אידיש
1
מֶע הֶערְט אוּמֶעטוּם, אַז ס׳אִיז פַארַאן זְנוּת צְוִוישְׁן אַייךְ, אוּן אַזַא זְנוּת, וִוי עֶס אִיז אֲפִילוּ נִישְׁטָא צְוִוישְׁן דִי גֶעצְנְדִינֶער, אַז אֵיינֶער זָאל הָאבְּן זַיין פָאטֶערְס וַוייבּ.
2
אוּן אִיר זֶענְט אָנְגֶעבְּלָאזְן! הָאט אִיר נִישְׁט גֶעדַארְפְט לִיבֶּער טְרוֹיעֶרְן, אַז דֶער, וָואס אִיז בַּאגַאנְגֶען דִי דָאזִיקֶע מַעֲשֶׂה, זָאל אָפְּגֶעטָאן וֶוערְן פוּן צְוִוישְׁן אַייךְ?
3
וָוארִים הַגַם אִיךְ בִּין נִישְׁט בַּיי אַייךְ אִין גוּף, בִּין אִיךְ אָבֶּער אָנְוֶועזְנְד אִין גֵייסְט, אוּן הָאבּ שׁוֹין גֶעמִשְׁפָּט דֶעם, גְלַייךְ וִוי אִיךְ וָואלְט גֶעוֶוען אָנְוֶועזְנְד, וָואס הָאט אַזוֹינְס גֶעטָאן.
4
בְּעֵת אִיר זֶענְט פַארְזַאמְלְט אִין דֶעם נָאמֶען פוּן אוּנְדְזֶער הַאר יֵשׁוּעַ, אוּן מַיין גֵייסְט אִיז צְוִוישְׁן אַייךְ, מִיט דֶער מַאכְט פוּן אוּנְדְזֶער הַאר יֵשׁוּעַ,
5
זָאלְט אִיר אַזַא אֵיינֶעם אִיבֶּערְעֶנְטְפֶערְן צוּם שָׂטָן פַאר דֶער פַארְדַארְבּוּנְג פוּן דֶעם פְלֵיישׁ, כְּדֵי דֶער גֵייסְט זָאל נִיצוּל וֶוערְן אִין דֶעם טָאג פוּן דֶעם הַאר יֵשׁוּעַ.
6
אַייעֶר רִימֶען זִיךְ אִיז נִישְׁט גוּט. וֵוייסְט אִיר נִישְׁט, אַז אַבִּיסְל חָמֵץ מַאכְט זוֹיעֶר דָאס גַאנְצֶע טֵייג?
7
רַאמְט זְשֶׁע אוֹיס דֶעם אַלְטְן חָמֵץ, כְּדֵי אִיר זָאלְט זַיין אַ נַיי טֵייג, אַזוֹי וִוי אִיר זֶענְט נִישְׁט גֶעזַייעֶרְט. וָוארִים מָשִׁיחַ, אוּנְדְזֶער קָרְבָּן־פֶּסַח, אִיז גֶעשָׁאכְטְן גֶעוָוארְן.
8
לָאמִיר דֶערִיבֶּער הַאלְטְן יוֹם־טוֹב, נִישְׁט מִיט דֶעם אַלְטְן חָמֵץ, אוֹיךְ נִישְׁט מִיט דֶעם חָמֵץ פוּן שְׁלֶעכְטְסְקַייט אוּן רִשְׁעוּת, נַייעֶרְט מִיט דִי מַצוֹת פוּן לוֹיטֶערְקַייט אוּן אֶמֶת.
9
אִיךְ הָאבּ אַייךְ גֶעשְׁרִיבְּן אִין מַיין בְּרִיוו, נִישְׁט צוּ חַבְרְן זִיךְ מִיט קֵיין נוֹאָפִים;
10
בִּכְלַל נִישְׁט מִיט דִי נוֹאָפִים פוּן דֶער וֶועלְט, אָדֶער מִיט דִי גֵייצִיקֶע אוּן גַזְלָנִים, אָדֶער מִיט גֶעצְנְדִינֶער; וָוארִים דֶעמָאלְט וָואלְט אִיר גֶעמוּזְט אַרוֹיסְגֵיין פוּן דֶער וֶועלְט.
11
אָבֶּער אִיךְ הָאבּ אַייךְ גִיכֶער גֶעשְׁרִיבְּן, נִישְׁט צוּ חַבְרְן זִיךְ מִיט עֶמִיצְן, וָואס וֶוערְט אָנְגֶערוּפְן אַ בְּרוּדֶער, אוּן וָואס אִיז אַ נוֹאֵף, אָדֶער גֵייצִיק, אָדֶער אַ גֶעצְנְדִינֶער, אָדֶער אַ לֶעסְטֶערֶער, אָדֶער אַ שִׁיכּוֹר, אָדֶער אַ גַזְלָן - מִיט אַזַא אֵיינֶעם זָאלְט אִיר אֲפִילוּ נִישְׁט עֶסְן.
12
וָוארִים וָואס הָאבּ אִיךְ צוּ טָאן מִיט מִשְׁפָּטְן דִי, וָואס זֶענֶען אִין דְרוֹיסְן? זָאלְט אִיר נִישְׁט מִשְׁפָּטְן דִי, וָואס זֶענֶען דְרִינֶען?
13
דִי דְרוֹיסְנְדִיקֶע וֶועט גָאט מִשְׁפָּטְן. רַאמְט אוֹיס דֶעם רָשָׁע פוּן צְוִוישְׁן אַייךְ.