אידיש
1
אוּן נָאכְדֶעם וִוי זֵיי זֶענֶען דוּרְכְגֶעגַאנְגֶען אַמְפִיפָּאלִיס אוּן אַפָּאלָאנִיֶע, זֶענֶען זֵיי גֶעקוּמֶען קֵיין תֶּעסַאלָאנִיקֶע, וואוּ עֶס אִיז גֶעוֶוען אַ יִידִישׁ שׁוּל.
2
אוּן וִוי זַיין מִנְהָג אִיז גֶעוֶוען, אִיז פָּאוֹלוֹס צוּ זֵיי אַרַיינְגֶעגַאנְגֶען, אוּן הָאט דְרַיי שַׁבָּתִים זִיךְ מִיט זֵיי מִתְוַוכֵּחַ גֶעוֶוען פוּן דִי כִּתְבֵי־הַקוֹדֶשׁ,
3
הָאט זֵיי גֶעעֶפְנְט אוּן בַּאוִויזְן, אַז דֶער מָשִׁיחַ הָאט גֶעמוּזְט לַיידְן, אוּן וִוידֶער אוֹיפְשְׁטֵיין פוּן דִי טוֹיטֶע, אוּן אַז דֶער דָאזִיקֶער יֵשׁוּעַ, וֶועמֶען אִיךְ בִּין מְבַשֵׂר פַאר אַייךְ, אִיז דֶער מָשִׁיחַ.
4
אוּן עֶטְלֶעכֶע פוּן זֵיי הָאבְּן זִיךְ אִיבֶּערְצַייגְט, אוּן זֶענֶען צוּגֶעשְׁטַאנֶען צוּ פָּאוֹלוֹס אוּן סִילַא; אוּן אוֹיךְ אַ סַך פוּן דִי פְרוּמֶע גְרִיכְן, אוּן פוּן דִי חָשׁוּבֶע פְרוֹיעֶן אוֹיךְ נִישְׁט קֵיין קְלֵיינֶע צָאל.
5
אָבֶּער דִי יִידְן הָאבְּן זֵיי מְקַנֵא גֶעוֶוען, אוּן הָאבְּן גֶענוּמֶען מִיט זִיךְ עֶטְלֶעכֶע פַארְדָארְבֶּענֶע מַארְק־יוּנְגֶען, אוּן הָאבְּן פַארְזַאמְלְט אַן עוֹלָם, אוּן גֶעמַאכְט אַ גֶערוּדֶער אִין דֶער שְׁטָאט; אוּן זֵיי הָאבְּן אַרוּמְגֶערִינְגְלְט דָאס הוֹיז פוּן יַאזָאן, אוּן הָאבְּן זֵיי גֶעוָואלְט אַרוֹיסְבְּרֶענְגֶען פַאר דֶעם פָאלְק.
6
אוּן אַז זֵיי הָאבְּן זֵיי נִישְׁט גֶעפוּנֶען, הָאבְּן זֵיי גֶעשְׁלֶעפְּט יַאזָאן אוּן עֶטְלֶעכֶע בְּרִידֶער פַאר דִי עֶלְטְסְטֶע פוּן דֶער שְׁטָאט, אוּן הָאבְּן גֶעשְׁרִיגְן: דִי דָאזִיקֶע לַייט, וָואס הָאבְּן אִיבֶּערְגֶעקֶערְט דִי וֶועלְט, זֶענֶען אוֹיךְ גֶעקוּמֶען אַהֶער,
7
אוּן יַאזָאן הָאט זֵיי אוֹיפְגֶענוּמֶען; אוּן זֵיי אַלֶע וִוידֶערְשְׁפֶּענִיקְן קֶעגְן דִי גֶעזֶעצְן פוּן דֶעם קֵיסָר, מַחְמַת זֵיי זָאגְן, אַז ס׳אִיז פַארַאן אַן אַנְדֶערֶער מֶלֶךְ, יֵשׁוּעַ.
8
אוּן זֵיי הָאבְּן דֶערְצֶערְנְט דָאס פָאלְק אוּן דִי עֶלְטְסְטֶע פוּן דֶער שְׁטָאט, בְּעֵת זֵיי הָאבְּן דָאס גֶעהֶערְט.
9
אוּן נָאכְדֶעם וִוי זֵיי הָאבְּן גֶענוּמֶען אַ גוּטְזָאגֶערַיי פוּן יַאזָאן אוּן דִי אִיבֶּערִיקֶע, הָאבְּן זֵיי זֵיי אָפְּגֶעלָאזְט.
10
אוּן דִי בְּרִידֶער הָאבְּן תֵּיכֵּף בַּיינַאכְט אַוֶועקְגֶעשִׁיקְט פָּאוֹלוֹס אוּן סִילַא קֵיין בֶּערָאיֶע; אוּן וֶוען זֵיי זֶענֶען אָנְגֶעקוּמֶען אַהִין, זֶענֶען זֵיי אַרַיינְגֶעגַאנְגֶען אִין דִי יִידִישְׁן שׁוּל.
11
אוּן דִי דָאזִיקֶע זֶענֶען גֶעוֶוען אֵיידֶעלֶער פוּן יֶענֶע אִין תֶּעסַאלָאנִיקֶע, וָוארִים זֵיי הָאבְּן מְקַבְּל גֶעוֶוען דָאס וָוארְט מִיט כַּוָונָה, אוּן הָאבְּן טָאג־טֶעגְלֶעך גֶעפָארְשְׁט דִי כִּתְבֵי־הַקוֹדֶשׁ, צִי דִי זַאכְן זֶענֶען טַאקֶע אַזוֹי.
12
אַ סַך פוּן זֵיי הָאבְּן דֶערִיבֶּער גֶעגְלוֹיבְּט, אוּן אוֹיךְ אַ סַך פוּן דִי גְרִיכִישֶׁע פְרוֹיעֶן פוּן חָשׁוּבְן שְׁטַאנְד, אוּן פוּן מֶענֶער אִיז דִי צָאל גֶעוֶוען נִישְׁט וִוינְצִיג.
13
אָבֶּער וֶוען דִי יִידְן פוּן תֶּעסַאלָאנִיקֶע זֶענֶען גֶעוָואר גֶעוָוארְן, אַז אוֹיךְ אִין בֶּערָאיֶע הָאט פָּאוֹלוֹס אָנְגֶעזָאגְט דָאס וָוארְט פוּן גָאט, זֶענֶען זֵיי אוֹיךְ גֶעקוּמֶען אַהִין, אוּן הָאבְּן בַּאאוּמְרוּאִיקְט אוּן אוֹיפְגֶעהֶעצְט דָאס פָאלְק.
14
אוּן דֶעמָאלְט הָאבְּן דִי בְּרִידֶער תֵּיכֵּף אַוֶועקְגֶעשִׁיקְט פָּאוֹלוֹס צוּ גֵיין אַזוֹי וַוייט וִוי בִּיזְן יַם; אוּן סִילַא אוּן טִימָאטֶעאוּס זֶענֶען נָאךְ פַארְבְּלִיבְּן דָארְטְן.
15
אוּן דִי, וָואס הָאבְּן בַּאגְלֵייט פָּאוֹלוֹס, הָאבְּן אִים גֶעבְּרַאכְט קֵיין אַטֶען; אוּן נָאכְדֶעם וִוי זֵיי הָאבְּן בַּאקוּמֶען אַ בַּאפֶעל פַאר סִילַא אוּן טִימָאטֶעאוּס, אַז זֵיי זָאלְן קוּמֶען צוּ אִים וָואס גִיכֶער, זֶענֶען זֵיי אַוֶועקְגֶעגַאנְגֶען.
16
אוּן בְּשַׁעַת פָּאוֹלוֹס הָאט אוֹיף זֵיי גֶעוַוארְט אִין אַטֶען, אִיז זַיין גֶעמִיט אִין אִים פַארְבִּיטֶערְט גֶעוָוארְן; בְּעֵת עֶר הָאט גֶעזֶען דִי שְׁטָאט פוּל מִיט אָפְּגֶעטֶער.
17
אוּן עֶר פְלֶעגְט רֶעדְן אִין דֶער שׁוּל מִיט דִי יִידְן אוּן מִיט דִי יִרְאֵי־שָׁמַיִם, אוּן אִין דֶעם מַארְק יֶעדְן טָאג מִיט דִי, וָואס עֶר הָאט בַּאגֶעגְנְט.
18
אוּן אוֹיךְ עֶטְלֶעכֶע פוּן דִי אַפִּיקוֹרְסִים אוּן סְטָאיִשֶׁע פִילָאזָאפְן הָאבְּן זִיךְ מִיט אִים מִתְוַוכֵּחַ גֶעוֶוען אוּן טֵייל הָאבְּן גֶעזָאגְט: וָואס מֵיינְט דֶער דָאזִיקֶער פְּלַאפְּלֶער צוּ זָאגְן? אַנְדֶערֶע הָאבְּן גֶעזָאגְט: עֶר וַוייזְט אוֹיס צוּ זַיין אַ מְבַשֵׂר פוּן פְרֶעמְדֶע אָפְּגֶעטֶער, - מַחְמַת עֶר הָאט גֶעדַרְשְׁנְט וֶועגְן יֵשׁוּעַ אוּן תְּחִיַת־הַמֵתִים.
19
אוּן זֵיי הָאבְּן אִים גֶענוּמֶען, אוּן הָאבְּן אִים גֶעבְּרַאכְט צוּ דֶעם אַרֶעאָפַּאגוּס, אוּן גֶעזָאגְט: קֶענֶען מִיר אֶפְשָׁר וִויסְן, וָואס עֶס אִיז אַזוֹינְס דִי נַייעֶ לֶערְנוּנְג, וָואס וֶוערְט פוּן דִיר גֶעלֶערְנְט?
20
וָוארִים דוּ בְּרֶענְגְסְט עֶפֶּעס מָאדְנֶע זַאכְן צוּ אוּנְדְזֶערֶע אוֹיעֶרן; מִיר וָואלְטְן דֶערִיבֶּער וֶועלְן וִויסְן, וָואס דִי דָאזִיקֶע זַאכְן בַּאטַייטְן.
21
אוּן אַלֶע אַטֶענֶער אוּן דִי פְרֶעמְדֶע, וָואס הָאבְּן דָארְט גֶעוְואוֹינְט, הָאבְּן זֵייעֶר צַייט פַארְבְּרַאכְט נִישְׁט אַנְדֶערְשׁ, וִוי אִין דֶערְצֵיילְן, אָדֶער אִין הֶערְן עֶפֶּעס אַ נַייעֶ זַאך.
22
אוּן פָּאוֹלוֹס אִיז גֶעשְׁטַאנֶען אִין דֶער מִיט פוּן דֶעם אַרֶעאָפַּאגוּס, אוּן הָאט גֶעזָאגְט: מֶענְטְשְׁן פוּן אַטֶען, אִין אַלְצְדִינְג זֶע אִיךְ, אַז אִיר הָאט שְׁטַארְק מוֹרֶא פַאר דִי גֶעטֶער.
23
וָוארִים וֶוען אִיךְ בִּין פַארְבַּייגֶעגַאנְגֶען, אוּן הָאבּ בַּאטְרַאכְט אַייעֶרֶע הֵיילִיקְטִימֶער, הָאבּ אִיךְ אוֹיךְ גֶעפִינֶען אַ מִזְבֵּחַ מִיט דֶער דָאזִיקֶער אוֹיפְשְׁרִיפְט: צוּ אַן אוּמְבַּאקַאנְטְן גָאט. בְּכֵן, דָאס וָואס אִיר דִינְט אוּמְוִויסְנְדִיקֶערְהֵייט, דָאס דָאזִיקֶע פְּרָאקְלַאמִיר אִיךְ אַייךְ.
24
גָאט, וָואס הָאט גֶעמַאכְט דִי וֶועלְט אוּן אַלְצְדִינְג דֶערִינֶען, עֶר, וָואס אִיז הַאר פוּן הִימְל אוּן עֶרְד, טוּט נִישְׁט וָואוֹינֶען אִין קֵיין טֶעמְפְּלֶען, גֶעמַאכְט דוּרְךְ מֶענְטְשְׁן;
25
עֶר וֶוערְט אוֹיךְ נִישְׁט בַּאדִינְט דוּרְךְ מֶענְטְשְׁן־הֶענְט, גְלַייךְ עֶר וָואלְט עֶפֶּעס נֵייטִיק גֶעהַאט, מַחְמַת עֶר אַלֵיין גִיט אַלֶעמֶען לֶעבְּן, אוּן אָטֶעם, אוּן אַלְצְדִינְג.
26
אוּן עֶר הָאט גֶעמַאכְט פוּן אֵיין בְּלוּט יֶעדֶע מֶענְטְשְׁלֶעכֶע אוּמָה צוּ וָואוֹינֶען אוֹיף דֶעם גַאנְצְן פָּנִים פוּן דֶער עֶרְד, בְּעֵת עֶר הָאט פֶעסְטְגֶעזֶעצְט זֵייעֶרֶע בַּאשְׁטִימְטֶע צַייטְן, אוּן דִי גְרֶענִיצְן פוּן זֵייעֶר בַּאוְואוֹינְאָרְט,
27
כְּדֵי זֵיי זָאלְן זוּכְן גָאט, אֶפְשָׁר וֶועלְן זֵיי אִים פִילְן אוּן גֶעפִינֶען, הַגַם עֶר אִיז נִישְׁט וַוייט פוּן יֶעדְן אֵיינֶעם פוּן אוּנְדְז.
28
וָוארִים אִין אִים לֶעבְּן מִיר, אוּן בַּאוֶועגְן זִיךְ, אוּן הָאבְּן אוּנְדְזֶער קִיוּם; וִוי אֲפִילוּ עֶטְלֶעכֶע פוּן אַייעֶרֶע אֵייגֶענֶע דִיכְטֶער הָאבְּן גֶעזָאגְט: וָוארִים מִיר זֶענֶען אוֹיךְ זַיין אָפְּשְׁטַאם.
29
בְּכֵן, וַוייל מִיר זֶענֶען דֶער אָפְּשְׁטַאם פוּן גָאט, דַארְפְן מִיר נִישְׁט מֵיינֶען, אַז דִי גָאטְהַייט אִיז גֶעגְלִיכְן צוּ גָאלְד, אָדֶער זִילְבֶּער, אָדֶער שְׁטֵיין, וָואס אִיז אוֹיסְגֶעקְרִיצְט דוּרְךְ דֶעם וֶוערְק אוּן הַשָׂגָה פוּן מֶענְטְשְׁן.
30
דֶערִיבֶּער הָאט גָאט פַארְזֶען דִי צַייטְן פוּן אוּמְוִויסְנְדִיקַייט, אָבֶּער אִיצְטֶער טוּט עֶר בַּאפֶעלְן אַלֶע מֶענְטְשְׁן, אַז זֵיי זָאלְן אוּמֶעטוּם תְּשׁוּבָה טָאן;
31
וַוייל עֶר הָאט בַּאשְׁטִימְט אַ טָאג, אִין וֶועלְכְן עֶר וֶועט מִשְׁפָּטְן דִי וֶועלְט מִיט גֶערֶעכְטִיקַייט דוּרְךְ דֶעם מֶענְטְשְׁן, וֶועמֶען עֶר הָאט בַּאשְׁטִימְט, אוּן עֶר הָאט מַבְטִיחַ גֶעוֶוען אַלֶע מֶענְטְשְׁן, מִיט דֶעם וָואס עֶר הָאט אִים מְחַיֵה־מֵתִים גֶעוֶוען.
32
אוּן וֶוען זֵיי הָאבְּן גֶעהֶערְט פוּן תְּחִיַת־הַמֵתִים, הָאבְּן טֵייל חוֹזְק גֶעמַאכְט; אָבֶּער אַנְדֶערֶע הָאבְּן גֶעזָאגְט: מִיר וֶועלְן דִיךְ בְּנוֹגֵע דֶעם וִוידֶער אַמָאל הֶערְן.
33
אַזוֹי אִיז פָּאוֹלוֹס אַרוֹיסְגֶעגַאנְגֶען פוּן צְוִוישְׁן זֵיי.
34
אָבֶּער עֶטְלֶעכֶע מֶענְטְשְׁן הָאבְּן זִיךְ בַּאהֶעפְט אָן אִים, אוּן הָאבְּן גֶעגְלוֹיבְּט; צְוִוישְׁן זֵיי אִיז אוֹיךְ גֶעוֶוען דִיָאנִיזִיוּס דֶער אַרֶעאָפַּאגִיט, אוּן אַ פְרוֹי מִיטְן נָאמֶען דַאמַארִיס, אוּן אַנְדֶערֶע מִיט זֵיי.