אידיש
1
אוּן עֶס אִיז גֶעוֶוען אַ מֶענְטְשׁ פוּן דִי פְּרוּשִׁים, וָואס הָאט גֶעהֵייסְן נַקְדִימוֹן, אַ שַׂר פוּן דִי יִידְן.
2
דֶער דָאזִיקֶער אִיז צוּ אִים גֶעקוּמֶען בַּיינַאכְט, אוּן הָאט צוּ אִים גֶעזָאגְט: רֶבְּי, מִיר וֵוייסְן, אַז דוּ בִּיסְט אַ לֶערֶער, וָואס אִיז גֶעקוּמֶען פוּן גָאט: וָוארִים קֵיינֶער קָאן נִישְׁט טָאן דִי דָאזִיקֶע צֵייכוּנְגֶען, וָואס דוּ טוּסְט, סַיידְן גָאט אִיז מִיט אִים.
3
הָאט יֵשׁוּעַ גֶעעֶנְטְפֶערְט, אוּן צוּ אִים גֶעזָאגְט: בֶּאֱמֶת, בֶּאֱמֶת, אִיךְ זָאג דִיר, סַיידְן אֵיינֶער וֶוערְט גֶעבּוֹירְן אוֹיפְסְנַיי, קָאן עֶר נִישְׁט זֶען דָאס מַלְכוּת פוּן גָאט.
4
זָאגְט צוּ אִים נַקְדִימוֹן: וִוי אַזוֹי קָאן אַ מֶענְטְשׁ גֶעבּוֹירְן וֶוערְן, וֶוען עֶר אִיז אַ זָקֵן? קָאן עֶר אַרַיינְקוּמֶען אַ צְוֵוייט מָאל אִין זַיין מוּטֶערְס טְרַאכְט, אוּן גֶעבּוֹירְן וֶוערְן?
5
הָאט יֵשׁוּעַ גֶעעֶנְטְפֶערְט: בֶּאֱמֶת, בֶּאֱמֶת, אִיךְ זָאג דִיר, סַיידְן אֵיינֶער וֶוערְט גֶעבּוֹירְן פוּן וַואסֶער אוּן דֶעם גֵייסְט, קָאן עֶר נִישְׁט אַרַיינְקוּמֶען אִין דֶעם מַלְכוּת פוּן גָאט.
6
דָאס, וָואס אִיז גֶעבּוֹירְן פוּן דֶעם פְלֵיישׁ, אִיז פְלֵיישׁ; אוּן דָאס, וָואס אִיז גֶעבּוֹירְן פוּן דֶעם גֵייסְט, אִיז גֵייסְט.
7
חִידוּשׁ דִיךְ נִישְׁט, וָואס אִיךְ הָאבּ דִיר גֶעזָאגְט: אִיר מוּזְט גֶעבּוֹירְן וֶוערְן אוֹיפְסְנַיי.
8
דֶער וִוינְט בְּלָאזְט וואוּ עֶר וִויל, אוּן דוּ הֶערְסְט זַיין קוֹל, אָבֶּער דוּ וֵוייסְט נִישְׁט פוּנְוַואנֶען עֶר קוּמְט, אוּן וואוּהִין עֶר גֵייט; אַזוֹי אִיז יֶעדֶער אֵיינֶער, וָואס אִיז גֶעבּוֹירְן פוּן דֶעם גֵייסְט.
9
הָאט נַקְדִימוֹן צוּ אִים גֶעזָאגְט: וִוי אַזוֹי קָאן דָאס זַיין?
10
אוּן יֵשׁוּעַ הָאט גֶעעֶנְטְפֶערְט, אוּן צוּ אִים גֶעזָאגְט: דוּ בִּיסְט אַ לֶערֶער פוּן יִשְׂרָאֵל, אוּן דָאס פַארְשְׁטֵייסְטוּ נִישְׁט?
11
בֶּאֱמֶת, בֶּאֱמֶת, אִיךְ זָאג דִיר: מִיר רֶעדְן דָאס, וָואס מִיר וֵוייסְן, אוּן זָאגְן עֵדוּת פוּנְוֶועגְן דֶעם, וָואס מִיר הָאבְּן גֶעזֶען; אוּן אִיר נֶעמְט נִישְׁט אָן אוּנְדְזֶער עֵדוּת.
12
אוֹיבּ אִיךְ הָאבּ צוּ אַייךְ גֶערֶעדְט פוּנְוֶועגְן עֶרְדִישֶׁע זַאכְן, אוּן אִיר גְלוֹיבְּט נִישְׁט, וִוי אַזוֹי וֶועט אִיר גְלוֹיבְּן, אוֹיבּ אִיךְ זָאל צוּ אַייךְ רֶעדְן פוּנְוֶועגְן הִימְלִישֶׁע זַאכְן?
13
אוּן קֵיינֶער אִיז נִישְׁט אַרוֹיפְגֶעגַאנְגֶען אִין הִימְל אַרַיין, נַייעֶרְט דֶער, וָואס הָאט אַרָאפְּגֶענִידֶערְט פוּן הִימְל, דֶער בֶּן־אָדָם, וָואס אִיז אִין הִימְל.
14
אוּן אַזוֹי וִוי מֹשֶׁה הָאט אוֹיפְגֶעהוֹיבְּן דִי שְׁלַאנְג אִין דֶער מִדְבָּר, פּוּנְקְט אַזוֹי מוּז דֶער בֶּן־אָדָם אוֹיפְגֶעהוֹיבְּן וֶוערְן,
15
כְּדֵי יֶעדֶער אֵיינֶער, וָואס גְלוֹיבְּט אִין אִים, זָאל הָאבְּן אֵייבִּיק לֶעבְּן.
16
וָוארִים גָאט הָאט אַזוֹי לִיבּ גֶעהַאט דִי וֶועלְט, אַז עֶר הָאט גֶעגֶעבְּן זַיין בֶּן־יָחִיד, כְּדֵי יֶעדֶער אֵיינֶער, וָואס גְלוֹיבְּט אִין אִים, זָאל נִישְׁט פַארְלוֹירְן וֶוערְן, נַייעֶרְט הָאבְּן אֵייבִּיק לֶעבְּן.
17
וָוארִים גָאט הָאט נִישְׁט גֶעשִׁיקְט דֶעם זוּן אִין דֶער וֶועלְט אַרַיין צוּ מִשְׁפָּטְן דִי וֶועלְט, נַייעֶרְט אַז דִי וֶועלְט זָאל גֶערַאטֶעוֶועט וֶוערְן דוּרְךְ אִים.
18
דֶער, וָואס גְלוֹיבְּט אִין אִים, וֶוערְט נִישְׁט גֶעמִשְׁפָּט; דֶער, וָואס גְלוֹיבְּט נִישְׁט, אִיז שׁוֹין גֶעמִשְׁפָּט גֶעוָוארְן, מַחְמַת עֶר הָאט נִישְׁט גֶעגְלוֹיבְּט אִין דֶעם נָאמֶען פוּן דֶעם בֶּן־יָחִיד פוּן גָאט.
19
אוּן דָאס אִיז דֶער מִשְׁפָּט, וָואס דָאס לִיכְט אִיז גֶעקוּמֶען אִין דֶער וֶועלְט אַרַיין, אוּן מֶענְטְשְׁן הָאבְּן לִיבּ גֶעהַאט דִי פִינְצְטֶערְנִישׁ לִיבֶּערְשְׁט וִוי דָאס לִיכְט; וָוארִים זֵייעֶרֶע מַעֲשִׂים זֶענֶען גֶעוֶוען שְׁלֶעכְט.
20
וָוארִים יֶעדֶער אֵיינֶער, וָואס טוּט שְׁלֶעכְטְס, הָאט פַיינְט דָאס לִיכְט, אוּן קוּמְט נִישְׁט צוּ דֶעם לִיכְט, כְּדֵי זַיינֶע מַעֲשִׂים זָאלְן נִישְׁט אוֹיסְגֶעפוּנֶען וֶוערְן.
21
נַייעֶרְט דֶער, וָואס טוּט דֶעם אֶמֶת, קוּמְט צוּ דֶעם לִיכְט, כְּדֵי זַיינֶע מַעֲשִׂים זָאלְן אַנְטְפְּלֶעקְט וֶוערְן, אַז זֵיי זֶענֶען גֶעטָאן גֶעוָוארְן אִין גָאט.
22
נָאךְ דֶעם אִיז יֵשׁוּעַ גֶעקוּמֶען מִיט זַיינֶע תַּלְמִידִים אִין דֶעם לַאנְד יְהוּדָה; אוּן עֶר אִיז דָארְט פַארְבְּלִיבְּן מִיט זֵיי, אוּן הָאט גֶעטוֹבְלְט.
23
אוּן אוֹיךְ יוֹחָנָן הָאט גֶעטוֹבְלְט גֶעוֶוען אִין עֵינוֹן, נָאעֶנְט צוּ שָׁלֵם, מַחְמַת עֶס אִיז דָארְטְן גֶעוֶוען אַ סַך וַואסֶער; אוּן זֵיי זֶענֶען גֶעקוּמֶען אוּן הָאבְּן זִיךְ גֶעלָאזְט טוֹבְלֶען.
24
וָוארִים יוֹחָנָן אִיז נָאךְ נִישְׁט גֶעוֶוען אַרַיינְגֶעוָוארְפן אִין דֶער תְּפִיסָה.
25
אוּן עֶס הָאט זִיךְ אָנְגֶעהוֹיבְּן אַ מַחְלוֹקֶת צְוִוישְׁן דִי תַּלְמִידִים פוּן יוֹחָנָן אוּן אַ יִידְן וֶועגְן רֵיינִיקְוּנְג.
26
אוּן זֵיי זֶענֶען גֶעקוּמֶען צוּ יוֹחָנָן, אוּן הָאבְּן צוּ אִים גֶעזָאגְט: רֶבְּי, דֶער, וָואס אִיז בַּיי דִיר גֶעוֶוען אִין אֵבֶר־הַיַרְדֵן, אוּן אוֹיף וֶועמֶען דוּ הָאסְט עֵדוּת גֶעזָאגְט, זֶע, דֶער דָאזִיקֶער טוֹבְלְט, אוּן אַלֶע קוּמֶען צוּ אִים.
27
הָאט יוֹחָנָן גֶעעֶנְטְפֶערְט, אוּן גֶעזָאגְט: אַ מֶענְטְשׁ קָאן זִיךְ גָארְנִישְׁט נֶעמֶען, סַיידְן עֶס אִיז אִים גֶעגֶעבְּן גֶעוָוארְן פוּן הִימְל.
28
אִיר אַלֵיין זֶענְט מַיינֶע עֵדוּת, אַז אִיךְ הָאבּ גֶעזָאגְט: אִיךְ בִּין נִישְׁט דֶער מָשִׁיחַ, נַייעֶרְט אַז אִיךְ בִּין גֶעשִׁיקְט גֶעוָוארְן פָארוֹיס פַאר אִים.
29
דֶער, וָואס הָאט דִי כַּלָה, אִיז דֶער חָתָן; אוּן דֶער פְרַיינְט פוּן דֶעם חָתָן, וָואס שְׁטֵייט אוּן הֶערְט זִיךְ צוּ צוּ אִים, אִיז זִיךְ שְׁטַארְק מְשַׂמֵחַ אִיבֶּער דֶעם חָתָנְס קוֹל; דִי דָאזִיקֶע שִׂמְחָה מַיינֶע אִיז אִיצְט פוּל.
30
עֶר מוּז וַואקְסְן, אִיךְ אָבֶּער מוּז וֶוערְן קְלֶענֶער.
31
דֶער, וָואס קוּמְט פוּן אוֹיבְן, אִיז אִיבֶּער אַלֶעמֶען; דֶער, וָואס אִיז פוּן דֶער עֶרְד, אִיז פוּן דֶער עֶרְד, אוּן פוּן דֶער עֶרְד טוּט עֶר רֶעדְן; דֶער, וָואס קוּמְט פוּן הִימְל, אִיז אִיבֶּער אַלֶעמֶען.
32
וָואס עֶר הָאט גֶעזֶען אוּן גֶעהֶערְט, וֶועגְן דֶעם זָאגְט עֶר עֵדוּת, אוּן קֵיינֶער נֶעמְט נִישְׁט אָן זַיין עֵדוּת;
33
דֶער, וָואס הָאט אָנְגֶענוּמֶען זַיין עֵדוּת, הָאט צוּגֶעלֵייגְט זַיין חַתִימָה, אַז גָאט אִיז אֶמֶת.
34
וָוארִים דֶער, וֶועמֶען גָאט הָאט גֶעשִׁיקְט, טוּט רֶעדְן דִי רֵייד פוּן גָאט; וָוארִים עֶר גִיט נִישְׁט דֶעם גֵייסְט מִיט אַ מָאס.
35
דֶער פָאטֶער הָאט לִיבּ דֶעם זוּן, אוּן הָאט אַלְצְדִינְג גֶעגֶעבְּן אִין זַיין הַאנְט אַרַיין.
36
דֶער, וָואס גְלוֹיבְּט אִין דֶעם זוּן, הָאט אֵייבִּיק לֶעבְּן; דֶער אָבֶּער, וָואס גֶעהָארְכְט נִישְׁט דֶעם זוּן, וֶועט נִישְׁט זֶען קֵיין לֶעבְּן, נַייעֶרְט דֶער צָארְן פוּן גָאט טוּט רוּעֶן אוֹיף אִים.