אידיש
1
אוּן בְּעֵת דֶער הַאר הָאט זִיךְ דֶערְוואוּסְט, אַז דִי פְּרוּשִׁים הָאבְּן גֶעהֶערְט, אַז יֵשׁוּעַ מַאכְט אוּן טוֹבְלְט מֶער תַּלְמִידִים וִוי יוֹחָנָן –
2
הַגַם יֵשׁוּעַ אַלֵיין הָאט נִישְׁט גֶעטוֹבְלְט, נַייעֶרְט זַיינֶע תַּלְמִידִים –
3
הָאט עֶר פַארְלָאזְט יְהוּדָה, אוּן אִיז וִוידֶער אַוֶועקְגֶעגַאנְגֶען קֵיין גָלִיל.
4
אוּן עֶר הָאט גֶעמוּזְט דוּרְכְגֵיין דוּרְךְ שׁוֹמְרוֹן.
5
אוּן עֶר אִיז גֶעקוּמֶען אִין אַ שְׁטָאט פוּן שׁוֹמְרוֹן, וָואס הָאט גֶעהֵייסְן סוּכַר, נָאעֶנְט צוּ דֶעם שְׁטִיק פֶעלְד, וָואס יַעֲקֹב הָאט גֶעגֶעבְּן צוּ זַיין זוּן יוֹסֵף.
6
אוּן יַעֲקֹבְ׳ס בְּרוּנֶעם אִיז דָארְט גֶעוֶוען. אוּן אַזוֹי וִוי יֵשׁוּעַ אִיז גֶעוֶוען מִיד פוּן וֶועג, הָאט עֶר זִיךְ אַנִידֶערְגֶעזֶעצְט בַּיי דֶעם בְּרוּנֶעם; עֶס אִיז גֶעוֶוען אַרוּם דֶער זֶעקְסְטֶער שָׂעָה.
7
אוּן גֶעקוּמֶען אִיז אַ פְרוֹי פוּן שׁוֹמְרוֹן צוּ שֶׁעפְּן וַואסֶער. זָאגְט יֵשׁוּעַ צוּ אִיר: גִיבּ מִיר צוּ טְרִינְקֶען.
8
וָוארִים זַיינֶע תַּלְמִידִים זֶענֶען אַוֶועקְגֶעגַאנְגֶען אִין דֶער שְׁטָאט אַרַיין צוּ קוֹיפְן שְׁפַּייז.
9
אוּן דִי שׁוֹמְרוֹנִישֶׁע פְרוֹי הָאט צוּ אִים גֶעזָאגְט: וִוי קוּמְט עֶס, וָואס דוּ, וָואס בִּיסְט אַ יִיד, בֶּעטְסְט צוּ טְרִינְקֶען בַּיי מִיר, אַ שׁוֹמְרוֹנִית? וָוארִים יִידְן הָאבְּן נִישְׁט גֶעהַאט קֵיין מַגָע־וּמַשָׂא מִיט שׁוֹמְרוֹנִים.
10
הָאט יֵשׁוּעַ אִיר גֶעעֶנְטְפֶערְט: אוֹיבּ דוּ וָואלְטְסְט גֶעוואוּסְט דִי מַתָּנָה פוּן גָאט, אוּן וֶוער דָאס אִיז, וָואס זָאגְט צוּ דִיר: גִיבּ מִיר צוּ טְרִינְקֶען, וָואלְטְסְטוּ גֶעוֶוען גֶעבֶּעטְן בַּיי אִים, אוּן עֶר וָואלְט דִיר גֶעוֶוען גֶעגֶעבְּן לֶעבֶּעדִיקֶע וַואסֶער.
11
זָאגְט צוּ אִים דִי פְרוֹי: הַאר, דוּ הָאסְט נִישְׁט מִיט וָואס אָנְצוּשֶׁעפְּן, אוּן דֶער בְּרוּנֶעם אִיז טִיף; פוּנְוַואנֶען הָאסְטוּ דָאס לֶעבֶּעדִיקֶע וַואסֶער?
12
צִי בִּיסְטוּ גְרֶעסֶער פוּן יַעֲקֹב אָבִינוּ, וָואס הָאט אוּנְדְז גֶעגֶעבְּן דֶעם בְּרוּנֶעם, אוּן הָאט פוּן אִים אַלֵיין גֶעטְרוּנְקֶען, אוּן זַיינֶע זִין, אוּן זַיינֶע בְּהֵמוֹת?
13
הָאט יֵשׁוּעַ גֶעעֶנְטְפֶערְט, אוּן צוּ אִיר גֶעזָאגְט: יֶעדֶער אֵיינֶער, וָואס טְרִינְקְט פוּן דֶעם דָאזִיקְן וַואסֶער, וֶועט וִוידֶער זַיין דָארְשְׁטִיק.
14
אָבֶּער דֶער, וָואס טוּט טְרִינְקֶען פוּן דֶעם וַואסֶער, וָואס אִיךְ וֶועל אִים גֶעבְּן, וֶועט קֵיינְמָאל מֶער נִישְׁט דָארְשְׁטִיק זַיין; נַייעֶרְט דָאס וַואסֶער, וָואס אִיךְ וֶועל אִים גֶעבְּן, וֶועט וֶוערְן אִין אִים אַ וַואסֶער־קְוַואל, וָואס קְוַואלְט אַרוֹיף צוּם אֵייבִּיקְן לֶעבְּן.
15
זָאגְט צוּ אִים דִי פְרוֹי: הַאר, גִיבּ מִיר דָאס דָאזִיקֶע וַואסֶער, כְּדֵי אִיךְ זָאל נִישְׁט דָארְשְׁטְן, אוּן נִישְׁט דַארְפְן קוּמֶען אַהֶער צוּ שֶׁעפְּן.
16
זָאגְט יֵשׁוּעַ צוּ אִיר: גֵיי, רוּף דַיין מַאן, אוּן קוּם אַהֶער.
17
הָאט דִי פְרוֹי גֶעעֶנְטְפֶערְט, אוּן גֶעזָאגְט: אִיךְ הָאבּ נִישְׁט קֵיין מַאן. זָאגְט יֵשׁוּעַ צוּ אִיר: דוּ הָאסְט רִיכְטִיק גֶעזָאגְט: אִיךְ הָאבּ נִישְׁט קֵיין מַאן;
18
וָוארִים דוּ הָאסְט גֶעהַאט פִינְף מֶענֶער; אוּן דֶער, וֶועמֶען דוּ הָאסְט אִיצְט, אִיז נִישְׁט דַיין מַאן; דָאס הָאסְטוּ אֶמֶת גֶעזָאגְט.
19
זָאגְט צוּ אִים דִי פְרוֹי: הַאר, אִיךְ זֶע, אַז דוּ בִּיסְט אַ נָבִיא.
20
אוּנְדְזֶערֶע אָבוֹת הָאבְּן תְּפִילָה גֶעטָאן אוֹיף דֶעם דָאזִיקְן בַּארְג; אוּן אִיר זָאגְט, אַז אִין יְרוּשָׁלַיִם אִיז דֶער מָקוֹם, וואוּ מֶע דַארְף תְּפִילָה טָאן.
21
זָאגְט יֵשׁוּעַ צוּ אִיר: אִשָׁה, גְלוֹיבּ מִיר, סֶע קוּמְט דִי שָׂעָה, וָואס נִישְׁט אוֹיף דֶעם דָאזִיקְן בַּארְג, אוֹיךְ נִישְׁט אִין יְרוּשָׁלַיִם וֶועט אִיר תְּפִילָה טָאן צוּם פָאטֶער.
22
אִיר טוּט תְּפִילָה צוּ דֶעם, וֶועמֶען אִיר קֶענְט נִישְׁט; מִיר טְוּעֶן תְּפִילָה צוּ דֶעם, וֶועמֶען מִיר קֶענֶען; וָוארִים דִי יְשׁוּעָה אִיז פוּן דִי יִידְן.
23
אָבֶּער סֶע קוּמְט דִי שָׂעָה, אוּן אָט אִיז זִי, וֶוען דִי אֶמֶתע מִתְפַּלֵלִים וֶועלְן מִתְפַּלֵל זַיין צוּם פָאטֶער אִין גֵייסְט אוּן אֶמֶת; וָוארִים אַזוֹינֶע טוּט דֶער פָאטֶער בַּאגֶערְן זָאלְן זַיין זַיינֶע מִתְפַּלֵלִים.
24
גָאט אִיז גֵייסְט; אוּן דִי, וָואס טְוּעֶן תְּפִילָה צוּ אִים, מוּזְן תְּפִילָה טָאן אִין גֵייסְט אוּן אֶמֶת.
25
זָאגְט דִי פְרוֹי צוּ אִים: אִיךְ וֵוייס, אַז מָשִׁיחַ (וָואס הֵייסְט גֶעזַאלְבְּטֶער) וֶועט קוּמֶען; וֶוען עֶר וֶועט קוּמֶען, וֶועט עֶר אוּנְדְז בַּאשֵׁיידְן אַלְצְדִינְג.
26
זָאגְט יֵשׁוּעַ צוּ אִיר: אִיךְ, וָואס רֶעד מִיט דִיר, בִּין עֶס דֶער.
27
אִינְצְוִוישְׁן זֶענֶען אָנְגֶעקוּמֶען זַיינֶע תַּלְמִידִים; אוּן זֵיי הָאבְּן זִיךְ גֶעחִידוּשְׁט, וָואס עֶר רֶעדְט מִיט אַ פְרוֹי. דָאךְ הָאט קֵיינֶער נִישְׁט גֶעזָאגְט: וָואס וִוילְסְטוּ? אָדֶער: פַארְוָואס רֶעדְסְטוּ מִיט אִיר?
28
אוּן דִי פְרוֹי הָאט אִיבֶּערְגֶעלָאזְט דֶעם וַואסֶער־קְרוּג, אוּן אִיז אַוֶועק אִין שְׁטָאט אַרַיין, אוּן גֶעזָאגְט צוּ דִי מֶענְטְשְׁן:
29
קוּמְט, זֶעט אַ מֶענְטְשְׁן, וָואס הָאט מִיר גֶעזָאגְט אַלְצְדִינְג, וָואס אִיךְ הָאבּ גֶעטָאן; אִיז עֶר דֶער מָשִׁיחַ?
30
זֶענֶען זֵיי אַרוֹיסְגֶעגַאנְגֶען פוּן דֶער שְׁטָאט, אוּן זֶענֶען גֶעקוּמֶען צוּ אִים.
31
בְּשַׁעַת־מַעֲשֶׂה הָאבְּן אִים דִי תַּלְמִידִים גֶעבֶּעטְן, אַזוֹי צוּ זָאגְן: רֶבְּי, עֶס.
32
אָבֶּער עֶר הָאט צוּ זֵיי גֶעזָאגְט: אִיךְ הָאבּ אַ שְׁפַּייז צוּ עֶסְן, פוּן וָואס אִיר וֵוייסְט נִישְׁט.
33
דִי תַּלְמִידִים הָאבְּן דֶערִיבֶּער גֶעזָאגְט אֵיינֶער צוּם אַנְדֶערְן: צִי הָאט אִים עֶמִיצֶער גֶעבְּרַאכְט עֶפֶּעס צוּ עֶסְן?
34
זָאגְט יֵשׁוּעַ צוּ זֵיי: מַיין שְׁפַּייז אִיז צוּ טָאן דֶעם רָצוֹן פוּן אִים, וָואס הָאט מִיךְ גֶעשִׁיקְט, אוּן צוּ פַארְעֶנְדִיקְן זַיין וֶוערְק.
35
זָאגְט אִיר נִישְׁט: עֶס זֶענֶען נָאךְ פִיר חַדָשִׁים, אוּן דֶערְנָאךְ קוּמְט דֶער שְׁנִיט? אִיךְ זָאג אַייךְ, הֵייבְּט אוֹיף אַייעֶרֶע אוֹיגְן, אוּן קוּקְט אוֹיף דִי פֶעלְדֶער, וָואס זֶענֶען שׁוֹין וַוייס צוּם שְׁנִיט.
36
דֶער, וָואס שְׁנַיידְט, אִיז מְקַבְּל שְׂכַר, אוּן זַאמְלְט אַיין פֵּירוֹת צוּם אֵייבִּיקְן לֶעבְּן, כְּדֵי דֶער, וָואס זֵייט, אוּן דֶער, וָואס שְׁנַיידְט, זָאלְן זִיךְ אִינְאֵיינֶעם מְשַׂמֵחַ זַיין.
37
וָוארִים דָא פַּאסְט זִיךְ דָאס מָשָׁל: אֵיינֶער זֵייט, אוּן אַן אַנְדֶערֶער שְׁנַיידְט.
38
אִיךְ הָאבּ אַייךְ גֶעשִׁיקְט צוּ שְׁנַיידְן דָאס, אוֹיף וָואס אִיר הָאט זִיךְ נִישְׁט גֶעמִיט; אַנְדֶערֶע הָאבְּן זִיךְ גֶעמִיט, אוּן אִיר זֶענְט אִין זֵייעֶר מִי אַרַיינְגֶעקוּמֶען.
39
אוּן פוּן יֶענֶער שְׁטָאט הָאבְּן אַ סַך פוּן דִי שׁוֹמְרוֹנִים גֶעגְלוֹיבְּט אִין אִים, צוּלִיבּ דֶעם וָוארְט פוּן דֶער פְרוֹי, וָואס הָאט עֵדוּת גֶעזָאגְט: עֶר הָאט מִיר גֶעזָאגְט אַלְצְדִינְג, וָואס אִיךְ הָאבּ גֶעטָאן.
40
אוּן אַז דִי שׁוֹמְרוֹנִים זֶענֶען צוּ אִים גֶעקוּמֶען, הָאבְּן זֵיי אִים גֶעבֶּעטְן צוּ פַארְבְּלַייבְּן מִיט זֵיי; אוּן עֶר אִיז דָארְט פַארְבְּלִיבְּן צְוֵויי טֶעג.
41
אוּן נָאךְ אַ סַך הָאבְּן גֶעגְלוֹיבְּט צוּלִיבּ זַיין וָוארְט;
42
אוּן זֵיי הָאבְּן גֶעזָאגְט צוּ דֶער פְרוֹי: אִיצְט גְלוֹיבְּן מִיר, נִישְׁט צוּלִיבּ דַיינֶע רֵייד, וָוארִים מִיר אַלֵיין הָאבְּן גֶעהֶערְט, אוּן וֵוייסְן, אַז דָאס אִיז בֶּאֱמֶת דֶער גוֹאֵל פוּן דֶער וֶועלְט.
43
אוּן נָאךְ דִי צְוֵויי טֶעג אִיז עֶר פוּן דָארְטְן אַוֶועקְגֶעגַאנְגֶען קֵיין גָלִיל.
44
וָוארִים יֵשׁוּעַ אַלֵיין הָאט עֵדוּת גֶעזָאגְט, אַז אַ נָבִיא הָאט נִישְׁט קֵיין כָּבוֹד אִין זַיין אֵייגְן לַאנְד.
45
אוּן אַז עֶר אִיז גֶעקוּמֶען קֵיין גָלִיל, הָאבְּן אִים דִי גָלִילֶער מְקַבְּל־פָּנִים גֶעוֶוען, וַוייל זֵיי הָאבְּן גֶעזֶען אַלְץ, וָואס עֶר הָאט גֶעטָאן אִין יְרוּשָׁלַיִם אוֹיף יוֹם־טוֹב; וָוארִים אוֹיךְ זֵיי הָאבְּן עוֹלֵה־רֶגֶל גֶעוֶוען אוֹיף יוֹם־טוֹב.
46
אוּן עֶר אִיז וִוידֶער אַמָאל גֶעקוּמֶען קֵיין קָנָה אִין גָלִיל, וואוּ עֶר הָאט גֶעמַאכְט דָאס וַואסֶער צוּ וַויין. אוּן דָארְט אִיז גֶעוֶוען אֵיינֶער אַן אֵיידְלְמַאן, וֶועמֶעס זוּן אִיז גֶעוֶוען קְרַאנְק אִין כְּפַר־נָחוּם.
47
בְּעֵת עֶר הָאט גֶעהֶערְט, אַז יֵשׁוּעַ אִיז אַרוֹיסְגֶעקוּמֶען פוּן יְהוּדָה קֵיין גָלִיל, אִיז עֶר גֶעגַאנְגֶען אוּן הָאט אִים גֶעבֶּעטְן, אַז עֶר זָאל אַרָאפְּנִידֶערְן אוּן הֵיילְן זַיין זוּן; וָוארִים עֶר הָאט גֶעהַאלְטְן בַּיים שְׁטַארְבְּן.
48
אוּן יֵשׁוּעַ הָאט צוּ אִים גֶעזָאגְט: סַיידְן אִיר זֶעט צֵייכְנְס אוּן וְואוּנְדֶער, וֶועט אִיר נִישְׁט גְלוֹיבְּן!
49
זָאגְט צוּ אִים דֶער אֵיידְלְמַאן: הַאר, קוּם אַרָאפּ, אֵיידֶער מַיין קִינְד שְׁטַארְבְּט.
50
זָאגְט יֵשׁוּעַ צוּ אִים: גֵיי; דַיין זוּן לֶעבְּט! אוּן דֶער מֶענְטְשׁ הָאט גֶעגְלוֹיבְּט דָאס וָוארְט, וָואס יֵשׁוּעַ הָאט צוּ אִים גֶערֶעדְט, אוּן עֶר אִיז גֶעגַאנְגֶען זַיין וֶועג.
51
אוּן בְּעֵת עֶר הָאט אַרָאפְּגֶענִידֶערְט, הָאבְּן אִים בַּאּגֶעגְנְט זַיינֶע קְנֶעכְט, אוּן גֶעזָאגְט, אַז זַיין זוּן לֶעבְּט.
52
אוּן עֶר הָאט גֶעפָארְשְׁט בַּיי זֵיי דִי שָׂעָה, וֶוען עֶר הָאט זִיךְ אָנְגֶעהוֹיבְּן צוּ בֶּעסֶערְן. הָאבְּן זֵיי צוּ אִים גֶעזָאגְט: נֶעכְטְן אִין דֶער זִיבֶּעטֶער שָׂעָה הָאט דָאס פִיבֶּער אִים אָפְּגֶעלָאזְט.
53
אוּן דֶער פָאטֶער הָאט פַארְשְׁטַאנֶען, אַז דָאס אִיז גֶעוֶוען אִין יֶענֶער שָׂעָה, אִין וֶועלְכֶער יֵשׁוּעַ הָאט צוּ אִים גֶעזָאגְט: דַיין זוּן לֶעבְּט! אוּן עֶר הָאט אַלֵיין גֶעגְלוֹיבְּט, אוּן זַיין גַאנְץ הוֹיז.
54
דָאס דָאזִיקֶע אִיז שׁוֹין דָאס צְוֵוייטֶע צֵייכְן, וָואס יֵשׁוּעַ הָאט גֶעטָאן בַּיי זַיין אַרוֹיסְקוּמֶען פוּן יְהוּדָה קֵיין גָלִיל.