אידיש
1
אוּן עֶס אִיז גֶעוֶוען, בְּעֵת אַפָּאלָאס אִיז גֶעוֶוען אִין קָארִינְט, אִיז פָּאוֹלוֹס דוּרְכְגֶעגַאנְגֶען דוּרְךְ דֶעם אוֹיבֶּערְשְׁטְן לַאנְד, אוּן אִיז גֶעקוּמֶען קֵיין עֶפֶעזוּס, אוּן הָאט גֶעפוּנֶען עֶטְלֶעכֶע תַּלְמִידִים.
2
אוּן עֶר הָאט צוּ זֵיי גֶעזָאגְט: הָאט אִיר מְקַבְּל גֶעוֶוען דֶעם רוּחַ־הַקוֹדֶשׁ, וֶוען אִיר זֶענְט גֶעוָוארְן מַאמִינִים? הָאבְּן זֵיי צוּ אִים גֶעזָאגְט: מִיר הָאבְּן אֲפִילוּ נִישְׁט גֶעהֶערְט, צִי סֶע אִיז פַארַאן אַ רוּחַ־הַקוֹדֶשׁ.
3
אוּן עֶר הָאט גֶעזָאגְט: אוֹיף וָואס דֶען זֶענְט אִיר גֶעטוֹבְלְט גֶעוָוארְן? הָאבְּן זֵיי גֶעזָאגְט: אוֹיף יוֹחָנָן׳ס טְבִילָה.
4
אוּן פָּאוֹלוֹס הָאט גֶעזָאגְט: יוֹחָנָן הָאט גֶעטוֹבְלְט מִיט דֶער טְבִילָה פוּן תְּשׁוּבָה, אוּן הָאט גֶעזָאגְט צוּם פָאלְק, אַז זֵיי זָאלְן גְלוֹיבְּן אִין אִים, וָואס דַארְף קוּמֶען נָאךְ אִים, דָאס הֵייסְט, אִין יֵשׁוּעַ.
5
אוּן אַז זֵיי הָאבְּן דָאס גֶעהֶערְט, הָאבְּן זֵיי זִיךְ גֶעלָאזְט טוֹבְלֶען אִין דֶעם נָאמֶען פוּן דֶעם הַאר יֵשׁוּעַ.
6
אוּן בְּעֵת פָּאוֹלוֹס הָאט אַרוֹיפְגֶעלֵייגְט אוֹיף זֵיי זַיינֶע הֶענְט, אִיז אוֹיף זֵיי גֶעקוּמֶען דֶער רוּחַ־הַקוֹדֶשׁ; אוּן זֵיי הָאבְּן גֶערֶעדְט מִיט אַנְדֶערֶע לְשׁוֹנוֹת, אוּן הָאבְּן נְבִיאוֹת גֶעזָאגְט.
7
אוּן זֵיי זֶענֶען גֶעוֶוען אַן עֶרֶךְ פוּן צְוֶועלְף מֶענְטְשְׁן.
8
אוּן עֶר אִיז אַרַיינְגֶעגַאנְגֶען אִין דֶער שׁוּל אוּן הָאט מוּטִיק גֶערֶעדְט אִין מֶשֶׁךְ פוּן דְרַיי חַדָשִׁים, אוּן הָאט זִיךְ מִתְוַוכֵּחַ גֶעוֶוען אוּן אִיבֶּערְצַייגְט בְּנוֹגֵע דֶעם מַלְכוּת פוּן גָאט.
9
אָבֶּער וֶוען עֶטְלֶעכֶע זֶענֶען גֶעוֶוען פַארְהַארְטֶעוֶועט אוּן הָאבְּן נִישְׁט גֶעגְלוֹיבְּט, אוּן גֶערֶעדְט שְׁלֶעכְטְס פַאר דֶעם פָאלְק פוּנְוֶועגְן דֶעם וֶועג, הָאט עֶר אָפְּגֶעקֶערְט פוּן זֵיי, אוּן אָפְּגֶעשֵׁיידְט דִי תַּלְמִידִים, אוּן הָאט זִיךְ יֶעדְן טָאג מִתְוַוכֵּחַ גֶעוֶוען אִין דֶעם בֵּית־הַמִדְרָשׁ פוּן טִירַאנוּס.
10
אוּן דָאס הָאט זִיךְ גֶעצוֹיגְן אַ מֶשֶׁךְ פוּן צְוֵויי יָאר, אַזוֹי, אַז אַלֶע, וָואס הָאבְּן גֶעוְואוֹינְט אִין אַסְיֶע, הָאבְּן גֶעהֶערְט דָאס וָוארְט פוּן דֶעם הַאר, סַיי יִידְן אוּן סַיי גְרִיכְן.
11
אוּן גָאט הָאט גֶעטָאן אוֹיסֶערְגֶעוֵויינְלֶעכֶע וואוּנְדֶער דוּרְךְ דִי הֶענְט פוּן פָּאוֹלוֹס,
12
אַזוֹי, אַז מֶען הָאט פוּן זַיין לַייבּ אַוֶועקְגֶעטְרָאגְן טִיכְלֶעך, אָדֶער פַארְטִיכֶער פַאר דִי שְׁוַואכֶע, אוּן דִי חוֹלַאתְן הָאבְּן זִיךְ אָפְּגֶעטָאן פוּן זֵיי, אוּן דִי בֵּייזֶע גֵייסְטֶער זֶענֶען אַרוֹיסְגֶעגַאנְגֶען.
13
אוּן עֶטְלֶעכֶע פוּן דִי וַואנְדֶערְנְדִיקֶע יִידִישֶׁע אָפְּשְׁפְּרֶעכֶערְס, הָאבְּן גֶענוּמֶען אוֹיף זִיךְ אָנְצוּרוּפְן דֶעם נָאמֶען פוּן דֶעם הַאר יֵשׁוּעַ אִיבֶּער דִי, וָואס הָאבְּן גֶעהַאט דִי בֵּייזֶע גֵייסְטֶער, אוּן הָאבְּן גֶעזָאגְט: אִיךְ בַּאשְׁוֶוער אַייךְ בַּיי יֵשׁוּעַ, וֶועמֶען פָּאוֹלוֹס אִיז מְבַשֵׂר.
14
אוּן עֶס זֶענֶען גֶעוֶוען זִיבְּן זִין פוּן אֵיינֶעם סְקֵוָה, אַ יִיד, אַ כֹּהֵן גָדוֹל, וָואס הָאבְּן דָאס גֶעטָאן.
15
אוּן דֶער בֵּייזֶער גֵייסְט הָאט גֶעעֶנְטְפֶערְט, אוּן צוּ זֵיי גֶעזָאגְט: יֵשׁוּעַ קֶען אִיךְ, אוּן פָּאוֹלוֹס קֶען אִיךְ, וֶוער אָבֶּער זֶענְט אִיר?
16
אוּן דֶער מֶענְטְשׁ, אִין וֶועמֶען עֶס אִיז גֶעוֶוען דֶער בֵּייזֶער גֵייסְט, אִיז אוֹיף זֵיי אַרוֹיפְגֶעשְׁפְּרוּנְגֶען, אוּן הָאט זֵיי אַלֶע גוֹבֵר גֶעוֶוען, אַזוֹי אַז זֵיי זֶענֶען אַרוֹיסְגֶעלָאפְן פוּן יֶענֶעם הוֹיז נַאקֶעט אוּן צֶעשְׁלָאגְן.
17
אוּן דָאס אִיז בַּאקַאנְט גֶעוָוארְן צוּ אַלֶע יִידְן אוּן גְרִיכְן, וָואס הָאבְּן גֶעוְואוֹינְט אִין עֶפֶעזוּס; אוּן אַ פַּחַד אִיז אוֹיף זֵיי אַלֶע גֶעפַאלְן, אוּן דֶער נָאמֶען פוּן דֶעם הַאר יֵשׁוּעַ אִיז גֶעוָוארְן גֶעגְרוֹיסְט.
18
אוּן אַ סַך פוּן דִי, וָואס הָאבְּן גֶעגְלוֹיבְּט, זֶענֶען גֶעקוּמֶען אוּן הָאבְּן זִיךְ מִתְוַודָה גֶעוֶוען, אוּן הָאבְּן בַּאקַאנְט גֶעמַאכְט זֵייעֶרֶע מַעֲשִׂים.
19
אוּן אַ סַך, וָואס הָאבְּן זִיךְ אָפְּגֶעגֶעבְּן מִיט כִּישׁוּף, הָאבְּן צוּנוֹיפְגֶעבְּרַאכְט זֵייעֶרֶע בִּיכֶער, אוּן הָאבְּן זֵיי פַארְבְּרֶענְט פַאר אַלֶעמֶען אִין דִי אוֹיגְן; אוּן זֵיי הָאבְּן בַּארֶעכְנְט דֶעם וֶוערְט דֶערְפוּן, אוּן הָאבְּן גֶעפוּנֶען, אַז עֶס הָאט בַּאטְרָאפְן פוּפְצִיק טוֹיזְנְט זִילְבֶּערְשְׁטִיק.
20
אָט אַזוֹי אִיז דָאס וָוארְט פוּן גָאט מֶעכְטִיק גֶעוַואקְסְן אוּן אִיז בַּאשְׁטַאנֶען.
21
אוּן נָאכְדֶעם וִוי דִי דָאזִיקֶע זַאכְן זֶענֶען פַארְעֶנְדִיקְט גֶעוָוארְן, הָאט פָּאוֹלוֹס זִיךְ פִירְגֶענוּמֶען אִין זַיין גֵייסְט, דוּרְכְצוּגֵיין דוּרְךְ מַאקֶעדָאנְיֶע אוּן אַכַאיָא, אוּן צוּ גֵיין קֵיין יְרוּשָׁלַיִם, אוּן עֶר הָאט גֶעזָאגְט: נָאכְדֶעם וִוי אִיךְ וֶועל דָארְטְן זַיין, מוּז אִיךְ אוֹיךְ זֶען רוֹים.
22
אוּן עֶר הָאט גֶעשִׁיקְט קֵיין מַאקֶעדָאנְיֶע צְוֵויי פוּן דִי, וָואס הָאבְּן אִים גֶעהָאלְפְן, טִימָאטֶעוּס אוּן עֶרַאסְטוּס, אוּן עֶר אַלֵיין אִיז נָאךְ פַארְבְּלִיבְּן אַ צַייט אִין אַסְיֶע.
23
אוּן אַרוּם יֶענֶער צַייט הָאט זִיךְ אוֹיפְגֶעהוֹיבְּן אַ שְׁטִיקְל מְהוּמָה בְּנוֹגֵע דֶעם דֶרֶךְ.
24
וָוארִים אֵיינֶער אַ מַאן מִיטְן נָאמֶען דֶעמֶעטְרִיוּס, אַ זִילְבֶּערְשְׁמִיד, וָואס הָאט גֶעמַאכְט זִילְבֶּערְנֶע טֶעמְפְּלֶען פוּן אַרְטֶעמִיס, הָאט אַרַיינְגֶעבְּרַאכְט גוּטֶע הַכְנָסוֹת פַאר דִי בַּעֲלֵי־מְלָאכוֹת.
25
זֵיי הָאט עֶר צוּנוֹיפְגֶענוּמֶען מִיט דִי אַרְבֶּעטֶער פוּן דֶעם זֶעלְבְּן פאַך, אוּן הָאט גֶעזָאגְט: מֶענֶער, אִיר וֵוייסְט, אַז פוּן דֶער דָאזִיקֶער מְלָאכָה הֶענְגְט אָפּ אוּנְדְזֶער פַּרְנָסָה.
26
אוּן אִיר זֶעט אוּן הֶערְט, אַז נִישְׁט נָאר אִין עֶפֶעזוּס אַלֵיין, נַייעֶרְט כִּמְעַט אִיבֶּער גַאנְץ אַסְיֶע הָאט דֶער דָאזִיקֶער פָּאוֹלוֹס אִיבֶּערְגֶערֶעדְט אוּן אָפְּגֶעקֶערְט אַ סַך מֶענְטְשְׁן, וַוייל עֶר זָאגְט, אַז דָאס זֶענֶען נִישְׁט קֵיין גֶעטֶער, וָואס וֶוערְן גֶעמַאכְט מִיט דִי הֶענְט.
27
אוּן נִישְׁט נָאר אִיז פַארַאן אַ סַכָּנָה, אַז דִי דָאזִיקֶע מְלָאכָה אוּנְדְזֶערֶע זָאל קְרִיגְן אַ שְׁלֶעכְטְן שֵׁם, נַייעֶרְט אַז אוֹיךְ דֶער טֶעמְפְּל פוּן דֶער גְרוֹיסֶער גֶעטִין אַרְטֶעמִיס זָאל בָּטֵל וֶוערְן, אוּן אַז זִי זָאל אֲפִילוּ אַרָאפְּגֶעזֶעצְט וֶוערְן פוּן אִיר הֶערְלְעכְקַייט, זִי, וָואס גַאנְץ אַסְיֶע אוּן דִי וֶועלְט דִינֶען אִיר.
28
אוּן אַז זֵיי הָאבְּן דָאס גֶעהֶערְט, זֶענֶען זֵיי גֶעוָוארְן פוּל מִיט צָארְן, אוּן הָאבְּן אוֹיסְגֶעשְׁרִיגְן: גְרוֹיס אִיז אַרְטֶעמִיס פוּן דִי עֶפֶעזֶער!
29
אוּן דִי שְׁטָאט אִיז גֶעוָוארְן פוּל מִיט גֶעטוּמְל: אוּן זֵיי הָאבְּן אַרַיינְגֶעשְׁטוּרֶעמְט אִין טֶעאַטֶער, אוּן הָאבְּן מִיטְגֶעשְׁלֶעפְּט גַאיוּס אוּן אַרִיסְטַארְכוּס, מַאקֶעדָאנְיֶער, וָואס זֶענֶען גֶעוֶוען פָּאוֹלוֹס חַבֵרִים אִין דֶער נְסִיעָה.
30
אוּן בְּעֵת פָּאוֹלוֹס הָאט בְּדֵעָה גֶעהַאט אַרַיינְצוּגֵיין צְוִוישְׁן דֶעם פָאלְק, הָאבְּן דִי תַּלְמִידִים אִים נִישְׁט גֶעלָאזְן.
31
אוּן אוֹיךְ עֶטְלֶעכֶע פוּן דִי עֶלְטְסְטֶע פוּן אַסְיֶע, וָואס זֶענֶען גֶעוֶוען זַיינֶע פְרַיינְט, הָאבְּן צוּ אִים גֶעשִׁיקְט, אוּן אִים גֶעבֶּעטְן, נִישְׁט צוּ דֶערְוֶועגְן זִיךְ צוּ קוּמֶען אִין טֶעאַטֶער אַרַיין.
32
אוּן טֵייל הָאבְּן גֶעשְׁרִיגְן אֵיין זַאך, אוּן אַנְדֶערֶע עֶפֶּעס אַנְדֶערְשׁ; וָוארִים דִי פַארְזַאמְלְטֶע זֶענֶען גֶעוֶוען אִין אַ מְהוּמָה, אוּן דֶער גְרֶעסְטֶער טֵייל הָאט נִישְׁט גֶעוואוּסְט, צוּלִיבּ וָואס זֵיי זֶענֶען זִיךְ צוּזַאמֶענְגֶעקוּמֶען.
33
אוּן זֵיי הָאבְּן אַרוֹיסְגֶעבְּרַאכְט אַלֶכְּסַנְדֶר פוּן דֶעם הַמוֹן, וֶועמֶען דִי יִידְן הָאבְּן אַרוֹיסְגֶעשְׁטֶעלְט פָארוֹיס. אוּן אַלֶכְּסַנְדֶר הָאט גֶעבֶּעטְן מִיט דֶער הַאנְט, אוּן הָאט בַּאגֶערְט צוּ הַאלְטְן אַ פַאַרְטֵיידִיקוּנְג פַאר דֶעם פָאלְק.
34
אָבֶּער וֶוען זֵיי הָאבְּן בַּאמֶערְקְט, אַז עֶר אִיז אַ יִיד, הָאבְּן זֵיי אַלֶע אִין מֶשֶׁךְ פוּן צְוֵויי שָׂעָה גֶעשְׁרִיגְן וִוי מִיט אֵיין קוֹל: גְרוֹיס אִיז אַרְטֶעמִיס פוּן דִי עֶפֶעזֶער!
35
אוּן אַז דֶער שְׁטָאט־שְׁרַייבֶּער הָאט אַיינְגֶעשְׁטִילְט דָאס פָאלְק, הָאט עֶר גֶעזָאגְט: מֶענֶער פוּן עֶפֶעזוּס, וֶועלְכֶער מֶענְטְשׁ וֵוייס נִישְׁט, אַז דִי שְׁטָאט פוּן דִי עֶפֶעזֶער אִיז דִי טֶעמְפְּל־הִיטֶערִין פוּן דֶער גְרוֹיסֶער אַרְטֶעמִיס, אוּן פוּן דָאס, וָואס אִיז אַרָאפְּגֶעפַאלְן פוּן הִימְל?
36
אוּן הֱיוֹת וִוי דִי דָאזִיקֶע זַאכְן קָאנֶען נִישְׁט אָפְּגֶעלֵייקְנְט וֶוערְן, וָואלְט אִיר בַּאדַארְפְט צוּ זַיין שְׁטִיל, אוּן גָארְנִישְׁט טָאן אִיבֶּערְגֶעאֵיילְט.
37
וָוארִים אִיר הָאט אַהֶערְגֶעבְּרַאכְט דִי דָאזִיקֶע מֶענְטְשְׁן, וָואס זֶענֶען נִישְׁט קֵיין רוֹיבֶּערְס פוּן קֵיין טֶעמְפְּלֶען, אוֹיךְ נִישְׁט קֵיין לֶעסְטֶערֶער פוּן אוּנְדְזֶער גֶעטִין.
38
דֶערִיבֶּער, אוֹיבּ דֶעמֶעטְרִיוּס אוּן דִי קִינְסְטְלֶער, וָואס זֶענֶען מִיט אִים, הָאבְּן אַ טַעֲנָה קֶעגְן עֶמִיצְן, זֶענֶען דִי גֶערִיכְטְן אָפְן, אוּן סֶע זֶענֶען פַארַאן פְּרָאקָאנְסוּלְן, לָאזְן זֵיי פַארְקְלָאגְן אֵיינֶער דֶעם אַנְדֶערְן.
39
אוּן הָאט אִיר עֶפֶּעס אַנְדֶערֶע עִנְיָנִים, וֶועט דָאס אוֹיסְגֶעגְלַייכְט וֶוערְן אִין דֶער גֶעזֶעצְלֶעכֶער פַארְזַאמְלוּנְג.
40
וָוארִים מִיר זֶענֶען אִין סַכָּנָה פַארְקְלָאגְט צוּ וֶוערְן פַאר דֶער הַיינְטִיקֶער מְהוּמָה, וַוייל עֶס אִיז נִישְׁטָא קֵיין סִיבָּה פַאר אִיר; אוּן מִיר וֶועלְן נִישְׁט קֶענֶען אָפּגֶעבְּן קֵיין רֶעכְנְשַׁאפְט פַאר דֶער דָאזִיקֶער מְהוּמָה.
41
אוּן נָאכְדֶעם וִוי עֶר הָאט אַזוֹי גֶערֶעדְט, הָאט עֶר דִי פַארְזַאמְלוּנְג פוּנְאַנְדֶערְגֶעלָאזְט.