אידיש
1
קִינְדֶער, פָאלְגְט אַייעֶרֶע עֶלְטֶערְן אִין דֶעם הַאר; וָוארִים דָאס אִיז רֶעכְט.
2
גִיבּ אָפּ כָּבוֹד דַיין פָאטֶער אוּן מוּטֶער (דָאס אִיז דִי עֶרשְׁטֶע גֶעבָּאט מִיט אַ הַבְטָחָה),
3
כְּדֵי סֶע זָאל דִיר גוּט זַיין, אוּן דוּ זָאלְסְט לַאנְג לֶעבְּן אוֹיף דֶער עֶרְד.
4
אוּן אִיר, פָאטֶערְס, דֶערְצֶערְנְט נִישְׁט אַייעֶרֶע קִינְדֶער, נַייעֶרְט דֶערְצִיט זֵיי אִין מוּסְר אוּן וָוארֶענוּנְג פוּן דֶעם הַאר.
5
קְנֶעכְט, זַייט גֶעהָארְכְזַאם צוּ דִי, וָואס זֶענֶען לוֹיט דֶעם פְלֵיישׁ אַייעֶרֶע הַארְן, מִיט מוֹרֶא אוּן צִיטֶערְנִישׁ, מִיט דֶער אוֹיפְרִיכְטִיקַייט פוּן אַייעֶר הַארְץ, וִוי צוּ מָשִׁיחַ;
6
נִישְׁט אוֹיף דֶעם אוֹפְן פוּן דִינֶען פַאר דֶעם אוֹיג, וִוי דִי, וָואס וִוילְן גֶעפֶעלְן וֶוערְן מֶענְטְשְׁן, נַייעֶרְט וִוי קְנֶעכְט פוּן מָשִׁיחַ, וָואס טְוּעֶן פוּן הַארְצְן דֶעם רָצוֹן פוּן גָאט,
7
צוּ טָאן דִי אַרְבֶּעט מִיט גוּטְן רָצוֹן, וִוי פַאר דֶעם הַאר, אוּן נִישְׁט פַאר מֶענְטְשְׁן,
8
וַוייל אִיר וֵוייסְט, אַז וָואסֶער גוּטְס יֶעדֶער אֵיינֶער טוּט, דָאס זֶעלְבֶּע וֶועט עֶר קְרִיגְן צוּרִיק פוּן דֶעם הַאר, סַיי עֶר אִיז אַ קְנֶעכְט, אָדֶער פְרַיי.
9
אוּן אִיר, הַארְן, טוּט דָאס זֶעלְבֶּע פַאר זֵיי, אוּן פַארְמַיידְט דָאס דְרָאעֶן וַוייל אִיר וֵוייסְט, אַז דֶער, וָואס אִיז סַיי זֵייעֶר הַאר אוּן אַייעֶרֶער, אִיז אִין הִימְל, אוּן בַּיי אִים אִיז נִישְׁטָא קֵיין נוֹשֵׂא־פָּנִים זַיין מֶענְטְשְׁן.
10
צוּם סוֹף, זַייט גֶעשְׁטַארְקְט אִין דֶעם הַאר, אוּן אִין דֶעם כֹּחַ פוּן זַיין מַאכְט.
11
טוּט אָן דֶעם גַאנְצְן פַּאנְצֶער פוּן גָאט, כְּדֵי אִיר זָאלְט זַיין בִּיֵכוֹלְת בַּייצוּשְׁטֵיין דִי פַאלְשְׁקַייטְן פוּן דֶעם שָׂטָן.
12
וָוארִים אוּנְדְזֶער רַאנְגְלֶען אִיז נִישְׁט קֶעגְן בְּלוּט אוּן פְלֵיישׁ, נַייעֶרְט קֶעגְן דִי שָׂרִים, קֶעגְן דִי מוֹשְׁלִים, קֶעגְן דִי וֶועלְט־הֶערְשֶׁער פוּן דֶער דָאזִיקֶער פִינְצְטֶערְנִישׁ, קֶעגְן דִי גֵייסְטִיקֶע הֶערְשַׁאפְטְן פוּן רִשְׁעוּת אִין דִי הִימְלִישֶׁע מְקוֹמוֹת.
13
דֶערִיבֶּער, נֶעמְט אוֹיף אַייךְ דֶעם גַאנְצְן פַּאנְצֶער פוּן גָאט, כְּדֵי אִיר זָאלְט זַיין בִּיֵכוֹלְת אוֹיסְצוּהַאלְטְן אִין דֶעם בֵּייזְן טָאג, אוּן, נָאכְן טָאן אַלְצְדִינְג, צוּ בַּאשְׁטֵיין.
14
שְׁטֵייט דֶערִיבֶּער, אַז אִיר וֶועט הָאבְּן אָנְגֶעגוּרְט אַייעֶרֶע לֶענְדְן מִיט אֶמֶת, אוּן הָאבְּן אָנְגֶעטָאן דִי בְּרוּסְט־שִׁילְד פוּן רֶעכְטְפַארְטִיקַייט,
15
אוּן הָאבְּן בַּאשׁוּכְט אַייעֶרֶע פִיס מִיט דֶער אָנְגֶעגְרֵייטְקַייט פוּן דֶער בְּשׂוּרָה טוֹבָה פוּן שָׁלוֹם.
16
צוּ דֶעם הֵייבְּט אוֹיף דִי שִׁילְד פוּן אֶמוּנָה, מִיט וָואס אִיר וֶועט זַיין בִּיֵכוֹלְת צוּ פַארְלֶעשְׁן אַלֶע פַייעֶרִיקֶע פַיילְן פוּן דֶעם רָשָׁע.
17
אוּן נֶעמְט דֶעם הֶעלְם פוּן דֶער יְשׁוּעָה, אוּן דִי שְׁוֶוערְד פוּן דֶעם גֵייסְט, וָואס אִיז דָאס וָוארְט פוּן גָאט.
18
זַייט תָּמִיד מִתְפַּלֵל אִין דֶעם גֵייסְט, מִיט יֶעדֶער תְּפִילָה אוּן בַּקָשָׁה. אוּן וַואכְט דֶערְצוּ מִיט יֶעדֶער גֶעדוּלְדִיקַייט אוּן בַּקָשָׁה פַאר אַלֶע הֵיילִיקֶע,
19
אוּן פוּן מַיינֶעטְוֶועגְן, אַז מִיר זָאל גֶעגֶעבְּן וֶוערְן דָאס וָוארְט בַּיים עֶפֶענֶען מַיין מוֹיל, צוּ אַנְטְפְּלֶעקְן מִיט מוּטִיקַייט דֶעם סוֹד פוּן דֶער בְּשׂוּרָה טוֹבָה,
20
פַאר וֶועלְכֶער אִיךְ בִּין אַ שְׁלִיחַ אִין קֵייטְן; אוּן כְּדֵי אִיךְ זָאל רֶעדְן מוּטִיק, וִוי אִיךְ בַּאדַארְף צוּ רֶעדְן.
21
אוּן כְּדֵי אִיר זָאלְט אוֹיךְ וִויסְן וִוי סֶע גֵייט מִיר, אוּן וָואס אִיךְ טוּ, וֶועט טִיכִיקוּס, דֶער בַּאלִיבְּטֶער בְּרוּדֶער אוּן גֶעטְרַייעֶר דִינֶער פוּן דֶעם הַאר, אַייךְ מוֹדִיעַ זַיין אַלְצְדִינְג.
22
אִים הָאבּ אִיךְ גֶעשִׁיקְט צוּ אַייךְ פוּנְוֶועגְן דֶעם טַאקֶע, כְּדֵי אִיר זָאלְט וִויסְן וִוי סֶע גֵייט אוּנְדְז, אוּן כְּדֵי עֶר זָאל טְרֵייסְטְן אַייעֶרֶע הֶערְצֶער.
23
שָׁלוֹם צוּ דִי בְּרִידֶער, אוּן לִיבְּשַׁאפְט מִיט אֶמוּנָה פוּן גָאט, דֶעם פָאטֶער, אוּן דֶער הַאר יֵשׁוּעַ הַמָשִׁיחַ.
24
חֶסֶד זָאל זַיין מִיט אַלֶע דִי, וָואס הָאבְּן לִיבּ אוּנְדְזֶער הַאר יֵשׁוּעַ הַמָשִׁיחַ מִיט אַן אוּמְפַארְדַארְבְּלֶעכֶער לִיבֶּע.