אידיש
1
אוּן עֶר אִיז אוֹיךְ גֶעקוּמֶען קֵיין דֶערְבֶּע אוּן קֵיין לִיסְטְרֶע. אוּן אָט אִיז דָארְט גֶעוֶוען אֵיינֶער אַ תַּלְמִיד מִיטְן נָאמֶען טִימָאטֶעאוּס, דֶער זוּן פוּן אַ יִידִישֶׁער פְרוֹי, וָואס הָאט גֶעגְלוֹיבְּט, אָבֶּער זַיין פָאטֶער אִיז גֶעוֶוען אַ גְרִיך.
2
דֶער דָאזִיקֶער הָאט גֶעהַאט אַ גוּטְן שֵׁם בַּיי דִי בְּרִידֶער אִין לִיסְטְרֶע אוּן אִיקָאנְיוֹן.
3
אוּן פָּאוֹלוֹס הָאט גֶעוָואלְט, אַז עֶר זָאל מִיט אִים מִיטְגֵיין; אוּן עֶר הָאט אִים גֶענוּמֶען אוּן הָאט אִים מַל גֶעוֶוען צוּלִיבּ דִי יִידְן, וָואס זֶענֶען גֶעוֶוען אִין יֶענֶע מְקוֹמוֹת, וָוארִים זֵיי הָאבְּן אַלֶע גֶעוואוּסְט, אַז זַיין פָאטֶער אִיז גֶעוֶוען אַ גְרִיך.
4
אוּן וִוי זֵיי זֶענֶען דוּרְכְגֶעגַאנְגֶען דוּרְךְ דִי שְׁטֶעט, הָאבְּן זֵיי זֵיי אָנְגֶעזָאגְט צוּ הִיטְן דִי חוּקִים, וָואס זֶענֶען בַּאשְׁלָאסְן גֶעוָוארְן פוּן דִי שְׁלִיחִים אוּן זְקֵנִים אִין יְרוּשָׁלַיִם.
5
אוּן אַזוֹי זֶענֶען דִי קְהִילוֹת גֶעשְׁטַארְקְט גֶעוָוארְן אִין דֶער אֶמוּנָה, אוּן הָאבְּן זִיךְ פַארְמֶערְט אִין צָאל פוּן טָאג צוּ טָאג.
6
אוּן זֵיי זֶענֶען דוּרְכְגֶעגַאנְגֶען דוּרְךְ דֶער גֶעגְנְט פוּן פְרִיגְיֶע אוּן גַאלַאטְיֶע, וַוייל זֵיי זֶענֶען פוּן דֶעם רוּחַ־הַקוֹדֶשׁ פַארְוֶוערְט גֶעוָוארְן צוּ רֶעדְן דָאס וָוארְט אִין אַסְיֶע.
7
אוּן אַז זֵיי זֶענֶען גֶעקוּמֶען קֵיין מוּסְיֶע, הָאבְּן זֵיי גֶעוָואלְט גֵיין קֵיין בִּיטוּנְיֶע, נָאר דֶער גֵייסְט פוּן יֵשׁוּעַ הָאט זֵיי נִישְׁט גֶעלָאזְן.
8
אוּן זֵיי זֶענֶען פַארְבַּייגֶעגַאנְגֶען מוּסְיֶע, אוּן זֶענֶען אַרָאפְּגֶעקוּמֶען קֵיין טְרָאאַס.
9
אוּן אַ זֶעאוּנְג הָאט זִיךְ אַנְטְפְּלֶעקְט צוּ פָּאוֹלוֹס בַּיינַאכְט: אַ מֶענְטְשׁ פוּן מַאקֶעדָאנְיֶע אִיז גֶעשְׁטַאנֶען אוּן הָאט אִים גֶעבֶּעטְן, אַזוֹי צוּ זָאגְן: קוּם אַרִיבֶּער קֵיין מַאקֶעדָאנְיֶע, אוּן הֶעלְף אוּנְדְז.
10
אוּן אַז עֶר הָאט גֶעזֶען דִי זֶעאוּנְג, הָאבְּן מִיר תֵּיכֵּף גֶעזוּכְט אַוֶועקְצוּגֵיין קֵיין מַאקֶעדָאנְיֶע, וָוארִים מִיר הָאבְּן גֶעדְרוּנְגֶען, אַז גָאט הָאט אוּנְדְז גֶערוּפְן מְבַשֵׂר צוּ זַיין פַאר זֵיי דִי בְּשׂוּרָה טוֹבָה.
11
אוּן בְּעֵת מִיר זֶענֶען אָפְּגֶעפָארְן פוּן טְרָאאַס, זֶענֶען מִיר גֶעקוּמֶען מִיט אַ גְלַייכְן וֶועג קֵיין סַאמָאטְרַאקְיֶע, אוּן אוֹיפְן אַנְדֶערְן טָאג קֵיין נֶעאַפָּאלִיס,
12
אוּן פוּנְדַאנֶען קֵיין פִילִיפִּי, וָואס אִיז דִי הוֹיפְּט־שְׁטָאט פוּן דֶעם גֶעבִּיט פוּן מַאקֶעדָאנְיֶע, אוּן אַ רוֹימִישֶׁע קָאלָאנְיֶע. אוּן מִיר זֶענֶען גֶעבְּלִיבְּן אִין דֶער דָאזִיקֶער שְׁטָאט עֶטְלֶעכֶע טֶעג.
13
אוּן שַׁבָּת זֶענֶען מִיר אַרוֹיסְגֶעגַאנְגֶען דוּרְךְ דֶעם טוֹיעֶר צוּ אַ טַייךְ, וואוּ מִיר הָאבְּן גֶעמֵיינְט עֶס אִיז גֶעוֶוען אַ מָקוֹם־תְּפִילָה; אוּן מִיר הָאבְּן זִיךְ אַנִידֶערְגֶעזֶעצְט, אוּן גֶערֶעדְט צוּ דִי פְרוֹיעֶן, וָואס זֶענֶען זִיךְ צוּנוֹיפְגֶעקוּמֶען.
14
אוּן אֵיינֶע אַ פְרוֹי, מִיטְן נָאמֶען לִידְיֶע, אַ קְרֶעמֶערִין פוּן פּוּרְפּוּר פוּן דֶער שְׁטָאט תִּיאַטִירֶע, וָואס הָאט גֶעדִינְט גָאט, הָאט זִיךְ צוּ אוּנְדְז צוּגֶעהֶערְט. אוּן גָאט הָאט גֶעעֶפְנְט אִיר הַארְץ צוּ פַארְנֶעמֶען דִי רֵייד, וָואס זֶענֶען דוּרְךְ פָּאוֹלוֹס גֶערֶעדְט גֶעוָוארְן.
15
אוּן אַז זִי אִיז גֶעטוֹבְלְט גֶעוָוארְן, מִיט אִיר בְּנֵי־בַּיִת, הָאט זִי אוּנְדְז גֶעבֶּעטְן, אַזוֹי צוּ זָאגְן: אוֹיבּ אִיר הַאלְט מִיךְ פַאר אַ מַאמֶנֶת אִין דֶעם הַאר, טָא קוּמְט אוּן בְּלַייבְּט אִין מַיין הוֹיז. אוּן זִי הָאט אוּנְדְז שְׁטַארְק גֶעבֶּעטְן.
16
אוּן עֶס אִיז גֶעוֶוען, בְּעֵת מִיר זֶענֶען גֶעגַאנְגֶען צוּ דֶעם מָקוֹם־תְּפִילָה, אַז אוּנְדְז הָאט בַּאגֶעגְנְט אַ דִינְסְטְמֵיידְל, וָואס הָאט גֶעהַאט אַ גֵייסְט פוּן וָוארְזָאגְן, אוּן וָואס הָאט מִיט אִיר וָוארְזָאגְן אַרַיינְגֶעבְּרַאכְט אִירֶע הַארְן אַ גְרוֹיסְן פַארְדִינְסְט.
17
אוּן זִי אִיז נָאכְגֶעגַאנְגֶען פָּאוֹלוֹס אוּן אוּנְדְז, אוּן הָאט גֶעשְׁרִיגְן: אָט־דִי מֶענְטְשְׁן זֶענֶען קְנֶעכְט פוּן דֶעם אֵל־עֶליוֹן, וָואס זָאגְן אָן פַאר אַייךְ דֶעם וֶועג פוּן יְשׁוּעָה.
18
אוּן דָאס הָאט זִי גֶעטָאן אַ סַך טֶעג. אָבֶּער פָּאוֹלוֹס הָאט זִיךְ מְצַעֶר גֶעוֶוען, אוּן הָאט זִיךְ אוֹיסְגֶעדְרֵייט אוּן גֶעזָאגְט צוּ דֶעם גֵייסְט: אִיךְ בַּאפֶעל דִיר אִין דֶעם נָאמֶען פוּן יֵשׁוּעַ הַמָשִׁיחַ אַרוֹיסְצוּגֵיין פוּן אִיר. אוּן עֶר אִיז אַרוֹיס דִי זֶעלְבֶּע שָׂעָה.
19
אוּן וֶוען אִירֶע הַארְן הָאבְּן גֶעזֶען, אַז דִי הָאפֶענוּנְג אוֹיף זֵייעֶר פַארְדִינְסְט אִיז פַארְלוֹירְן גֶעגַאנְגֶען, הָאבְּן זֵיי גֶעכַאפְּט פָּאוֹלוֹס אוּן סִילַא, אוּן הָאבְּן זֵיי אַוֶועקְגֶעשְׁלֶעפְּט אִין מַארְק אַרַיין פַאר דִי שָׂרִים.
20
אוּן אַז זֵיי הָאבְּן זֵיי גֶעבְּרַאכְט פַאר דִי רִיכְטֶער, הָאבְּן זֵיי גֶעזָאגְט: דִי דָאזִיקֶע מֶענְטְשְׁן, וָואס זֶענֶען יִידְן, טְוּעֶן אָן גְרוֹיסֶע צָרוֹת אוּנְדְזֶער שְׁטָאט,
21
אוּן פִירְן אֵיין מִנְהָגִים, וָואס מִיר טָארְן נִישְׁט אָנְנֶעמֶען, אָדֶער אָפְּהִיטְן, וַוייל מִיר זֶענֶען רוֹימֶער.
22
אוּן דָאס פָאלְק אִיז אִינְאֵיינֶעם אוֹיפְגֶעשְׁטַאנֶען קֶעגְן זֵיי; אוּן דִי רִיכְטֶער הָאבְּן פוּן זֵיי אַרָאפְּגֶערִיסְן דִי מַלְבּוּשִׁים, אוּן בַּאפוֹילְן זֵיי צוּ שְׁמַייסְן מִיט רִיטֶער.
23
אוּן נָאכְדֶעם וִוי זֵיי הָאבְּן זֵיי גֶעגֶעבְּן אַ סַך שְׁמִיץ, הָאבְּן זֵיי זֵיי אַרַיינְגֶעוָוארְפְן אִין דֶער תְּפִיסָה, אוּן בַּאפוֹילְן דֶעם שׁוֹמֵר זֵיי גוּט צוּ הִיטְן;
24
אוּן אַז עֶר הָאט גֶעקְרִיגְן אַזַא בַּאפֶעל, הָאט עֶר זֵיי אַרַיינְגֶעוָוארְפְן אִין דֶער אִינֶעוֵויינִיקְסְטֶער תְּפִיסָה, אוּן אַיינְגֶעשְׁלָאסְן זֵייעֶרֶע פִיס אִין קְלֶעצֶער.
25
אָבֶּער קֶעגְן הַאלְבֶּער נַאכְט הָאבְּן פָּאוֹלוֹס אוּן סִילַא מִתְפַּלֵל גֶעוֶוען אוּן גֶעזוּנְגֶען לוֹיבְּלִידֶער צוּ גָאט, אוּן דִי גֶעפַאנְגֶענֶע הָאבְּן זִיךְ צוּגֶעהֶערְט צוּ זֵיי.
26
אוּן פְּלוּצוּם אִיז גֶעוָוארְן אַ גְרוֹיס עֶרְדְצִיטֶערְנִישׁ, אַזוֹי, אַז דִי יְסוֹדוֹת פוּן דֶער תְּפִיסָה הָאבְּן זִיךְ גֶעטְרֵייסְלְט; אוּן אַלֶע טִירְן זֶענֶען תֵּיכֵּף גֶעעֶפְנְט גֶעוָוארְן, אוּן אַלֶעמֶענְס קֵייטְן זֶענֶען לוֹיז גֶעוָוארְן.
27
אוּן וִוי דֶער שׁוֹמֵר הָאט זִיךְ אוֹיפְגֶעכַאפְּט פוּן שְׁלָאף, אוּן גֶעזֶען דִי תְּפִיסָה־טִירְן אָפְן, הָאט עֶר גֶעצוֹיגְן זַיין שְׁוֶוערְד אוּן אִיז גֶעוֶוען גְרֵייט זִיךְ אַלֵיין צוּ טֵייטְן, וַוייל עֶר הָאט גֶעמֵיינְט, אַז דִי גֶעפַאנְגֶענֶע זֶענֶען אַנְטְלָאפְן.
28
אָבֶּער פָּאוֹלוֹס הָאט גֶעשְׁרִיגְן מִיט אַ הוֹיךְ קוֹל, אַזוֹי צוּ זָאגְן: טוּ דִיר נִישְׁט קֵיין שׁוּם שְׁלֶעכְטְס, וָוארִים מִיר זֶענֶען אַלֶע דָא.
29
אוּן עֶר הָאט פַארְלַאנְגְט אַ לִיכְט, אוּן אִיז אַרַיינְגֶעשְׁפְּרוּנְגֶען, אוּן אַ צִיטֶערְנְדִיקֶער אִיז עֶר אַנִידֶערְגֶעפַאלְן פַאר פָּאוֹלוֹס אוּן סִילַא,
30
אוּן עֶר הָאט זֵיי אַרוֹיסְגֶעפִירְט, אוּן גֶעזָאגְט: הַארְן, וָואס מוּז אִיךְ טָאן, כְּדֵי גֶערַאטֶעוֶועט צוּ וֶוערְן?
31
אוּן זֵיי הָאבְּן גֶעזָאגְט: גְלוֹיבּ אִין דֶעם הַאר יֵשׁוּעַ, אוּן דוּ וֶועסְט גֶערַאטֶעוֶועט וֶוערְן, דוּ אוּן דַיין הוֹיז.
32
אוּן זֵיי הָאבְּן גֶערֶעדְט צוּ אִים דָאס וָוארְט פוּן גָאט, אוּן צוּ אַלֶע, וָואס זֶענֶען גֶעוֶוען אִין זַיין הוֹיז.
33
אוּן עֶר הָאט זֵיי גֶענוּמֶען אִין יֶענֶער שָׂעָה פוּן דֶער נַאכְט, אוּן הָאט אָפְּגֶעוַואשְׁן זֵייעֶרֶע שְׁרַאמֶען, אוּן עֶר אִיז תֵּיכֵּף גֶעטוֹבְלְט גֶעוָוארְן, עֶר אוּן אַלֶע זַיינִיקֶע.
34
אוּן עֶר הָאט זֵיי אַרוֹיפְגֶעבְּרַאכְט צוּ זִיךְ אִין הוֹיז אַרַיין, אוּן הָאט גֶעגְרֵייט פַאר זֵיי שְׁפַּייז, אוּן הָאט זִיךְ שְׁטַארְק גֶעפְרֵייט מִיט זַיין גַאנְצְן הוֹיז, וַוייל עֶר אִיז גֶעוָוארְן אַ מַאֲמִין אִין גָאט.
35
אוּן בְּעֵת עֶס אִיז גֶעוָוארְן טָאג, הָאבְּן דִי רִיכְטֶער גֶעשִׁיקְט דִי שׁוֹטְרִים, אַזוֹי צוּ זָאגְן: לָאז גֵיין יֶענֶע מֶענְטְשְׁן.
36
אוּן דֶער שׁוֹמֵר פוּן דֶער תְּפִיסָה הָאט גֶעמָאלְדְן פָּאוֹלוֹס דִי רֵייד, אַזוֹי צוּ זָאגְן: דִי רִיכְטֶער הָאבְּן גֶעשִׁיקְט, אַז מֶע זָאל אַייךְ לָאזְן גֵיין; דֶערִיבֶּער, קוּמְט אַרוֹיס, אוּן גֵייט בְּשָׁלוֹם.
37
אָבֶּער פָּאוֹלוֹס הָאט צוּ זֵיי גֶעזָאגְט: זֵיי הָאבְּן אוּנְדְז עֶפְנְטְלֶעךְ גֶעשְׁלָאגְן, אָן דִין אוּן מִשְׁפָּט, מֶענְטְשְׁן, וָואס זֶענֶען רוֹימֶער, אוּן הָאבְּן אוּנְדְז אַרַיינְגֶעוָוארְפְן אִין דֶער תְּפִיסָה; אוּן אִיצְט וַוארְפְן זֵיי אוּנְדְז אַרוֹיס בְּסֵתֶר? נֵיין! זָאלְן זֵיי אַלֵיין קוּמֶען אוּן אוּנְדְז אַרוֹיסְפִירְן.
38
אוּן דִי שׁוֹטְרִים הָאבְּן גֶעמָאלְדְן דִי רִיכְטֶער דִי דָאזִיקֶער רֵייד. אוּן זֵיי הָאבְּן זִיךְ דֶערְשְׁרָאקְן, וֶוען זֵיי הָאבְּן גֶעהֶערְט, אַז זֵיי זֶענֶען רוֹימֶער;
39
אוּן זֵיי זֶענֶען גֶעקוּמֶען אוּן הָאבְּן זֵיי אִיבֶּערְגֶעבֶּעטְן. אוּן זֵיי הָאבְּן זֵיי אַרוֹיסְגֶעפִירְט, אוּן הָאבְּן זֵיי גֶעבֶּעטְן צוּ פַארְלָאזְן דִי שְׁטָאט.
40
אוּן זֵיי זֶענֶען אַרוֹיסְגֶעגַאנְגֶען פוּן דֶער תְּפִיסָה, אוּן זֶענֶען אַרַיינְגֶעגַאנְגֶען צוּ לִידְיֶען; אוּן אַז זֵיי הָאבְּן גֶעזֶען דִי בְּרִידֶער, הָאבְּן זֵיי זֵיי גֶעטְרֵייסְט, אוּן זֶענֶען אַוֶועקְגֶעגַאנְגֶען.