אידיש
1
דֶערִיבֶּער, וַוייל מִיר זֶענֶען אַרוּמְגֶערִינְגְלְט מִיט אַזַא גְרוֹיסְן וָואלְקְן עֵדוּת, לָאמִיר אַוֶועקְלֵייגְן יֶעדֶע מַשָׂא, אוּן דִי זִינְד, וָואס בַּאהֶעפְט זִיךְ צוּ אוּנְדְז, אוּן לָאמִיר לוֹיפְן מִיט גֶעדוּלְדִיקַייט דֶעם וֶועטלוֹיף, וָואס לִיגְט פַאר אוּנְדְז,
2
אוּן קוּקְן אוֹיף יֵשׁוּעַ, דֶעם רֹאשׁ אוּן מַשְׁלִים פוּן אוּנְדְזֶער אֶמוּנָה, וָואס צוּלִיבּ דֶער שִׂמְחָה, וָואס אִיז גֶעוֶוען אָנְגֶעגְרֵייט פַאר אִים, הָאט עֶר דֶערְטְרָאגְן דֶעם הָאט פַארְאָפְּשַׁייט דִי חַרְפָּה, אוּן הָאט זִיךְ אַנִידֶערְגֶעזֶעצְט בַּיי דֶער רֶעכְטֶער הַאנְט פוּן דֶעם כִּסֵא־אֱלֹהִים.
3
וָוארִים בַּאטְרַאכְט אִים, וָואס הָאט דֶערְטְרָאגְן אַזַא סְתִּירָה פוּן זִינְדִיקֶע קֶעגְן זִיךְ, כְּדֵי אִיר זָאלְט נִישְׁט וֶוערְן מִיד אוּן אָפְּגֶעשְׁוַואכְט אִין אַייעֶרֶע נְשָׁמוֹת.
4
אִיר הָאט זִיךְ נָאךְ נִישְׁט אַנְטְקֶעגְנְגֶעשְׁטֶעלְט בִּיז בְּלוּט אִין דֶעם קַאמְף קֶעגְן זִינְד,
5
אוּן אִיר הָאט פַארְגֶעסְן דִי וָוארְעֶנוּנְג, וָואס טוּט אַיינְטַענֶהן מִיט אַייךְ וִוי מִיט קִינְדֶער: מַיין זוּן, הַאלְט נִישְׁט גְרִינְג דֶעם מוּסָר פוּן גָאט, פַאל בַּיי זִיךְ נִישְׁט אַרָאפּ, בְּעֵת דוּ וֶוערְסְט פוּן אִים גֶעשְׁטְרָאפְט;
6
וָוארִים וֶועמֶען גָאט הָאט לִיבּ, דֶעם שְׁטְרָאף עֶר, אוּן שְׁמַייסְט יֶעדְן זוּן, וֶועמֶען עֶר אִיז מְקַבְּל.
7
עֶס אִיז צוּלִיבּ דֶעם שְׁטְרָאף וָואס אִיר דֶערְטְרָאגְט; גָאט פִירְט זִיךְ אוֹיף מִיט אַייךְ וִוי מִיט זִין; וָוארִים וָואסֶער זוּן אִיז עֶס, וֶועמֶען זַיין פָאטֶער טוּט נִישְׁט שְׁטְרָאפְן?
8
אוֹיבּ אָבֶּער אִיר וֶוערְט נִישְׁט גֶעשְׁטְרָאפְט, וָואס אִין דֶעם זֶענֶען אַלֶע טֵיילְנֶעמֶער, דֶעמָאלְט זֶענְט אִיר מַמְזֵרִים, אוּן נִישְׁט קֵיין זִין.
9
נָאךְ מֶער, מִיר הָאבְּן גֶעהַאט לַייבְּלֶעכֶע פָאטֶערְס אוּנְדְז צוּ שְׁטְרָאפְן אוּן מִיר הָאבְּן זֵיי אָפְּגֶעגֶעבְּן כָּבוֹד; צִי זָאלְן מִיר נִישְׁט אַ סַך לִיבֶּער אוּנְטֶערְטֶענִיק זַיין צוּ דֶעם פָאטֶער פוּן דִי גֵייסְטֶער, אוּן לֶעבְּן?
10
וָוארִים זֵיי הָאבְּן אוּנְדְז גֶעשְׁטְרָאפְט אוֹיף אַ קוּרְצֶער צַייט, לוֹיט וִוי זֵיי הָאבְּן עֶס גֶעהַאלְטְן פַאר נֵייטִיק, עֶר אָבֶּער טוּט עֶס פַאר אוּנְדְזֶער נוּצְן־וֶועגְן, כְּדֵי מִיר זָאלְן זַיין טֵיילְנֶעמֶער פוּן זַיין הֵיילִיקַייט.
11
יֶעדֶער שְׁטְרָאף זֶעט אוֹיס, בְּעֵת עֶר קוּמְט אוֹיף אוּנְדְז, צוּ זַיין נִישְׁט דֶערְפְרַייעֶנְדִיק, נַייעֶרְט טְרוֹיעֶרִיק; דָאךְ שְׁפֶּעטֶער טְרָאגְט זִי פְרִידְלֶעכֶע פֵּירוֹת פוּן רֶעכְטְפַארְטִיקַייט פַאר דִי, וָואס לֶערְנֶען זִיךְ עֶפֶּעס דֶערְפוּן אָפּ.
12
בְּכֵן, הֵייבְּט אוֹיף דִי הֶענְט, דִי שְׁלָאפֶע, אוּן שְׁטַארְקְט דִי מִידֶע קְנִי,
13
אוּן מַאכְט גְלַייכֶע שְׁטֶעגְן פַאר אַייעֶרֶע פִיס, כְּדֵי דֶער לָאמֶער זָאל נִישְׁט אָפְּקֶערְן פוּן וֶועג, נַייעֶרְט זָאל לִיבֶּערְשְׁט גֶעהֵיילְט וֶוערְן.
14
יָאגְט זִיךְ נָאךְ שָׁלוֹם מִיט אַלֶע מֶענְטְשְׁן, אוּן דֶער הֵיילִיקוּנְג, אָן וֶועלְכֶער קֵיינֶער וֶועט נִישְׁט זֶען דֶעם הַאר.
15
אוּן גִיט אַכְטוּנְג, אַז קֵיינֶער זָאל נִישְׁט גֶעמִינֶערְט וֶוערְן אִין דֶעם חֶסֶד פוּן גָאט, אוּן אַז סֶע זָאל נִישְׁט אוֹיפְשְׁפְּרָאצְן אַ וָוארְצְל פוּן בִּיטֶערְקֵייט אוּן אַייךְ בַּאשְׁוֶוערְן, אוּן דוּרְכְדֶעם מְטַמֵא מַאכְן דֶעם רַבִּים;
16
אַז קֵיינֶער זָאל נִישְׁט זַיין קֵיין נוֹאֵף, אָדֶער אַן אוּמְוֶוערְדִיקֶער מֶענְטְשׁ וִוי עֵשָׂו, וָואס הָאט פַאר אַ גֶעקֶעכְץ פַארְקוֹיפְט זַיין בְּכוֹרָה.
17
וָוארִים אִיר וֵוייסְט, אַז בְּעֵת עֶר הָאט שְׁפֶּעטֶערשׁוֹין בַּאגֶערְט צוּ הָאבְּן דִי בְּרָכָה, אִיז עֶר פַארְוָוארְפְן גֶעוָוארְן; וָוארִים עֶר הָאט שׁוֹין נִישְׁט גֶעפוּנֶען קֵיין תְּשׁוּבָה, הַגַם עֶר הָאט זִי גֶעזוּכְט מִיט טְרֶערְן.
18
וָוארִים אִיר זֶענְט נִישְׁט גֶעקוּמֶען צוּ קֵיין בַּארְג, וָואס מֶען קָאן אָנְרִירְן, אוּן וָואס בְּרֶענְט מִיט פַייעֶר, אוּן צוּ שְׁוַוארְצְקַייט, אוּן חַשְׁכוּת אוּן שְׁטוּרֶעמְוִוינְט,
19
אוּן דֶעם שַׁאלְן פוּן אַ שׁוֹפָר, אוּן דֶעם קוֹל פוּן רֵייד, וָואס דִי, וָואס הָאבְּן גֶעהֶערְט, הָאבְּן גֶעבֶּעטְן, אַז מֶען זָאל צוּ זֵיי מֶער נִישְׁט רֶעדְן.
20
וָוארִים זֵיי הָאבְּן נִישְׁט גֶעקָאנְט דֶערְטְרָאגְן דָאס, וָואס אִיז גֶעבָּאטְן גֶעוָוארְן: אוֹיבּ אַפִילוּ אַ בְּהֵמָה רִירְט אָן דֶעם בַּארְג, זָאל מֶען זִי פַארְשְׁטֵיינֶען.
21
אוּן דִי זֶעאוּנְג אִיז גֶעוֶוען אַזוֹי מוֹרֶאדִיק, אַז מֹשֶׁה הָאט גֶעזָאגְט: אִיךְ הָאבּ זֵייעֶר מוֹרֶא אוּן צִיטֶער.
22
נָאר אִיר זֶענְט גֶעקוּמֶען צוּם בַּארְג צִיוֹן, אוּן צוּ דֶער שְׁטָאט פוּן דֶעם לֶעבֶּעדִיקְן גָאט, דֶעם הִימְלִישְׁן יְרוּשָׁלַיִם, אוּן צוּ אוּמְצֵיילִיקֶע מַלְאָכִים,
23
צוּ דֶער כְּנֶסֶת־הַגְדוֹלָה אוּן קְהִילָה פוּן דִי בְּכוֹרִים, וָואס זֶענֶען פַארְשְׁרִיבְּן אִין הִימְל, אוּן צוּ גָאט, דֶעם שׁוֹפֵט פוּן אַלֶע, אוּן צוּ דִי גֵייסְטֶער פוּן צַדִיקִים גְמוּרִים,
24
אוּן צוּ יֵשׁוּעַ, דֶעם מֵלִיץ פוּן אַ נַייעֶם בּוּנְד, אוּן צוּ דֶעם בְּלוּט פוּן שְׁפְּרֶענְגֶען, וָואס רֶעדְט פוּן עֶפֶּעס בֶּעסֶערְס, וִוי דָאס בְּלוּט פוּן הֶבֶל.
25
זֶעט, אַז אִיר זָאלְט זִיךְ נִישְׁט אָפְּזָאגְן פוּן דֶעם, וָואס רֶעדְט. וָוארִים אוֹיבּ זֵיי זֶענֶען נִישְׁט אַנְטְרוּנֶען, בְּעֵת זֵיי הָאבְּן זִיךְ אָפְּגֶעזָאגְט פוּן דֶעם, וָואס הָאט זֵיי מַזְהִיר גֶעוֶוען אוֹיף דֶער עֶרְד, אַ סַך מֶער וֶועלְן מִיר נִישְׁט אַנְטְרוּנֶען, אוֹיבּ מִיר קֶערְן אָפּ פוּן דֶעם, וָואס טוּט מַזְהִיר זַיין פוּן הִימְל,
26
וֶועמֶעס קוֹל הָאט אַמָאל גֶעמַאכְט צִיטֶערְן דִי עֶרְד. אַצִינְד אָבֶּער הָאט עֶר מַבְטִיחַ גֶעוֶוען, אַזוֹי צוּ זָאגְן: אִיךְ וֶועל נָאכְאַמָאל מַאכְן צִיטֶערְן נִישְׁט נָאר דִי עֶרְד, נַייעֶרְט אוֹיךְ דֶעם הִימְל.
27
אוּן דָאס דָאזִיקֶע וָוארְט: נָאכְאַמָאל, בַּאצֵייכְנְט דָאס אִיבֶּערְשְׁטֶעלְן פוּן יֶענֶע זַאכְן, וָואס טְרֵייסְלֶען זִיךְ, וִוי זַאכְן, וָואס זֶענֶען גֶעמַאכְט גֶעוָוארְן, כְּדֵי דָאס, וָואס טְרֵייסְלְט זִיךְ נִישְׁט, זָאל פַארְבְּלַייבְּן.
28
בְּכֵן, וַוייל מִיר זֶענֶען מְקַבְּל אַ מַלְכוּת, וָואס קָאן זִיךְ נִישְׁט טְרֵייסְלֶען, לָאמִיר זַיין דַאנְקְבַּאר, אוּן דִינֶען מִיט וואוֹילְגֶעפֶעלְן פַאר גָאט, מִיט פָארְכְטִיקַייט אוּן פַּחַד;
29
וָוארִים אוּנְדְזֶער גָאט אִיז אַ פַארְצֶערְנְדִיק פַייעֶר.