אידיש
1
דֶערִיבֶּער, בְּעֵת מִיר הָאבְּן עֶס מֶער נִישְׁט גֶעקֶענְט דֶערְטְרָאגְן, הָאבְּן מִיר צוּפְרִידֶענֶערְהֵייט בַּאשְׁלָאסְן גֶעוָוארְן צוּ פַארְבְּלַייבְּן אַלֵיין אִין אַטֶען,
2
אוּן הָאבְּן גֶעשִׁיקְט טִימָאטֶעאוּס, אוּנְדְזֶער בְּרוּדֶער אוּן גָאטְס דִינֶער אִין דֶער בְּשׂוּרָה פוּן מָשִׁיחַ, אַייךְ צוּ שְׁטַארְקְן אוּן טְרֵייסְטְן פוּנְוֶועגְן אַייעֶר אֶמוּנָה,
3
אַז קֵיינֶער זָאל זִיךְ נִישְׁט אוֹיפְטְרֵייסְלֶען אִיבֶּער דִי דָאזִיקֶע צָרוֹת. וָוארִים אִיר אַלֵיין וֵוייסְט, אַז צוּ דֶעם זֶענֶען מִיר בַּאשְׁטִימְט גֶעוָוארְן.
4
וָוארִים בְּעֵת מִיר זֶענֶען גֶעוֶוען מִיט אַייךְ, הָאבְּן מִיר אַייךְ פָארְוֹיסְגֶעזָאגְט, אַז מִיר וֶועלְן לַיידְן צָרוֹת, אַזוֹי וִוי עֶס אִיז גֶעשֶׁען, אוּן וִוי אִיר וֵוייסְט עֶס.
5
צוּלִיבּ דֶעם, בְּעֵת אִיךְ הָאבּ עֶס שׁוֹין מֶער נִישְׁט גֶעקֶענְט דֶערְטְרָאגְן, הָאבּ אִיךְ גֶעשִׁיקְט זִיךְ צוּ דֶערְוִויסְן פוּנְוֶועגְן אַייעֶר אֶמוּנָה, טָאמֶער הָאט אַייךְ דֶער פְּרוּוֶוער דוּרְךְ עֶפֶּעס גֶעבְּרַאכְט צוּ אַ נִסָיוֹן, אוּן אוּנְדְזֶער מִי אִיז גֶעוֶוען אוּמְזִיסְט.
6
אָבֶּער אַצִינְד, בְּעֵת טִימָאטֶעאוּס אִיז גֶעקוּמֶען פוּן אַייךְ צוּ אוּנְדְז, אוּן הָאט אוּנְדְז גֶעבְּרַאכְט דִי גוּטֶע נַייעֶס פוּן אַייעֶר אֶמוּנָה אוּן לִיבְּשַׁאפְט, אוּן אַז אִיר גֶעדֶענְקְט אוּנְדְז תָּמִיד צוּם גוּטְן, אוּן בֶּענְקְט אוּנְדְז צוּ זֶען, אַזוֹי וִוי מִיר אוֹיךְ אַייךְ,
7
זֶענֶען מִיר דֶערְפַאר, בְּרִידֶער, אִיבֶּער אַייךְ גֶעטְרֵייסְט גֶעוָוארְן אִין אַלֶע אוּנְדְזֶערֶע צָרוֹת אוּן נוֹיט, דוּרְךְ אַייעֶר אֶמוּנָה;
8
וָוארִים אִיצְט לֶעבְּן מִיר, אוֹיבּ אִיר שְׁטֵייט פֶעסְט אִין דֶעם הַאר.
9
וָוארִים וָואסֶער דַאנְק קֶענֶען מִיר אָפְּגֶעבְּן גָאט פַאר אַייךְ, פַאר דֶער גַאנְצֶער פְרֵייד, מִיט וֶועלְכֶער מִיר פְרַייעֶן זִיךְ פוּן אַייעֶרְטְוֶועגְן פַאר אוּנְדְזֶער גָאט?
10
טָאג אוּן נַאכְט בֶּעטְן מִיר זֵייעֶר, אַז מִיר זָאלְן זֶען אַייעֶר פָּנִים, אוּן מִיר זָאלְן דֶערְפִילְן דָאס, וָואס אִיז גֶעמִינֶערְט אִין אַייעֶר אֶמוּנָה.
11
אוּן זָאל אוּנְדְזֶער גָאט אוּן פָאטֶער אַלֵיין, אוּן אוּנְדְזֶער הַאר יֵשׁוּעַ, פִירְן אוּנְדְזֶער וֶועג צוּ אַייךְ.
12
אוּן זָאל דֶער הַאר אַייךְ מַאכְן וַואקְסְן אוּן מֶערְן זִיךְ אִין לִיבְּשַׁאפְט אֵיינֶער צוּם אַנְדֶערְן, אוּן צוּ אַלֶע מֶענְטְשְׁן, אַזוֹי וִוי אוֹיךְ מִיר טְוּעֶן צוּ אַייךְ,
13
כְּדֵי עֶר זָאל שְׁטַארְקְן אַייעֶרֶע הֶערְצֶער, אַז זֵיי זָאלְן זַיין אָן אַ מוּם אִין הֵיילִיקַייט פַאר אוּנְדְזֶער גָאט אוּן פָאטֶער, בְּעֵת דֶעם קוּמֶען פוּן אוּנְדְזֶער הַאר יֵשׁוּעַ מִיט אַלֶע זַיינֶע הֵיילִיקֶע.