אידיש
1
אוּן אוֹיף דֶעם עֶרְשְׁטְן טָאג נָאךְ דֶעם שַׁבָּת, בְּשַׁעַת עֶס אִיז נָאךְ גֶעוֶוען טוּנְקְל, אִיז מִרְיָם פוּן מַגְדָלָה גֶעקוּמֶען פְרִי צוּם קֵבֶר, אוּן הָאט גֶעזֶען, אַז דֶער שְׁטֵיין אִיז אַוֶועקְגֶענוּמֶען גֶעוָוארְן פוּן דֶעם קֵבֶר.
2
אוּן זִי אִיז גֶעלָאפְן, אוּן אִיז גֶעקוּמֶען צוּ שִׁמְעוֹן פֶּעטְרוּס אוּן צוּ דֶעם אַנְדֶערְן תַּלְמִיד, וֶועמֶען יֵשׁוּעַ הָאט לִיבּ גֶעהַאט, אוּן הָאט צוּ זֵיי גֶעזָאגְט: זֵיי הָאבְּן אַוֶועקְגֶענוּמֶען דֶעם הַאר פוּן דֶעם קֵבֶר, אוּן מִיר וֵוייסְן נִישְׁט וואוּ זֵיי הָאבְּן אִים גֶעלֵייגְט.
3
אוּן פֶּעטְרוֹס אִיז אַרוֹיסְגֶעגַאנְגֶען, אוּן דֶער אַנְדֶערֶער תַּלְמִיד, אוּן זֵיי זֶענֶען גֶעגַאנְגֶען צוּם קֵבֶר.
4
אוּן זֵיי זֶענֶען בֵּיידֶע גֶעלָאפְן צוּזַאמֶען, אוּן דֶער אַנְדֶערֶער תַּלְמִיד אִיז אִיבֶּערְגֶעלָאפְן פֶּעטְרוּס, אוּן אִיז אָנְגֶעקוּמֶען פְרִיעֶר צוּם קֵבֶר.
5
אוּן אַז עֶר הָאט זִיךְ אַיינְגֶעבּוֹיגְן אוּן אַרַיינְגֶעקוּקְט, הָאט עֶר גֶעזֶען דִי תַּכְרִיכִים לִיגְן; אָבֶּער עֶר אִיז נִישְׁט אַרַיינְגֶעגַאנְגֶען.
6
דֶערְנָאךְ אִיז שִׁמְעוֹן פֶּעטְרוֹס אָנְגֶעקוּמֶען נָאךְ אִים, אוּן עֶר אִיז אַרַיינְגֶעגַאנְגֶען אִין דֶעם קֵבֶר אַרַיין; אוּן עֶר הָאט גֶעזֶען דִי תַּכְרִיכִים לִיגְן,
7
אוּן דָאס טִיכְל, וָואס אִיז גֶעוֶוען אוֹיף זַיין קָאפּ, אִיז נִישְׁט גֶעלֶעגְן מִיט דִי תַּכְרִיכִים, נַייעֶרְט צוּנוֹיפְגֶעוִויקְלְט אִין אַ פְּלַאץ בַּאזוּנְדֶער.
8
אוּן דֶערְנָאךְ אִיז אַרַיינְגֶעגַאנְגֶען אוֹיךְ דֶער אַנְדֶערֶער תַּלְמִיד, וָואס אִיז פְרִיעֶר גֶעקוּמֶען צוּם קֵבֶר, אוּן עֶר הָאט גֶעזֶען, אוּן גֶעגְלוֹיבְּט.
9
וָוארִים זֵיי הָאבְּן נָאךְ נִישְׁט פַארְשְׁטַאנֶען דֶעם פָּסוּק, אַז עֶר מוּז אוֹיפְשְׁטֵיין תְּחִיַת־הַמֵתִים.
10
אוּן דִי תַּלְמִידִים זֶענֶען דֶערִיבֶּער וִוידֶער אַוֶועק צוּ זִיךְ אַהֵיים.
11
אָבֶּער מִרְיָם אִיז גֶעשְׁטַאנֶען אִין דְרוֹיסְן בַּיים קֵבֶר אוּן הָאט גֶעוֵויינְט. אוּן, וִוי זִי הָאט גֶעוֵויינְט, הָאט זִי זִיךְ אַיינְגֶעבּוֹיגְן אוּן הָאט אַרַיינְגֶעקוּקְט אִין דֶעם קֵבֶר;
12
אוּן זִי הָאט גֶעזֶען צְוֵויי מַלְאָכִים אִין וֵוייסְן זִיצְן, וואוּ דֶער גוּף פוּן יֵשׁוּעַ אִיז גֶעלֶעגְן, אֵיינֶער צוּקָאפְּנְס, אוּן אֵיינֶער צוּפוּסְנְס.
13
אוּן זֵיי הָאבְּן צוּ אִיר גֶעזָאגְט: אִשָׁה, פַארְוָואס וֵויינְסְטוּ? זָאגְט זִי צוּ זֵיי: מַחְמַת זֵיי הָאבְּן אַוֶועקְגֶענוּמֶען מַיין הַאר, אוּן אִיךְ וֵוייס נִישְׁט, וואוּ זֵיי הָאבְּן אִים גֶעלֵייגְט.
14
אוּן בְּעֵת זִי הָאט דָאס גֶעזָאגְט, הָאט זִי זִיךְ אוֹיסְגֶעדְרֵייט, אוּן גֶעזֶען יֵשׁוּעַ שְׁטֵיין, אָבֶּער זִי הָאט נִישְׁט גֶעוואוּסְט, אַז דָאס אִיז יֵשׁוּעַ.
15
זָאגְט צוּ אִיר יֵשׁוּעַ: אִשָׁה, פַארְוָואס וֵויינְסְטוּ? וֶועמֶען זוּכְסְטוּ? אוּן מַחְמַת זִי הָאט אִים אָנְגֶענוּמֶען פַאר דֶעם גֶערְטְנֶער, הָאט זִי צוּ אִים גֶעזָאגְט: הַאר, אוֹיבּ דוּ הָאסְט אִים אַוֶועקְגֶעטְרָאגְן, זָאג מִיר, וואוּ דוּ הָאסְט אִים גֶעלֵייגְט, אוּן אִיךְ וֶועל אִים אַוֶועקְנֶעמֶען.
16
זָאגְט צוּ אִיר יֵשׁוּעַ: מִרְיָם! אוּן זִי הָאט זִיךְ אוֹיסְגֶעדְרֵייט, אוּן צוּ אִים גֶעזָאגְט אוֹיף לָשׁוֹן־קוֹדֶשׁ: רִבּוֹנִי, וָואס מֵיינְט צוּ זָאגְן: לֶערֶער.
17
זָאגְט יֵשׁוּעַ צוּ אִיר: רִיר מִיךְ נִישְׁט אָן, וָוארִים אִיךְ בִּין נָאךְ נִישְׁט אַרוֹיפְגֶעגַאנְגֶען צוּ דֶעם פָאטֶער; נַייעֶרְט גֵיי צוּ מַיינֶע בְּרִידֶער, אוּן זָאג זֵיי: אִיךְ גֵיי אַרוֹיף צוּ מַיין פָאטֶער אוּן אַייעֶר פָאטֶער, אוּן צוּ מַיין גָאט אוּן אַייעֶר גָאט.
18
אוּן מִרְיָם פוּן מַגְדָאלָה אִיז גֶעגַאנְגֶען אוּן הָאט דֶערְצֵיילְט דִי תַּלְמִידִים: אִיךְ הָאבּ גֶעזֶען דֶעם הַאר; אוּן אַז עֶר הָאט צוּ אִיר גֶעזָאגְט דִי דָאזִיקֶע זַאכְן.
19
אוּן אִין אָוונְט פוּן יֶענֶעם טָאג, דֶעם עֶרְשְׁטְן טָאג פוּן דֶער וָואךְ, בְּעֵת דִי טִירְן זֶענֶען גֶעוֶוען פַארְשְׁלָאסְן, וואוּ דִי תַּלְמִידִים זֶענֶען גֶעוֶוען, אַלְץ מוֹרֶא פַאר דִי יִידְן, אִיז יֵשׁוּעַ גֶעקוּמֶען אוּן אִיז גֶעשְׁטַאנֶען צְוִוישְׁן זֵיי, אוּן הָאט צוּ זֵיי גֶעזָאגְט: שָׁלוֹם־עַלֵיכֶם!
20
אוּן בְּעֵת עֶר הָאט דָאס גֶעזָאגְט, הָאט עֶר זֵיי גֶעוִויזְן זַיינֶע הֶענְט אוּן זַיין זַייט. אוּן דִי תַּלְמִידִים הָאבְּן זִיךְ גֶעפְרֵייט, בְּעֵת זֵיי הָאבְּן גֶעזֶען דֶעם הַאר.
21
אוּן יֵשׁוּעַ הָאט נָאכְאַמָאל צוּ זֵיי גֶעזָאגְט: שָׁלוֹם־עַלֵיכֶם! אַזוֹי וִוי דֶער פָאטֶער הָאט מִיךְ גֶעשִׁיקְט, פּוּנְקְט אַזוֹי שִׁיק אִיךְ אַייךְ.
22
אוּן אַז עֶר הָאט דָאס גֶעזָאגְט, הָאט עֶר אַ הוֹיךְ גֶעטָאן אוֹיף זֵיי, אוּן צוּ זֵיי גֶעזָאגְט: זַייט מְקַבְּל דֶעם רוּחַ־הַקוֹדֶשׁ.
23
וֶועמֶעס זִינְד אִיר זֶענְט מוֹחְל, פַאר דִי זֶענֶען זֵיי פַארְגֶעבְּן; וֶועמֶעס זִינְד אִיר פַארְהַאלְט, זֶענֶען זֵיי פַארְהַאלְטְן.
24
אוּן תּוֹמָא, אֵיינֶער פוּן דִי צְוֶועלְף, וֶועמֶען מֶען הָאט גֶערוּפְן: , אִיז נִישְׁט גֶעוֶוען מִיט זֵיי, בְּעֵת יֵשׁוּעַ אִיז גֶעקוּמֶען.
25
דִי אַנְדֶערֶע תַּלְמִידִים הָאבְּן דֶערִיבֶּער גֶעזָאגְט צוּ אִים: מִיר הָאבְּן גֶעזֶען דֶעם הַאר. עֶר אָבֶּער הָאט צוּ זֵיי גֶעזָאגְט: סַיידְן אִיךְ וֶועל זֶען דֶעם סִימָן פוּן דִי נֶעגְל אִין זַיינֶע הֶענְט, אוּן אַרַיינְטָאן מַיין פִינְגֶער אִין דֶעם סִימָן פוּן דִי נֶעגְל, אוּן אַרַיינְטָאן מַיין הַאנְט אִין זַיין זַייט, וֶועל אִיךְ נִישְׁט גְלוֹיבְּן.
26
אוּן אִין אַכְט טֶעג אַרוּם זֶענֶען זַיינֶע תַּלְמִידִים וִוידֶער גֶעוֶוען אִין דֶעם הוֹיז, אוּן תּוֹמָא אִיז גֶעוֶוען מִיט זֵיי. אוּן בְּעֵת דִי טִירְן זֶענֶען גֶעוֶוען פַארְשְׁלָאסְן, אִיז יֵשׁוּעַ גֶעקוּמֶען אוּן אִיז גֶעשְׁטַאנֶען צְוִוישְׁן זֵיי, אוּן הָאט גֶעזָאגְט: שָׁלוֹם־עַלֵיכֶם!
27
דֶערְנָאךְ הָאט עֶר גֶעזָאגְט צוּ תּוֹמָא: שְׁטְרֶעק אוֹיס אַהֶער דַיין פִינְגֶער, אוּן זֶע מַיינֶע הֶענְט; אוּן שְׁטְרֶעק אוֹיס דַיין הַאנְט, אוּן טוּ זִי אַרַיין אִין מַיין זַייט; אוּן זַיי נִישְׁט אוּמְגְלוֹיבִּיק, נַייעֶרְט גְלוֹיבִּיק.
28
הָאט תּוֹמָא גֶעעֶנְטְפֶערְט, אוּן צוּ אִים גֶעזָאגְט: מַיין הַאר אוּן מַיין גָאט!
29
זָאגְט צוּ אִים יֵשׁוּעַ: וַוייל דוּ הָאסְט מִיךְ גֶעזֶען, הָאסְטוּ גֶעגְלוֹיבְּט? וָואוֹיל אִיז דִי, וָואס הָאבְּן נִישְׁט גֶעזֶען, אוּן דָאךְ הָאבְּן זֵיי גֶעגְלוֹיבְּט.
30
אוּן נָאךְ אַ סַך אַנְדֶערֶע צֵייכְנְס הָאט יֵשׁוּעַ גֶעטָאן פַאר דִי תַּלְמִידִים, וָואס זֶענֶען נִישְׁט פַארְשְׁרִיבְּן אִין דֶעם דָאזִיקְן סֵפֶר.
31
אָבֶּער דִי דָאזִיקֶע זֶענֶען פַארְשְׁרִיבְּן, כְּדֵי אִיר זָאלְט גְלוֹיבְּן, אַז יֵשׁוּעַ אִיז דֶער מָשִׁיחַ, דֶער בֶּן־אֱלֹהִים, אוּן אַז אִין גְלוֹיבְּן זָאלְט אִיר הָאבְּן לֶעבְּן אִין זַיין נָאמֶען.