אידיש
1
בְּכֵן, דוּ מַיין זוּן, וֶוער גֶעשְׁטַארְקְט דוּרְךְ דֶעם חֶסֶד, וָואס אִיז אִין יֵשׁוּעַ הַמָשִׁיחַ.
2
אוּן דִי זַאכְן, וָואס דוּ הָאסְט גֶעהֶערְט פוּן מִיר צְוִוישְׁן עֵדוּת אַ סַך, עֶנְטְפֶער אִיבֶּער צוּ גֶעטְרַייעֶ מֶענְטְשְׁן, וָואס וֶועלְן זַיין בִּיֵכוֹלְת אוֹיךְ אַנְדֶערֶע צוּ לֶערְנֶען.
3
לֵייד שְׁוֶוערִיקַייט מִיט מִיר, וִוי אַ גוּטֶער זֶעלְנֶער פוּן יֵשׁוּעַ הַמָשִׁיחַ.
4
קֵיין שׁוּם זֶעלְנֶער אוֹיף דִינְסְט פַארְפְּלָאנְטֶערְט זִיךְ נִישְׁט אִין דִי זַאכְן פוּן דֶעם לֶעבְּן, כְּדֵי עֶר זָאל וָואוֹילְגֶעפֶעלְן וֶוערְן דֶעם, וָואס הָאט אִים פַארְשְׁרִיבְּן פַאר אַ זֶעלְנֶער.
5
אוּן אוֹיבּ עֶמִיצֶער קֶעמְפְט וִוי אַן אַטְלֶעט, וֶוערְט עֶר נִישְׁט גֶעקְרוֹינְט, סַיידְן עֶר הָאט גֶעקֶעמְפְט לוֹיט דֶעם דִין.
6
דֶער אַקֶערֶער, וָואס טוּט זִיךְ מִיעֶן, דַארְף זַיין דֶער עֶרְשְׁטֶער צוּ גֶענִיסְן פוּן דִי פֵּירוֹת.
7
פַארְשְׁטֵיי וָואס אִיךְ זָאג; וָוארִים דֶער הַאר וֶועט דִיר גֶעבְּן פַארְשְׁטֶענְדֶענִישׁ אִין אַלְצְדִינְג.
8
גֶעדֶענֶק יֵשׁוּעַ הַמָשִׁיחַ, וָואס אִיז אוֹיפְגֶעשְׁטַאנֶען תְּחִיַת־הַמֵתִים, פוּן דֶעם זָאמֶען פוּן דָוִד, לוֹיט מַיין בְּשׂוּרָה,
9
וָואס צוּלִיבּ אִיר לַייד אִיךְ צָרוֹת בִּיז קֵייטְן, וִוי אַ פַארְבְּרֶעכֶער; אָבֶּער דָאס וָוארְט פוּן גָאט אִיז נִישְׁט גֶעבּוּנְדְן.
10
דֶערִיבֶּער דֶערְטְרָאג אִיךְ אַלְצְדִינְג פוּנְוֶועגְן דִי אוֹיסְדֶערְוֵויילְטֶע, כְּדֵי אוֹיךְ זֵיי זָאלְן דֶערְגְרֵייכְן דִי יְשׁוּעָה, וָואס אִיז אִין יֵשׁוּעַ הַמָשִׁיחַ, מִיט אֵייבִּיקֶער הֶערְלֶעכְקַייט.
11
אֶמֶת אִיז דָאס וָוארְט: אוֹיבּ מִיר זֶענֶען גֶעשְׁטָארְבְּן מִיט אִים, וֶועלְן מִיר אוֹיךְ לֶעבְּן מִיט אִים.
12
אוֹיבּ מִיר דֶערְטְרָאגְן, וֶועלְן מִיר אוֹיךְ הֶערְשְׁן מִיט אִים; אוֹיבּ מִיר וֶועלְן אִים פַארְלֵייקֶענֶען, וֶועט עֶר אוֹיךְ אוּנְדְז פַארְלֵייקֶענֶען;
13
אוֹיבּ מִיר זֶענֶען נִישְׁט גֶעטְרַיי, פַארְבְּלַייבְּט עֶר דָאךְ גֶעטְרַיי; וָוארִים עֶר קֶען זִיךְ אַלֵיין נִישְׁט פַארְלֵייקֶענֶען.
14
דֶערְמָאן זֵיי וֶועגְן דִי דָאזִיקֶע זַאכְן, אוּן בַּאפֶעל זֵיי פַאר גָאט, אַז זֵיי זָאלְן זִיךְ נִישְׁט קְרִיגְן אִיבֶּער רֵייד, וָואס נוּצְן אוֹיף גָארְנִישְׁט, נָאר פַארְדַארְבְּן דִי, וָואס הֶערְן.
15
בַּאמִי דִיךְ צוּ שְׁטֶעלְן זִיךְ פַאר גָאט, וִוי אַן אוֹיסְגֶעפְּרוּאוְוטֶער אַרְבֶּעטֶער, וָואס דַארְף זִיךְ נִישְׁט שֶׁעמֶען, אוּן וָואס בַּאגֵייט זִיךְ רֶעכְט מִיט דֶעם וָוארְט פוּן אֶמֶת.
16
וַוייךְ אָבֶּער אוֹיס אוּמְוֶוערְדִיקֶע פְּלַאפְּלֶערַייעֶן; וָוארִים זֵיי פַארְמֶערְן וַוייטֶער דָאס רִשְׁעוּת,
17
אוּן זֵייעֶר וָוארְט וֶועט פַארְשְׁפְּרֵייטְן, וִוי אַ קַאלְטֶער־בְּרַאנְד. צוּ זֵיי גֶעהֶערְט הִימֶענֶעאוּס אוּן פִילֶעטוּס,
18
וָואס הָאבְּן אָפְּגֶעקֶערְט פוּן דֶעם אֶמֶת, אוּן זָאגְן, אַז תְּחִיַת־הַמֵתִים אִיז שׁוֹין גֶעוֶוען, אוּן צֶעשְׁטֶערְן דִי אֶמוּנָה פוּן טֵייל.
19
דָאךְ דֶער שְׁטַארְקֶער יְסוֹד פוּן גָאט בַּאשְׁטֵייט, אוּן הָאט דֶעם דָאזִיקְן זִיגְל: דעֶר הַאר קֶענְט דִי, וָואס גֶעהֶערְן אִים; אוּן: זָאל יֶעדֶער אֵיינֶער, וָואס רוּפְט אָן דֶעם נָאמֶען פוּן דֶעם הַאר, אָפְּקֶערְן פוּן אוּמְרֶעכְט.
20
אִין אַ גְרוֹיס הוֹיז זֶענֶען פַארַאן נִישְׁט נָאר כֵּלִים פוּן גָאלְד אוּן פוּן זִילְבֶּער, נַייעֶרְט אוֹיךְ פוּן הָאלְץ אוּן פוּן עֶרְד; אוּן טֵייל צוּם כָּבוֹד, אוּן טֵייל צוּם אוּמְכָּבוֹד.
21
דֶערִיבֶּער, אוֹיבּ עֶמִיצֶער לַייטֶערְט זִיךְ פוּן דִי דָאזִיקֶע, וֶועט עֶר זַיין אַ כֵּלִי צוּם כָּבוֹד, גֶעהֵיילִיקְט, פַּאסִיק פַאר דֶעם הַארְס נוּצְן, אָנגֶעגְרֵייט צוּ יֶעדְן גוּטְן וֶוערְק.
22
אַנְטְרִין אָבֶּער פוּן יוּגְנְט־תַּאֲווֹת, אוּן יָאג נָאךְ רֶעכְטְפַארְטִיקַייט, אֶמוּנָה, לִיבְּשַׁאפְט שָׁלוֹם מִיט דִי, וָואס רוּפְן אָן דֶעם הַאר פוּן אַ רֵיין הַארְץ.
23
וַוייך אָבֶּער אוֹיס נַארִישֶׁע אוּן אוּמְוִויסְנְדִיקֶע קַשְׁיוֹת, וַוייל דוּ וֵוייסְט, אַז זֵיי בְּרֶענְגֶען מַחְלוֹקֶת.
24
אוּן דֶעם הַארְס קְנֶעכְט דַארְף זִיךְ נִישְׁט קְרִיגְן, נַייעֶרְט זַיין מִילְד צוּ אַלֶעמֶען, פֶעאִיק צוּ לֶערְנֶען, גֶעדוּלְדִיק,
25
אוּן אִין עַנִיוֶות אוֹיסְבֶּעסֶערְן דִי וִוידֶערְשְׁפֶּענִיקֶע. אֶפְשָׁר וֶועט גָאט בַּאוִוילִיקְן, אַז זֵיי זָאלְן חַרָטָה קְרִיגְן, אוּן דֶערְקֶענֶען דֶעם אֶמֶת,
26
אוּן זֵיי וֶועלְן אַנְטְרִינֶען פוּן דֶער נֶעץ פוּן דֶעם שָׂטָן, נָאכְדֶעם וִוי זֵיי זֶענֶען דוּרְךְ אִים גֶענוּמֶען גֶעוָוארְן גֶעפַאנְגֶען פַאר זַיין רָצוֹן.