אידיש
1
אוּן שָׁאוּל הָאט נָאךְ וַוייטֶער גֶעאָטֶעמְט מִיט כַּעַס אוּן רְצִיחָה קֶעגְן דִי תַּלְמִידִים פוּן דֶעם הַאר, אוּן עֶר אִיז גֶעגַאנְגֶען צוּם כֹּהֵן־גָדוֹל,
2
אוּן הָאט גֶעבֶּעטְן בַּיי אִים בְּרִיוו צוּ דִי שׁוּלְן אִין דַמֶּשֶׂק, כְּדֵי אוֹיבּ עֶר וֶועט גֶעפִינֶען עֶטְלֶעכֶע, וָואס זֶענֶען פוּן דֶעם דֶרֶךְ, סַיי מֶענֶער, סַיי פְרוֹיעֶן, זָאל עֶר זֵיי קֶענֶען בְּרֶענְגֶען גֶעבּוּנְדְן קֵיין יְרוּשָׁלַיִם.
3
אוּן בְּעֵת עֶר אִיז גֶעגַאנְגֶען, הָאט עֶר זִיךְ דֶערְנֶענְטֶערְט צוּ דַמֶּשֶׂק, אוּן פְּלוּצִים הָאט אַרוּם אִים גֶעשַׁיינְט אַ לִיכְט פוּן הִימְל אַרוֹיס.
4
אוּן עֶר אִיז גֶעפַאלְן אוֹיף דֶער עֶרְד, אוּן הָאט גֶעהֶערְט אַ קוֹל זָאגְן צוּ אִים: שָׁאוּל, שָׁאוּל, פַארְוָואס רוֹדֶפְסְט דִי מִיךְ?
5
הָאט עֶר גֶעזָאגְט: וֶוער בִּיסְטוּ, הַאר? אוּן עֶר הָאט גֶעזָאגְט: אִיךְ בִּין יֵשׁוּעַ, וֶועמֶען דוּ רוֹדֶפְסְט.
6
אָבֶּער שְׁטֵיי אוֹיף, אוּן גֵיי אַרַיין אִין דֶער שְׁטָאט, אוּן סֶע וֶועט דִיר גֶעזָאגְט וֶוערְן וָואס דוּ זָאלְסְט טָאן.
7
אוּן דִי מֶענְטְשְׁן, וָואס זֶענֶען מִיט אִים גֶעגַאנְגֶען, זֶענֶען גֶעבְּלִיבְּן אָן לָשׁוֹן, בְּעֵת זֵיי הָאבְּן גֶעהֶערְט דָאס קוֹל, אָבֶּער הָאבְּן קֵיינֶעם נִישְׁט גֶעזֶען.
8
אוּן שָׁאוּל אִיז אוֹיפְגֶעשְׁטַאנֶען פוּן דֶער עֶרְד; אוּן בְּעֵת זַיינֶע אוֹיגְן זֶענֶען גֶעעֶפְנְט גֶעוָוארְן, הָאט עֶר גָארְנִישְׁט גֶעזֶען. אוּן זֵיי הָאבְּן אִים גֶעפִירְט בַּיי דֶער הַאנְט, אוּן הָאבְּן אִים גֶעבְּרַאכְט קֵיין דַמֶּשֶׂק.
9
אוּן עֶר אִיז גֶעוֶוען דְרַיי טֶעג אָן רְאִיָה, אוּן הָאט נִישְׁט גֶעגֶעסְן, אוּן נִישְׁט גֶעטְרוּנְקֶען.
10
אוּן עֶס אִיז גֶעוֶוען אִין דַמֶּשֶׂק אֵיינֶער אַ תַּלְמִיד, וָואס הָאט גֶעהֵייסְן חַנַנְיָה. אוּן דֶער הַאר הָאט צוּ אִים גֶעזָאגְט אִין אַ זֶעאוּנְג: חַנַנְיָה! אוּן עֶר הָאט גֶעזָאגְט: אָט בִּין אִיךְ, הַאר.
11
אוּן דֶער הַאר הָאט צוּ אִים גֶעזָאגְט: שְׁטֵיי אוֹיף, אוּן גֵיי צוּ דֶער גַאס, וָואס מֶען רוּפְט דִי גְלַייכֶע גַאס, אוּן פְרֶעג אִין דֶעם הוֹיז פוּן יְהוּדָה אוֹיף אֵיינֶעם מִיטְן נָאמֶען שָׁאוּל פוּן טַארְסוּס. וָוארִים זֶע, עֶר טוּט מִתְפַּלֵל זַיין;
12
אוּן עֶר הָאט גֶעזֶען אִין דֶער זֶעאוּנְג וִוי אַ מַאן, מִיטְן נָאמֶען חַנַנְיָה, טוּט אַרַיינְקוּמֶען אוּן אַרוֹיפְלֵייגְן אוֹיף אִים זַיינֶע הֶענְט, כְּדֵי עֶר זָאל קְרִיגְן זַיין רְאִיָה.
13
אָבֶּער חַנַנְיָה הָאט גֶעעֶנְטְפֶערְט: הַאר, אִיךְ הָאבּ גֶעהֶערְט אַ סַך וֶועגְן דֶעם דָאזִיקְן מֶענְטְשְׁן, וִויפְל רִשְׁעוּת עֶר הָאט גֶעטָאן דַיינֶע הֵיילִיקֶע אִין יְרוּשָׁלַיִם;
14
אוּן אוֹיךְ דָא הָאט עֶר רְשׁוּת פוּן דִי רָאשֵׁי־כֹּהַנִים צוּ בִּינְדְן אַלֶע, וָואס רוּפְן אָן דַיין נָאמֶען.
15
אוּן דֶער הַאר הָאט צוּ אִים גֶעזָאגְט: גֵיי, וָוארִים עֶר אִיז פַאר מִיר אַן אוֹיסְדֶערְוֵויילְטֶע כֵּלִי, צוּ טְרָאגְן מַיין נָאמֶען פַאר דִי אוּמוֹת אוּן מְלָכִים, אוּן פַאר דִי קִינְדֶער פוּן יִשְׂרָאֵל;
16
וָוארִים אִיךְ וֶועל אִים וַוייזְן וִויפְל עֶר מוּז לַיידְן פוּן מַיין נָאמֶענְוֶועגְן.
17
אוּן חַנַנְיָה הָאט אָפְּגֶעקֶערְט, אוּן עֶר אִיז אַרַיינְגֶעגַאנְגֶען אִין דֶעם הוֹיז אַרַיין, אוּן הָאט אַרוֹיפְגֶעלֵייגְט אוֹיף אִים זַיינֶע הֶענְט, אוּן גֶעזָאגְט: בְּרוּדֶער שָׁאוּל, דֶער הַאר יֵשׁוּעַ, וָואס הָאט זִיךְ אַנְטְפְּלֶעקְט צוּ דִיר אוֹיף דֶעם וֶועג, אוֹיף וֶועלְכְן דוּ בִּיסְט גֶעקוּמֶען, הָאט מִיךְ גֶעשִׁיקְט, אַז דוּ זָאלְסְט קְרִיגְן דַיין רְאִיָה, אוּן וֶוערְן פוּל מִיט דֶעם רוּחַ־הַקוֹדֶשׁ.
18
אוּן סֶע זֶענֶען תֵּיכֵּף אַרָאפְּגֶעפַאלְן פוּן זַיינֶע אוֹיגְן עֶפֶּעס וִוי שׁוּפְּן, אוּן עֶר הָאט בַּאקוּמֶען זַיין רְאִיָה. אוּן עֶר אִיז אוֹיפְגֶעשְׁטַאנֶען אוּן אִיז גֶעטוֹבְלְט גֶעוָוארְן,
19
אוּן הָאט גֶענוּמֶען שְׁפַּייז אוּן אִיז גֶעשְׁטַארְקְט גֶעוָוארְן. אוּן עֶר אִיז גֶעוֶוען עֶטְלֶעכֶע טֶעג מִיט דִי תַּלְמִידִים אִין דַמֶּשֶׂק.
20
אוּן עֶר הָאט תֵּיכֵּף אִין דִי שׁוּלְן גֶענוּמֶען דַרְשֶׁענֶען וֶועגְן יֵשׁוּעַ, אַז עֶר אִיז דֶער בֶּן־אֱלֹהִים.
21
אוּן אַלֶע, וָואס הָאבְּן אִים גֶעהֶערְט, זֶענֶען נִשְׁתּוֹמְם גֶעוָוארְן, אוּן הָאבְּן גֶעזָאגְט: אִיז דָאס נִישְׁט דֶער, וָואס הָאט אִין יְרוּשָׁלַיִם פַארְטִילִיקְט דִי, וָואס הָאבְּן גֶערוּפְן צוּ דֶעם דָאזִיקְן נָאמֶען, אוּן אִיז אוֹיךְ דָא אַהֶערְגֶעקוּמֶען מִיט דֶער אֵייגֶענֶער דֵעָה, כְּדֵי עֶר זָאל זֵיי בְּרֶענְגֶען גֶעבּוּנְדְן פַאר דִי רָאשֵׁי־כֹּהַנִים?
22
אָבֶּער שָׁאוּל הָאט זִיךְ אַלְץ מֶער גֶעשְׁטַארְקְט, אוּן הָאט גֶעמַאכְט אַ בֶּהָלָה צְוִוישְׁן דִי יִידְן פוּן דַמֶּשֶׂק, אוּן הָאט בַּאוִויזְן, אַז יֵשׁוּעַ אִיז דֶער מָשִׁיחַ.
23
אוּן אַז עֶס זֶענֶען פַארְבַּיי אַ סַך טֶעג, הָאבְּן דִי יִידְן זִיךְ אַן עֵצָה גֶעהַאלְטֶען, אִים צוּ טֵייטְן,
24
אָבֶּער זֵייעֶר פַארְשְׁוֶוערוּנְג אִיז שָׁאוּל בַּאקַאנְט גֶעוָוארְן. אוּן זֵיי הָאבְּן אוֹיךְ גֶעהִיט דִי טוֹיעֶרְן טָאג אוּן נַאכְט, כְּדֵי אִים צוּ טֵייטְן.
25
אָבֶּער זַיינֶע תַּלְמִידִים הָאבְּן אִים גֶענוּמֶען בַּיינַאכְט, אוּן הָאבְּן אִים אַרָאפְּגֶעלָאזְט פוּן דֶער מוֹיעֶר אִין אַ קָארְבּ.
26
אוּן אַז עֶר אִיז גֶעקוּמֶען קֵיין יְרוּשָׁלַיִם, הָאט עֶר גֶעוָואלְט צוּשְׁטֵיין צוּ דִי תַּלְמִידִים; אוּן זֵיי הָאבְּן אַלֶע מוֹרֶא גֶעהַאט פַאר אִים, וַוייל זֵיי הָאבְּן נִישְׁט גֶעגְלוֹיבְּט, אַז עֶר אִיז אַ תַּלְמִיד.
27
אָבֶּער בַּר־נַבָּא הָאט אִים גֶענוּמֶען אוּן הָאט אִים גֶעבְּרַאכְט צוּ דִי שְׁלִיחִים, אוּן הָאט זֵיי דֶערְצֵיילְט, וִויאַזוֹי עֶר הָאט גֶעזֶען דֶעם הַאר אוֹיף דֶעם וֶועג, אוּן אַז עֶר הָאט צוּ אִים גֶערֶעדְט, אוּן וִויאַזוֹי עֶר הָאט אִין דַמֶּשֶׂק מוּטִיק גֶערֶעדְט אִין דֶעם נָאמֶען פוּן יֵשׁוּעַ.
28
אוּן עֶר אִיז מִיט זֵיי אַרַיינְגֶעגַאנְגֶען אוּן אַרוֹיסְגֶעגַאנְגֶען אִין יְרוּשָׁלַיִם,
29
אוּן הָאט מוּטִיק גֶעדַרְשְׁנְט אִין דֶעם נָאמֶען פוּן דֶעם הַאר, אוּן עֶר הָאט גֶערֶעדְט אוּן זִיךְ מִתְוַוכֵּחַ גֶעוֶוען מִיט דִי גְרִיכִישֶׁע יִידְן; אָבֶּער זֵיי הָאבְּן גֶעטְרַאכְט, אִים צוּ טֵייטְן,
30
אוּן אַז דִי בְּרִידֶער זֶענֶען דָאס גֶעוָואר גֶעוָוארְן, הָאבְּן זֵיי אִים אַרָאפְּגֶעבְּרַאכְט קֵיין קֵיסַרְיָה, אוּן הָאבְּן אִים אַוֶועקְגֶעשִׁיקְט קֵיין טַארְסוּס.
31
אוּן דִי קְהִילָה אִיבֶּער גַאנְץ יְהוּדָה, אוּן גָלִיל, אוּן שׁוֹמְרוֹן, הָאט גֶעהַאט שָׁלוֹם, אוּן הָאט זִיךְ גֶעבּוֹיט, אוּן אִיז גֶעגַאנְגֶען אִין דֶער מוֹרֶא פוּן דֶעם הַאר, אוּן דוּרְךְ דֶער נֶחָמָה פוּן דֶעם רוּחַ־הַקוֹדֶשׁ הָאט זִי זִיךְ גֶעמֶערְט.
32
אוּן עֶס אִיז גֶעוֶוען, בְּעֵת פֶּעטְרוֹס אִיז גֶעגַאנְגֶען פוּן אָרְט צוּ אָרְט, הָאט עֶר אוֹיךְ אַרָאפְּגֶענִידֶערְט צוּ דִי הֵיילִיקֶע, וָואס הָאבְּן גֶעוְואוֹינְט אִין לוֹד.
33
אוּן עֶר הָאט דָארְטְן גֶעפוּנֶען אֵיינֶעם אַ מֶענְטְשׁ מִיטְן נָאמֶען עֶנֶעאַס, וָואס אִיז זַייט אַכְט יָאר גֶעלֶעגְן אוֹיף זַיין גֶעלֶעגֶער; וָוארִים עֶר אִיז גֶעוֶוען גֶעלֵיימְט.
34
אוּן פֶּעטְרוֹס הָאט צוּ אִים גֶעזָאגְט: עֶנֶעאַס, יֵשׁוּעַ הַמָשִׁיחַ הֵיילְט דִיךְ; שְׁטֵיי אוֹיף, אוּן פַארְבֶּעט דַיין גֶעלֶעגֶער. אוּן עֶר אִיז תֵּיכֵּף אוֹיפְגֶעשְׁטַאנֶען.
35
אוּן אַלֶע, וָואס הָאבְּן גֶעוְואוֹינְט אִין לוֹד אוּן אִין שָׁרוֹן הָאבְּן אִים גֶעזֶען, אוּן הָאבְּן זִיךְ גֶעקֶערְט צוּ דֶעם הַאר.
36
אוּן עֶס אִיז גֶעוֶוען אִין יָפוֹ אֵיינֶע אַ תַּלְמִידָה מִיטְן נָאמֶען טָבִּיתָא, וָואס אִיז טַייטְשׁ: צְבִיָה. זִי אִיז גֶעוֶוען פוּל מִיט מַעֲשִׂים־טוֹבִים אוּן צְדָקָה, וָואס זִי הָאט גֶעטָאן.
37
אוּן עֶס אִיז גֶעוֶוען אִין יֶענֶע טֶעג, אַז זִי אִיז קְרַאנְק גֶעוָוארְן אוּן אִיז גֶעשְׁטָארְבְּן. אוּן אַז זֵיי הָאבְּן זִי מְטַהֵר גֶעוֶוען, הָאבְּן זֵיי זִי גֶעלֵייגְט אִין אַן אוֹיבֶּערְשְׁטֶער שְׁטוּבּ.
38
אוּן הֱיוֹת וִוי לוֹד אִיז גֶעוֶוען נָאעֶנְט פוּן יָפוֹ, אוּן דִי תַּלְמִידִים הָאבְּן גֶעהֶערְט, אַז פֶּעטְרוֹס אִיז דָארְטְן, הָאבְּן זֵיי גֶעשִׁיקְט צוּ אִים צְוֵויי מֶענְטְשְׁן אוּן אִים גֶעבֶּעטְן: פַארְזַאם נִישְׁט צוּ קוּמֶען צוּ אוּנְדְז.
39
אוּן פֶּעטְרוֹס אִיז אוֹיפְגֶעשְׁטַאנֶען אוּן אִיז מִיט זֵיי גֶעגַאנְגֶען. אוּן וֶוען עֶר אִיז גֶעקוּמֶען, הָאבְּן זֵיי אִים גֶעבְּרַאכְט אִין דֶער אוֹיבֶּערְשְׁטֶער שְׁטוּבּ. אוּן אַלֶע אַלְמָנוֹת זֶענֶען גֶעשְׁטַאנֶען אַרוּם אִים אוּן הָאבְּן גֶעוֵויינְט, אוּן אִים גֶעוִויזְן דִי רֶעק אוּן מַלְבּוּשִׁים, וָואס צְבִיָה הָאט גֶעמַאכְט, בְּעֵת זִי אִיז מִיט זֵיי גֶעוֶוען.
40
אָבֶּער פֶּעטְרוֹס הָאט זֵיי אַלֶע אַרוֹיסְגֶעשִׁיקְט, אוּן הָאט גֶענֵייגְט זַיינֶע קְנִי אוּן מִתְפַּלֵל גֶעוֶוען; אוּן עֶר הָאט זִיךְ גֶעקֶערְט צוּם מֵת, אוּן גֶעזָאגְט: טָבִיתָא, שְׁטֵיי אוֹיף! אוּן זִי הָאט גֶעעֶפְנְט אִירֶע אוֹיגְן; אוּן אַז זִי הָאט גֶעזֶען פֶּעטְרוֹס, הָאט זִי זִיךְ אוֹיפְגֶעזֶעצְט.
41
אוּן עֶר הָאט אִיר גֶעגֶעבְּן זַיין הַאנְט, אוּן הָאט זִי אוֹיפְגֶעהוֹיבְּן; אוּן עֶר הָאט גֶערוּפְן דִי הֵיילִיקֶע אוּן דִי אַלְמָנוֹת, אוּן הָאט זִי אַנִידֶערְגֶעשְׁטֶעלְט אַ לֶעבֶּעדִיקֶע.
42
אוּן דָאס אִיז בַּאקַאנְט גֶעוָוארְן אִיבֶּער גַאנְץ יָפוֹ; אוּן אַ סַך הָאבְּן גֶעגְלוֹיבְּט אִין דֶעם הַאר.
43
אוּן עֶר אִיז פַארְבְּלִיבְּן אַ לֶענְגֶערֶע צַייט אִין יָפוֹ מִיט אֵיינֶעם אַ גַארְבֶּער, שִׁמְעוֹן.