אידיש
1
אִיךְ וִויל אַז אִיר זָאלְט וִויסְן, בְּרִידֶער, אַז אוּנְדְזֶערֶע אָבוֹת זֶענֶען אַלֶע גֶעוֶוען אוּנְטֶער דֶעם וָואלְקְן, אוּן אַלֶע זֶענֶען אַרִיבֶּערְגֶעגַאנְגֶען אִיבֶּער דֶעם יַם;
2
אוּן אַלֶע זֶענֶען גֶעטוֹבְלְט גֶעוָוארְן אוֹיף מֹשֶׁה אִין דֶעם וָואלְקְן אוּן אִין דֶעם יַם,
3
אוּן הָאבְּן אַלֶע גֶעגֶעסְן דִי זֶעלְבֶּע גֵייסְטִיקֶע שְׁפַּייז,
4
אוּן הָאבְּן אַלֶע גֶעטְרוּנְקֶען דֶעם זֶעלְבְּן גֵייסְטִיקְן טְרוּנְק; וָוארִים זֵיי הָאבְּן גֶעטְרוּנְקֶען פוּן אַ גֵייסְטִיקְן פֶעלְזְן, וָואס אִיז זֵיי נָאכְגֶעגַאנְגֶען, אוּן דֶער פֶעלְז אִיז גֶעוֶוען מָשִׁיחַ.
5
דָאךְ זֶענֶען דִי מֵיינְסְטֶע פוּן זֵיי נִישְׁט וָואוֹילְגֶעפֶעלְן גֶעוָוארְן גָאט; וָוארִים זֵיי זֶענֶען אוּמְגֶעקוּמֶען אִין דֶער מִדְבָּר.
6
אוּן דִי דָאזִיקֶע זַאכְן זֶענֶען גֶעוֶוען בַּיישְׁפִּילְן פַאר אוּנְדְז, כְּדֵי מִיר זָאלְן נִישְׁט גְלוּסְטְן נָאךְ קֵיין שְׁלֶעכְטִיקַייטְן, אַזוֹי וִוי זֵיי הָאבְּן גֶעגְלוּסְט.
7
זַייט אוֹיךְ נִישְׁט קֵיין גֶעצְנְדִינֶער, וִוי טֵייל פוּן זֵיי זֶענֶען גֶעוֶוען; וִוי סֶע שְׁטֵייט גֶעשְׁרִיבְּן: דָאס פָאלְק הָאט זִיךְ אַנִידֶערְגֶעזֶעצְט צוּ עֶסְן אוּן טְרִינְקֶען, אוּן זֵיי זֶענֶען אוֹיפְגֶעשְׁטַאנֶען צוּ שְׁפִּילְן זִיךְ.
8
לָאמִיר אוֹיךְ נִישְׁט בַּאגֵיין קֵיין נִיאוּף, וִוי טֵייל פוּן זֵיי זֶענֶען בַּאגַאנְגֶען, אוּן זֶענֶען גֶעפַאלְן אִין אֵיין טָאג דְרַיי אוּן צְוַואנְצִיק טוֹיזְנְט.
9
לָאמִיר אוֹיךְ נִישְׁט אוֹיסְפְּרוּאוְון גָאט, וִוי טֵייל פוּן זֵיי הָאבְּן אִים אוֹיסְגֶעפְּרוּאוְוט, אוּן זֶענֶען אוּמְגֶעקוּמֶען דוּרְךְ דִי שְׁלַאנְגֶען.
10
אִיר זָאלְט אוֹיךְ נִישְׁט מוּרְמְלֶען, וִוי טֵייל פוּן זֵיי הָאבְּן גֶעמוּרְמְלְט, אוּן זֶענֶען אוּמְגֶעקוּמֶען דוּרְךְ דֶעם מַשְׁחִית.
11
אוּן דִי דָאזִיקֶע זַאכְן זֶענֶען גֶעשֶׁען צוּ זֵיי פַאר אַ בַּיישְׁפִּיל; אוּן זֵיי זֶענֶען פַארְשְׁרִיבְּן גֶעוָוארְן צוּ זַיין אַ וָוארֶענוּנְג פַאר אוּנְדְז, אוֹיף וֶועמֶען דֶער סוֹף פוּן דִי צַייטְן הָאט גֶענֶעעֶנְט.
12
בְּכֵן, לָאז דֶער, וָואס מֵיינְט, אַז עֶר שְׁטֵייט, אַכְטוּנְג גֶעבְּן, אַז עֶר זָאל נִישְׁט פַאלְן.
13
סֶע הָאט אַייךְ קֵיין שׁוּם נִסָיוֹן נִישְׁט גֶעטְרָאפְן, סַיידְן אַזַא וִוי אַ מֶענְטְשׁ קָאן פַארְטְרָאגְן. אָבֶּער גָאט אִיז גֶעטְרַיי, וָואס וֶועט נִישְׁט לָאזְן, אַז אִיר זָאלְט גֶעפְּרוּאְוְוט וֶוערְן אִיבֶּער אַייעֶרֶע כּוֹחוֹת; נַייעֶרְט עֶר וֶועט מִיט דֶעם נִסָיוֹן אוֹיךְ מַאכְן אַן אוֹיסְוֶועג, כְּדֵי אִיר זָאלְט אִים קָאנֶען דֶערְטְרָאגְן.
14
אִיבֶּערְדֶעם, מַיינֶע בַּאלִיבְּטֶע, אַנְטְלוֹיפְט פוּן גֶעצְנְדִינֶערַיי.
15
אִיךְ רֶעד וִוי צוּ פַארְשְׁטֶענְדִיקֶע; מִשְׁפָּט אִיר אַלֵיין, וָואס אִיךְ זָאג.
16
דֶער כּוֹס פוּן בְּרָכָה, אִיבֶּער וֶועלכְן מִיר מַאכְן אַ בְּרָכָה, אִיז דָאס נִישְׁט קֵיין בַּאהֶעפְטוּנְג מִיט דֶעם בְּלוּט פוּן מָשִׁיחַ? דִי מַצָה, וָואס מִיר בְּרֶעכְן אָפּ, אִיז דָאס נִישְׁט קֵיין בַּאהֶעפְטוּנְג מִיט דֶעם לַייבּ פוּן מָשִׁיחַ?
17
אוּן מַחְמַת עֶס אִיז אֵיין מַצָה, זֶענֶען מִיר, וָואס זֶענֶען אַ סַך, אֵיין לַייבּ, וָוארִים מִיר אַלֶע הָאבְּן אַ חֵלֶק אִין דֶער אֵיינֶער מַצָה.
18
זֶעט דִי נַאטִירְלֶעכֶע בְּנֵי־יִשְׂרָאֵל לֹויט דֶער פְלֵיישׁ: צִי זֶענֶען זֵיי, וָואס עֶסְן דִי קָרְבָּנוֹת, נִישְׁט בַּאהֶעפְט מִיט דֶעם מִזְבֵּחַ?
19
דֶערִיבֶּער, וָואס זָאל אִיךְ זָאגְן? אַז אַ זַאך, וָואס מֶען הָאט מַקְרִיב גֶעוֶוען צוּ אָפְּגֶעטֶער הָאט אַ מַמָשׁוּת, אָדֶער אַז אַן אָפְּגָאט הָאט אַ מַמָשׁוּת?
20
אִיךְ זָאג גִיכֶער, אַז דָאס, וָואס דִי גֶעצְנְדִינֶער זֶענֶען מַקְרִיב, זֶענֶען זֵיי מַקְרִיב צוּ רוּחוֹת, אוּן נִישְׁט צוּ גָאט. אוּן אִיךְ וִויל נִישְׁט, אַז אִיר זָאלְט פִירְן חַבְרוּתֶעשַׁאפְט מִיט רוּחוֹת.
21
אִיר קֶענְט נִישְׁט טְרִינְקֶען דֶעם כּוֹס פוּן דֶעם הַאר, אוּן דֶעם כּוֹס פוּן רוּחוֹת; אִיר קֶענְט נִישְׁט הָאבְּן אַ חֵלֶק אִין דֶעם טִישׁ פוּן דֶעם הַאר, אוּן אִין דֶעם טִישׁ פוּן רוּחוֹת.
22
אָדֶער זָאלְן מִיר דֶערְצֶערֶענֶען דֶעם הַאר צוּ קִנְאָה? זֶענֶען מִיר שְׁטַארְקֶער פוּן אִים?
23
אַלְצְדִינְג אִיז דֶערְלוֹיבְּט, אָבֶּער נִישְׁט אַלְצְדִינְג אִיז נוּצְלֶעך. אַלְצְדִינְג אִיז דֶערְלוֹיבְּט, אָבֶּער נִישְׁט אַלְצְדִינְג בּוֹיט אוֹיף.
24
זָאל קֵיינֶער נִישְׁט זוּכְן זַיין אֵייגֶענֶע טוֹבָה, נַייעֶרְט יֶעדֶער זַיין חַבֵר׳ס.
25
אַלְץ, וָואס סֶע וֶוערְט פַארְקוֹיפְט אִין דִי יַאטְקֶעס, עֶסְט, אוּן פְרֶעגְט נִישְׁט קֵיין שְׁאֵלָה פוּן גֶעוִויסְנְוֶועגְן;
26
וָוארִים דִי עֶרְד גֶעהֶערְט צוּ גָאט, אוּן דִי פוּלְקַייט פוּן אִיר.
27
אוּן אוֹיבּ אֵיינֶער פוּן דִי, וָואס גְלוֹיבְּן נִישְׁט, פַארְבֶּעט אַייךְ אוֹיף אַ סְעוּדָה, אוּן אִיר הָאט בְּדֵעָה צוּ גֵיין, זָאלְט אִיר עֶסְן אַלְץ, וָואס סֶע וֶוערְט גֶעשְׁטֶעלְט פַאר אַייךְ, אוּן פְרֶעגְט נִישְׁט קֵיין שְׁאֵלָה פוּן גֶעוִויסְנְוֶועגְן.
28
נָאר אוֹיבּ עֶמִיצֶער זָאגְט צוּ אַייךְ: דָאס הָאט מֶען מַקְרִיב גֶעוֶוען פַאר אַ קָרְבָּן, טָא עֶסְט עֶס נִישְׁט, פוּן זַיינֶעטְוֶועגְן, וָואס הָאט עֶס אָנְגֶעוִויזְן, אוּן פוּן גֶעוִויסְנְוֶועגְן.
29
אִיךְ מַיין נִישְׁט דָאס אֵייגֶענֶע גֶעוִויסְן, נַייעֶרְט דֶעם אַנְדֶערְנְס. וָוארִים פַארְוָואס זָאל מַיין פְרַייהַייט גֶעמִשְׁפָּט וֶוערְן פוּן אַן אַנְדֶערְנְס גֶעוִויסְן?
30
אוּן אוֹיבּ אִיךְ גֶענִיס מִיט אַ בְּרָכָה, פַארְוָואס זָאל אִיךְ בַּארֶעדְט וֶוערְן פוּנְוֶועגְן דֶעם, פַאר וֶועלכְן אִיךְ מַאך אַ בְּרָכָה?
31
בְּכֵן, צִי אִיר עֶסְט, אָדֶער טְרִינְקְט, אָדֶער וָואס נָאר אִיר טוּט, טוּט אַלְץ פַאר דֶעם כָּבוֹד פוּן גָאט.
32
גִיט נִישְׁט קֵיין גֶעלֶעגְנְהֵייט פוּן שְׁטְרוֹיכְלוּנְג דִי יִידְן, אָדֶער דִי גוֹייִם, אָדֶער דֶער קְהִילָה פוּן גָאט;
33
פּוּנְקְט וִוי אוֹיךְ אִיךְ בַּאוִוילִיק אַלֶע מֶענְטְשְׁן אִין אַלְצְדִינְג, אוּן זוּך נִישְׁט מַיין אֵייגֶענֶעם נוּצְן, נַייעֶרְט דֶעם נוּצְן פוּן דֶעם רַבִּים, כְּדֵי זֵיי זָאלְן גֶערַאטֶעוֶועט וֶוערְן.