אידיש
1
אוּן אִיךְ, פָּאוֹלוֹס, בִּין אַייךְ מַזְהִיר אַלֵיין דוּרְךְ דֶער עַנִיווּת אוּן אֵיידְלְקַייט פוּן מָשִׁיחַ, אִיךְ, וָואס אִין אַייעֶר אָנְוֶועזְנְהַייט בִּין אִיךְ קְלֵיין צְוִוישְׁן אַייךְ, אָבֶּער פוּן דֶערְוַוייטְנְס בִּין אִיךְ דְרַייסְט אוֹיף אַייךְ.
2
אִיךְ בֶּעט אַייךְ, אַז וֶוען אִיךְ וֶועל זַיין בַּיי אַייךְ, זָאל אִיךְ נִישְׁט דַארְפְן אַרוֹיסְוַוייזְן קֵיין תְּקִיפוּת מִיט דֶער זִיכֶערְקַייט, מִיט וֶועלְכֶער אִיךְ רֶעכְן צוּ זַיין שְׁטְרֶענְג קֶעגְן טֵייל, וָואס טְרַאכְטְן וֶועגְן אוּנְדְז וִוי מִיר וָואלְטְן גֶעלֶעבְּט לוֹיט דֶעם פְלֵיישׁ.
3
וָוארִים הַגַם מִיר לֶעבְּן אִין דֶעם פְלֵיישׁ, פִירְן מִיר נִישְׁט קֵיין מִלְחָמָה לוֹיט דֶעם פְלֵיישׁ,
4
וָוארִים דִי כְּלֵי־זַיִן פוּן אוּנְדְזְער מִלְחָמָה־פִירוּנג זֶענֶען נִישְׁט לוֹיט דֶעם פְלֵיישׁ, נַייעֶרְט זֶענֶען מֶעכְטִיק פַאר גָאט אַרָאפְּצוּאוַוארְפְן פֶעסְטוּנְגֶען.
5
מִיר צֶעוַוארְפְן גֶעדַאנְקֶען, אוּן יֶעדֶע הוֹיכֶע זַאך, וָואס אִיז דֶערְהוֹיבְּן קֶעגְן דֶער דֶערְקֶענְטֶענִישׁ פוּן גָאט, אוּן נֶעמֶען יֶעדֶע מַחְשָׁבָה אִין גֶעפַאנְגֶענְשַׁאפְט צוּ דֶער גֶעהָארְכְזַאמְקַייט פוּן מָשִׁיחַ,
6
אוּן זֶענֶען אָנְגֶעגְרֵייט צוּ שְׁטְרָאפְן פַאר יֶעדֶער אוּמְגֶעהָארְכְזַאמְקַייט, בְּעֵת אַייעֶר גֶעהָארְכְזַאמְקַייט וֶועט זַיין דֶערְפִילְט.
7
קוּקְט אוֹיף דֶעם, וָואס אִיז פַאר אַייעֶרֶע אוֹיגְן. אוֹיבּ עֶמִיצֶער אִיז בַּיי זִיךְ זִיכֶער, אַז עֶר גֶעהֶערְט צוּ מָשִׁיחַ, זָאל עֶר דָאס נָאכְאַמָאל אִיבֶּערְטְרַאכְטְן אִין זִיךְ אַלֵיין, אַז אַזוֹי וִוי עֶר גֶעהֶערְט צוּ מָשִׁיחַ, אַזוֹי גֶעהֶערְן אוֹיךְ מִיר.
8
וָוארִים אוֹיבּ אֲפִילוּ אִיךְ זָאל מִיךְ רִימֶען אַבִּיסְל צוּפִיל פוּנְוֶועגְן אוּנְדְזְער מַאכְט, וָואס דֶער הַאר הָאט אוּנְדְז גֶעגֶעבְּן פַאר אַייעֶר אוֹיפְבּוֹיאוּנְג, אוּן נִישְׁט פַאר אַייעֶר צֶעשְׁטֶערוּנְג, וֶועל אִיךְ נִישְׁט פַארְשֶׁעמְט וֶוערְן,
9
כְּדֵי אִיךְ זָאל נִישְׁט אוֹיסְזֶען וִוי אִיךְ וָואלְט אַייךְ וֶועלְן דֶערְשְׁרֶעקְן מִיט מַיינֶע בְּרִיוו.
10
וָוארִים זַיינֶע בְּרִיוו, זָאגְן זֵיי, זֶענֶען וִויכְטִיק אוּן שְׁטַארְק, אָבֶּער וֶוען עֶר אַלֵיין אִיז בַּיי אוּנְדְז, אִיז עֶר שְׁוַואך, אוּן זַיין רֶעדְן אִיז אָן מַמָשׁוּת.
11
זָאל אַזַא אֵיינֶער דָאס בַּארֶעכֶענֶען, אַז וָואס מִיר זֶענֶען אִין וָוארְט דוּרְךְ בְּרִיוו, וֶוען מִיר זֶענֶען אָפְּוֶועזְנְד, זֶענֶען מִיר אוֹיךְ אִין מַעֲשִׂים, וֶוען מִיר זֶענֶען אָנְוֶועזְנְד.
12
וָוארִים מִיר נֶעמֶען זִיךְ נִישְׁט אוּנְטֶער צוּ רֶעכֶענֶען, אָדֶער צוּ פַארְגְלַייכְן זִיךְ מִיט דִי, וָואס לוֹיבְּן זִיךְ אַלֵיין. שׁוֹין מִיט דֶעם, וָואס זֵיי מֶעסְטְן זִיךְ מִיט זִיךְ אַלֵיין, אוּן פַארְגְלַייכְן זִיךְ מִיט זִיךְ אַלֵיין, זֶענֶען זֵיי אָן פַארְשְׁטֶענְדֶענִישׁ.
13
מִיר אָבֶּער וֶועלְן זִיךְ נִישְׁט רִימֶען אִיבֶּער אוּנְדְזְער מָאס, נַייעֶרְט לוֹיט דֶער מָאס פוּן דֶעם גְרֶענִיץ, וָואס גָאט הָאט אוּנְדְז צוּגֶעטֵיילְט וִוי אַ מָאס, אַייךְ אֲפִילוּ צוּ דֶערְגְרֵייכְן.
14
וָוארִים מִיר שְׁטְרֶעקְן זִיךְ נִישְׁט אוֹיס צוּפִיל, גְלַייךְ וִוי מִיר וָואלְטְן נִישְׁט דֶערְגְרֵייכְט בִּיז צוּ אַייךְ, וָוארִים מִיר זֶענֶען אֲפִילוּ דֶערְגַאנְגֶען בִּיז צוּ אַייךְ אִין דֶער בְּשׂוּרָה פוּן מָשִׁיחַ.
15
מִיר רִימֶען זִיךְ נִישְׁט אִיבֶּער אוּנְדְזְער מָאס אִין אַנְדֶערֶע מֶענְטְשְׁנְס מִיאוּנְגֶען; מִיר הָאפְן אָבֶּער, אַז וָואס מֶער אַייעֶר אֶמוּנָה וֶועט וַואקְסְן, וֶועלְן מִיר גְרֶעסֶער וֶוערְן בַּיי אַייךְ לוֹיט אוּנְדְזְער גְרֶענִיץ צוּ וַוייטֶערֶער שֶׁפַע,
16
כְּדֵי צוּ אָנְזָוּאגְן דִי בְּשׂוּרָה אֲפִילוּ אִין דִי גֶעגְנְטְן וַוייטֶער פוּן אַייךְ, אוּן נִישְׁט צוּ רִימֶען זִיךְ מִיט דֶעם, וָואס אִיז אָנְגֶעגְרֵייט אִין דֶעם גְרֶענִיץ פוּן אַנְדֶערֶע.
17
דֶער אָבֶּער, וָואס טוּט זִיךְ רִימֶען, לָאז עֶר זִיךְ רִימֶען אִין גָאט.
18
וָוארִים נִישְׁט דֶער, וָואס לוֹיבְּט זִיךְ אַלֵיין אִיז בַּאוִוילִיקְט, נַייעֶרְט דֶער, וֶועמֶען גָאט לוֹיבְּט.