אידיש
1
צוּם סוֹף, בְּרִידֶער, בֶּעטְן מִיר אַייךְ אוּן זֶענֶען אַייךְ מַזְהִיר אִין דֶעם הַאר יֵשׁוּעַ, אַז אַזוֹי וִוי אִיר הָאט מְקַבְּל גֶעוֶוען פוּן אוּנְדְז וִוי אַזוֹי אִיר דַארְפְט זִיךְ פִירְן אוּן וָואוֹילְגֶעפֶעלְן וֶוערְן בַּיי גָאט, אוּן טַאקֶע אַזוֹי וִוי אִיר טוּט דָאס, זָאלְט אִיר עֶס טָאן אַלְץ מֶער אוּן מֶער.
2
וָוארִים אִיר וֵוייסְט וָואסֶער גֶעבָּאט מִיר הָאבְּן אַייךְ גֶעגֶעבְּן דוּרְךְ דֶעם הַאר יֵשׁוּעַ.
3
וָוארִים דָאס אִיז דֶער רָצוֹן פוּן גָאט, אַייעֶר הֵיילִיקַייט: אַז אִיר זָאלְט זִיךְ צוּרִיקְהַאלְטְן פוּן זְנוּת;
4
אַז יֶעדֶער אֵיינֶער פוּן אַייךְ זָאל וִויסְן וִוי אַזוֹי אַלֵיין צוּ בַּאהֶערְשְׁן זַיין אֵייגֶענֶע כֵּלִי אִין הֵיילִיקַייט אוּן כָּבוֹד;
5
נִישְׁט אִין דֶער גְלוּסְטוּנְג פוּן תַּאֲוָוה, אַזוֹי וִוי דִי גוֹייִם, וָואס קֶענֶען נִישְׁט גָאט.
6
אַז קֵיינֶער זָאל נִישְׁט עוֹבֵר זַיין אוּן קְרִיוְודֶען זַיין בְּרוּדֶער אִין דֶעם עִנְיָן; וָוארִים גָאט אִיז זִיךְ נוֹקֵם אוֹיף דֶעם אַלֶעם, אַזוֹי וִוי מִיר הָאבְּן אַייךְ אוֹיךְ פָארְאוֹיס מַזְהִיר גֶעוֶוען אוּן אוֹיפְגֶעוִויזְן.
7
וָוארִים גָאט הָאט אוּנְדְז בַּארוּפְן נִישְׁט צוּ טוּמְאָה, נַייעֶרְט צוּ קְדוּשָׁה,
8
דֶערִיבֶּער, דֶער וָואס פַארְוַוארְפְט עֶס, פַארְוַוארְפְט נִישְׁט קֵיין מֶענְטְשְׁן, נַייעֶרְט גָאט, וָואס גִיט אַייךְ זַיין רוּחַ־הַקוֹדֶשׁ.
9
אָבֶּער וֶועגְן דִי לִיבְּשַׁאפְט פוּן דִי בְּרִידֶער, דַארְפְט אִיר נִישְׁט, אַז קֵײנֶער זָאל אַייךְ שְׁרַייבְּן, וַוײל אִיר אַלֵײן הָאט זִיךְ גֶעלֶערְנְט פוּן גָאט צוּ לִיבּ הָאבְּן אֵײנֶער דֶעם אַנְדֶערְן;
10
וָוארִים אִיר טוּט עֶס אוֹיךְ בְּנוֹגֵע אַלֶע בְּרִידֶער, וָואס זֶענֶען אִין מַאקֶעדָאנְיֶע. מִיר זֶענֶען אַייךְ אָבֶּער מַזְהִיר, בְּרִידֶער, אַז אִיר זָאלְט טָאן מֶער אוּן מֶער,
11
אוּן אַז אִיר זָאלְט זִיךְ לֶערְנֶען צוּ זַיין רוּאִיק, אוּן טָאן דָאס אַייעֶרִיקֶע, אוּן צוּ אַרְבֶּעטְן מִיט אַייעֶרֶע הֶענְט, אַזוֹי וִוי מִיר הָאבְּן אַייךְ גֶעבָּאטְן,
12
כְּדֵי אִיר זָאלְט אַייךְ פִירְן רִיכְטִיק קֶעגְן דִי, וָואס זֶענֶען אִין דְרוֹיסְן, אוּן אִיר זָאלְט נִישְׁט דַארְפְן אָנְקוּמֶען צוּ קֵיינֶעם נִישְׁט.
13
אוּן מִיר וִוילְן פוּן אַייךְ נִישְׁט פַארְהוֹילְן, בְּרִידֶער, פוּנְוֶועגְן דִי, וָואס זֶענֶען אַיינְגֶעשְׁלָאפְן, כְּדֵי אִיר זָאלְט זִיךְ נִישְׁט מְצַעֶר זַיין, אַזוֹי וִוי דִי אִיבֶּערִיקֶע, וָואס הָאבְּן נִישְׁט קֵיין הָאפֶענוּנְג.
14
וָוארִים אוֹיבּ מִיר גְלוֹיבְּן, אַז יֵשׁוּעַ אִיז גֶעשְׁטָארְבְּן אוּן אִיז וִוידֶער אוֹיפְגֶעשְׁטַאנֶען, אַזוֹי וֶועט אוֹיךְ גָאט בְּרֶענְגֶען דִי, וָואס זֶענֶען אַיינְגֶעשְׁלָאפְן אִין יֵשׁוּעַ, אִינְאֵיינֶעם מִיט אִים.
15
וָוארִים דָאס זָאגְן מִיר אַייךְ דוּרְךְ דֶעם וָוארְט פוּן גָאט, אַז מִיר, וָואס לֶעבְּן, אוּן זֶענֶען אִיבֶּערְגֶעבְּלִיבְּן בִּיז אוֹיף דֶעם קוּמֶען פוּן דֶעם הַאר, וֶועלְן בְּשׁוּם־אוֹפְן זִיךְ נִישְׁט קוּמֶען פְרִיעֶר פוּן דִי, וָואס זֶענֶען אַיינְגֶעשְׁלָאפְן.
16
וָוארִים דֶער הַאר אַלֵיין וֶועט זִיךְ אַרָאפְּנִידֶערְן פוּן הִימְל מִיט אַ קְלִנְגֶעדִיקְן בַּאפֶעל, מִיט דֶעם שְׁטִימֶע פוּן דֶעם שַׂר־הַמַלְאָכִים, אוּן מִיט דֶעם שׁוֹפָר פוּן גָאט; אוּן דִי טוֹיטֶע אִין מָשִׁיחַ וֶועלְן עֶרְשְׁט אוֹיפְשְׁטֵיין;
17
דֶערְנָאךְ וֶועלְן מִיר, וָואס לֶעבְּן, וָואס זֶענֶען אִיבֶּערְגֶעבְּלִיבְּן אַרוֹיפְגֶעכַאפְּט וֶוערְן צוּזַאמֶען מִיט זֵיי אִין דִי וָואלְקְנְס, צוּ בַּאגֶעגֶענֶען דֶעם הַאר אִין דֶער לוּפְט; אוּן אַזוֹי וֶועלְן מִיר תָּמִיד זַיין מִיט דֶעם הַאר.
18
דֶערִיבֶּער, טְרֵייסְט אֵיינֶער דֶעם אַנְדֶערְן מִיט דִי דָאזִיקֶע וֶוערְטֶער.