אידיש
1
אוּן נָאכְדֶעם וִוי מִיר זֶענֶען נִיצוּל גֶעוָוארְן, זֶענֶען מִיר גֶעוָואר גֶעוָוארְן, אַז דֶער אִינְזְל הֵייסְט מֶעלִיטֶע.
2
אוּן דִי נָכְרִים הָאבְּן אוּנְדְז אַרוֹיסְגֶעוִויזְן נִישְׁט קֵיין פָּשׁוּטְן חֶסֶד; וָוארִים זֵיי הָאבְּן אָנְגֶעצוּנְדְן אַ פַייעֶר, אוּן הָאבְּן אוּנְדְז אַלֶע אוֹיפְגֶענוּמֶען צוּלִיבּ דֶעם רֶעגְן, וָואס הָאט גֶעהַאלְטְן אִין אַרָאפְּקוּמֶען, אוּן צוּלִיבּ דֶער קֶעלְט.
3
אוּן בְּעֵת פָּאוֹלוֹס הָאט צוּנוֹיפְגֶעזַאמְלְט אַ בִּינְטְל רִיטְלֶעך אוּן הָאט זֵיי אַרוֹיפְגֶעלֵייגְט אוֹיף דֶעם פַייעֶר, אִיז אַרוֹיס אַ פִּיפֶּערְשְׁלַאנְג צוּלִיבּ דֶער הִיץ, אוּן הָאט זִיךְ אָנגֶעכַאפְּט אָן זַיין הַאנְט.
4
אוּן אַז דִי נָכְרִים הָאבְּן דֶערְזֶען דֶעם שֶׁרֶץ הֶענְגֶען אוֹיף זַיין הַאנְט, הָאבְּן זֵיי אֵיינֶער צוּם אַנְדֶערְן גֶעזָאגְט: דֶער דָאזִיקֶער מַאן אִיז אַוַודַאי אַ רוֹצֵחַ, אוּן הַגַם עֶר הָאט זִיךְ מַצִיל גֶעוֶוען פוּן דֶעם יַם, טוּט אִים אָבֶּער דִי גֶערֶעכְטִיקַייט נִישְׁט לָאזְן לֶעבְּן.
5
נָאר עֶר הָאט אָפְּגֶעטְרֶעסְלְט דֶעם שֶׁרֶץ אִין פַייעֶר אַרַיין, אוּן ס׳הָאט אִים גָארְנִישְׁט גֶעשַׁאדְט.
6
אוּן זֵיי הָאבְּן דֶערְוַוארְט, אַז עֶר זָאל גֶעשְׁוָואלְן וֶוערְן, אָדֶער פְּלוּצִים אַנִידֶערְפַאלְן טוֹיט; נָאר וֶוען זֵיי הָאבְּן לַאנְג גֶעוַוארְט אוּן גֶעזֶען, אַז אִים אִיז קֵיין שׁוּם שְׁלֶעכְטְס נִישְׁט גֶעשֶׁען, הָאבְּן זֵיי גֶעעֶנְדֶערְט זֵייעֶר מֵיינוּנְג, אוּן גֶעזָאגְט, אַז עֶר אִיז אַ גָאט.
7
אוּן אִין דֶער שְׁכֵנוּת פוּן יֶענֶעם אָרְט זֶענֶען גֶעוֶוען לֶענְדֶערַייעֶן, וָואס הָאבְּן גֶעהֶערְט צוּ דֶעם עֶלְטְסְטְן פוּן דֶעם אִינְזְל, וָואס הָאט גֶעהֵייסְן פּוּבְּלִיוּס; עֶר הָאט אוּנְדְז אוֹיפְגֶענוּמֶען, אוּן הָאט אוּנְדְז פְרַיינְטְלֶעך אוּנְטֶערְהַאלְטְן דְרַיי טֶעג.
8
אוּן פּוּבְּלִיוּס פָאטֶער אִיז גְרָאד גֶעלֶעגְן קְרַאנְק אוֹיף פִיבֶּער אוּן לַאקְסִיר; אוּן פָּאוֹלוֹס אִיז צוּ אִים אַרַיינְגֶעגַאנְגֶען, אוּן אִיז מִתְפַּלֵל גֶעוֶוען, אוּן בְּעֵת עֶר הָאט אַרוֹיפְגֶעלֵייגְט אוֹיף אִים זַיינֶע הֶענְט, הָאט עֶר אִים אוֹיסְגֶעהֵיילְט.
9
אוּן נָאכְדֶעם וִוי דָאס אִיז גֶעשֶׁען, זֶענֶען גֶעקוּמֶען אוֹיךְ דִי אִיבֶּערִיקֶע, וָואס הָאבְּן אוֹיף דֶעם אִינְזְל גֶעהַאט חוֹלַאתְן, אוּן זֶענֶען גֶעהֵיילְט גֶעוָוארְן.
10
זֵיי הָאבְּן אוּנְדְז אוֹיךְ אָנְגֶעטָאן אַ סַך כָּבוֹד, אוּן וֶוען מִיר זֶענֶען אָפְּגֶעפָארְן, הָאבְּן זֵיי אוּנְדְז פַארְזָארְגְט מִיט וָואס מִיר הָאבְּן זִיךְ גֶענֵייטִיקְט.
11
אוּן אִין דְרַיי חַדָשִׁים אַרוּם זֶענֶען מִיר אָפְּגֶעפָארְן אִין אַ שִׁיף פוּן אַלֶעקְסַאנְדְרִיֶע, וָואס הָאט אִיבֶּערְגֶעוִוינְטֶערְט בַּיי דֶע אִינְזְל; אִיר צֵייכְן אִיז גֶעוֶוען דִי צְוִוילִינְג־בְּרִידֶער.
12
אוּן אַז מִיר הָאבְּן גֶעגְרֵייכְט סִירַאקוּס, זֶענֶען מִיר דָארְטְן פַארְבְּלִיבְּן דְרַיי טֶעג.
13
אוּן פוּן דָארְטְן הָאבְּן מִיר גֶעמַאכְט אַ קְרַייז אוּן זֶענֶען אָנְגֶעקוּמֶען קֵיין רֶעגְיוּם; אוּן אִין אַ טָאג אַרוּם הָאט זִיךְ אוֹיפְגֶעהוֹיבְּן אַ דָרוֹם־וִוינְט, אוּן אוֹיף דֶעם אַנְדֶערְן טָאג זֶענֶען מִיר אָנְגֶעקוּמֶען קֵיין פּוּטֶעאָלִי.
14
דָארְטְן הָאבְּן מִיר גֶעפוּנֶען בְּרִידֶער, אוּן זֶענֶען גֶעבֶּעטְן גֶעוָוארְן, צוּ בְּלַייבְּן מִיט זֵיי זִיבְּן טֶעג; אוּן נָאכְדֶעם זֶענֶען מִיר גֶעקוּמֶען קֵיין רוֹים.
15
אוּן פוּן דָארְטְן זֶענֶען דִי בְּרִידֶער, בְּעֵת זֵיי הָאבְּן גֶעהֶערְט פוּנְוֶועגְן אוּנְדְז, אוּנְדְז גֶעקוּמֶען בַּאגֶעגֶענֶען בַּיי דֶעם מַארְק אַפִּיוּס אוּן דִי דְרַיי אַכְסַנְיוֹת. וֶוען פָּאוֹלוֹס הָאט זֵיי דֶערְזֶען, הָאט עֶר גֶעדַאנְקְט גָאט, אוּן הָאט זִיךְ גֶעשְׁטַארְקְט.
16
אוּן וֶוען מִיר זֶענֶען אַרַיינְגֶעקוּמֶען קֵיין רוֹים, הָאט פָּאוֹלוֹס בַּאקוּמֶען דֶערְלוֹיבֶּענִישׁ צוּ וָואוֹינֶען פַאר זִיךְ, מִיט דֶעם זֶעלְנֶער, וָואס הָאט אִים בַּאוַואכְט.
17
אוּן עֶס אִיז גֶעוֶוען, אַז אִין דְרַיי טֶעג אַרוּם הָאט עֶר צוּנוֹיפְגֶערוּפְן דִי פִירֶער פוּן דִי יִידְן; אוּן אַז זֵיי זֶענֶען זִיךְ צוּזַאמֶענְגֶעקוּמֶען, הָאט עֶר צוּ זֵיי גֶעזָאגְט: בְּרִידֶער, הַגַם אִיךְ הָאבּ גָארְנִישְׁט גֶעטָאן קֶעגְן דֶעם פָאלְק, אָדֶער דִי מִנְהָגִים פוּן אוּנְדְזֶערֶע אָבוֹת, בִּין אִיךְ דָאךְ אִיבֶּערְגֶעעֶנְטְפֶערְט גֶעוָוארְן פוּן יְרוּשָׁלַיִם אַ גֶעפַאנְגֶענֶער אִין דִי הֶענְט פוּן דִי רוֹימֶער.
18
אוּן נָאכְדֶעם וִוי זֵיי הָאבְּן מִיךְ חוֹקֵר־וְדוֹרֵשׁ גֶעוֶוען, הָאבְּן זֵיי מִיךְ גֶעוָואלְט פְרַיי לָאזְן, מַחְמַת עֶס אִיז נִישְׁט גֶעוֶוען קֶעגְן מִיר קֵיין שׁוּם גְרוּנְט פַאר מִיתָה.
19
אוּן וֶוען דִי יִידְן הָאבְּן אַיינְגֶעוֶוענְדְט קֶעגְן דֶעם, בִּין אִיךְ גֶעצְוואוּנְגֶען גֶעוֶוען צוּ וֶוענְדְן זִיךְ צוּם קֵיסָר; נִישְׁט, וַוייל אִיךְ הָאבּ גֶעוָואלְט אִין עֶפֶּעס בַּאשׁוּלְדִיקְן מַיין פָאלְק.
20
פוּנְוֶועגְן דֶער דָאזִיקֶער סִיבָּה הָאבּ אִיךְ אַייךְ דֶערִיבֶּער גֶעבֶּעטְן צוּ זֶען, אוּן מִיט אַייךְ צוּ רֶעדְן; וָוארִים פוּנְוֶועגְן דֶער הָאפֶענוּנְג פוּן יִשְׂרָאֵל בִּין אִיךְ גֶעבּוּנְדְן מִיט דֶער דָאזִיקֶער קֵייט.
21
אוּן זֵיי הָאבְּן צוּ אִים גֶעזָאגְט: מִיר הָאבְּן נִישְׁט בַּאקוּמֶען פוּן יְהוּדָה קֵיין בְּרִיוו פוּנְוֶועגְן דִיר, אוֹיךְ אִיז קֵיינֶער נִישְׁט פוּן דִי בְּרִידֶער גֶעקוּמֶען אַהֶער אוּן הָאט דֶערְצֵיילְט, אָדֶער גֶעזָאגְט עֶפֶּעס שְׁלֶעכְטְס פוּנְוֶועגְן דִיר.
22
מִיר וִוילְן אָבֶּער הֶערְן פוּן דִיר, וָואס דוּ דֶענְקְסְט; וָוארִים בְּנוֹגֵע דֶער דָאזִיקֶער כִּיתָּה, אִיז עֶס אוּנְדְז בַּאקַאנְט, אַז אוּמֶעטוּם וֶוערְט גֶערֶעדְט קֶעגְן אִיר.
23
אוּן נָאכְדֶעם וִוי זֵיי הָאבְּן אִים בַּאשְׁטִימְט אַ טָאג, זֶענֶען זֵיי גֶעקוּמֶען צוּ אִים אִין זַיין אַכְסַנְיָא אִין אַ גְרוֹיסֶער צָאל; אוּן עֶר הָאט פַאר זֵיי דֶערְקְלֶערְט דֶעם עִנְיָן פוּן אִין דֶער פְרִי בִּיז נַאכְט, אוּן הָאט עֵדוּת גֶעזָאגְט וֶועגְן דֶעם מַלְכוּת־אֱלֹהִים, אוּן זֵיי אִיבֶּערְצַייגְט בְּנוֹגֵע יֵשׁוּעַ, סַיי פוּן תּוֹרַת־מֹשֶׁה אוּן סַיי פוּן דִי נְבִיאִים.
24
אוּן טֵייל הָאבְּן גֶעגְלוֹיבְּט דִי רֵייד, וָואס זֶענֶען גֶערֶעדְט גֶעוָוארְן, אוּן דִי אַנְדֶערֶע הָאבְּן נִישְׁט גֶעגְלוֹיבְּט.
25
אוּן אַזוֹיוִוי זֵיי זֶענֶען צְוִוישְׁן זִיךְ נִישְׁט אֵיינִיק גֶעוֶוען, זֶענֶען זֵיי אַוֶועקְגֶעגַאנְגֶען, נָאכְדֶעם וִוי פָּאוֹלוֹס הָאט נָאךְ גֶעזָאגְט אֵיין וָוארְט: גוּט הָאט דֶער רוּחַ־הַקוֹדֶשׁ גֶערֶעדְט דוּרְךְ יְשַׁעְיָהוּ הַנָבִיא צוּ אַייעֶרֶע אָבוֹת:
26
גֵיי צוּ דֶעם דָאזִיקְן פָאלְק אוּן זָאג: הֶערְן וֶועט אִיר הֶערְן, אָבֶּער נִישְׁט פַארְשְׁטֵיין, אוּן זֶען וֶועט אִיר זֶען, אָבֶּער נִישְׁט בַּאנֶעמֶען.
27
וָוארִים דָאס הַארְץ פוּן דֶעם דָאזִיקְן פָאלְק אִיז גֶעוָוארְן פֶעט, אוּן זֵייעֶרֶע אוֹיעֶרן זֶענֶען שְׁוֶוער פוּן צוּ הֶערְן, אוּן זֵייעֶרֶע אוֹיגְן הָאבְּן זֵיי פַארְמַאכְט, טָאמֶער וֶועלְן זֵיי זֶען מִיט זֵייעֶרֶע אוֹיגְן, אוּן פַארְשְׁטֵיין מִיט זֵייעֶר הַארְץ, אוּן הֶערְן מִיט זֵייעֶרֶע אוֹיעֶרן, אוּן זִיךְ אוּמְקֶערְן, אוּן אִיךְ וֶועל זֵיי הֵיילְן.
28
בְּכֵן, זַייט וִויסְן, אַז דִי דָאזִיקֶע יְשׁוּעָה פוּן גָאט וֶוערְט גֶעשִׁיקְט צוּ דִי אוּמוֹת־הָעוֹלָם; אוּן זֵיי וֶועלְן הֶערְן.
29
אוּן נָאכְדֶעם וִוי עֶר הָאט דָאס גֶעזָאגְט, זֶענֶען זִיךְ דִי יִידְן פוּנְאַנְדֶערְגֶעגַאנְגֶען, אוּן הָאבְּן זִיךְ אַ סַך מִתְוַוכֵּחַ גֶעוֶוען צְוִוישְׁן זִיךְ.
30
אוּן עֶר אִיז פַארְבְּלִיבְּן צְוֵויי גַאנְצֶע יָאר אִין זַיין אֵייגֶענֶער גֶעדוּנְגֶענֶער דִירָה, אוּן הָאט אוֹיפְגֶענוּמֶען אַלֶע, וָואס זֶענֶען אַרַיינְגֶעגַאנְגֶען צוּ אִים,
31
אוּן הָאט אָנְגֶעזָאגְט דָאס מַלְכוּת פוּן גָאט, אוּן גֶעלֶערְנְט בְּנוֹגֵע דֶעם הַאר יֵשׁוּעַ הַמָשִׁיחַ מִיט דֶער גַאנְצֶער מוּטִיקַייט, אוּן קֵיינֶער הָאט אִים נִישְׁט פַארְוֶוערְט.