אידיש
1
אִיךְ זָאג אָבֶּער, אַז כָּל־זְמַן דֶער יוֹרֶשׁ אִיז אַ קִינְד, אוּנְטֶערְשֵׁיידְט עֶר זִיךְ מִיט גָארְנִישְׁט פוּן אַ קְנֶעכְט, הַגַם עֶר אִיז הַאר פוּן אַלְץ;
2
נַייעֶרְט עֶר אִיז אוּנְטֶער אַפּוֹטרוֹפְּסִים אוּן אוֹיפְזֶעעֶרְס בִּיז צוּ דֶער צַייט, וָואס אִיז בַּאשְׁטִימְט פוּן דֶעם פָאטֶער.
3
אַזוֹי אוֹיךְ מִיר, בְּעֵת מִיר זֶענֶען גֶעוֶוען קִינְדֶער, זֶענֶען מִיר גֶעהַאלְטְן גֶעוָוארְן אִין קְנֶעכְטְשַׁאפְט אוּנְטֶער דִי עֶרְשְׁטֶע יְסוֹדוֹת פוּן דֶער וֶועלְט.
4
בְּעֵת אָבֶּער דִי צַייט אִיז גֶעוָוארְן דֶערְפִילְט, הָאט גָאט אַרוֹיסְגֶעשִׁיקְט זַיין זוּן, גֶעבּוֹירְן פוּן אַ פְרוֹי, גֶעבּוֹירְן אוּנְטֶער דֶער תּוֹרָה,
5
אַז עֶר זָאל אוֹיסְלֵייזְן דִי, וָואס זֶענֶען גֶעוֶוען אוּנְטֶער דֶער תּוֹרָה, כְּדֵי מִיר זָאלְן מְקַבְּל זַיין דָאס רֶעכְט פוּן קִינְדֶער.
6
אוּן וַוייל אִיר זֶענְט קִינְדֶער, הָאט גָאט אַרוֹיסְגֶעשִׁיקְט דֶעם גֵייסְט פוּן זַיין זוּן אִין אוּנְדְזֶערֶע הֶערְצֶער אַרַיין, וָואס רוּפְט: אַבָּא, פָאטֶער!
7
אַזוֹי, אַז דוּ בִּיסְט נִישְׁט מֶער קֵיין קְנֶעכְט, נַייעֶרְט אַ זוּן; אוּן אוֹיבּ אַ זוּן, טָא אַ יוֹרֶשׁ דוּרְךְ גָאט.
8
אָבֶּער דֶעמָאלְט, בְּעֵת אִיר הָאט גָאט נִישְׁט גֶעקֶענְט, זֶענְט אִיר גֶעוֶוען אִין קְנֶעכְטְשַׁאפְט בַּיי דִי, וָואס זֶענֶען אִין זֵייעֶר עֶצֶם נִישְׁט קֵיין גֶעטֶער.
9
אַצִינְד אָבֶּער, בְּעֵת אִיר קֶענְט גָאט, אָדֶער לִיבֶּער, אִיר זֶענְט דֶערְקֶענְט פוּן גָאט, וִוי אַזוֹי קֶערְט אִיר אַייךְ אוּם צוּרִיק צוּ דִי שְׁוַואכֶע אוּן אָרֶעמֶע יְסוֹדוֹת, צוּ וֶועלְכֶע אִיר בַּאגֶערְט צוּ זַיין אִין קְנֶעכְטְשַׁאפְט אוֹיפְסְנַיי?
10
אִיר הִיט אָפּ טֶעג, אוּן חַדָשִׁים, אוּן זְמַנִים, אוּן יָארְן.
11
אִיךְ הָאבּ מוֹרֶא פוּנְוֶועגְן אַייךְ, טָאמֶער חָלִילָה הָאבּ אִיךְ אוּמְזִיסְט אַוֶועקְגֶעשָׁאנְקֶען מִי אוֹיף אַייךְ.
12
אִיךְ בֶּעט אַייךְ, בְּרִידֶער, וֶוערְט וִוי אִיךְ בִּין, וָוארִים אוֹיךְ אִיךְ בִּין גֶעוָוארְן וִוי אִיר זֶענְט. אִיר הָאט מִיר נִישְׁט גֶעטָאן קֵיין שׁוּם שְׁלֶעכְטְס;
13
אִיר וֵוייסְט, אַז מַחְמַת אַ שְׁוַואכְקַייט אִין דֶעם לַייבּ הָאבּ אִיךְ גֶעדַרְשֶׁענְט פַאר אַייךְ דִי בְּשׂוּרָה טוֹבָה דָאס עֶרְשְׁטֶע מָאל;
14
אוּן דָאס, וָואס אִיז בַּיי אַייךְ גֶעוֶוען אַ שְׁוֶוערִיקַייט אִין מַיין לַייבּ, הָאט אִיר נִישְׁט פַארְאַכְט אוּן נִישְׁט פַארְוָוארְפְן, נַייעֶרְט אִיר הָאט מִיךְ מְקַבְּל גֶעוֶוען וִוי אַ מַלְאַךְ פוּן גָאט, וִוי יֵשׁוּעַ הַמָשִׁיחַ.
15
דֶערִיבֶּער, וואוּ אִיז יֶענֶע גֶעבֶּענְטְשְׁטְקַייט אַייעֶרֶע? וָוארִים אִיךְ זָאג אַייךְ עֵדוּת, אַז אוֹיבּ מֶעגְלֶעך, וָואלְט אִיר אַרוֹיסְגֶערִיסְן אַייעֶרֶע אוֹיגְן אוּן זֵיי מִיר גֶעגֶעבְּן.
16
צִי בִּין אִיךְ דֶערִיבֶּער גֶעוָוארְן אַייעֶר שׂוֹנֵא מִיט דֶעם זָאגְן אַייךְ דֶעם אֶמֶת?
17
זֵיי בַּאגֶערְן אַייךְ אֵייפֶערִיק אוֹיף נִישְׁט קֵיין גוּטְן אוֹפְן; יָא, זֵיי וִוילְן אַייךְ אוֹיסְשְׁלִיסְן, כְּדֵי אִיר זָאלְט זֵיי בַּאגֶערְן.
18
עֶס אִיז תָּמִיד גוּט אֵייפֶערִיק גֶעזוּכְט צוּ וֶוערְן אִין אַ גוּטֶער זַאך, אוּן נִישְׁט נָאר בְּעֵת אִיךְ בִּין מִיט אַייךְ.
19
קִינְדֶער מַיינֶע, צוּלִיבּ וֶועמֶען אִיךְ בִּין וִוידֶער אַמָאל אִין וֵוייעֶן, בִּיז מָשִׁיחַ וֶועט גֶעפוּרֶעמְט וֶוערְן אִין אַייךְ!
20
אִיךְ וָואלְט אָבֶּער וֶועלְן זַיין אָנְוֶועזְנְד מִיט אַייךְ אַצִינְד, אוּן צוּ בַּייטְן מַיין קוֹל; וָוארִים אִיךְ בִּין בַּאזָארְגְט פוּנְוֶועגְן אַייךְ.
21
זָאגְט מִיר, אִיר, וָואס בַּאגֶערְט צוּ זַיין אוּנְטֶער דֶער תּוֹרָה, צִי טוּט אִיר נִישְׁט הֶערְן דִי תּוֹרָה?
22
וָוארִים סֶע שְׁטֵייט גֶעשְׁרִיבְּן, אַז אַבְרָהָם הָאט גֶעהַאט צְוֵויי זִין, אֵיינֶעם פוּן דֶער דִינְסְט, אוּן אֵיינֶעם פוּן דֶעם פְרַייעֶן וַוייבּ.
23
אָבֶּער דֶער זוּן פוּן דֶער דִינְסְט אִיז גֶעבּוֹירְן גֶעוָוארְן לוֹיט דֶעם פְלֵיישׁ, אוּן דֶער זוּן פוּן דֶעם פְרַייעֶן וַוייבּ דוּרְךְ דֶער הַבְטָחָה.
24
דִי דָאזִיקֶע זַאכְן הָאבְּן אִין זִיךְ אַ מָשָׁל: וָוארִים דִי דָאזִיקֶע וַוייבֶּער זֶענֶען גְלַייךְ צְוֵויי בּוּנְדְן; אֵיינֶעם פוּן דֶעם בַּארְג סִינַי, וָואס גֶעבֶּערְט קִינְדֶער פַאר קְנֶעכְטְשַׁאפְט, דָאס אִיז הָגָר.
25
אוּן דִי דָאזִיקֶע הָגָר אִיז דֶער בַּארְג סִינַי אִין אַרַאבְּיֶע, אוּן אִיז גֶעגְלִיכְן דֶער אִיצְטִיקֶער יְרוּשָׁלַיִם, וָוארִים זִי אִיז אִין קְנֶעכְטְשַׁאפְט מִיט אִירֶע קִינְדֶער.
26
אָבֶּער דִי יְרוּשָׁלַיִם שֶׁל־מַעֲלָה, אִיז פְרַיי, אוּן זִי אִיז אוּנְדְזֶער מוּטֶער.
27
וָוארִים סֶע שְׁטֵייט גֶעשְׁרִיבְּן: פְרַיי דִיךְ, דוּ עַקָרָה, וָואס הָאסְט נִישְׁט גֶעבּוֹירְן, שְׁרַיי אוֹיס אוּן זִינְג, דוּ, וָואס הָאסְט נִישְׁט קֵיין וֵוייעֶן; וָוארִים מֶערֶער זֶענֶען דִי קִינְדֶער פוּן דֶער פַארְלָאזְטֶער, וִוי פוּן אִיר, וָואס הָאט אַ מַאן.
28
אוּן מִיר, בְּרִידֶער, וִוי יִצְחָק, זֶענֶען קִינְדֶער פוּן דֶער הַבְטָחָה.
29
אָבֶּער אַזוֹי וִוי דֶעמָאלְט, הָאט דֶער, וָואס אִיז גֶעבּוֹירְן גֶעוָוארְן לוֹיט דֶעם פְלֵיישׁ, גֶערוֹדֶפְט דֶעם, וָואס אִיז גֶעבּוֹירְן גֶעוָוארְן לוֹיט דֶעם גֵייסְט; אַזוֹי אִיז עֶס אוֹיךְ אַצִינְד.
30
אָבֶּער וָואס זָאגְט דֶער פָּסוּק? טְרַייבּ אַרוֹיס דִי דִינְסְט אוּן אִיר זוּן; וָוארִים דֶער זוּן פוּן דֶער דִינְסְט וֶועט נִישְׁט יַרְשֶׁענֶען מִיט דֶעם זוּן פוּן דֶעם פְרַייעֶן וַוייבּ.
31
דֶערִיבֶּער, בְּרִידֶער, מִיר זֶענֶען נִישְׁט קֵיין קִינְדֶער פוּן אַ דִינְסְט, נַייעֶרְט פוּן דֶעם פְרַייעֶן וַוייבּ.