אידיש
1
אִיךְ בַּאפֶעל דִיר פַאר גָאט אוּן פַאר יֵשׁוּעַ הַמָשִׁיחַ, וָואס וֶועט מִשְׁפָּטְן דִי לֶעבֶּעדִיקֶע אוּן דִי טוֹיטֶע, אוּן דוּרְךְ זַיין אַנְטְפּלֶעקוּנְג אוּן זַיין מְלוּכָה:
2
פְּרָאקְלַאמִיר דָאס וָוארְט, זַיי גֶעאַיילְט אִין צַייט, אוּן אוֹיסֶער דֶער צַייט, רֶעד אִיבֶּער, שְׁטְרָאף, זַיי מַזְהִיר, מִיט גֶעדוּלְדִיקַייט אוּן לֶערְנוּנְג.
3
וָוארִים סֶע וֶועט קוּמֶען דִי צַייט, וֶוען זֵיי וֶועלְן נִישְׁט פַארְטְרָאגְן דִי גֶעזוּנְטֶע לֶערְנוּנְג, אוּן וַוייל זֵיי הָאבְּן קִיצְלְדִיקֶע אוֹיעֶרְן, וֶועלְן זֵיי זִיךְ אָנְקְלַייבְּן לֶערֶערְס לוֹיט זֵייעֶרֶע אֵייגֶענֶע תַּאֲווֹת,
4
אוּן זֵיי וֶועלְן אָפְּנֵייגְן זֵייעֶרֶע אוֹיעֶרְן פוּן דֶעם אֶמֶת, אוּן זִיךְ קֶערְן צוּ בָּאבֶּע־מַעֲשִׂיוֹת.
5
דוּ אָבֶּער זֵיי נִיכְטֶער אִין אַלְצְדִינְג, לַייד צָרוֹת, טוּ דִי אַרְבֶּעט פוּן אַן אָנְזָאגֶער, זֵיי מְמַלֵא דַיין דִינוּנְג.
6
וָוארִים אִיךְ בִּין שׁוֹין גֶעבְּרַאכְט פַאר אַ קָרְבָּן, אוּן דִי צַייט פוּן מַיין אַוֶועקְגֵיין גֶענֶעעֶנְט.
7
אִיךְ הָאבּ גֶעקֶעמְפְט דֶעם גוּטְן קַאמְף, אִיךְ הָאבּ פַארְעֶנְדִיקְט מַיין לוֹיף, אִיךְ הָאבּ גֶעהִיט דִי אֶמוּנָה.
8
פוּן אִיצְט אָן אִיז אָנְגֶעגְרֵייט פַאר מִיר דִי קְרוֹין פוּן גֶערֶעכְטִיקַייט, וָואס דֶער הַאר, דֶער רֶעכְטְפַארְטִיקֶער שׁוֹפֵט, וֶועט מִיר גֶעבְּן אִין יֶענֶעם טָאג; אוּן נִישְׁט נָאר מִיר אַלֵיין, נַייעֶרְט אוֹיךְ דִי אַלֶע, וָואס הָאבְּן לִיבּ גֶעהַאט זַיין אַנְטְפּלֶעקוּנְג.
9
אֵייל דִיךְ צוּ קוּמֶען אִין גִיכְן צוּ מִיר;
10
וָוארִים דֶעמַאס הָאט מִיךְ פַארְלָאזְן, וַוייל עֶר הָאט לִיבּ גֶעהַאט דֶעם עוֹלָם־הַזֶה, אוּן אִיז אַוֶועקְגֶעגַאנְגֶען קֵיין טֶעסַאלָאנִיקֶע, קְרֶעסְצֶענְס קֵיין גַאלַאטְיֶע, טִיטוּס קֵיין דַאלְמַאצְיֶע.
11
נָאר לוּקאָס אַלֵיין אִיז מִיט מִיר. נֶעם מַארְקוּס אוּן בְּרֶענְג אִים מִיט מִיט דִיר; וָוארִים עֶר אִיז מִיר נוּצְלֶעך פַאר דֶער בַּאדִינוּנְג.
12
טִיכִיקוּס אָבֶּער הָאבּ אִיךְ גֶעשִׁיקְט קֵיין עֶפֶעזוּס.
13
בְּעֵת דוּ וֶועסְט קוּמֶען, זָאלְסְטוּ בְּרֶענְגֶען דֶעם מַאנְטְל, וָואס אִיךְ הָאבּ גֶעלָאזְן אִין טְרָאאַס בַּיי קַארְפּוּס, אוֹיךְ דִי סְפָרִים, אוּן בִּפְרַט דִי פַּארְמֶעטְן.
14
אַלֶעקְסַאנְדֶער, דֶער קוּפֶּערְשְׁמִיד, הָאט מִיר אַ סַך שְׁלֶעכְטְס גֶעטָאן; גָאט וֶועט אִים פַארְגֶעלְטְן לוֹיט זַיינֶע מַעֲשִׂים.
15
פַאר אִים טוּ אוֹיךְ דוּ דִיךְ הִיטְן, וָוארִים עֶר הָאט זִיךְ שְׁטַארְק אַקֶעגְנְגֶעשְׁטֶעלְט אוּנְדְזֶערֶע רֵייד.
16
בַּיי מַיין עֶרְשְׁטֶער פַארְטַיידִיקוּנְג הָאט קֵיינֶער נִישְׁט גֶענוּמֶען מַיין צַד, נַייעֶרְט אַלֶע הָאבְּן מִיךְ פַארְלָאזְן. זָאל דָאס נִישְׁט פַארְרֶעכְנְט וֶוערְן אוֹיף זֵייעֶר רֶעכֶענוּנְג!
17
אָבֶּער דֶער הַאר הָאט מִיר גֶעהָאלְפְן, אוּן הָאט מִיךְ גֶעשְׁטַארְקְט, כְּדֵי דוּרְךְ מִיר זָאל דִי בְּשׂוּרָה אִינְגַאנְצְן אָנְגֶעזָאגְט וֶוערְן, אוּן אַלֶע פֶעלְקֶער זָאלְן זִי הֶערְן; אוּן אִיךְ בִּין נִיצוּל גֶעוָוארְן פוּן דֶעם לֵייבְּס מוֹיל.
18
דֶער הַאר וֶועט מִיךְ מַצִיל זַיין פוּן יֶעדְן בֵּייזְן וֶוערְק, אוּן וֶועט מִיר פַארְהֶעלְפְן צוּ זַיין הִימְלִישֶׁער מְלוּכָה; פַאר אִים זָאל זַיין כָּבוֹד אוֹיף אֵייבִּיק אוּן אֵייבִּיק. אָמֵן.
19
גְרִיס פְּרִיסְקָא אוּן אַקְוִוילַס, אוּן דֶעם הוֹיזְגֶעזִינְד פוּן אָנֶעסִיפָארוּס.
20
עֶרַאסְטוּס אִיז פַארְבְּלִיבְּן אִין קָארִינְט, אוּן טְרָאפִימוּס הָאבּ אִיךְ אִיבֶּערְגֶעלָאזְן קְרַאנְק אִין מִילֶעטוּס.
21
אַייל דִיךְ צוּ קוּמֶען פַאר וִוינְטֶער. עוּבּוּלוֹס גְרִיסְט דִיךְ, אוּן פוּדֶענְס אוּן לִינוּס אוּן קְלָאוֹדִיעֶ, אוּן אַלֶע בְּרִידֶער.
22
דֶער הַאר זָאל זַיין מִיט דַיין גֵייסְט. חֶסֶד זָאל זַיין מִיט אַייךְ.