אידיש
1
פָּאוֹלוֹס, אוּן סִילְוַואנוּס, אוּן טִימָאטֶעאוּס, צוּ דֶער קְהִילָה פוּן דִי טֶעסַאלָאנִיקֶער אִין גָאט, אוּנְדְזֶער פָאטֶער, אוּן דֶעם הַאר יֵשׁוּעַ הַמָשִׁיחַ:
2
חֶסֶד צוּ אַייךְ אוּן שָׁלוֹם פוּן גָאט, דֶעם פָאטֶער, אוּן דֶעם הַאר יֵשׁוּעַ הַמָשִׁיחַ.
3
מִיר זֶענֶען מְחוּיָב תָּמִיד צוּ דַאנְקֶען גָאט פַאר אַייךְ, בְּרִידֶער, וִוי סֶע דַארְף צוּ זַיין, וָוארִים אַייעֶר אֶמוּנָה וַואקְסְט זֵייעֶר שְׁטַארְק, אוּן דִי לִיבְּשַׁאפְט פוּן יֶעדְן אֵיינֶעם פוּן אַייךְ מֶערְט זִיךְ פוּן אֵיינֶעם צוּם אַנְדֶערְן,
4
אַזוֹי, אַז מִיר אַלֵיין רִימֶען זִיךְ מִיט אַייךְ אִין דִי קְהִילוֹת פוּן גָאט פוּנְוֶועגְן אַייעֶר סַבְלָנוּת אוּן אֶמוּנָה אִין אַלֶע אַייעֶרֶע רְדִיפוֹת אוּן אִין דִי צָרוֹת, וָואס אִיר טְרָאגְט אִיבֶּער.
5
דָאס אִיז אַן אָפֶענֶער צֵייכְן פוּן דֶעם רֶעכְטְפַארְטִיקְן מִשְׁפָּט פוּן גָאט, כְּדֵי אִיר זָאלְט גֶערֶעכְנְט וֶוערְן צוּ זַיין רָאוּי פַאר דֶעם מַלְכוּת פוּן גָאט, פַאר וֶועלכְן אִיר טוּט אוֹיךְ לַיידְן;
6
בְּכֵן, אוֹיבּ עֶס אִיז רֶעכְט בַּיי גָאט צוּ פַּיין צוּ דִי, וָואס פַּיינִיקְן אַייךְ,
7
אוּן אַייךְ, וָואס זֶענְט גֶעפַּיינִיקְט, רוּה מִיט אוּנְדְז, בַּיי דֶער אַנְטְפְּלֶעקוּנְג פוּן דֶעם הַאר יֵשׁוּעַ פוּן הִימְל מִיט דִי מַלְאָכִים פוּן זַיין שְׁטַארְקַייט אִין פְלַאמִיקְן פַייעֶר,
8
בְּעֵת עֶר וֶועט פַארְגֶעלְטְן נְקָמָה צוּ דִי, וָואס קֶענֶען נִישְׁט גָאט, אוּן צוּ דִי, וָואס נִישְׁט דִי בְּשׂוּרָה פוּן אוּנְדְזֶער הַאר יֵשׁוּעַ.
9
זֵיי וֶועלְן לַיידְן דִי שְׁטְרָאף פוּן אֵייבִּיקֶער פַארְדַארְבּוּנְג פוּן פַאר דֶעם פָּנִים פוּן דֶעם הַאר אוּן פוּן דֶער הֶערְלֶעכְקַייט פוּן זַיין מַאכְט,
10
בְּעֵת עֶר וֶועט קוּמֶען פַארְהֶערְלְעכְט צוּ וֶוערְן בַּיי זַיינֶע הֵיילִיקֶע, אוּן וֶוערְן בַּאוְואוּנְדֶערְט פוּן אַלֶע גְלוֹיבִּיקֶע, וָוארִים אוּנְדְזֶער עֵדוּת בַּיי אַייךְ אִיז גֶעוֶוען בַּאגְלוֹיבְּט.
11
אִיבֶּערְדֶעם זֶענֶען מִיר אוֹיךְ תָּמִיד מִתְפַּלֵל פַאר אַייךְ, אַז אוּנְדְזֶער גָאט זָאל אַייךְ הַאלְטְן צוּ זַיין רָאוּי אִין אַייעֶר בַּארוּפוּנְג, אוּן זָאל דֶערְפִילְן מִיט שְׁטַארְקַייט יֶעדְן בַּאגֶער פוּן גוּטְסְקַייט אוּן טוּאוּנְג פוּן אֶמוּנָה,
12
כְּדֵי דֶער נָאמֶען פוּן אוּנְדְזֶער הַאר יֵשׁוּעַ זָאל זַיין אִין אַייךְ פַארְהֶערְלְעכְט, אוּן אִיר אִין אִים, לוֹיט דֶעם חֶסֶד פוּן אוּנְדְזֶער גָאט אוּן דֶעם הַאר יֵשׁוּעַ הַמָשִׁיחַ.