶנְלֶעכְן אוֹפְן אַ חֵלֶק פוּן דֶעם זֶעלְבְּן, כְּדֵי דוּרְךְ דֶעם טוֹיט זָאל עֶר קֶענֶען מְבַטְל זַיין דֶעם, וָואס הָאט דִי מַאכְט פוּן דֶעם טוֹיט, דָאס אִיז, דֶעם שָׂטָן,
15
אוּן זָאל אוֹיסְלֵייזְן אַלֶע דִי, וָואס זֶענֶען דוּרְךְ מוֹרֶא פַאר דֶעם טוֹיט זֵייעֶר גַאנְץ לֶעבְּן. גֶעוֶוען אוּנְטֶערְטֶענִיק צוּ קְנֶעכְטְשַׁאפְט.
16
וָוארִים בֶּאֱמֶת, נִישְׁט דִי מַלְאָכִים הֶעלְפְט עֶר, נַייעֶרְט דֶעם זָאמֶען פוּן אַבְרָהָם.
17
דֶערִיבֶּער אִיז אִים אָנְגֶעשְׁטַאנֶען אִין אַלְצְדִינְג גֶעגְלִיכְן צוּ זַיין צוּ זַיינֶע בְּרִידֶער, כְּדֵי עֶר זָאל וֶוערְן אַ דֶערְבַּארֶעמְדִיקֶער אוּן אַ גֶעטְרַייעֶר כֹּהֵן־גָדוֹל אִין זַאכְן, וָואס זֶענֶען נוֹגֵעַ גָאט, מְכַפֵּר צוּ זַיין פַאר דִי זִינְד פוּן דֶעם פָאלְק.
18
וָוארִים הֶיוֹת עֶר אַלֵיין הָאט גֶעלִיטְן, בְּעֵת עֶר אִיז גֶעפְּרוּאוְוט גֶעוָוארְן, אִיז עֶר בִּיְכוֹלֶת צוּ הֶעלְפְן דִי, וָואס וֶוערְן גֶעפְּרוּאוְוט.