אידיש
1
אִין דֶעם עֶרְשְׁטְן סֵפֶר, אָ טֶעאָפִילוּס, הָאבּ אִיךְ גֶעשְׁרִיבְּן פוּנְוֶועגְן אַלְץ, וָואס יֵשׁוּעַ הָאט אָנְגֶעהוֹיבְּן צוּ טָאן אוּן צוּ לֶערְנֶען,
2
בִּיז דֶעם טָאג, אִין וֶועלְכְן עֶר אִיז אַרוֹיפְגֶענוּמֶען גֶעוָוארְן, נָאכְדֶעם וִוי עֶר הָאט דוּרְךְ דֶעם רוּחַ־הַקוֹדֶשׁ גֶעגֶעבְּן גֶעבָּאט צוּ דִי שְׁלִיחִים, וֶועמֶען עֶר הָאט אוֹיסְדֶערְוֵויילְט;
3
צוּ וֶועמֶען עֶר הָאט זִיךְ אוֹיךְ אַנְטְפְּלֶעקְט אַ לֶעבְּדִיקֶער נָאךְ זַיינֶע יְסוּרִים דוּרְךְ אַ סַך בַּאוַוייזְן, בְּעֵת עֶר הָאט זִיךְ צוּ זֵיי בַּאוִויזְן אִין מֶשֶׁךְ פוּן פֶערְצִיק טֶעג, אוּן הָאט גֶערֶעדְט צוּ זֵיי פוּנְוֶועגְן דֶעם מַלְכוּת פוּן גָאט.
4
אוּן בְּעֵת עֶר אִיז מִיט זֵיי גֶעוֶוען פַארְזַאמְלְט אִינְאֵיינֶעם, הָאט עֶר זֵיי בַּאפוֹילְן נִישְׁט אָפְּצוּקֶערְן פוּן יְרוּשָׁלַיִם, נַייעֶרְט צוּ וַוארְטְן אוֹיף דֶער הַבְטָחָה פוּן דֶעם פָאטֶער, פוּן וָואס, הָאט עֶר גֶעזָאגְט, אִיר הָאט גֶעהֶערְט פוּן מִיר;
5
וָוארִים יוֹחָנָן הָאט גֶעטוֹבְלְט מִיט וַואסֶער, אָבֶּער אִיר וֶועט גֶעטוֹבְלְט וֶוערְן מִיט דֶעם רוּחַ־הַקוֹדֶשׁ בְּקָרוֹב, נָאךְ דִי דָאזִיקֶע טֶעג.
6
דֶערִיבֶּער, בְּעֵת זֵיי זֶענֶען זִיךְ צוּזַאמֶענְגֶעקוּמֶען, הָאבְּן זֵיי אִים גֶעפְרֶעגְט, אַזוֹי צוּ זָאגְן: הַאר, וֶועסְטוּ אִין דֶער אִיצְטִיקֶער צַייט וִוידֶער אוֹיפְרִיכְטְן דָאס מַלְכוּת צוּ יִשְׂרָאֵל?
7
אוּן עֶר הָאט צוּ זֵיי גֶעזָאגְט: עֶס אִיז נִישְׁט פַאר אַייךְ צוּ וִויסְן דִי צַייטְן, אָדֶער זְמַנִים, וָואס דֶער פָאטֶער הָאט בַּאשְׁטִימְט אִין זַיין אֵייגֶענֶעם רְשׁוּת.
8
אָבֶּער אִיר וֶועט קְרִיגְן גְבוּרָה, וֶוען דֶער רוּחַ־הַקוֹדֶשׁ וֶועט קוּמֶען אוֹיף אַייךְ; אוּן אִיר וֶועט זַיין מַיינֶע עֵדוּת אִין יְרוּשָׁלַיִם, אוּן אִין גַאנְץ יְהוּדָה, אוּן אִין שׁוֹמְרוֹן, אוּן בִּיז צוּם סוֹף פוּן דֶער עֶרְד.
9
אוּן בְּעֵת עֶר הָאט דָאס גֶעזָאגְט, אִיז עֶר פַאר זֵייעֶרֶע אוֹיגְן אַרוֹיפְגֶענוּמֶען גֶעוָוארְן; אוּן אַ וָואלְקְן הָאט אִים צוּגֶענוּמֶען פוּן זֵייעֶרֶע אוֹיגְן.
10
אוּן בְּשַׁעַת זֵיי הָאבְּן גֶעקוּקְט גְלַייךְ צוּם הִימְל וִוי עֶר אִיז אַרוֹיפְגֶעגַאנְגֶען, עֶרְשְׁט צְוֵויי מֶענְטְשְׁן זֶענֶען גֶעשְׁטַאנֶען לֶעבְּן זֵיי אִין וַוייסֶע קְלֵיידֶער,
11
אוּן הָאבְּן גֶעזָאגְט: אִיר מֶענְטְשְׁן פוּן גָלִיל, פַארְוָואס שְׁטֵייט אִיר אוּן קוּקְט צוּם הִימְל? דֶער דָאזִיקֶער יֵשׁוּעַ, וָואס אִיז אַרוֹיפְגֶענוּמֶען גֶעוָוארְן פוּן אַייךְ אִין הִימְל אַרַיין, וֶועט קוּמֶען אוֹיף אַזַא אוֹפְן, וִוי אִיר הָאט אִים גֶעזֶען גֵיין אִין הִימְל אַרַיין.
12
דֶעמָאלְט הָאבְּן זֵיי זִיךְ אוּמְגֶעקֶערְט קֵיין יְרוּשָׁלַיִם פוּן דֶעם בַּארְג, וָואס הֵייסְט הַר־הַזֵיתִים, וָואס אִיז נָאעֶנְט פוּן יְרוּשָׁלַיִם, אַ גַאנְג פוּן אַ תְּחוּם־שַׁבָּת.
13
אוּן בְּעֵת זֵיי זֶענֶען אַרַיינְגֶעקוּמֶען, זֶענֶען זֵיי אַרוֹיפְגֶעגַאנְגֶען אִין דֶעם אוֹיבֶּערְשְׁטְן חֵדֶר אַרַיין, וואוּ זֵיי זֶענֶען אַיינְגֶעשְׁטַאנֶען: פֶּעטְרוֹס אוּן יוֹחָנָן, אוּן יַעֲקֹב אוּן אַנְדְרֵי, פִילִיפּוּס אוּן תּוֹמָא, בַּר־תַּלְמַי אוּן מַתְּיָה, יַעֲקֹב בֶּן־חַלְפַי, אוּן שִׁמְעוֹן דֶער קַנָאִי, אוּן יְהוּדָה בֶּן־יַעֲקֹב.
14
דִי אַלֶע הָאבְּן אִינְאֵיינֶעם כְּסֵדֶר פַארְבְּרַאכְט אִין תְּפִילָה טָאן, מִיט דִי וַוייבֶּער, אוּן מִרְיָם, דִי מוּטֶער פוּן יֵשׁוּעַ, אוּן מִיט זַיינֶע בְּרִידֶער.
15
אוּן אִין דִי דָאזִיקֶע טֶעג אִיז פֶּעטְרוֹס אוֹיפְגֶעשְׁטַאנֶען אִין דֶער מִיט פוּן דִי בְּרִידֶער (אוּן דִי צָאל פוּן דִי פַארְזַאמְלְטֶע אִיז גֶעוֶוען אַן עֶרֶךְ פוּן הוּנְדֶערְט אוּן צְוַואנְצִיק מֶענְטְשְׁן), אוּן הָאט גֶעזָאגְט:
16
בְּרִידֶער, עֶס אִיז גֶעוֶוען נֵייטִיק אַז דֶער פָּסוּק זָאל מְקוּיָם וֶוערְן, פוּן וָואס דֶער רוּחַ־הַקוֹדֶשׁ הָאט פָארְוֹיסְגֶעזָאגְט דוּרְךְ דֶעם מוֹיל פוּן דָוִד וֶועגְן יְהוּדָה, וָואס אִיז גֶעוֶוען דֶער אָנְפִירֶער פוּן דִי, וָואס הָאבְּן גֶעפַאנְגֶען גֶענוּמֶען יֵשׁוּעַ;
17
וָוארִים עֶר אִיז גֶעוֶוען גֶעצֵיילְט צְוִוישְׁן אוּנְדְז, אוּן הָאט מְקַבְּל גֶעוֶוען זַיין חֵלֶק אִין דֶער דָאזִיקֶער עַבוֹדָה.
18
אוּן עֶר הָאט זִיךְ גֶעקוֹיפְט אַ פֶעלְד מִיט דֶעם שְׂכַר פוּן זַיין רִשְׁעוּת; אוּן עֶר אִיז גֶעפַאלְן אוֹיפְן קָאפּ, אוּן הָאט גֶעפְּלַאצְט אִין צְוֵוייעֶן, אוּן אַלֶע זַיינֶע אִינְגֶעוֵויידְן זֶענֶען אוֹיסְגֶעגָאסְן גֶעוָוארְן.
19
אוּן דָאס אִיז בַּאקַאנְט גֶעוָוארְן פַאר אַלֶע בַּאוְואוֹינֶער פוּן יְרוּשָׁלַיִם, אַזוֹי, אַז אִין זֵייעֶר לָשׁוֹן אִיז דָאס פֶעלְד גֶערוּפְן גֶעוָוארְן חֲקַל־דְמָא, וָואס אִיז טַייטְשׁ: דָאס פֶעלְד פוּן בְּלוּט.
20
וָוארִים סֶע שְׁטֵייט גֶעשְׁרִיבְּן אִין דֶעם סֵפֶר תְּהִלִים: זָאל זַיין יִשׁוּב וֶוערְן פַארְוִויסְט, אוּן זָאל קֵיינֶער דֶערִין נִישְׁט וָואוֹינֶער, אוּן זַיין אָרְט זָאל אַן אַנְדֶערֶער פַארְנֶעמֶען.
21
דֶערִיבֶּער מוּז אֵיינֶער פוּן דִי מֶענְטְשְׁן, וָואס זֶענֶען גֶעגַאנְגֶען מִיט אוּנְדְז דִי גַאנְצֶע צַייט, בְּעֵת דֶער הַאר יֵשׁוּעַ אִיז אַרַיינְגֶעגַאנְגֶען אוּן אַרוֹיסְגֶעגַאנְגֶען צְוִוישְׁן אוּנְדְז,
22
אָנְהֵייבְּנְדִיק פוּן יוֹחָנָנְס טְבִילָה, בִּיז דֶעם טָאג, וֶוען עֶר אִיז פוּן אוּנְדְז אַרוֹיפְגֶענוּמֶען גֶעוָוארְן, -פוּן דִי דָאזִיקֶע מוּז אֵיינֶער וֶוערְן מִיט אוּנְדְז אַן עֵדוּת פוּן זַיין תְּחִיַת־הַמֵתִים.
23
אוּן זֵיי הָאבְּן אוֹיפְגֶעשְׁטֶעלְט צְוֵויי: יוֹסֵף, וֶועמֶען מֶען הָאט גֶערוּפְן בַּר־שַׁבָּא, אוּן וָואס הָאט גֶעהַאט דֶעם צוּנָאמֶען יוּסְטוּס, אוּן מַתְּיָה.
24
אוּן זֵיי הָאבְּן מִתְפַּלֵל גֶעוֶוען אוּן גֶעזָאגְט: דוּ, הַאר, וָואס וֵוייסְט דִי הֶערְצֶער פוּן אַלֶע מֶענְטְשְׁן, וַוייז אָן פוּן דִי דָאזִיקֶע צְוֵויי דֶעם, וֶועמֶען דוּ הָאסְט אוֹיסְדֶערְוֵויילְט
25
צוּ פַארְנֶעמֶען דֶעם פְּלַאץ פוּן דֶער דָאזִיקֶער עַבוֹדָה אוּן שְׁלִיחוּת, פוּן וֶועלְכֶער יְהוּדָה אִיז אָפְּגֶעפַאלְן, כְּדֵי עֶר זָאל גֵיין צוּ זַיין אֵייגֶענֶעם אָרְט.
26
אוּן זֵיי הָאבְּן גֶעוָוארְפְן גוֹרָל פוּנְוֶועגְן זֵיי, אוּן דֶער גוֹרָל אִיז גֶעפַאלְן אוֹיף מַתְּיָא; אוּן עֶר אִיז גֶעצֵיילְט גֶעוָוארְן מִיט דִי עֶלְף שְׁלִיחִים.