אידיש
1
אוּן נָאכְדֶעם וִוי דִי מְהוּמָה הָאט זִיךְ אַיינְגֶעשְׁטִילְט, הָאט פָּאוֹלוֹס גֶעשִׁיקְט נָאךְ דִי תַּלְמִידִים, אוּן אַז עֶר הָאט זֵיי מַזְהִיר גֶעוֶוען אוּן זִיךְ מִיט זֵיי גֶעזֶעגְנְט, הָאט עֶר אָפְּגֶעקֶערְט צוּ פָארְן קֵיין מַאקֶעדָאנְיֶע.
2
אוּן בְּעֵת עֶר אִיז דוּרְכְגֶעצוֹיגְן דוּרְךְ יֶענֶע גֶעגְנְטְן, אוּן הָאט זֵיי גֶעטְרֵייסְט מִיט אַ סַך רֵייד, אִיז עֶר גֶעקוּמֶען קֵיין גְרִיכְנְלַאנְד.
3
אוּן נָאכְדֶעם וִוי עֶר הָאט דָארְטְן פַארְבְּרַאכְט דְרַיי חַדָשִׁים, אוּן אַ פַארְשְׁוֶוערוּנְג אִיז קֶעגְן אִים גֶעמַאכְט גֶעוָוארְן מִצַד דִי יִידְן, בְּעֵת עֶר אִיז גֶעוֶוען גְרֵייט אָפְּצוּפָארְן מִיט אַ שִׁיף קֵיין סִירְיֶע, הָאט עֶר בַּאשְׁלָאסְן זִיךְ אוּמְצוּקֶערְן דוּרְךְ מַאקֶעדָאנְיֶע.
4
אוּן עֶס הָאבְּן אִים בַּאגְלֵייט סָאפַּאטְרוּס פוּן בֶּערָאיֶע, דֶער זוּן פוּן פִּירוּס; אוּן פוּן דִי טֶעסַאלָאנִיקֶער, אַרִיסְטַארְכוּס אוּן סֶעקוּנְדוּס; אוּן גַאיוּס פוּן דֶערְבֶּע, אוּן טִימָאטֶעאוּס; אוּן פוּן אַסְיֶע, טִיכִיקוּס אוּן טְרָאפִימוּס.
5
אוּן דִי דָאזִיקֶע זֶענֶען גֶעגַאנְגֶען פָארוֹיס, אוּן הָאבְּן גֶעוָוארְט אוֹיף אוּנְדְז אִין טְרָאאַס.
6
אוּן נָאךְ פֵּסַח זֶענֶען מִיר אָפְּגֶעפָארְן פוּן פִילִיפִּי, אוּן אִין פִינְף טֶעג אַרוּם זֶענֶען מִיר גֶעקוּמֶען צוּ זֵיי קֵיין טְרָאאַס, וואוּ מִיר זֶענֶען פַארְבְּלִיבְּן זִיבְּן טֶעג.
7
אוּן אוֹיף דֶעם עֶרְשְׁטְן טָאג נָאךְ דֶעם שַׁבָּת, בְּעֵת מִיר זֶענֶען זִיךְ צוּנוֹיפְגֶעקוּמֶען צוּ בְּרֶעכְן בְּרוֹיט, הָאט פָּאוֹלוֹס גֶערֶעדְט מִיט זֵיי, וַוייל עֶר הָאט בְּדֵעָה גֶעהַאט אוֹיף מָארְגְן אַוֶועקְצוּפָארְן; אוּן עֶר הָאט פַארְצוֹיגְן זַיין דְרָשָׁה בִּיז הַאלְבֶּער נַאכְט.
8
אוּן עֶס זֶענֶען גֶעוֶוען אַ סַך לִיכְט אִין דֶעם אוֹיבֶּערְשְׁטְן חֵדֶר, וואוּ מִיר זֶענֶען גֶעוֶוען פַארְזַאמְלְט אִינְאֵיינֶעם.
9
אוּן אֵיינֶער אַ בָּחוּר מִיטְן נָאמֶען עוּטִיכוֹס אִיז גֶעזֶעסְן אִין דֶעם פֶענְצְטֶער, אוּן אִיז אַרַיינְגֶעפַאלְן אִין אַ טִיפְן שְׁלָאף; אוּן בְּעֵת פָּאוֹלוֹס הָאט נָאךְ לַאנְג גֶערֶעדְט, אִיז אִים שְׁלָאף בַּייגֶעקוּמֶען, אוּן עֶר אִיז אַרָאפְּגֶעפַאלְן פוּן דֶעם דְרִיטְן שְׁטָאק, אוּן מֶען הָאט אִים אוֹיפְגֶעהוֹיבְּן אַ טוֹיטְן.
10
אוּן פָּאוֹלוֹס אִיז אַרָאפְּגֶעגַאנְגֶען, אוּן הָאט זִיךְ פַארְבּוֹיגְן אִיבֶּער אִים, אוּן הָאט אִים אַרוּמְגֶענוּמֶען, אוּן גֶעזָאגְט: שְׁרֶעקְט אַייךְ נִישְׁט, וָוארִים זַיין נְשָׁמָה אִיז אִין אִים.
11
אוּן נָאכְדֶעם וִוי עֶר אִיז אַרוֹיפְגֶעגַאנְגֶען, אוּן הָאט גֶעבְּרָאכְן בְּרוֹיט, אוּן גֶעגֶעסְן, הָאט עֶר מִיט זֵיי גֶערֶעדְט אַ לַאנְגֶע צַייט, בִּיז עֶס אִיז גֶעוָוארְן טָאג, אוּן דֶערְנָאךְ אִיז עֶר אַוֶועקְגֶעגַאנְגֶען.
12
אוּן זֵיי הָאבְּן אָפְּגֶעפִירְט דָאס יִינְגְל אַ לֶעבֶּעדִיקְן, אוּן הָאבְּן זִיךְ שְׁטַארְק גֶעטְרֵייסְט.
13
אוּן מִיר זֶענֶען גֶעגַאנְגֶען פָארוֹיס צוּ דֶער שִׁיף, אוּן זֶענֶען אָפְּגֶעפָארְן קֵיין אַסָאס, אוּן הָאבְּן בְּדֵעָה גֶעהַאט דָארְט אַרַיינְצוּנֶעמֶען פָּאוֹלוֹס; וָוארִים אַזוֹי הָאט עֶר בַּאשְׁלָאסְן, וַוייל עֶר הָאט גֶעוָואלְט גֵיין צוּפִיס.
14
אוּן אַז עֶר הָאט אוּנְדְז בַּאגֶעגְנְט אִין אַסָאס, הָאבְּן מִיר אִים אַרַיינְגֶענוּמֶען, אוּן זֶענֶען גֶעקוּמֶען קֵיין מִיטוּלֶענֶע.
15
אוּן פוּן דָארְטְן זֶענֶען מִיר אָפְּגֶעפָארְן, אוּן זֶענֶען אוֹיף דֶעם אַנְדֶערְן טָאג גֶעקוּמֶען קֶעגְנְאִיבֶּער קִיָאס; אוּן דֶעם אַנְדֶערְן טָאג הָאבְּן מִיר גֶעלַאנְדְט אִין סַאמָאס; אוּן אַ טָאג שְׁפֶּעטֶער זֶענֶען מִיר גֶעקוּמֶען קֵיין מִילֶעטוּס.
16
וָוארִים פָּאוֹלוֹס הָאט בַּאשְׁלָאסְן פַארְבַּייצוּפָארְן עֶפֶעזוּס, כְּדֵי עֶר זָאל נִישְׁט דַארְפְן פַארְבְּרֶענְגֶען קֵיין צַייט אִין אַסְיֶע; מַחְמַת עֶר הָאט זִיךְ גֶעאֵיילְט, אוֹיף וִוי וַוייט מֶעגְלֶעך, צוּ זַיין אִין יְרוּשָׁלַיִם אוֹיף שְׁבוּעוֹת.
17
אוּן פוּן מִילֶעטוּס הָאט עֶר גֶעשִׁיקְט קֵיין עֶפֶעזוּס, אוּן הָאט גֶעלָאזְט רוּפְן צוּ זִיךְ דִי זְקֵנִים פוּן דֶער קְהִילָה.
18
אוּן אַז זֵיי זֶענֶען צוּ אִים גֶעקוּמֶען, הָאט עֶר צוּ זֵיי גֶעזָאגְט: אִיר אַלֵיין וֵוייסְט, פוּן דֶעם עֶרְשְׁטְן טָאג אָן, וָואס אִיךְ הָאבּ גֶעשְׁטֶעלְט אַ פוּס אִין אַסְיֶע, וִויאַזוֹי אִיךְ הָאבּ מִיט אַייךְ פַארְבְּרַאכְט דִי גַאנְצֶע צַייט,
19
בְּעֵת אִיךְ הָאבּ גֶעדִינְט דֶעם הַאר מִיט דֶעם גַאנְצֶער עַנִיווּת, אוּן מִיט טְרֶערְן, אוּן מִיט נִסָיוֹנוֹת, וָואס זֶענֶען מִיךְ בַּאפַאלְן דוּרְךְ דִי פַארְשְׁוֶוערוּנְגען פוּן דִי יִידְן;
20
וִוי אִיךְ הָאבּ מִיךְ נִישְׁט אָפְּגֶעהַאלְטְן פוּן אָנְזָאגְן אַייךְ עֶפֶּעס, וָואס אִיז נִיצְלֶעך, אוּן אַייךְ גֶעלֶערְנְט עֶפְנְטְלֶעךְ, אוּן פוּן הוֹיז צוּ הוֹיז,
21
אוּן הָאבּ מֵעִיד גֶעוֶוען סַיי פַאר יִידְן, סַיי פַאר גְרִיכְן, פוּנְוֶועגְן תְּשׁוּבָה צוּ גָאט, אוּן אֶמוּנָה צוּ אוּנְדְזֶער הַאר יֵשׁוּעַ הַמָשִׁיחַ.
22
אוּן אִיצְט, זֶעט, אִיךְ גֵיי גֶעבּוּנְדְן אִין דֶעם גֵייסְט קֵיין יְרוּשָׁלַיִם, אוּן אִיךְ וֵוייס נִישְׁט, וָואס מִיךְ וֶועט דָארְטְן טְרֶעפְן;
23
אַחוּץ, וָואס דֶער רוּחַ־הַקוֹדֶשׁ טוּט מִיר עֵדוּת־זָאגְן אִין יֶעדֶער שְׁטָאט, אַז קֵייטְן אוּן צָרוֹת וַוארְטְן אוֹיף מִיר.
24
אָבֶּער אִיךְ הַאלְט נִישְׁט מַיין לֶעבְּן אַזוֹי טַייעֶר פַאר מִיר אַלֵיין, וִוי דָאס, אַז אִיךְ זָאל קֶענֶען פַארְעֶנְדִיקְן מַיין גַאנְג, אוּן דִי עוּבְדָא, וָואס אִיךְ הָאבּ מְקַבְּל גֶעוֶוען פוּן דֶעם הַאר יֵשׁוּעַ, מֵעִיד צוּ זַיין דִי גוּטֶע בְּשׂוּרָה פוּנְוֶועגְן דֶעם חֶסֶד פוּן גָאט.
25
אוּן אִיצְט, זֶעט, אִיךְ וֵוייס, אַז אִיר אַלֶע, צְוִוישְׁן וֶועמֶען אִיךְ בִּין אַרוּמְגֶעגַאנְגֶען אוּן הָאבּ אָנְגֶעזָאגְט דָאס מַלְכוּת, וֶועט מַיין פָּנִים מֶער נִישְׁט זֶען.
26
דֶערִיבֶּער בִּין אִיךְ מֵעִיד פַאר אַייךְ הַיינְטִיקְן טָאג, אַז אִיךְ בִּין רֵיין פוּן אַייעֶר אַלֶעמֶענְס בְּלוּט.
27
וָוארִים אִיךְ הָאבּ נִישְׁט פַארְמִיטְן פַאר אַייךְ אָנְצוּזָאגְן דִי גַאנְצֶע עֵצָה פוּן גָאט.
28
גִיט אַכְטוּנְג אוֹיף זִיךְ אַלֵיין, אוּן אוֹיף דֶער גַאנְצֶער סְטַאדֶע, אִיבֶּער וֶועלְכֶער דֶער רוּחַ־הַקוֹדֶשׁ הָאט אַייךְ גֶעמַאכְט פַאר אוֹיפְזֶעעֶר, צוּ פִיטֶערְן דִי עֵדָה פוּן גָאט, וָואס עֶר הָאט זִיךְ גֶעקוֹיפְט מִיט זַיין אֵייגְן בְּלוּט.
29
אִיךְ וֵוייס, אַז נָאךְ מַיין אַוֶועקְגֵיין, וֶועלְן בֵּייזֶע וֶועלְף אַרַיין צְוִוישְׁן אַייךְ, אוּן נִישְׁט שׁוֹינֶען דִי סְטַאדֶע;
30
אוּן פוּן צְוִוישְׁן אַייךְ אַלֵיין וֶועלְן אוֹיפְשְׁטֵיין מֶענְטְשְׁן, וֶועס וֶועלְן רֶעדְן פַארְקֶערְטֶע זַאכְן, אָפְּצוּצִיֶען דִי תַּלְמִידִים נָאךְ זִיךְ.
31
דֶערִיבֶּער, גִיט אַכְטוּנְג אוּן גֶעדֶענְקְט, אַז אִין מֶשֶׁךְ פוּן דְרַיי יָאר הָאבּ אִיךְ נִישְׁט אוֹיפְגֶעהֶערְט צוּ וָוארֶענֶען יֶעדְן אֵיינֶעם מִיט טְרֶערְן טָאג אוּן נַאכְט.
32
אוּן אִיצְט לָאז אִיךְ אַייךְ אוֹיף גָאטְס בַּארָאט, אוּן צוּ דֶעם וָוארְט פוּן זַיין חֶסֶד, וָואס אִיז בְּכּוֹחַ אַייךְ אוֹיפְצוּבּוֹיעֶן, אוּן צוּ גֶעבְּן אַייךְ דִי יְרוּשָׁה צְוִוישְׁן אַלֶע דִי, וָואס זֶענֶען גֶעהֵיילִיקְט.
33
אִיךְ הָאבּ נִישְׁט גֶעגְלוּסְט קֵיין שׁוּם מֶענְטְשְׁנְס זִילְבֶּער, אָדֶער גָאלְד, אָדֶער קְלֵיידוּנְג.
34
אִיר אַלֵיין וֵוייסְט, אַז דִי דָאזִיקֶע הֶענְט הָאבְּן גֶעדִינְט פַאר מַיינֶע בַּאדֶערְפֶענִישְׁן, אוּן פַאר דִי, וָואס זֶענֶען גֶעוֶוען מִיט מִיר.
35
אִין אַלְצְדִינְג הָאבּ אִיךְ אַייךְ גֶעוִויזְן אַ בַּיישְׁפִּיל, אַז מִיט אַרְבֶּעט אוֹיף אַזַא מִין אוֹפְן, דַארְפְט אִיר הֶעלְפְן דִי שְׁוַואכֶע, אוּן צוּ גֶעדֶענְקֶען דִי רֵייד פוּן דֶעם הַאר יֵשׁוּעַ, וָואס עֶר הָאט גֶעזָאגְט: ס׳אִיז בֶּעסֶער צוּ גֶעבְּן, וִוי צוּ נֶעמֶען.
36
אוּן נָאכְדֶעם וִוי עֶר הָאט דָאס גֶעזָאגְט, הָאט עֶר גֶענֵייגְט זַיינֶע קְנִי אוּן מִיט זֵיי אַלֶע מִתְפַּלֵל גֶעוֶוען.
37
אוּן זֵיי הָאבְּן אַלֶע בִּיטֶער גֶעוֵויינְט, אוּן זֶענֶען גֶעפַאלְן פָּאוֹלוֹס אוֹיפְן הַאלְדְז אוּן הָאבְּן אִים גֶעקוּשְׁט,
38
אוּן מֶער פוּן אַלְץ הָאבְּן זֵיי זִיךְ מְצַעֶר גֶעוֶוען פוּנְוֶועגְן דֶעם וָוארְט, וָואס עֶר הָאט גֶעזָאגְט, אַז זֵיי וֶועלְן זַיין פָּנִים מֶער נִישְׁט זֶען. אוּן זֵיי הָאבְּן אִים בַּאגְלֵייט אוֹיף זַיין וֶועג צוּ דֶער שִׁיף.