אידיש
1
פָּאוֹלוֹס, אוּן סִילְוַואנוּס, אוּן טִימָאטֶעאוּס, צוּ דֶער קְהִילָה פוּן דִי טֶעסַאלָאנִיקֶער אִין גָאט דֶעם פָאטֶער אוּן דֶעם הַאר יֵשׁוּעַ הַמָשִׁיחַ; חֶסֶד צוּ אַייךְ אוּן שָׁלוֹם.
2
מִיר דַאנְקֶען תָּמִיד גָאט פַאר אַייךְ אַלֶע, בְּעֵת מִיר דֶערְמָאנֶען אַייךְ אִין אוּנְדְזֶערֶע תְּפִילוֹת;
3
אוּן אָן אוֹיפְהֶער גֶעדֶענְקֶען מִיר פַאר גָאט, אוּנְדְזֶער פָאטֶער, אַייעֶר וֶוערְק פוּן אֶמוּנָה, אוּן מִי פוּן לִיבְּשַׁאפְט, אוּן גֶעדוּלְדִיקַייט פוּן הָאפְנוּנְג אִין אוּנְדְזֶער הַאר יֵשׁוּעַ הַמָשִׁיחַ.
4
וָוארִים מִיר וֵוייסְן, בְּרִידֶער בַּאלִיבְּט פוּן גָאט, אַייעֶר אוֹיסְדֶערְוֵויילְטְקַייט,
5
וִוי אַזוֹי אוּנְדְזֶערֶע בְּשׂוּרָה טוֹבָה אִיז צוּ אַייךְ גֶעקוּמֶען נִישְׁט נָאר אִין וָוארְט אַלֵיין, נַייעֶרְט אוֹיךְ אִין גְבוּרָה אוּן אִין דֶעם רוּחַ־הַקוֹדֶשׁ, אוּן אִין אַ סַך זִיכֶערְקַייט; אַזוֹי וִוי אִיר וֵוייסְט וָואסֶערֶע מִין מֶענְטְשְׁן מִיר הָאבְּן זִיךְ אַרוֹיסְגֶעוִויזְן קֶעגְן אַייךְ פוּן אַייעֶרְטְוֶועגְן.
6
אוּן אִיר זֶענְט גֶעוָוארְן נָאכְמַאכֶער פוּן אוּנְדְז אוּן פוּן דֶעם הַאר, בְּעֵת אִיר הָאט מְקַבְּל גֶעוֶוען דָאס וָוארְט אִין אַ סַך לַייד מִיט פְרֵייד פוּן דֶעם רוּחַ־הַקוֹדֶשׁ,
7
אַזוֹי, אַז אִיר זֶענְט גֶעוָוארְן אַ בַּיישְׁפִּיל פַאר אַלֶע, וָואס גְלוֹיבְּן אִין מַאקֶעדָאנְיֶע אוּן אִין אַכַאיָא.
8
וָוארִים פוּן אַייךְ אִיז גֶעהֶערְט גֶעוָוארְן דָאס וָוארְט פוּן גָאט, נִישְׁט נָאר אִין מַאקֶעדָאנְיֶע אוּן אַכַאיָא, נַייעֶרְט אִין אִיטְלֶעכְן אָרְט אִיז אַרוֹיסְגֶעגַאנְגֶען אַייעֶר אֶמוּנָה אִין גָאט, אַזוֹי, אַז מִיר הָאבְּן נִישְׁט נֵייטִיק עֶפֶּעס דֶערְפוּן צוּ רֶעדְן.
9
וָוארִים זֵיי אַלֵיין דֶערְצֵיילְן וֶועגְן אוּנְדְז, וָואסֶער מִין אַרַיינְגַאנְג מִיר הָאבְּן גֶעהַאט בַּיי אַייךְ, אוּן וִוי אַזוֹי אִיר הָאט אַייךְ אַוֶועקְגֶעקֶערְט פוּן אָפְּגֶעטֶער צוּ גָאט, צוּ דִינֶען אַ לֶעבֶּעדִיקְן אוּן אֶמֶתְן גָאט,
10
אוּן צוּ וַוארְטְן אוֹיף זַיין זוּן פוּן הִימְל, וֶועמֶען עֶר הָאט מְחַיֵה־מֵתִים גֶעוֶוען, אוֹיף יֵשׁוּעַ, וָואס אִיז אוּנְדְז מַצִיל פוּן דֶעם גְרִימְצָארְן, וָואס וֶועט קוּמֶען.