אידיש
1
אוּן בְּעֵת עֶר אִיז פַארְבַּייגֶעגַאנְגֶען, הָאט עֶר גֶעזֶען אַ מֶענְטְשְׁן, וָואס אִיז גֶעוֶוען בְּלִינְד פוּן זַיין גֶעבּוּרְט אָן.
2
אוּן זַיינֶע תַּלְמִידִים הָאבְּן אִים גֶעפְרֶעגְט: רֶבְּי, וֶוער הָאט גֶעזִינְדִיקְט, דֶער דָאזִיקֶער מֶענְטְשׁ, אָדֶער זַיינֶע עֶלְטֶערְן, וָואס עֶר אִיז גֶעבּוֹירְן גֶעוָוארְן בְּלִינְד?
3
הָאט יֵשׁוּעַ גֶעעֶנְטְפֶערְט: נִישְׁט עֶר הָאט גֶעזִינְדִיקְט, אוּן נִישְׁט זַיינֶע עֶלְטֶערְן, נַייעֶרְט כְּדֵי דִי מַעֲשִׂים פוּן גָאט זָאלְן אִין אִים אַנְטְפְּלֶעקְט וֶוערְן.
4
מִיר מוּזְן טָאן דִי מַעֲשִׂים פוּן אִים, וָואס הָאט מִיךְ גֶעשִׁיקְט, כָּל־זְמַן עֶס אִיז טָאג; סֶע קוּמְט אָן דִי נַאכְט, וֶוען קֵיינֶער קָאן נִישְׁט אַרְבֶּעטְן.
5
כָּל־זְמַן אִיךְ בִּין אִין דֶער וֶועלְט, בִּין אִיךְ דָאס לִיכְט פוּן דֶער וֶועלְט.
6
בְּעֵת עֶר הָאט דָאס גֶעזָאגְט, הָאט עֶר אוֹיסְגֶעשְׁפִּיגְן אוֹיף דֶער עֶרְד, אוּן גֶעמַאכְט אַ לֵיים פוּן דֶעם שְׁפַּייעֶכְץ, אוּן הָאט אִים בַּאשְׁמִירְט דִי אוֹיגְן מִיט דֶעם לֵיים,
7
אוּן צוּ אִים גֶעזָאגְט: גֵיי, וַואשׁ דִיךְ אִין דֶעם טַייךְ שִׁילוֹחַ, וָואס אִיז טַייטְשׁ: גֶעשִׁיקְטֶער. עֶר אִיז דֶערִיבֶּער גֶעגַאנְגֶען, אוּן הָאט זִיךְ גֶעוַואשְׁן, אוּן אִיז צוּרִיקְגֶעקוּמֶען זֶעעֶנְדִיק.
8
דִי שְׁכֵנִים, אוּן דִי, וָואס הָאבְּן אִים פְרִיעֶר גֶעזֶען, בְּעֵת עֶר אִיז גֶעוֶוען אַ בֶּעטְלֶער, הָאבְּן גֶעזָאגְט: אִיז דָאס נִישְׁט דֶער, וָואס אִיז גֶעזֶעסְן אוּן הָאט גֶעבֶּעטְלְט?
9
אַנְדֶערֶע הָאבְּן גֶעזָאגְט: עֶר אִיז עֶס; אַנְדֶערֶע וִוידֶער הָאבְּן גֶעזָאגְט: נֵיין, נָאר עֶר אִיז עֶנְדְלֶעך צוּ אִים. אוּן עֶר הָאט גֶעזָאגְט: אִיךְ בִּין עֶס.
10
הָאבְּן זֵיי צוּ אִים גֶעזָאגְט: וִוי אַזוֹי זֶענֶען דַיינֶע אוֹיגְן גֶעעֶפְנְט גֶעוָוארְן?
11
אוּן עֶר הָאט גֶעעֶנְטְפֶערְט: דֶער מֶענְטְשׁ, וָואס וֶוערְט גֶערוּפְן יֵשׁוּעַ, הָאט גֶעמַאכְט אַ לֵיים, אוּן הָאט בַּאשְׁמִירְט מַיינֶע אוֹיגְן, אוּן הָאט צוּ מִיר גֶעזָאגְט: גֵיי צוּם שִׁילוֹחַ, אוּן וַואשׁ דִיךְ; אוּן אִיךְ בִּין גֶעגַאנְגֶען אוּן הָאבּ מִיךְ גֶעוַואשְׁן, אוּן אִיךְ הָאבּ גֶעקְרִיגְן מַיין רְאִיָה.
12
אוּן זֵיי הָאבְּן צוּ אִים גֶעזָאגְט: וואוּ אִיז עֶר? הָאט עֶר גֶעזָאגְט: אִיךְ וֵוייס נִישְׁט.
13
אוּן זֵיי הָאבְּן גֶעבְּרַאכְט צוּ דִי פְּרוּשִׁים דֶעם, וָואס אִיז פְרִיעֶר גֶעוֶוען בְּלִינְד.
14
אוּן עֶס אִיז גֶעוֶוען שַׁבָּת אִין יֶענֶעם טָאג, וֶוען יֵשׁוּעַ הָאט גֶעמַאכְט דָאס לֵיים, אוּן גֶעעֶפְנְט זַיינֶע אוֹיגְן.
15
אוּן דִי פְּרוּשִׁים הָאבְּן אִים וִוידֶער גֶעפְרֶעגְט, וִוי אַזוֹי עֶר הָאט גֶעקְרִיגְן זַיין רְאִיָה. אוּן עֶר הָאט צוּ זֵיי גֶעזָאגְט: עֶר הָאט אַרוֹיפְגֶעלֵייגְט לֵיים אוֹיף דִי אוֹיגְן, אוּן אִיךְ הָאבּ מִיךְ גֶעוַואשְׁן, אוּן אִיךְ זֶע.
16
אוּן עֶטְלֶעכֶע פוּן דִי פְּרוּשִׁים הָאבְּן גֶעזָאגְט: דֶער דָאזִיקֶער מֶענְטְשׁ אִיז נִישְׁט פוּן גָאט, מַחְמַת עֶר הִיט נִישְׁט אָפּ שַׁבָּת. נָאר אַנְדֶערֶע הָאבְּן גֶעזָאגְט: וִוי אַזוֹי קָאן אַ מֶענְטְשׁ, וָואס אִיז אַ זִינְדִיקֶער, טָאן אַזֶעלְכֶע צֵייכְנְס? אוּן סֶע זֶענֶען גֶעוֶוען צְוִוישְׁן זֵיי חִילוּקֵי־דֵעוֹת.
17
אוּן זֵיי הָאבְּן נָאכְאַמָאל גֶעזָאגְט צוּם בְּלִינְדְן: וָואס זָאגְסְטוּ פוּנְוֶועגְן אִים, מַחְמַת עֶר הָאט דִיר גֶעעֶפְנְט דַיינֶע אוֹיגְן? הָאט עֶר גֶעזָאגְט: עֶר אִיז אַ נָבִיא.
18
אָבֶּער דִי יִידְן הָאבְּן נִישְׁט גֶעוָואלְט גְלוֹיבְּן, אַז עֶר אִיז גֶעוֶוען בְּלִינְד, אוּן הָאט גֶעקְרִיגְן זַיין רְאִיָה, בִּיז זֵיי הָאבְּן גֶערוּפְן דִי עֶלְטֶערְן פוּן דֶעם, וָואס הָאט גֶעקְרִיגְן זַיין רְאִיָה,
19
אוּן הָאבְּן זֵיי גֶעפְרֶעגְט: אִיז דָאס אַייעֶר זוּן, פוּן וֶועמֶען אִיר זָאגְט, אַז עֶר אִיז גֶעבּוֹירְן גֶעוָוארְן בְּלִינְד? וִוי אַזוֹי זֶעט עֶר אִיצְט?
20
אוּן זַיינֶע עֶלְטֶערְן הָאבְּן גֶעעֶנְטְפֶערְט: מִיר וֵוייסְן, אַז דָאס אִיז אוּנְדְזֶער זוּן, אוּן אַז עֶר אִיז גֶעבּוֹירְן גֶעוָוארְן בְּלִינְד;
21
נָאר וִוי אַזוֹי עֶר זֶעט אִיצְטֶער, וֵוייסְן מִיר נִישְׁט; אָדֶער וֶוער סֶע הָאט אִים גֶעעֶפְנְט דִי אוֹיגְן, וֵוייסְן מִיר נִישְׁט. פְרֶעגְט אִים; עֶר אִיז שׁוֹין אַ בַּר־דַעַת, זָאל עֶר רֶעדְן פַאר זִיךְ אַלֵיין.
22
דָאס הָאבְּן זַיינֶע עֶלְטֶערְן גֶעזָאגְט, מַחְמַת זֵיי הָאבְּן מוֹרֶא גֶעהַאט פַאר דִי יִידְן, וָוארִים דִי יִידְן הָאבְּן שׁוֹין גֶעהַאט אָפְּגֶעמַאכְט, אַז אוֹיבּ עֶמִיצֶער וֶועט אִים אָנְעֶרְקֶענֶען פַאר דֶעם מָשִׁיחַ, זָאל מֶען אִים אוֹיסְשְׁלִיסְן פוּן קָהָל.
23
דֶערִיבֶּער הָאבְּן זַיינֶע עֶלְטֶערְן גֶעזָאגְט: עֶר אִיז אַ בַּר־דַעַת, פְרֶעגְט אִים.
24
אוּן זֵיי הָאבְּן גֶערוּפְן אַ צְוֵוייט מָאל דֶעם מֶענְטְשְׁן, וָואס אִיז גֶעוֶוען בְּלִינְד, אוּן הָאבְּן צוּ אִים גֶעזָאגְט: גִיבּ אָפּ כָּבוֹד צוּ גָאט; מִיר וֵוייסְן, אַז דֶער דָאזִיקֶער מֶענְטְשׁ אִיז אַ זִינְדִיקֶער.
25
הָאט עֶר גֶעעֶנְטְפֶערְט: צִי עֶר אִיז אַ זִינְדִיקֶער, וֵוייס אִיךְ נִישְׁט; אֵיין זַאךְ וֵוייס אִיךְ, אַז אִיךְ בִּין גֶעוֶוען בְּלִינְד, אוּן אִיצְט זֶע אִיךְ.
26
הָאבְּן זֵיי דֶערִיבֶּער צוּ אִים גֶעזָאגְט: וָואס הָאט עֶר דִיר גֶעטָאן? וִוי אַזוֹי הָאט עֶר גֶעעֶפְנְט דַיינֶע אוֹיגְן?
27
הָאט עֶר זֵיי גֶעעֶנְטְפֶערְט: אִיךְ הָאבּ עֶס אַייךְ שׁוֹין גֶעזָאגְט, אוּן אִיר הָאט נִישְׁט גֶעוָואלְט הֶערְן; צוּ וָואס וִוילְט אִיר דָאס נָאכְאַמָאל הֶערְן? צִי וִוילְט אִיר אוֹיךְ וֶוערְן זַיינֶע תַּלְמִידִים?
28
אוּן זֵיי הָאבְּן אִים גֶעזִידְלְט, אוּן גֶעזָאגְט: דוּ בִּיסְט זַיין תַּלְמִיד; מִיר אָבֶּער זֶענֶען מֹשֶׁהס תַּלְמִידִים.
29
מִיר וֵוייסְן, אַז גָאט הָאט גֶערֶעדְט צוּ מֹשֶׁה; נָאר וָואס שַׁייךְ דֶעם דָאזִיקְן מֶענְטְשְׁן, וֵוייסְן מִיר נִישְׁט פוּנְוַואנֶען עֶר אִיז.
30
אוּן דֶער מֶענְטְשׁ הָאט גֶעעֶנְטְפֶערְט: אִין דֶעם אִיז דָאס חִידוּשׁ, וָואס אִיר וֵוייסְט נִישְׁט פוּנְוַואנֶען עֶר אִיז, אוּן מִיר הָאט עֶר גֶעעֶפְנְט מַיינֶע אוֹיגְן.
31
מִיר וֵוייסְן, אַז גָאט טוּט נִישְׁט הֶערְן קֵיין זִינְדִיקֶע; נַייעֶרְט אוֹיבּ אֵיינֶער אִיז אַ יָרֵא־שָׁמַיִם, אוּן טוּט זַיין רָצוֹן, דֶעם דָאזִיקְן הֶערְט עֶר.
32
זִינְט דִי וֶועלְט שְׁטֵייט, אִיז נָאךְ נִישְׁט גֶעהֶערְט גֶעוָוארְן, אַז עֶמִיצֶער זָאל הָאבְּן גֶעעֶפְנְט דִי אוֹיגְן פוּן אַ מֶענְטְשְׁן, וָואס אִיז גֶעבּוֹירְן גֶעוָוארְן בְּלִינְד.
33
וֶוען דֶער דָאזִיקֶער וָואלְט נִישְׁט גֶעוֶוען פוּן גָאט, וָואלְט עֶר גָארְנִישְׁט גֶעקָאנְט טָאן.
34
אוּן זֵיי הָאבְּן גֶעעֶנְטְפֶערְט, אוּן צוּ אִים גֶעזָאגְט: דוּ בִּיסְט אִינְגַאנְצְן גֶעבּוֹירְן גֶעוָוארְן אִין זִינְד, אוּן אוּנְדְז טוּסְטוּ לֶערְנֶען? אוּן זֵיי הָאבְּן אִים אַרוֹיסְגֶעוָוארְפְן.
35
אוּן יֵשׁוּעַ הָאט גֶעהֶערְט, אַז זֵיי הָאבְּן אִים אַרוֹיסְגֶעוָוארְפְן; אוּן עֶר הָאט אִים גֶעפוּנֶען, אוּן גֶעזָאגְט: גְלוֹיבְּסְטוּ אִין דֶעם בֶּן־אָדָם?
36
הָאט עֶר גֶעעֶנְטְפֶערְט, אוּן גֶעזָאגְט: אוּן וֶוער אִיז עֶר, הַאר, אַז אִיךְ זָאל קֶענֶען גְלוֹיבְּן אִין אִים.
37
הָאט יֵשׁוּעַ צוּ אִים גֶעזָאגְט: דוּ הָאסְט אִים גֶעזֶען, אוּן דָאס אִיז עֶר, וָואס טוּט רֶעדְן מִיט דִיר.
38
הָאט עֶר גֶעזָאגְט: הַאר, אִיךְ גְלוֹיבּ; אוּן עֶר הָאט זִיךְ גֶעבּוּקְט פַאר אִים.
39
אוּן יֵשׁוּעַ הָאט גֶעזָאגְט: פוּנְוֶועגְן מִשְׁפָּט בִּין אִיךְ גֶעקוּמֶען אִין דֶער דָאזִיקֶער וֶועלְט אַרַיין, כְּדֵי דִי, וָואס זֶעעֶן נִישְׁט, זָאלְן קֶענֶען זֶען, אוּן כְּדֵי דִי, וָואס זֶעעֶן, זָאלְן וֶוערְן בְּלִינְד.
40
אוּן עֶטְלֶעכֶע פוּן דִי פְּרוּשִׁים, וָואס זֶענֶען גֶעוֶוען מִיט אִים, הָאבְּן דָאס גֶעהֶערְט, אוּן זֵיי הָאבְּן צוּ אִים גֶעזָאגְט: זֶענֶען מִיר אוֹיךְ בְּלִינְד?
41
הָאט יֵשׁוּעַ צוּ זֵיי גֶעזָאגְט: וֶוען אִיר וָואלְט גֶעוֶוען בְּלִינְד, וָואלְט אִיר נִישְׁט גֶעהַאט קֵיין זִינְד; אָבֶּער אִיצְט זָאגְט אִיר: מִיר זֶעעֶן; דֶערְפַאר בְּלַייבְּט אַייעֶר זִינְד.