אידיש
1
אוּן בְּעֵת דֶער טָאג פוּן שְׁבוּעוֹת הָאט גֶענֶעעֶנְט, זֶענֶען זֵיי גֶעוֶוען אַלֶע צוּזַאמֶען אִין אֵיין אָרְט.
2
אוּן פְּלוּצִים אִיז גֶעקוּמֶען פוּן הִימְל אַ רַעַשׁ וִוי דָאס יָאגְן פוּן אַ שְׁטַארְקְן וִוינְט, אוּן עֶר הָאט אָנְגֶעפִילְט דָאס גַאנְצֶע הוֹיז, וואוּ זֵיי זֶענֶען גֶעזֶעסְן.
3
אוּן עֶס הָאבְּן זִיךְ בַּאוִויזְן צוּ זֵיי צוּנְגֶען אַזוֹיוִוי פוּן פַייעֶר, וָואס הָאבְּן זִיךְ פוּנְאַנְדֶערְגֶעטֵיילְט, אוּן זֵיי הָאבְּן זִיךְ גֶעזֶעצְט אוֹיף יֶעדֶען אֵיינֶעם פוּן זֵיי.
4
אוּן זֵיי זֶענֶען אַלֶע גֶעוָוארְן אָנְגֶעפִילְט מִיט דֶעם רוּחַ־הַקוֹדֶשׁ, אוּן הָאבְּן אָנְגֶעהוֹיבְּן צוּ רֶעדְן מִיט אַנְדֶערֶע לְשׁוֹנוֹת, וִוי דֶער גֵייסְט הָאט זֵיי גֶעגֶעבְּן צוּ רֶעדְן.
5
אוּן עֶס הָאבְּן גֶעוְואוֹינְט אִין יְרוּשָׁלַיִם יִידְן, יִרְאֵי־שָׁמַיִם, פוּן יֶעדֶער אוּמָה אוּנְטֶערְן הִימְל.
6
אוּן וֶוען דֶער דָאזִיקֶער רַעַשׁ אִיז גֶעהֶערְט גֶעוָוארְן, אִיז דָאס פָאלְק זִיךְ צוּזַאמֶענְגֶעלָאפְן, אוּן אִיז פַארְטוּמְלְט גֶעוָוארְן, מַחְמַת יֶעדֶער הָאט זֵיי גֶעהֶערְט רֶעדְן אִין זַיין אֵייגֶענֶעם לָשׁוֹן.
7
אוּן זֵיי זֶענֶען אַלֶע נִבְהַל אוּן נִשְׁתּוֹמְם גֶעוָוארְן, אוּן הָאבְּן גֶעזָאגְט: זֶענֶען נִישְׁט אָט־דִי אַלֶע, וָואס רֶעדְן, גָלִילֶער?
8
אוּן וִויאַזוֹי הֶערְן מִיר זֵיי, אִיטְלֶעכְן אִין אוּנְדְזֶער אֵייגֶענֶעם לָשׁוֹן, אִין וֶועלְכְן מִיר זֶענֶען גֶעבּוֹירְן גֶעוָוארְן?
9
דִי פוּן פָּרַס אוּן מָדַי, אוּן עֵילָם, אוּן דִי בַּאוְואוֹינֶער פוּן אֲרַם־נַהֲרַיִם, פוּן יְהוּדָה אוּן קַאפַּאדָאקְיֶע, פוּן פָּאנְטוּס אוּן אַסְיֶע,
10
פוּן פְרִיגְיֶע אוּן פַּאמְפִילְיֶע, פוּן מִצְרַיִם אוּן דִי קָאנְטְן פוּן לִיבְּיֶע אַרוּם קוּרִינִי, אוּן דִי בַּאזוּכֶער, פוּן רוֹים,
11
יִידְן אוּן גֵרִים, קְרֶעטֶער אוּן אַרַאַבֶּער, מִיר הֶערְן זֵיי רֶעדְן אִין אוּנְדְזֶערֶע לְשׁוֹנוֹת דִי וואוּנְדֶערְלֶעכֶע מַעֲשִׂים פוּן גָאט.
12
אוּן זֵיי זֶענֶען אַלֶע נִבְהַל אוּן נִשְׁתּוֹמְם גֶעוָוארְן, אוּן הָאבְּן גֶעזָאגְט אֵיינֶער צוּם אַנְדֶערְן: וָואס בַּאטֵייט דָאס דָאזִיקֶע?
13
נָאר אַנְדֶערֶע הָאבְּן גֶעשְׁפֶּעט, אוּן גֶעזָאגְט: זֵיי זֶענֶען פוּל מִיט זִיסְן וַויין.
14
אָבֶּער פֶּעטְרוֹס הָאט זִיךְ אוֹיפְגֶעשְׁטֶעלְט מִיט דִי עֶלְף, אוּן הָאט אוֹיפְגֶעהוֹיבְּן זַיין קוֹל, אוּן צוּ זֵיי גֶעזָאגְט: מֶענְטְשְׁן פוּן יְהוּדָה, אוּן אִיר אַלֶע, וָואס וואוֹינְט אִין יְרוּשָׁלַיִם, זַייט וִויסְן אָט־וָואס, אוּן פַארְנֶעמְט מַיינֶע רֵייד.
15
וָוארִים דִי דָאזִיקֶע זֶענֶען נִישְׁט שִׁיכּוֹר, וִוי אִיר מֵיינְט, מַחְמַת עֶס אִיז עֶרְשְׁט דִי דְרִיטֶע שָׂעָה פוּן טָאג;
16
נָאר דָאס דָאזִיקֶע אִיז דָאס, וָואס עֶס אִיז גֶעזָאגְט גֶעוָוארְן דוּרְךְ יוֹאֵל הַנָבִיא:
17
אוּן עֶס וֶועט זַיין אִין דִי לֶעצְטֶע טֶעג, זָאגְט גָאט, וֶועל אִיךְ אוֹיסְגִיסְן מַיין גֵייסְט אוֹיף אִיטְלֶעכְן בָּשָׂר, אוּן אַייעֶרֶע זִין אוּן אַייעֶרֶע טֶעכְטֶער וֶועלְן נְבִיאוֹת זָאגְן, אוּן אַייעֶרֶע בָּחוּרִים וֶועלְן זֶען חִזְיוֹנוֹת, אוּן אַייעֶרֶע זְקֵנִים וֶועלְן חָלוּמֶען חַלוֹמוֹת;
18
אוּן אוֹיךְ אוֹיף מַיינֶע קְנֶעכְט אוּן אוֹיף מַיינֶע דִינְסְטְן וֶועל אִיךְ אוֹיסְגִיסְן מַיין גֵייסְט אִין יֶענֶע טֶעג; אוּן זֵיי וֶועלְן נְבִיאוֹת זָאגְן.
19
אוּן אִיךְ וֶועל וַוייזְן וואוּנְדֶער אוֹיבְן אִין הִימְל, אוּן צֵייכְנְס אוּנְטְן אוֹיף דֶער עֶרְד, בְּלוּט, אוּן פַייעֶר, אוּן זַיילְן רוֹיך.
20
דִי זוּן וֶועט פַארְקֶערְט וֶוערְן אִין פִינְצְטֶערְנִישׁ, אוּן דִי לְבָנָה אִין בְּלוּט, אֵיידֶער עֶס קוּמְט אָן דֶער טָאג פוּן גָאט, דֶער גְרוֹיסֶער אוּן מוֹרֶאדִיקֶער טָאג.
21
אוּן עֶס וֶועט זַיין, אַז וֶוער סֶע וֶועט רוּפְן דֶעם נָאמֶען פוּן גָאט, וֶועט נִיצוּל וֶוערְן.
22
מֶענְטְשְׁן פוּן יִשְׂרָאֵל, הֶערְט אוֹיס דִי דָאזִיקֶע רֵייד: יֵשׁוּעַ הַנוֹצְרִי, אַ מֶענְטְשׁ, בַּאוִוילִיקְט פוּן גָאט פַאר אַייךְ דוּרְךְ גְבוּרוֹת, אוּן נִסִים וְנִפְלָאוֹת, וָואס גָאט הָאט גֶעטָאן דוּרְךְ אִים אִין אַייעֶר מִיט, וִוי אִיר וֵוייסְט אַלֵיין.
23
דֶעם דָאזִיקְן יֵשׁוּעַ, וָואס אִיז אִיבֶּערְגֶעעֶנְטְפֶערְט גֶעוָוארְן דוּרְךְ דֶער בַּאשְׁלָאסֶענֶער עֵצָה אוּן פְרִיעֶרְדִיק וִויסְן פוּן גָאט, הָאט אִיר, דוּרְךְ דֶער הַאנְט פוּן רְשָׁעִים, גֶעקְרֵייצִיקְט אוּן גֶעהַרְגֶעט.
24
אָבֶּער גָאט הָאט אִים אוֹיפְגֶעוֶועקְט, נָאכְדֶעם וִוי עֶר הָאט אוֹיפְגֶעלֵייזְט דִי יְסוּרִים פוּן טוֹיט, מַחְמַת עֶס אִיז נִישְׁט גֶעוֶוען מֶעגְלֶעך, אַז עֶר זָאל פוּן אִים גֶעהַאלְטְן וֶוערְן.
25
וָוארִים דָוִד זָאגְט פוּנְוֶועגְן אִים: אִיךְ הָאבּ תָּמִיד גֶעזֶען גָאט פַאר מִיר, וָוארִים עֶר אִיז בַּיי מַיין רֶעכְטֶער הַאנְט, כְּדֵי אִיךְ זָאל נִישְׁט פַאלְן;
26
דֶערִיבֶּער אִיז מַיין הַארְץ גֶעוֶוען פְרֵיילֶעך, אוּן מַיין צוּנְג הָאט זִיךְ גֶעפְרֵייט; אוּן מַיין לַייבּ וֶועט אוֹיךְ רוּעֶן אִין זִיכֶערְקַייט;
27
וָוארִים דוּ וֶועסְט נִישְׁט לָאזְן מַיין נֶפֶשׁ אִין שְׁאוֹל, דוּ וֶועסְט אוֹיךְ נִישְׁט גֶעבְּן דַיין הֵיילִיקְן צוּ זֶען פַארְדַארְבּוּנְג.
28
דוּ הָאסְט מִיר בַּאקַאנְט גֶעמַאכְט דִי וֶועגְן פוּן לֶעבְּן, דוּ וֶועסְט מִיךְ זַאט מַאכְן מִיט פְרֵייד פַאר דַיין פָּנִים.
29
בְּרִידֶער, אִיךְ קָאן אַייךְ זָאגְן אָפְן פוּנְוֶועגְן דֶעם פָאטֶער דָוִד, אַז עֶר אִיז גֶעשְׁטָארְבְּן, אוּן מֶע הָאט אִים בַּאגְרָאבְּן, אוּן זַיין קֵבֶר אִיז מִיט אוּנְדְז בִּיז אוֹיף הַיינְטִיקְן טָאג.
30
אָבֶּער אַזוֹי וִוי עֶר אִיז גֶעוֶוען אַ נָבִיא, אוּן הָאט גֶעוואוּסְט, אַז גָאט הָאט אִים צוּגֶעשְׁוואוֹירְן מִיט אַ שְׁבוּעָה, אַז פוּן דֶער פְרוּכְט פוּן זַיינֶע לֶענְדְן וֶועט עֶר זֶעצְן אֵיינֶעם אוֹיף זַיין טְרָאן,
31
הָאט עֶר פָארְוֹיסְגֶעזֶען אוּן גֶערֶעדְט פוּן דֶעם אוֹיפְשְׁטֵיין פוּן מָשִׁיחַ, אַז עֶר וֶועט נִישְׁט אִיבֶּערְגֶעלָאזְט וֶוערְן אִין שְׁאוֹל, אוּן אוֹיךְ וֶועט זַיין פְלֵיישׁ נִישְׁט זֶען קֵיין פַארְדַארְבּוּנְג.
32
דֶעם דָאזִיקְן יֵשׁוּעַ הָאט גָאט אוֹיפְגֶעוֶועקְט, פוּן וָואס מִיר אַלֶע זֶענֶען עֵדוּת.
33
דֶערִיבֶּער, וַוייל עֶר אִיז דֶערְהוֹיבְּן צוּ דֶער רֶעכְטֶער הַאנְט פוּן גָאט, אוּן וַוייל עֶר הָאט מְקַבְּל גֶעוֶוען פוּן דֶעם פָאטֶער דִי הַבְטָחָה פוּן דֶעם רוּחַ־הַקוֹדֶשׁ, הָאט עֶר אוֹיסְגֶעגָאסְן דָאס, וָואס אִיר זֶעט אוּן הֶערְט.
34
וָוארִים דָוִד אִיז נִישְׁט אַרוֹיף אִין הִימְל אַרַיין, נַייעֶרְט עֶר זָאגְט אַלֵיין: גָאט הָאט גֶעזָאגְט צוּ מַיין הַאר: זֶעץ דִיךְ בַּיי מַיין רֶעכְטֶער הַאנְט,
35
בִּיז אִיךְ וֶועל מַאכְן דַיינֶע פַיינְט אַ פוּסְבֶּענְקְל פַאר דַיינֶע פִיס.
36
זָאל דֶערִיבֶּער דָאס גַאנְצֶע הוֹיז פוּן יִשְׂרָאֵל וִויסְן אוֹיף זִיכֶער, אַז גָאט הָאט גֶעמַאכְט דֶעם דָאזִיקְן יֵשׁוּעַ, וֶועמֶען אִיר הָאט גֶעקְרֵייצִיקְט, פַאר אַ הַאר אוּן מָשִׁיחַ.
37
אוּן וִוי זֵיי הָאבְּן דָאס גֶעהֶערְט, הָאט עֶס זֵיי גֶעשְׁטָאכְן אִין הַארְצְן, אוּן זֵיי הָאבְּן גֶעזָאגְט צוּ פֶּעטְרוֹס אוּן דִי אִיבֶּערִיקֶע פוּן דִי שְׁלִיחִים: בְּרִידֶער, וָואס זָאלְן מִיר טָאן?
38
אוּן פֶּעטְרוֹס הָאט צוּ זֵיי גֶעזָאגְט: טוּט תְּשׁוּבָה, אוּן זָאל יֶעדֶער פוּן אַייךְ גֶעטוֹבְלְט וֶוערְן אִין דֶעם נָאמֶען פוּן יֵשׁוּעַ הַמָשִׁיחַ פַאר דֶער פַארְגֶעבּוּנְג פוּן אַייעֶרֶע זִינְד; אוּן אִיר וֶועט בַּאקוּמֶען דִי מַתָּנָה פוּן דֶעם רוּחַ־הַקוֹדֶשׁ.
39
וָוארִים פַאר אַייךְ אִיז דִי הַבְטָחָה, אוּן פַאר אַייעֶרֶע קִינְדֶער, אוּן פַאר אַלֶע, וָואס זֶענֶען פוּן וַוייטְן, וָואס גָאט, אוּנְדְזֶער גָאט, וֶועט רוּפְן צוּ זִיךְ.
40
אוּן מִיט אַ סַך אַנְדֶערֶע רֵייד הָאט עֶר עֵדוּת גֶעזָאגְט אוּן זֵיי מַזְהִיר גֶעוֶוען, אַזוֹי צוּ זָאגְן: זַייט אַייךְ מַצִיל פוּן דֶעם דָאזִיקְן פַארְקְרוּמְטְן דוֹר.
41
אוּן דִי, וָואס הָאבְּן אָנְגֶענוּמֶען זַיין וָוארְט, זֶענֶען גֶעטוֹבְלְט גֶעוָוארְן, אוּן עֶס זֶענֶען צוּגֶעקוּמֶען יֶענֶעם טָאג אַרוּם דְרַיי טוֹיזְנְט נְשָׁמוֹת.
42
אוּן זֵיי הָאבְּן זִיךְ גֶעהַאלְטְן פֶעסְט אִין דֶער לֶערְנוּנְג פוּן דִי שְׁלִיחִים אוּן אִין זֵייעֶר חַבְרוּתָא, אִין דֶעם בְּרֶעכְן פוּן בְּרוֹיט אוּן אִין תְּפִילוֹת.
43
אוּן אַ שְׁרֶעק אִיז גֶעפַאלְן אוֹיף יֶעדְר זֶעל, אוּן אַ סַך צֵייכְנְס אוּן וואוּנְדֶער זֶענֶען גֶעשֶׁען דוּרְךְ דִי שְׁלִיחִים.
44
אוּן אַלֶע, וָואס הָאבְּן גֶעגְלוֹיבְּט, זֶענֶען גֶעוֶוען צוּזַאמֶען, אוּן הָאבְּן אַלְצְדִינְג גֶעהַאט בְּשׁוּתְּפוּת;
45
אוּן זֵיי הָאבְּן פַארְקוֹיפְט זֵייעֶר הָאבּ אוּן גוּטְס, אוּן הָאבְּן עֶס צֶעטֵיילְט צוּ אַלֶעמֶען, לוֹיט אִיטְלֶעכְנְס בַּאדֶערְפֶענִישׁ.
46
אוּן פוּן טָאג צוּ טָאג זֶענֶען זֵיי גֶעוֶוען בַּאשְׁטֶענְדִיק מִיט אֵיין גֶעמִיט אִין דֶעם בֵּית־הַמִקְדָשׁ, אוּן זֵיי הָאבְּן גֶעבְּרָאכְן בְּרוֹיט אִין דִי הַייזֶער, אוּן הָאבְּן גֶעגֶעסְן זֵייעֶר שְׁפַּייז מִיט פְרֵיילֶעכְקַייט אוּן מִיט אַן עֶרְלֶעך הַארְץ.
47
אוּן זֵיי הָאבְּן גֶעלוֹיבְּט גָאט, אוּן הָאבְּן גֶעפוּנֶען חֵן בַּיים גַאנְצְן פָאלְק. אוּן דֶער הַאר הָאט פַארְמֶערְט פוּן טָאג צוּ טָאג יֶענֶע, וָואס זֶענֶען נִיצוּל גֶעוָוארְן.