אידיש
1
דֶערִיבֶּער, אוֹיבּ סֶע אִיז פַארַאן אַ וָואסֶער טְרֵייסְט אִין מָשִׁיחַ, אוֹיבּ וָואסֶער נֶחָמָה פוּן לִיבְּשַׁפְט, אוֹיבּ וָואסֶער שׁוּתְּפוּת פוּן דֶעם גֵייסְט, אוֹיבּ וָואסֶערֶע בַּארֶעמְהַארְצִיקַייט אוּן רַחֲמָנוּת,
2
מַאכְט פוּל מַיין שִׂמְחָה, אַז אִיר זָאלְט זַיין פוּן דֶעם זֶעלְבְּן זִין, אוּן הָאבְּן דִי זֶעלְבֶּע לִיבְּשַׁאפְט, אוּן זַיין פוּן אֵיין גֶעמִיט, אוּן פוּן אֵיין מַחְשָׁבָה.
3
טוּט גָארְנִישְׁט דוּרְךְ מַחְלוֹקֶת, אָדֶער גַאוֶוה, נַייעֶרְט מִיט אַ נִידֶערִיק גֶעמִיט זָאל יֶעדֶער הַאלְטְן דֶעם אַנְדֶערְן פַאר בֶּעסֶער פוּן זִיךְ אַלֵיין;
4
אוּן קוּקְט נִישְׁט אִיטְלֶעכֶער נָאר אוֹיף זַיין אֵייגְנְס, נַייעֶרְט אוֹיךְ אוֹיף דֶעם אַנְדֶערְנְס.
5
הָאט דִי זֶעלְבֶּע מַחְשָׁבָה, וָואס אִיז אוֹיךְ גֶעוֶוען אִין יֵשׁוּעַ הַמָשִׁיחַ,
6
וָואס, הַגַם עֶר אִיז גֶעוֶוען אִין דֶער גֶעשְׁטַאלְט פוּן גָאט, הָאט עֶר דָאס גְלַייךְ זַיין מִיט גָאט נִישְׁט גֶעהַאלְטְן פַאר קֵיין בַּארוֹיבּוּנְג,
7
נַייעֶרְט הָאט זִיךְ אוֹיסְגֶעלֵיידִיקְט, בְּעֵת עֶר הָאט אָנְגֶענוּמֶען דִי גֶעשְׁטַאלְט פוּן אַ קְנֶעכְט, אוּן אִיז גֶעוָוארְן אִין דֶער גְלַייכְקַייט פוּן מֶענְטְשְׁן;
8
אוּן בְּעֵת עֶר אִיז גֶעפוּנֶען גֶעוָוארְן אִין דֶער פָארְם פוּן אַ מֶענְטְשְׁן, הָאט עֶר זִיךְ דֶערְנִידֶערִיקְט, אוּן אִיז גֶעוָוארְן אוּנְטֶערְטֶענִיק בִּיז צוּם טוֹיט, יָא, דֶעם טוֹיט אוֹיף דֶעם קְרֵייץ.
9
דֶערִיבֶּער הָאט אִים אוֹיךְ גָאט שְׁטַארְק דֶערְהוֹיבְּן, אוּן אִים גֶעגֶעבְּן דֶעם נָאמֶען, וָואס אִיז הֶעכֶער אִיבֶּער יֶעדְן נָאמֶען,
10
כְּדֵי אִין דֶעם נָאמֶען פוּן יֵשׁוּעַ זָאל זִיךְ בֵּייגְן יֶעדֶע קְנִי אִין הִימְל אוּן אוֹיף דֶער עֶרְד אוּן אוּנְטֶער דֶער עֶרְד,
11
אוּן יֶעדֶע צוּנְג זָאל מוֹדֶה זַיין, אַז יֵשׁוּעַ הַמָשִׁיחַ אִיז הַאר, פַאר דֶעם כָּבוֹד פוּן גָאט, דֶעם פָאטֶער.
12
בְּכֵן, מַיינֶע בַּאלִיבְּטֶע, אַזוֹי וִוי אִיר הָאט זִיךְ תָּמִיד צוּגֶעהָארְכְט, נִישְׁט נָאר אִין מַיין אָנְוֶועזְנְהַייט, נַייעֶרְט אַ סַך מֶער אַצִינְד, אִין מַיין אָפְּוֶועזְנְהַייט, זָאלְט אִיר אַייךְ מִיעֶן פַאר אַייעֶר אֵייגֶענֶער יְשׁוּעָה מִיט מוֹרֶא אוּן צִיטֶערְנִישׁ;
13
וָוארִים דָאס אִיז גָאט, וָואס וִוירְקְט אִין אַייךְ, סַיי צוּ וֶועלְן אוּן סַיי צוּ טָאן, לוֹיט זַיין וָואוֹילְגֶעפֶעלְן.
14
טוּט אַלְצְדִינְג אָן תַּרְעוּמוֹת אוּן סְפֵקוֹת,
15
כְּדֵי אִיר זָאלְט זַיין רֵיין אוּן אוּמְשׁוּלְדִיק, קִינְדֶער פוּן גָאט, אָן אַ מוּם אִין דֶער מִיט פוּן אַ פַארְקְרִימְטְן אוּן פַארְדָארְבֶּענֶעם דוֹר, צְוִוישְׁן וֶועמֶען אִיר טוּט שַׁיינֶען וִוי לִיכְט אִין דֶער וֶועלְט,
16
אוּן הַאלְט פֶעסְט דָאס וָוארְט פוּן לֶעבְּן, כְּדֵי אִיךְ זָאל מִיךְ הָאבְּן מִיט וָואס צוּ רִימֶען אִין דֶעם טָאג פוּן מָשִׁיחַ, אַז אִיךְ בִּין נִישְׁט גֶעלָאפְן אוּמְזִיסְט, אוּן הָאבּ מִיךְ אוֹיךְ נִישְׁט גֶעמִיט אוּמְזִיסְט.
17
אוּן אוֹיבּ אֲפִילוּ אִיךְ וֶוער אוֹיסְגֶעגָאסְן אוֹיף דֶעם קָרְבָּן פוּן עַבוֹדָה פַאר אַייעֶר אֶמוּנָה, פְרֵיי אִיךְ מִיךְ, אוּן בִּין מִיךְ אוֹיךְ מְשַׂמֵחַ מִיט אַייךְ אַלֶע.
18
אוּן אוֹיף דֶעם זֶעלְבְּן אוֹפְן זָאלְט אִיר אַייךְ אוֹיךְ פְרֵייעֶן, אוּן זִיךְ מְשַׂמֵחַ זַיין מִיט מִיר.
19
אוּן אִיךְ הָאף אִין דֶעם הַאר יֵשׁוּעַ, צוּ שִׁיקְן צוּ אַייךְ אִין גִיכְן טִימָאטֶעאוּס, כְּדֵי אִיךְ זָאל מִיךְ טְרֵייסְטְן, בְּעֵת אִיךְ וֶועל וִויסְן וִוי סֶע גֵייט אַייךְ.
20
וָוארִים אִיךְ הָאבּ נִישְׁט קֵיינֶעם וִוי אִים, וָואס זָאל אוֹיפְרִיכְטִיק זָארְגְן פַאר אַייעֶר מַצָב.
21
וָוארִים זֵיי אַלֶע זוּכְן דָאס אֵייגְנְס, אוּן נִישְׁט דִי זַאכְן פוּן יֵשׁוּעַ הַמָשִׁיחַ.
22
אִיר אָבֶּער וֵוייסְט זַיין אוֹיסְגֶעפְּרוּאוְוטְקַייט, אַז וִוי אַ קִינְד מִיט אַ פָאטֶער, אַזוֹי הָאט עֶר גֶעדִינְט מִיט מִיר אִין דֶער בְּשׂוּרָה טוֹבָה.
23
אִיךְ הָאף דֶערִיבֶּער אִים אַרוֹיסְצוּשִׁיקְן, אַזוֹי גִיךְ וִוי אִיךְ וֶועל זֶען וִוי סֶע הַאלְט מִיט מִיר;
24
אוּן אִיךְ בִּין בָּטוּחַ אִין דֶעם הַאר, אַז אִיךְ אַלֵיין זָאל אוֹיךְ אִין גִיכְן קוּמֶען.
25
אִיךְ הָאבּ אָבֶּער גֶעהַאלְטְן פַאר נֵייטִיק אַייךְ צוּ שִׁיקְן עֶפַּאפְרָאדִיטוּס, מַיין בְּרוּדֶער אוּן מִיטְאַרְבֶּעטֶער אוּן מִיטְקֶעמְפֶער, אוּן אַייעֶר שְׁלִיחַ אוּן בַּאדִינֶער אִין מַיין בַּאדֶערְפֶענִישׁ,
26
וַוייל עֶר הָאט גֶעבֶּענְקְט נָאךְ אַייךְ אַלֶע, אוּן הָאט זִיךְ זֵייעֶר מְצַעֶר גֶעוֶוען, מַחְמַת אִיר הָאט גֶעהֶערְט, אַז עֶר אִיז גֶעוֶוען קְרַאנְק.
27
וָוארִים עֶר אִיז טַאקֶע גֶעוֶוען קְרַאנְק, קָרוֹב־לְמִיתָה. אָבֶּער גָאט הָאט זִיךְ דֶערְבַּארֶעמְט אוֹיף אִים, אוּן נִישְׁט נָאר אוֹיף אִים אַלֵיין, נַייעֶרְט אוֹיךְ אוֹיף מִיר, כְּדֵי אִיךְ זָאל נִישְׁט הָאבְּן צַעַר אוֹיף צַעַר.
28
אִיךְ הָאבּ אִים דֶערִיבֶּער וָואס גִיכֶער גֶעשִׁיקְט, כְּדֵי, אַז אִיר וֶועט אִים וִוידֶער אַמָאל זֶען, זָאלְט אִיר אַייךְ פְרֵייעֶן, אוּן אִיךְ זָאל אוֹיךְ הָאבְּן וֵויינִיקֶער צַעַר.
29
זַייט אִים דֶערִיבֶּער מְקַבְּל־פָּנִים אִין דֶעם הַאר מִיט דֶער גַאנְצֶער שִׂמְחָה; אוּן הַאלְט אַזֶעלְכֶע מֶענְטְשְׁן בְּכָּבוֹד,
30
וָוארִים פוּנְוֶועגְן דֶעם וֶוערְק פוּן מָשִׁיחַ אִיז עֶר גֶעוֶוען נָאעֶנְט צוּם טוֹיט, בְּעֵת עֶר הָאט אַיינְגֶעשְׁטֶעלְט זַיין לֶעבְּן צוּ דֶערְפִילְן דָאס, וָואס הָאט גֶעפֶעלְט אִין אַייעֶר בַּאדִינוּנְג פַאר מִיר.