אידיש
1
אוּן פֶּעטְרוֹס אוּן יוֹחָנָן זֶענֶען צוּזַאמֶען אַרוֹיפְגֶעגַאנְגֶען אִין דֶעם בֵּית־הַמִקְדָשׁ אַרַיין צוּ תְּפִילַת־מִנְחָה, אִין דֶער נַיינְטֶער שָׂעָה.
2
אוּן אֵיינֶער אַ מֶענְטְשׁ, וָואס אִיז גֶעוֶוען לָאם פוּן זַיין מוּטֶערְס טְרַאכְט אָן, אִיז גֶעטְרָאגְן גֶעוָוארְן, אוּן מֶע הָאט אִים יֶעדְן טָאג גֶעלֵייגְט בַּיים טוֹיעֶר פוּן דֶעם בֵּית־הַמִקְדָשׁ, וָואס הָאט גֶעהֵייסְן דֶער שֵׁיינֶער טוֹיעֶר, צוּ בֶּעטְן נְדָבוֹת בַּיי דִי, וָואס זֶענֶען אַרַיינְגֶעגַאנְגֶען אִין דֶעם בֵּית־הַמִקְדָשׁ.
3
אוּן אַז עֶר הָאט גֶעזֶען פֶּעטְרוֹס אוּן יוֹחָנָן הַאלְטְן אִין אַרַיינְגֵיין אִין דֶעם בֵּית־הַמִקְדָשׁ, הָאט עֶר גֶעבֶּעטְן אַ נְדָבָה.
4
אוּן פֶּעטְרוֹס אוּן יוֹחָנָן הָאבְּן אִים שַׁארְף אָנְגֶעקוּקְט, אוּן גֶעזָאגְט: קוּק אוֹיף אוּנְדְז.
5
אוּן עֶר הָאט זֵיי בַּאטְרַאכְט, אוּן גֶעהָאפְט עֶפֶּעס צוּ בַּאקוּמֶען פוּן זֵיי.
6
אָבֶּער פֶּעטְרוֹס הָאט גֶעזָאגְט: זִילְבֶּער אוּן גָאלְד הָאבּ אִיךְ נִישְׁט, נָאר וָואס אִיךְ הָאבּ, גִיבּ אִיךְ דִיר: אִין דֶעם נָאמֶען פוּן יֵשׁוּעַ הַמָשִׁיחַ פוּן נְצֶרֶת, שְׁטֵיי אוֹיף אוּן גֵיי.
7
אוּן עֶר הָאט אִים אָנְגֶענוּמֶען בַּיי דֶער רֶעכְטֶער הַאנְט, אוּן הָאט אִים אוֹיפְגֶעשְׁטֶעלְט; אוּן תֵּיכֵּף זֶענֶען זַיינֶע פִיס אוּן קְנֶעכְלֶעך גֶעשְׁטַארְקְט גֶעוָוארְן.
8
אוּן עֶר אִיז אוֹיפְגֶעשְׁפְּרוּנְגֶען אוּן אִיז גֶעשְׁטַאנֶען, אוּן הָאט אָנְגֶעהוֹיבְּן צוּ גֵיין; אוּן עֶר אִיז אַרַיינְגֶעגַאנְגֶען מִיט זֵיי אִין דֶעם בֵּית־הַמִקְדָשׁ, אִיז גֶעגַאנְגֶען אוּן גֶעשְׁפְּרוּנְגֶען, אוּן הָאט גֶעלוֹיבְּט גָאט.
9
אוּן דָאס גַאנְצֶע פָאלְק הָאט אִים גֶעזֶען גֵיין אוּן לוֹיבְּן גָאט.
10
אוּן זֵיי הָאבְּן דֶערְקֶענְט אוּן אִים, אַז דָאס אִיז דֶער, וָואס אִיז גֶעזֶעסְן אוּן גֶעבֶּעטְן נְדָבוֹת בַּיים שֵׁיינֶעם טוֹיעֶר פוּן דֶעם בֵּית־הַמִקְדָשׁ; אוּן זֵיי זֶענֶען גֶעוָוארְן פוּל מִיט שְׁטוֹינֶען אוּן פַארְוואוּנְדֶערוּנְג אִיבֶּער דֶעם, וָואס אִיז מִיט אִים גֶעשֶׁען.
11
אוּן בְּעֵת עֶר הָאט זִיךְ גֶעהַאלְטְן צוּ פֶּעטְרוֹס אוּן יוֹחָנָן, אִיז זִיךְ דָאס גַאנְצֶע פָאלְק צוּזַאמֶענְגֶעלָאפְן צוּ זֵיי אִין דֶעם פָּאלִישׁ, וָואס הָאט גֶעהֵייסְן שְׁלֹמֹהס פָּאלִישׁ, אוּן זֵיי הָאבְּן זִיךְ שְׁטַארְק גֶעחִידוּשְׁט.
12
אוּן אַז פֶּעטְרוֹס הָאט דָאס גֶעזֶען, הָאט עֶר זִיךְ אָפְּגֶערוּפְן צוּם פָאלְק: אִיר מֶענְטְשְׁן פוּן יִשְׂרָאֵל, וָואס חִידוּשְׁט אִיר זִיךְ אִיבֶּער דֶעם דָאזִיקְן, אָדֶער וָואס קוּקְט אִיר אוּנְדְז אַזוֹי אָן, גְלַייךְ וִוי מִיר וָואלְטְן דוּרְךְ אוּנְדְזֶער אֵייגֶענֶעם כּוֹחַ אָדֶער פְרוּמְקַייט אִים גֶעמַאכְט גֵיין?
13
דֶער גָאט פוּן אַבְרָהָם, אוּן פוּן יִצְחָק, אוּן פוּן יַעֲקֹב, דֶער גָאט פוּן אוּנְדְזֶערֶע אָבוֹת הָאט גֶעאַכְפֶּערְט זַיין קְנֶעכְט יֵשׁוּעַ, וֶועמֶען אִיר הָאט אִיבֶּערְגֶעעֶנְטְפֶערְט, אוּן פַארְלֵייקְנְט פַאר פִּילַאטוּס, וֶוען עֶר הָאט בְּדֵעָה גֶעהַאט אִים צוּ לָאזְן פְרַיי.
14
אִיר אָבֶּער הָאט פַארְלֵייקְנְט דֶעם קָדוֹשׁ אוּן צַדִיק, אוּן הָאט גֶעבֶּעטְן, מֶע זָאל אַייךְ בַּאוִוילִיקְן אַ רוֹצֵחַ,
15
אוּן הָאט גֶעטֵייט דֶעם שַׂר פוּן לֶעבְּן, וֶועמֶען גָאט הָאט מְחַיֵה־מֵתִים גֶעוֶוען; פוּן וָואס מִיר זֶענֶען עֵדוּת.
16
אוּן דוּרְךְ דֶער אֶמוּנָה אִין זַיין נָאמֶען, הָאט זַיין נָאמֶען דֶעם דָאזִיקְן מֶענְטְשְׁן, וֶועמֶען אִיר זֶעט אוּן קֶענְט, שְׁטַארְק גֶעמַאכְט; אוּן דִי אֶמוּנָה, וָואס קוּמְט דוּרְךְ אִים, הָאט אִים גֶעגֶעבְּן דִי דָאזִיקֶע רְפוּאָה־שְׁלֵימָה פַאר אַייעֶר אַלֶעמֶענְס אוֹיגְן.
17
אוּן אִיצְט, בְּרִידֶער, אִיךְ וֵוייס, אַז אִיר הָאט דָאס גֶעטָאן אוּמְוִויסְנְדִיק, פּוּנְקְט וִוי אַייעֶרֶע שָׂרִים.
18
אָבֶּער וָואס גָאט הָאט פָארְוֹיסְגֶעזָאגְט דוּרְךְ דֶעם מוֹיל פוּן אַלֶע נְבִיאִים, אַז זַיין מָשִׁיחַ וֶועט לַיידְן, הָאט עֶר אַזוֹי אַרוּם מְמַלֵא גֶעוֶוען.
19
דֶערִיבֶּער טוּט תְּשׁוּבָה, אוּן קֶערְט אַייךְ אוּם פוּן אַייעֶרֶע וֶועגְן, כְּדֵי אַייעֶרֶע זִינְד זָאלְן אוֹיסְגֶעמֶעקְט וֶוערְן, אוּן סֶע זָאלְן קוּמֶען צַייטְן פוּן דֶערְקְוִויקוּנְג פוּן פַאר גָאט,
20
אוּן כְּדֵי עֶר זָאל שִׁיקְן דֶעם מָשִׁיחַ, וָואס אִיז פַאר אַייךְ בַּאשְׁטִימְט גֶעוָוארְן, יֵשׁוּעַ,
21
וֶועמֶען דֶער הִימְל מוּז מְקַבְּל זַיין, בִּיז דִי צַייטְן, וֶוען סֶע וֶועט אוֹיפְגֶערִיכְט וֶוערְן אַלְצְדִינְג, פוּן וָואס גָאט הָאט גֶערֶעדְט דוּרְךְ דֶעם מוֹיל פוּן זַיינֶע הֵיילִיקֶע נְבִיאִים פוּן אַמָאל.
22
מֹשֶׁה הָאט אוֹיךְ גֶעזָאגְט: אַ נָבִיא וֶועט גָאט דַיין הַאר אוֹיפְשְׁטֶעלְן פַאר אַייךְ פוּן צְוִוישְׁן אַייעֶרֶע בְּרִידֶער, גְלַייךְ צוּ מִיר; צוּ אִים זָאלְט אִיר זִיךְ צוּהֶערְן אִין אַלְצְדִינְג, וָואס עֶר וֶועט צוּ אַייךְ רֶעדְן.
23
אוּן סֶע וֶועט זַיין, אַז יֶעדֶע זֶעל, וָואס וֶועט זִיךְ נִישְׁט צוּהֶערְן צוּ דֶעם דָאזִיקְן נָבִיא, וֶועט פַארְשְׁנִיטְן וֶוערְן פוּן צְוִוישְׁן דֶעם פָאלְק.
24
אוּן אַלֶע נְבִיאִים פוּן שְׁמוּאֵל אָן, אוּן דִי, וָואס זֶענֶען גֶעוֶוען נָאךְ אִים, זֵיי הָאבְּן אַלֶע גֶערֶעדְט פוּן דִי דָאזִיקֶע טֶעג,
25
אִיר זֶענְט דִי קִינְדֶער פוּן דִי נְבִיאִים, אוּן פוּן דֶעם בּוּנְד, וָואס גָאט הָאט גֶעמַאכְט מִיט אַייעֶרֶע אָבוֹת, בְּעֵת עֶר הָאט גֶעזָאגְט צוּ אַבְרָהָם: אוּן אִין דַיין זָאמֶען וֶועלְן זַיין גֶעבֶּענְטְשְׁט אַלֶע מִשְׁפָּחוֹת פוּן דֶער עֶרְד.
26
פַאר אַייךְ קוֹדֶם הָאט גָאט אוֹיפְגֶעשְׁטֶעלְט זַיין קְנֶעכְט, אוּן אִים גֶעשִׁיקְט אַייךְ צוּ בֶּענְטְשְׁן, אוּן אָפְּקֶערְן יֶעדְן אֵיינֶעם פוּן אַייךְ פוּן אַייעֶרֶע שְׁלֶעכְטֶע מַעֲשִׂים.