אידיש
1
אוּן עֶס אִיז גֶעוֶוען, אַז נָאכְדֶעם וִוי מִיר הָאבְּן זִיךְ אָפְּגֶעשֵׁיידְט פוּן זֵיי אוּן זֶענֶען אַוֶועקְגֶעפָארְן מִיט אַ שִׁיף, זֶענֶען מִיר מִיט אַ גְלַייכְן וֶועג גֶעקוּמֶען קֵיין קָאס, אוּן דֶעם אַנְדֶערְן טָאג קֵיין רָאדָאס, אוּן פוּן דָארְטְן קֵיין פַּאטַארַא.
2
אוּן אַזוֹיוִוי מִיר הָאבְּן גֶעפוּנֶען אַ שִׁיף, וָואס אִיז גֶעגַאנְגֶען קֵיין פֶענִיקְיֶע, זֶענֶען מִיר אַרַיינְגֶעגַאנְגֶען אוּן זֶענֶען אָפְּגֶעפָארְן.
3
אוּן נָאכְדֶעם וִוי מִיר הָאבְּן גֶענֶעעֶנְט אוּן גֶעזֶען קִיפְּרוּס, אוּן עֶס גֶעלָאזְן צוּ דֶער לִינְקֶער זַייט, זֶענֶען מִיר גֶעפָארְן קֵיין סִירְיֶע, אוּן זֶענֶען אָנְגֶעקוּמֶען קֵיין צוֹר, וָוארִים דָארְטְן הָאט דִי שִׁיף גֶעדַארְפְט אוֹיסְלָאדְן אִיר מַשָׂא.
4
אוּן אַז מִיר הָאבְּן גֶעפוּנֶען דִי תַּלְמִידִים, זֶענֶען מִיר דָארְטְן פַארְבְּלִיבְּן זִיבְּן טֶעג. אוּן זֵיי הָאבְּן גֶעזָאגְט צוּ פָּאוֹלוֹס דוּרְךְ דֶעם רוּחַ־הַקוֹדֶשׁ, אַז עֶר זָאל נִישְׁט אַרוֹיפְגֵיין קֵיין יְרוּשָׁלַיִם.
5
אוּן עֶס אִיז גֶעוֶוען, אַז נָאכְדֶעם וִוי מִיר הָאבְּן פַארְפִילְט דִי טֶעג, הָאבְּן מִיר אַוֶועקְגֶעצוֹיגְן אוּן זֶענֶען גֶעגַאנְגֶען אוֹיף אוּנְדְזֶער וֶועג; אוּן זֵיי אַלֶע הָאבְּן אוּנְדְז בַּאגְלֵייט מִיט זֵייעֶרֶע וַוייבֶּער אוּן קִינְדֶער, בִּיז מִיר זֶענֶען אַרוֹיס פוּן דֶער שְׁטָאט. אוּן מִיר הָאבְּן גֶעקְנִיט בַּיים יַם־בְּרֶעג אוּן מִתְפַּלֵל גֶעוֶוען, אוּן הָאבְּן זִיךְ גֶעזֶעגְנְט אֵיינֶער מִיטְן אַנְדֶערְן.
6
דֶערְנָאךְ זֶענֶען מִיר אַרַיינְגֶעגַאנְגֶען אִין דֶער שִׁיף, אוּן זֵיי הָאבְּן זִיךְ אוּמְגֶעקֶערְט אַהֵיים.
7
אוּן אַז מִיר הָאבְּן פַארְעֶנְדִיקְט דִי נְסִיעָה פוּן צוֹר, זֶענֶען מִיר אָנְגֶעקוּמֶען קֵיין עַכּוֹ, אוּן הָאבְּן אָפְּגֶעגֶעבְּן שָׁלוֹם דִי בְּרִידֶער, אוּן זֶענֶען פַארְבְּלִיבְּן מִיט זֵיי אַ טָאג.
8
אוּן אוֹיף מָארְגְן הָאבְּן מִיר אַוֶועקְגֶעצוֹיגְן, אוּן זֶענֶען גֶעקוּמֶען קֵיין קֵיסַרְיָה, אוּן מִיר זֶענֶען אַרַיינְגֶעגַאנְגֶען אִין דֶעם הוֹיז פוּן פִילִיפּוּס, דֶעם בַּעַל־מְבַשֵׂר, וָואס אִיז גֶעוֶוען אֵיינֶער פוּן דִי זִיבְּן, אוּן זֶענֶען פַארְבְּלִיבְּן מִיט אִים.
9
אוּן עֶר הָאט גֶעהַאט פִיר טֶעכְטֶער, בְּתוּלוֹת, וָואס הָאבְּן נְבִיאוֹת גֶעזָאגְט.
10
אוּן בְּעֵת מִיר זֶענֶען דָארְטְן גֶעוֶוען עֶטְלֶעכֶע טֶעג, אִיז אַרָאפְּגֶעקוּמֶען פוּן יְהוּדָה אֵיינֶער אַ נָבִיא מִיטְן נָאמֶען אַגַאבּוֹס.
11
אוּן עֶר אִיז גֶעקוּמֶען צוּ אוּנְדְז, אוּן הָאט גֶענוּמֶען פָּאוֹלוֹסֶעס גַארְטְל, אוּן הָאט זִיךְ גֶעבּוּנְדְן זַיינֶע אֵייגֶענֶע פִיס אוּן הֶענְט, אוּן הָאט גֶעזָאגְט: דָאס זָאגְט דֶער רוּחַ־הַקוֹדֶשׁ: אַזוֹי וֶועלְן דִי יִידְן אִין יְרוּשָׁלַיִם בִּינְדְן דֶעם מֶענְטְשְׁן, וָואס הָאט דֶעם דָאזִיקְן גַארְטְל, אוּן וֶועלְן אִים אִיבֶּערְעֶנְטְפֶערְן אִין דִי הֶענְט פוּן דִי גוֹייִם.
12
אוּן אַז מִיר הָאבְּן דָאס גֶעהֶערְט, הָאבְּן מִיר אוּן דִי מֶענְטְשְׁן פוּן יֶענֶעם אָרְט אִים גֶעבֶּעטְן, נִישְׁט אַרוֹיפְצוּגֵיין קֵיין יְרוּשָׁלַיִם.
13
דֶעמָאלְט הָאט פָּאוֹלוֹס גֶעעֶנְטְפֶערְט: וָואס טוּט אִיר, וָואס וֵויינְט אִיר אוּן צֶעבְּרֶעכְט מִיר מַיין הַארְץ? וָוארִים אִיךְ בִּין אָנְגֶעגְרֵייט נִישְׁט נָאר גֶעבּוּנְדְן צוּ וֶוערְן, נַייעֶרְט אוֹיךְ צוּ שְׁטַארְבְּן אִין יְרוּשָׁלַיִם פוּנְוֶועגְן דֶעם נָאמֶען פוּן דֶעם הַאר יֵשׁוּעַ.
14
אוּן אַז עֶר הָאט זִיךְ נִישְׁט גֶעלָאזְט אִיבֶּערְרֶעדְן, הָאבְּן מִיר אוֹיפְגֶעהֶערְט, אוּן גֶעזָאגְט: דֶער רָצוֹן פוּן גָאט זָאל גֶעשֶׁען.
15
אוּן נָאךְ דִי דָאזִיקֶע טֶעג הָאבְּן מִיר גֶענוּמֶען אוּנְדְזֶערֶע זַאכְן, אוּן זֶענֶען אַרוֹיפְגֶעגַאנְגֶען קֵיין יְרוּשָׁלַיִם.
16
אוּן סֶע זֶענֶען מִיט אוּנְדְז אוֹיךְ גֶעגַאנְגֶען עֶטְלֶעכֶע תַּלְמִידִים פוּן קֵיסַרְיָה, וָואס הָאבְּן אוּנְדְז גֶעפִירְט צוּ מְנַאסָאנֶען פוּן קִיפְּרוּס, אַן אַלְטֶער תַּלְמִיד, בַּיי וֶועמֶען מִיר הָאבְּן גֶעזָאלְט אַיינְשְׁטֵיין.
17
אוּן אַז מִיר זֶענֶען גֶעקוּמֶען קֵיין יְרוּשָׁלַיִם, הָאבְּן דִי בְּרִידֶער אוּנְדְז מְקַבְּל־פָּנִים גֶעוֶוען מִיט שִׂמְחָה.
18
אוּן אוֹיף דֶעם אַנְדֶערְן טָאג אִיז פָּאוֹלוֹס מִיט אוּנְדְז אַרַיינְגֶעגַאנְגֶען צוּ יַעֲקֹב; אוּן אַלֶע זְקֵנִים זֶענֶען אַהִין גֶעקוּמֶען.
19
אוּן נָאכְדֶעם וִוי עֶר הָאט זֵיי בַּאגְרִיסְט, הָאט עֶר דֶערְצֵיילְט בְּאַרִיכוּת, וָואס גָאט הָאט דוּרְךְ זַיין עוּבְדָא גֶעטָאן צְוִוישְׁן דִי אוּמוֹת־הָעוֹלָם.
20
אוּן בְּעֵת זֵיי הָאבְּן דָאס גֶעהֶערְט, הָאבְּן זֵיי גֶעלוֹיבְּט גָאט; אוּן זֵיי הָאבְּן צוּ אִים גֶעזָאגְט: דוּ זֶעסְט, בְּרוּדֶער, וִויפְל טוֹיזְנטֶער יִידְן עֶס זֶענֶען פַארַאן, וָואס גְלוֹיבְּן, אוּן זֵיי זֶענֶען אַלֶע קַנָאִים פַאר דֶער תּוֹרָה;
21
אוּן מֶע הָאט זֵיי מוֹדִיעַ גֶעוֶוען וֶועגְן דִיר, אַז דוּ לֶערְנְסְט אַלֶע יִידְן, וָואס זֶענֶען צְוִוישְׁן דִי אוּמוֹת־הָעוֹלָם, אָפְּצוּקֶערְן זִיךְ פוּן מֹשֶׁה, מִיט דֶעם, וָואס דוּ זָאגְסְט זֵיי, אַז זֵיי זָאלְן נִישְׁט מַל זַיין זֵייעֶרֶע קִינְדֶער, אוּן אוֹיךְ נִישְׁט לֶעבְּן נָאךְ דִי חוּקִים פוּן דֶער תּוֹרָה.
22
בְּכֵן, וָואס זָאלְן מִיר טָאן? זֵיי וֶועלְן אַוַודַאי הֶערְן, אַז דוּ בִּיסְט גֶעקוּמֶען.
23
טוּ דֶערִיבֶּער דָאס, וָואס מִיר זָאגְן דִיר: מִיר הָאבְּן פִיר מֶענְטְשְׁן, וָואס הָאבְּן אַ נֵדֶר אוֹיף זִיךְ;
24
נֶעם דִי דָאזִיקֶע אוּן רֵיינִיק דִיךְ מִיט זֵיי, אוּן נֶעם אוֹיף זִיךְ דִי הוֹצָאוֹת פַאר זֵיי, אַז זֵיי זָאלְן זִיךְ קֶענֶען אָפְּגָאלְן זֵייעֶרֶע קֶעפּ; אוּן אַלֶע וֶועלְן וִויסְן, אַז דָאס, וָואס זֵיי הָאבְּן גֶעהֶערְט וֶועגְן דִיר, אִיז נִישְׁט אֶמֶת, נַייעֶרְט אַז אוֹיךְ דוּ אַלֵיין גֵייסְט אוֹיפְן עֶרְלֶעכְן וֶועג, אוּן הִיטְסְט אָפּ דִי תּוֹרָה.
25
אָבֶּער וֶועגְן דִי גְלֵייבִּיקֶע גוֹייִם, הָאבְּן מִיר גֶעשְׁרִיבְּן, אוּן גֶעפַּאסְקְנְט, אַז זֵיי זָאלְן זִיךְ אָפְּהַאלְטְן פוּן דֶעם, וָואס מֶע הָאט מַקְרִיב גֶעוֶוען צוּ אָפְּגֶעטֶער, אוּן פוּן בְּלוּט, אוּן פוּן וָואס ס׳אִיז דֶערְוָוארְגְן גֶעוָוארְן, אוּן פוּן זְנוּת.
26
דֶעמָאלְט הָאט פָּאוֹלוֹס גֶענוּמֶען דִי מֶענְטְשְׁן, אוּן אוֹיף דֶעם אַנְדֶערְן טָאג הָאט עֶר זִיךְ גֶערֵיינִיקְט מִיט זֵיי, אוּן אִיז גֶעגַאנְגֶען אִין דֶעם בֵּית־הַמִקְדָשׁ אַרַיין, כְּדֵי צוּ גֶעבְּן צוּ וִויסְן, וֶוען סֶע וֶועלְן דֶערְפִילְט וֶוערְן דִי טֶעג פוּן זֵייעֶר רֵיינִיקוּנְג, אוּן דֶער קָרְבָּן וֶועט גֶעבְּרַאכְט וֶוערְן פַאר יֶעדְן אֵיינֶעם פוּן זֵיי.
27
אוּן נָאכְדֶעם וִוי דִי זִיבְּן טֶעג הָאבְּן זִיךְ שׁוֹין גֶעהַאט כִּמְעַט פַארְעֶנְדִיקְט, הָאבְּן דִי יִידְן פוּן אַסְיֶע אוֹיפְגֶעהֶעצְט דָאס גַאנְצֶע פָאלְק, בְּעֵת זֵיי הָאבְּן אִים גֶעזֶען אִין בֵּית־הַמִקְדָשׁ, אוּן הָאבְּן אוֹיסְגֶעשְׁטְרֶעקְט זֵייעֶרֶע הֶענְט אוֹיף אִים,
28
אוּן הָאבְּן גֶעשְׁרִיגְן: מֶענְטְשְׁן פוּן יִשְׂרָאֵל, הֶעלְפְט! דָאס אִיז דֶער מַאן, וָואס לֶערְנְט אַלֶע מֶענְטְשְׁן אוּמֶעטוּם אַנְטְקֶעגְן דֶעם פָאלְק אוּן דֶער תּוֹרָה אוּן דֶעם דָאזִיקְן הֵיילִיקְן אָרְט; אוּן חוּצְדֶעם הָאט עֶר אוֹיךְ גֶעבְּרַאכְט גְרִיכְן אִין בֵּית־הַמִקְדָשׁ אַרַיין, אוּן הָאט מְחַלֵל גֶעוֶוען דֶעם דָאזִיקְן מָקוֹם־קָדוֹשׁ.
29
וָוארִים זֵיי הָאבְּן פְרִיעֶר גֶעזֶען מִיט אִים אִין שְׁטָאט טְרָאפִימוּס, דֶעם עֶפֶעזֶער, אוּן הָאבְּן גֶעמֵיינְט, אַז פָּאוֹלוֹס הָאט אִים אַרַיינְגֶעבְּרַאכְט אִין בֵּית־הַמִקְדָשׁ.
30
אוּן דִי גַאנְצֶע שְׁטָאט הָאט גֶעטוּמְלט, אוּן דָאס פָאלְק אִיז זִיךְ צוּנוֹיפְגֶעלָאפְן; אוּן זֵיי הָאבְּן אָנְגֶענוּמֶען פָּאוֹלוֹס, אוּן הָאבְּן אִים אַרוֹיסְגֶעשְׁלֶעפְּט פוּן דֶעם בֵּית־הַמִקְדָשׁ; אוּן דִי טוֹיעֶרְן זֶענֶען תֵּיכֵּף גֶעשְׁלָאסְן גֶעוָוארְן.
31
אוּן בְּעֵת זֵיי הָאבְּן אִים גֶעוָואלְט טֵייטְן, אִיז אָנְגֶעקוּמֶען אַ יְדִיעָה צוּם חַיִל־פִירֶער פוּן דֶעם רעֶגִימֶענְט, אַז גַאנְץ יְרוּשָׁלַיִם אִיז אִין גֶערוּדֶער.
32
אוּן עֶר הָאט תֵּיכֵּף גֶענוּמֶען זֶעלְנֶער אוּן הוֹיפְּטְלַייט, אוּן אִיז אַרָאפְּגֶעלָאפְן צוּ זֵיי. אוּן אַז זֵיי הָאבְּן דֶערְזֶען דֶעם חַיִל־פִירֶער אוּן דִי זֶעלְנֶער, הָאבְּן זֵיי אוֹיפְגֶעהֶערְט צוּ שְׁלָאגְן פָּאוֹלוֹס.
33
אוּן דֶער חַיִל־פִירֶער אִיז צוּגֶעגַאנְגֶען, אוּן הָאט אִים אָנְגֶענוּמֶען, אוּן בַּאפוֹילְן מֶען זָאל אִים בִּינְדְן מִיט צְוֵויי קֵייטְן, אוּן גֶעפְרֶעגְט, וֶוער עֶר אִיז, אוּן וָואס עֶר הָאט גֶעטָאן.
34
אוּן טֵייל פוּן דֶעם פָאלְק הָאבְּן גֶעשְׁרִיגְן אֵיין זַאך, אוּן טֵייל עֶפֶּעס אַנְדֶערְשׁ; אוּן אַזוֹיוִוי עֶר הָאט צוּלִיבּ דֶעם גֶעטוּמְל נִישְׁט גֶעקֶענְט דֶערְגֵיין קֵיין טָאלְק, הָאט עֶר בַּאפוֹילְן, אִים צוּ בְּרֶענְגֶען אִין דֶער פֶעסְטוּנְג אַרַיין.
35
אוּן בְּעֵת עֶר אִיז צוּגֶעקוּמֶען צוּ דִי טְרֶעפּ, הָאבְּן דִי זֶעלְנֶער אִים גֶעטְרָאגְן צוּלִיבּ דֶעם צָארְן פוּן דֶעם עוֹלָם;
36
וָוארִים דֶער הַמוֹן פוּן פָאלְק אִיז נָאכְגֶעגַאנְגֶען, אוּן הָאט גֶעשְׁרִיגְן: אַוֶועק מִיט אִים!
37
אוּן בְּעֵת פָּאוֹלוֹס הָאט גֶעזָאלְט אַרַיינְגֶעבְּרַאכְט וֶוערְן אִין דֶער פֶעסְטוּנְג, הָאט עֶר גֶעזָאגְט צוּם חַיִל־פִירֶער: מֶעג אִיךְ דִיר עֶפֶּעס זָאגְן? אוּן עֶר הָאט גֶעזָאגְט: קֶענְסְטוּ גְרִיכִישׁ?
38
בִּיסְטוּ דֶען נִישְׁט דֶער מִצְרִי, וָואס הָאט נִישְׁט לַאנְג צוּרִיק גֶעמַאכְט אַ מְרִידָה, אוּן הָאט אַרוֹיסְגֶעפִירְט אִין דֶער מִדְבָּר אַרַיין דִי פִיר טוֹיזְנְט לַייט פוּן דִי רוֹצְחִים?
39
אָבֶּער פָּאוֹלוֹס הָאט גֶעזָאגְט: אִיךְ בִּין אַ יִיד פוּן טַארְסוּס אִין קִילִיקְיֶע, אַ תּוֹשָׁב פוּן אַן אָנְגֶעזֶעעֶנֶער שְׁטָאט; אוּן אִיךְ בֶּעט דִיךְ, גִיבּ מִיר דֶערְלוֹיבֶּענִישׁ צוּ רֶעדְן צוּם פָאלְק.
40
אוּן אַז עֶר הָאט אִים גֶעגֶעבְּן דֶערְלוֹיבֶּענִישׁ, הָאט פָּאוֹלוֹס, וִוי עֶר אִיז אַזוֹי גֶעשְׁטַאנֶען אוֹיף דִי טְרֶעפּ, אַ מַאךְ גֶעטָאן מִיט דֶער הַאנְט צוּם פָאלְק. אוּן נָאכְדֶעם וִוי עֶס אִיז גֶעוָוארְן זֵייעֶר שְׁטִיל, הָאט עֶר גֶערֶעדְט צוּ זֵיי אוֹיף לָשׁוֹן־קוֹדֶשׁ, אַזוֹי צוּ זָאגְן: