אידיש
1
יֶעצְט אָבֶּער וֶועגְן דִי צַייט אוּן צַייטְן, בְּרִידֶער, נֵייטִיקְט אִיר נִישְׁט, אַז אִיךְ זָאל אַייךְ דַארְפְן שְׁרַייבְּן.
2
וָוארִים אִיר אַלֵיין וֵוייסְט גַאנְץ גוּט, אַז דֶער טָאג פוּן דֶעם הַאר קוּמְט אַזוֹי וִוי אַ גַנָב אִין דֶער נַאכְט.
3
בְּעֵת זֵיי זָאגְן: פְרִידְן אוּן זִיכֶערְקַייט, דֶעמָאלְט וֶועט קוּמֶען אוֹיף זֵיי פְּלוּצִים אַ בְּרָאךְ, וִוי דִי וֵוייעֶן פוּן אַ שְׁוַויינְגֶערְדִיגְן פְרוֹי; אוּן זֵיי וֶועלְן בְּשׁוּם־אוֹפְן נִישְׁט אַנְטְרִינֶען.
4
אִיר אָבֶּער, בְּרִידֶער, זֶענְט נִישְׁט אִין דֶער פִינְצְטֶערְנִישׁ, אַז יֶענֶער טָאג זָאל אַייךְ בַּאפַאלְן וִוי אַ גַנָב;
5
וָוארִים אִיר אַלֶע זֶענְט קִינְדֶער פוּן לִיכְטִיקַייט, אוּן קִינְדֶער פוּן דֶעם טָאג; מִיר זֶענֶען נִישְׁט פוּן דֶער נַאכְט, אוֹיךְ נִישְׁט פוּן דֶער פִינְצְטֶערְנִישׁ.
6
לָאמִיר דֶערִיבֶּער נִישְׁט שְׁלָאפְן, וִוי סֶע טְוּעֶן דִי אִיבֶּערִיקֶע, נַייעֶרְט לָאמִיר וַואכְן אוּן נִיכְטֶער זַיין.
7
וָוארִים דִי, וָואס שְׁלָאפְן, שְׁלָאפְן אִין דֶער נַאכְט: אוּן דִי, וָואס זֶענֶען שִׁיכּוֹר, זֶענֶען שִׁיכּוֹר אִין דֶער נַאכְט.
8
מִיר אָבֶּער גִיהֶערְן פוּן דֶעם טָאג, לָאמִיר נִיכְטֶער זַיין, אוּן אָנְטָאן דֶעם פַּאנְצֶער פוּן אֶמוּנָה אוּן לִיבְּשַׁאפְט, אוּן פַאר אַ הֶעלְם, פוּן דִי הָאפֶענוּנְג פוּן יְשׁוּעָה.
9
וָוארִים גָאט הָאט אוּנְדְז נִישְׁט בַּאשְׁטִימְט פַאר גְרִימְצָארְן, נָאר צוּ דֶערְהַאלְטְן דִי יְשׁוּעָה דוּרְךְ אוּנְדְזֶער הַאר יֵשׁוּעַ הַמָשִׁיחַ,
10
וָואס אִיז פַאר אוּנְדְז גֶעשְׁטָארְבְּן, כְּדֵי, סַיי צוּ מִיר וַואכְן אָדֶער שְׁלָאפְן, זָאלְן מִיר לֶעבְּן אִינְאֵיינֶעם מִיט אִים.
11
בְּכֵן, טְרֵייסְט אֵיינֶער דֶעם אַנְדֶערְן, אוּן בּוֹיט אוֹיף אֵיינֶער דֶעם אַנְדֶערְן, אַזוֹי וִוי אִיר טוּט עֶס אוֹיךְ.
12
מִיר בֶּעטְן אַייךְ אָבֶּער, בְּרִידֶער, אִיר זָאלְט אַנֶערְקֶענֶען דִי, וָואס מִיעֶן זִיךְ צְוִוישְׁן אַייךְ, אוּן שְׁטֵייעֶן אִיבֶּער אַייךְ אִין דֶעם הַאר, אוּן וָואס זֶענֶען אַייךְ מַזְהִיר,
13
אוּן אַז אִיר זָאלְט פַאר זֵיי הָאבְּן דֶרֶךְ־אֶרֶץ אִין לִיבְּשַׁאפְט פוּנְוֶועגְן זֵייעֶר וֶוערְק. לֶעבְּט בְּשָׁלוֹם צְוִוישְׁן זִיךְ.
14
אוּן מִיר דֶרְמַאנֶען אַייךְ, בְּרִידֶער וָואָרְנְט דִי אוּמְאָרְנְטְלֶעכֶע, דֶערְמוּטִיקְט דִי וֵוייכְהַארְצִיקֶע, הֶעלְפְט דִי שְׁוַואכֶע, זַייט גֶעדוּלְדִיק קֶעגְן אַלֶע.
15
זֶעט אַז קֵיינֶער זָאל קֵיינֶעם נִישְׁט שְׁלֶעכְטְס פַאר שְׁלֶעכְטְס, נַייעֶרְט זוּכְט תָּמִיד צוּ טָאן גוּטְס אֵיינֶער דֶעם אַנְדֶערְן, אוּן צוּ אַלֶע מֶענְטְשְׁן.
16
זַייט תָּמִיד פְרֵיילֶעךְ,
17
זַייט מִתְפַּלֵל אָן אוֹיפְהֶער;
18
דַאנְקְט פַאר אַלְצְדִינְג; וָוארִים דָאס אִיז דֶער רָצוֹן פוּן גָאט צוּ אַייךְ אִין יֵשׁוּעַ הַמָשִׁיחַ.
19
לֶעשְׁט נִישְׁט דֶעם גֵייסְט;
20
פַארַאכְט נִישְׁט דָאס נְבִיאוֹת זָאגְן;
21
פְּרוּאוְוט אוֹיס אַלְצְדִינְג, הַאלְט פֶעסְט דָאס, וָואס אִיז גוּט;
22
דֶערְוַוייטֶערְט אַייךְ פוּן יֶעדֶער פָארְם פוּן שְׁלֶעכְטְס.
23
אוּן דֶער גָאט פוּן פְרִידְן אַלֵיין זָאל אַייךְ אִין גַאנְצְן הֵיילִיקְן; אוּן זָאל אַייעֶר גֵייסְט אוּן זֶעל אוּן גוּף זַיין אִין גַאנְצְן אָפְּגֶעהִיט אָן אַ מוּם בַּיי דֶעם קוּמֶען פוּן אוּנְדְזֶער הַאר יֵשׁוּעַ הַמָשִׁיחַ.
24
גֶעטְרַיי אִיז דֶער, וָואס הָאט אַייךְ בַּארוּפְן, אוּן וָואס וֶועט עֶס אוֹיךְ טָאן.
25
בְּרִידֶער, זַייט מִתְפַּלֵל פַאר אוּנְדְז.
26
גְרִיסְט אַלֶע בְּרִידֶער מִיט אַ הֵיילִיקְן קוּשׁ.
27
אִיךְ בַּאשְׁוֶוער אַייךְ בַּיי דֶעם הַאר, אַז דֶער דָאזִיקֶער בְּרִיוו זָאל גֶעלֵייעֶנְט וֶוערְן פַאר אַלֶע בְּרִידֶער.
28
דֶער חֶסֶד פוּן אוּנְדְזֶער הַאר יֵשׁוּעַ הַמָשִׁיחַ זָאל זַיין מִיט אַייךְ.