אידיש
1
וָוארִים דִי תּוֹרָה, וַוייל זִי הָאט נָאר אַ שָׁאטְן פוּן דִי קוּמֶענְדִיקֶע גוּטֶע זַאכְן, אוּן נִישְׁט דָאס אָפְּבִּילְד פוּן דִי זַאכְן גוּפָא, אִיז קֵיינְמָאל נִישְׁט בִּיְכוֹלֶת מִיט דִי זֶעלְבֶּע קָרְבָּנוֹת, וָואס זֵיי זֶענֶען כְּסֵדֶר מַקְרִיב יָאר נָאךְ יָאר, שְׁלֵמוּתדִיק צוּ מַאכְן דִי, וָואס גֶענֶעעֶנֶען.
2
אַנִישְׁט, וָואלְט מֶען דֶען זֵיי נִישְׁט אוֹיפְגֶעהֶערְט מַקְרִיב צוּ זַיין? מַחְמַת דִי, וָואס דִינֶען, נָאכְדֶעם וִוי זֵיי זֶענֶען אֵיין מָאל גֶערֵיינִיקְט גֶעוָוארְן, וָואלְטְן מֶער נִישְׁט גֶעהַאט דָאס בַּאוואוּסְטְזַיין פוּן זִינְד.
3
אִין יֶענֶע קָרְבָּנוֹת אָבֶּער אִיז אַלֶע יָאר פַארַאן אַ זֵכֶר פוּן זִינְד.
4
וָוארִים עֶס אִיז נִישְׁט מֶעגֶלֶעך, אַז דָאס בְּלוּט פוּן אָקְסְן אוּן בֶּעק זָאל אַוֶועקְנֶעמֶען זִינְד.
5
בְּכֵן, בְּעֵת עֶר קוּמְט אִין דֶער וֶועלְט אַרַיין, זָאגְט עֶר: שְׁלַאכְטְאָפֶּער אוּן שְׁפַּייזְאָפֶּער הָאסְטוּ נִישְׁט בַּאגֶערְט, נַייעֶרְט אָ גוּף הָאסְטוּ צוּגֶעגְרֵייט פַאר מִיר.
6
בְּרָאנְדְאָפֶּער אוּן זִינְדַאָפֶּער הָאסְטוּ נִישְׁט פַארְלַאנְגְט.
7
דֶערִיבֶּער הָאבּ אִיךְ גֶעזָאגְט: זֶע, אִיךְ בִּין גֶעקוּמֶען, אִין דֶער מְגִילָה פוּן דֶעם סֵפֶר שְׁטֵייט גֶעשְׁרִיבְּן וֶועגְן מִיר, צוּ טָאן דַיין רָצוֹן, מַיין גָאט.
8
בְּעֵת עֶר זָאגְט אוֹיבְן: שְׁלַאכְטְאָפֶּער אוּן שְׁפַּייזְאָפֶּער, בְּרָאנְדְאָפֶּער אוּן זִינְדַאָפֶּער הָאסְטוּ נִישְׁט גֶעוָואלְט, אוֹיךְ הָאסְטוּ דֶערִין נִישְׁט גֶעהַאט קֵיין וואוֹילְגֶעפֶעלְן, (וָואס מֶען אִיז זֵיי מַקְרִיב עַל־פִּי תּוֹרָה),
9
דֶעמָאלְט הָאט עֶר גֶעזָאגְט: זֶע, אִיךְ בִּין גֶעקוּמֶען, צוּ טָאן דַיין רָצוֹן. עֶר שַׁאפְט אָפּ דָאס עֶרְשְׁטֶע, כְּדֵי עֶר זָאל בַּאפֶעסְטִיקְן דָאס צְוֵוייטֶע.
10
דוּרְךְ דֶעם דָאזִיקְן רָצוֹן זֶענֶען מִיר גֶעהֵיילִיקְט גֶעוָוארְן דוּרְךְ דֶעם מַקְרִיב זַיין פוּן דֶעם גוּף פוּן יֵשׁוּעַ הַמָשִׁיחַ אֵיין מָאל פַאר אַלֶעמָאל.
11
אוּן יֶעדֶער כֹּהֵן שְׁטֵייט טָאג־טֶעגְלֶעך צוּ טָאן דִי עַבוֹדָה אוּן מַקְרִיב צוּ זַיין דִי זֶעלְבִּיקֶע קָרְבָּנוֹת, וָואס קָאנֶען קֵיינְמָאל נִישְׁט אַוֶועקְנֶעמֶען דִי זִינְד;
12
עֶר אָבֶּער, נָאכְדֶעם וִוי עֶר הָאט מַקְרִיב גֶעוֶוען אֵיין קָרְבָּן פַאר זִינְד אוֹיף אֵייבִּיק, הָאט זִיךְ אַנִידֶערְגֶעזֶעצְט בַּיי דֶער רֶעכְטֶער הַאנְט פוּן גָאט,
13
אוּן וַוארְט פוּן דֶעמָאלְט אָן, בִּיז זַיינֶע שׂוֹנְאִים וֶועלְן גֶעמַאכְט וֶוערְן דָאס פוּסְבֶּענְקְל פוּן זַיינֶע פִיס.
14
וָוארִים דוּרְךְ אֵיין קָרְבָּן הָאט עֶר אוֹיף אֵייבִּיק שְׁלֵמוּתדִיק גֶעמַאכְט דִי וָואס זֶענֶען גֶעהֵיילִיקְט גֶעוָוארְן.
15
אוּן דֶער רוּחַ־הַקוֹדֶשׁ זָאגְט אוּנְדְז אוֹיךְ עֵדוּת; וָוארִים נָאכְדֶעם וִוי עֶר הָאט גֶעזָאגְט:
16
דָאס אִיז דֶער בּוּנְד, וָואס אִיךְ וֶועל מַאכְן מִיט זֵיי נָאךְ יֶענֶע טֶעג, זָאגְט גָאט: אִיךְ וֶועל אַרַיינְגֶעבְּן מַיין תּוֹרָה אִין זֵייעֶר פַארְשְׁטַאנְד, אוּן אוֹיף זֵייעֶר הַארְץ וֶועל אִיךְ זִי אוֹיפְשְׁרַייבְּן.
17
אוּן זֵייעֶרע זִינְד אוּן חַטָאִים וֶועל אִיךְ מֶער נִישְׁט גֶעדֶענְקֶען.
18
אוּן וואוּ עֶס אִיז פַארַאן פַארְגֶעבּוּנְג פוּן דִי דָאזִיקֶע, דָארְט אִיז מֶער נִישְׁטָא קֵיין קָרְבָּן פַאר זִינְד.
19
דֶערִיבֶּער, בְּרִידֶער, וַוייל מִיר הָאבְּן בִּטָחוֹן אַרַיינְצוּקוּמֶען אִין מָקוֹם־קָדוֹשׁ דוּרְךְ דֶעם בְּלוּט פוּן יֵשׁוּעַ,
20
דוּרְךְ דֶעם נַייעֶם אוּן לֶעבֶּעדִיקְן וֶועג, וָואס עֶר הָאט גֶעהֵיילִיקְט פַאר אוּנְדְז דוּרְךְ דֶעם פָּרוֹכֶת, דָאס הֵייסְט, דוּרְךְ זַיין לַייבּ;
21
אוּן וַוייל מִיר הָאבְּן אַ כֹּהֵן־גָדוֹל אִיבֶּער דֶעם הוֹיז פוּן גָאט,
22
לָאמִיר גֶענֶעעֶנֶען מִיט אַן אוֹיפְרִיכְטִיק הַארְץ אִין דֶער גַאנְצְקַייט פוּן אֶמוּנָה, כְּדֵי אוּנְדְזֶערֶע הֶערְצֶער זָאלְן זַיין בַּאשְׁפְּרֶענְגְט אוּן פְרַיי פוּן אַ בֵּייז גֶעוִויסְן, אוּן אוּנְדְזֶערֶע לַייבֶּער זָאלְן גֶעוַואשְׁן וֶוערְן מִיט רֵיין וַואסֶער;
23
לָאמִיר זִיךְ הַאלְטְן פֶעסְט אִין דֶער אָפֶענֶער בַּאקֶענוּנְג פוּן אוּנְדְזֶער הָאפֶענוּנְג, כְּדֵי זִי זָאל זִיךְ נִישְׁט טְרֵייסְלֶען, וָוארִים גֶעטְרַיי אִיז דֶער, וָואס הָאט מַבְטִיחַ גֶעוֶוען;
24
אוּן לָאמִיר טְרַאכְטְן צוּ דֶערְוֶועקְן אֵיינֶער דֶעם אַנְדֶערְן צוּ לִיבְּשַׁאפְט אוּן מַעֲשִׂים־טוֹבִים,
25
אוּן נִישְׁט פַארְלָאזְן אוּנְדְזֶער אֵייגְן אַיינְזַאמְלֶען זִיךְ אִינְאֵיינֶעם, וִוי עֶס אִיז בַּיי טֵייל דֶער מִנְהָג, נַייעֶרְט לָאמִיר מַזְהִיר זַיין אֵיינֶער דֶעם אַנְדֶערְן, אוּן אַ סַך מֶער צוּלִיבּ דֶעם, וַוייל אִיר זֶעט, אַז דֶער טָאג זִיךְ דֶערְנֶענְטֶערְט.
26
וָוארִים אוֹיבּ מִיר זִינְדִיקְן בְּכַּוָונָה, נָאכְדֶעם וִוי מִיר הָאבְּן מְקַבְּל גֶעוֶוען דָאס וִויסְן פוּן דֶעם אֶמֶת, דֶעמָאלְט פַארְבְּלַייבְּט נִישְׁט מֶער קֵיין קָרְבָּן פַאר זִינְד,
27
נַייעֶרְט אַ מוֹרֶאדִיק דֶערְוַוארְטְן פוּן מִשְׁפָּט, אוּן אַ גֶעפֶערְלֶעך פַייעֶר, וָואס וֶועט פַארְצֶערְן דִי וִוידֶערְשְׁפֶּענִיקֶע.
28
דֶער, וָואס אִיז עוֹבֵר תּוֹרַת־מֹשֶׁה, וֶוערְט אָן דֶערְבַּארֶעמוּנְג גֶעטֵייט אוֹיף דֶעם וָוארְט פוּן צְוֵויי אָדֶער דְרַיי עֵדוּת;
29
הַיינְט, וָואסֶער הַארְבֶּערֶע שְׁטְרָאף, מֵיינְט אִיר, אִיז וֶועט דֶער, וָואס הָאט גֶעטְרֶעטְן מִיט דִי פִיס דֶעם בֶּן־אֱלֹהִים, אוּן הָאט מְחַלֵל גֶעוֶוען דָאס בְּלוּט פוּן דֶעם בּוּנְד, מִיט וָואס עֶר אִיז גֶעהֵיילִיקְט גֶעוָוארְן, אוּן גֶעלֶעסְטֶערְט דֶעם גֵייסְט פוּן חֶסֶד?
30
וָוארִים מִיר קֶענֶען אִים, וָואס הָאט גֶעזָאגְט: צוּ מִיר גֶעהֶערְט דִי נְקָמָה, אִיךְ וֶועל פַארְגֶעלְטְן. אוּן וִוידֶער אַמָאל: גָאט וֶועט מִשְׁפָּטְן זַיין פָאלְק.
31
עֶס אִיז אַ מוֹרֶאדִיקֶע זַאך אַרַיינְצוּפַאלְן אִין דִי הֶענְט פוּן דֶעם לֶעבֶּעדִיקְן גָאט.
32
דֶערְמָאנְט אַייךְ אָבֶּער דִי פְרִיעֶרְדִיקֶע טֶעג, אִין וֶועלְכֶע אִיר זֶענְט בַּאלוֹיכְטְן גֶעוָוארְן, אוּן אִיר הָאט דֶערְטְרָאגְן אַ שְׁוֶוערְן קַאמְף פוּן עִנוּיִים,
33
טֵיילְוַוייז, וַוייל אִיר זֶענְט גֶעוָוארְן אַ שׁוֹישְׁפִּיל דוּרְךְ חַרְפּוֹת אוּן צָרוֹת, אוּן טֵיילְוַוייז, וַוייל אִיר זֶענְט גֶעוָוארְן טֵיילְנֶעמֶער מִיט דִי, וָואס זֶענֶען אַזוֹי בַּאהַנְדְלְט גֶעוָוארְן.
34
וָוארִים אִיר הָאט גֶעהַאט רַחְמָנוֹת אוֹיף דִי וָואס זֶענֶען גֶעוֶוען אִין קֵייטְן, אוּן הָאט אָנְגֶענוּמֶען מִיט פְרֵייד דִי בַּארוֹיבּוּנְג פוּן אַייעֶר הָאבּ אוּן גוּטְס, וַוייל אִיר וֵוייסְט, אַז אִיר הָאט אַ גְרֶעסֶער אוּן אַ בֶּעשְׁטֶענְדִיקְס פַארְמֶעגְן אִין הִימְל.
35
פַארְוַוארְפְט דֶערִיבֶּער נִישְׁט אַייעֶר בִּטָחוֹן, וָואס הָאט אַ גְרוֹיסֶע פַארְגֶעלְטוּנְג אוּן א בַּאשְׁטֶענְדִיקְס.
36
וָוארִים אִיר נֵייטִיקְט זִיךְ אִין גֶעדוּלְד, כְּדֵי נָאכְדֶעם וִוי אִיר וֶועט הָאבְּן גֶעטָאן דֶעם רָצוֹן פוּן גָאט, זָאלְט אִיר מְקַבְּל זַיין דִי הַבְטָחָה.
37
וָוארִים נָאךְ אַ גַאנְץ קְלֵיינֶע רֶגֶע וֶועט קוּמֶען דֶער, וָואס קוּמְט, אוּן וֶועט נִישְׁט פַארְזַאמֶען.
38
אוּן מַיין גֶערֶעכְטֶער וֶועט לֶעבְּן דוּרְךְ אֶמוּנָה; אוּן אוֹיבּ עֶר צִיט זִיךְ צוּרִיק, הָאט מַיין נְשָׁמָה נִישְׁט קֵיין וואוֹילְגֶעפֶעלְן אִין אִים.
39
מִיר זֶענֶען אָבֶּער נִישְׁט פוּן דִי, וָואס צִיעֶן זִיךְ צוּרִיק צוּ פַארְדַארְבּוּנְג, נַייעֶרְט פוּן דִי, וָואס הָאבְּן אֶמוּנָה מַצִיל צוּ זַיין זֵייעֶר נְשָׁמָה.