אידיש
1
אוּן דָאס זָאלְסְטוּ וִויסְן, אַז אִין דִי לֶעצְטֶע טֶעג וֶועלְן קוּמֶען שְׁוֶוערֶע צַייטְן.
2
וָוארִים מֶענְטְשְׁן וֶועלְן זַיין לִיבְּהָאבֶּערְס פוּן זִיךְ אַלֵיין, לִיבְּהָאבֶּערְס פוּן גֶעלְט, בַּארִימֶערְס, בַּעֲלֵי־גַאוָוה, לֶעסְטֶערֶערְס, וִוידֶערְשְׁפֶּענִיק קֶעגְן עֶלטֶערְן, אוּמְדַאנְקבְּאַר, אוּמְהֵיילִיק,
3
אוּמְמֶענְטְשְׁלֶעך, אוּמְפַארְגֶעבְּלֶעך, רְכִילוּת־טְרַייבֶּער, זוֹלֵלִים, אַכְזָרִיוֹתְדִיק, שׂוֹנְאִים פוּן גוּטְס,
4
מוֹסְרִים, עַקְשָׁנִים, אוֹיפְגֶעבְּלָאזְן, לִיבְּהָאבֶּערְס פוּן תַּעַנוּג מֶער וִוי לִיבְּהָאבֶּערְס פוּן גָאט,
5
וָואס הָאבְּן אַן אוֹיסְזֶען פוּן פְרוּמְקַייט, אָבֶּער פַארְלֵייקֶענֶען דִי קְרַאפְט פוּן אִיר. אוֹיךְ פוּן דִי דָאזִיקֶע קֶער דִיךְ אָפּ.
6
וָוארִים צוּ דִי דָאזִיקֶע גֶעהֶערְן דִי, וָואס פּוֹיזֶען אַרַיין אִין הַייזֶער, אוּן נֶעמֶען גֶעפַאנְגֶען נַארִישֶׁע וַוייבֶּער, בַּאלָאדְן מִיט זִינְד, פַארְפִירְט פוּן אַלֶערְלֵיי תַּאֲווֹת,
7
וָואס תָּמִיד לֶערְנֶען זֵיי, אוּן קֶענֶען קֵיינְמָאל נִישְׁט קוּמֶען צוּם וִויסְן פוּן דֶעם אֶמֶת.
8
אוּן פּוּנְקְט וִוי יֵנִיס אוּן יִמְבֵּריס הָאבְּן זִיךְ קֶעגְנְגֶעשְׁטֶעלְט מֹשֶׁה, אַזוֹי טְוּעֶן זֵיי זִיךְ אוֹיךְ קֶעגְנְשְׁטֶעלְן דֶעם אֶמֶת; מֶענְטְשְׁן, וָואס זֶענֶען פַארְדָארְבְּן אִין פַארְשְׁטַאנְד, אוּן פַארְוָוארְפְן בְּנוֹגֵע דֶער אֶמוּנָה.
9
זֵיי וֶועלְן אָבֶּער וַוייטֶער נִישְׁט קוּמֶען; וָוארִים זֵייעֶר נַארִישְׁקַייט וֶועט זַיין אָפְן פַאר אַלֶעמֶען, אַזוֹי וִוי עֶס אִיז אוֹיךְ גֶעוֶוען מִיט יֶענֶע.
10
דוּ אָבֶּער הָאסְט נָאכְגֶעפָאלְגְט מַיין לֶערְנוּנְג, פִירוּנְג, דֵעָה, אֶמוּנָה, גֶעדוּלְדִיקַייט, לִיבֶּע, סַבְלָנוּת,
11
רְדִיפוֹת, לַיידְן, וָואס זֶענֶען מִיךְ בַּאפַאלְן אִין אַנְטִיָאכִיֶע, אִין אִיקָאנְיֶע, אִין לִיסְטְרַא; וָואסֶערֶע רְדִיפוֹת אִיךְ הָאבּ אִיבֶּערְגֶעטְרָאגְן; אוּן פוּן זֵיי אַלֶע הָאט מִיךְ דֶער הַאר מַצִיל גֶעוֶוען.
12
יָא, אוּן אַלֶע, וָואס וִוילְן לֶעבְּן פְרוּם אִין יֵשׁוּעַ הַמָשִׁיחַ, וֶועלְן גֶערוֹדֶפְט וֶוערְן.
13
אָבֶּער רְשָׁעִים אוּן בַּאטְרִיגֶערְס וֶועלְן וֶוערְן עֶרגֶער אוּן עֶרגֶער, וֶועלְן נַארְן אוּן גֶענַארְט וֶוערְן.
14
דוּ אָבֶּער פַארְבְּלַייבּ אִין דֶעם, וָואס דוּ הָאסְט גֶעלֶערְנְט אוּן בִּיסְט אִיבֶּערְצַייגְט גֶעוָוארְן, וַוייל דוּ וֵוייסְט פוּן וֶועמֶען דוּ הָאסְט עֶס גֶעלֶערְנְט,
15
אוּן וַוייל פוּן קִינְדְוַוייז אָן הָאסְטוּ גֶעקֶענְט דִי כִּתְבֵי־הַקוֹדֶשׁ, וָואס קֶענֶען דִיךְ מַאכְן קְלוּג פַאר דֶער יְשׁוּעָה דוּרְךְ אֶמוּנָה, וָואס אִיז אִין יֵשׁוּעַ הַמָשִׁיחַ.
16
אַלֶע כִּתְבֵי־הַקוֹדֶשׁ זֶענֶען בַּאאָטֶעמְט פוּן גָאטְס גֵייסְט, אוּן זֶענֶען אוֹיךְ נוּצְלֶעך צוּם לֶערְנֶען, צוּם שְׁטְרָאפְן, צוּם אוֹיסְבֶּעסֶערֶן, צוּם מַדְרִיךְ זַיין אִין רֶעכְטְפַארְטִיקַייט,
17
כְּדֵי דֶער מֶענְטְשׁ פוּן גָאט זָאל זַיין גַאנְץ, אוּן גְרֵייט פַאר צוּ יֶעדְן גוּטֶע וֶוערְק.