אידיש
1
אוּן דֶעם דְרִיטְן טָאג אִיז גֶעוֶוען אַ חַתוּנָה אִין קָנָה פוּן גָלִיל, אוּן יֵשׁוּעַ׳ס מוּטֶער אִיז דָארְט גֶעוֶוען;
2
אוּן אוֹיךְ יֵשׁוּעַ אִיז גֶעוֶוען פַארְבֶּעטְן צוּ דֶער חַתוּנָה, מִיט זַיינֶע תַּלְמִידִים.
3
אוּן בְּעֵת דֶער וַויין הָאט זִיךְ אוֹיסְגֶעלָאזְט, הָאט יֵשׁוּעַ׳ס מוּטֶער צוּ אִים גֶעזָאגְט: זֵיי הָאבְּן נִישְׁט קֵיין וַויין.
4
אוּן יֵשׁוּעַ הָאט צוּ אִיר גֶעזָאגְט: אִשָׁה, וָואס הָאבּ אִיךְ מִיט דִיר צוּ טָאן? מַיין שָׂעָה אִיז נָאךְ נִישְׁט גֶעקוּמֶען.
5
זָאגְט זַיין מוּטֶער צוּ דִי בַּאדִינֶער: וָואס נָאר עֶר וֶועט אַייךְ זָאגְן, דָאס טוּט.
6
אוּן דָארְטְן זֶענֶען גֶעשְׁטַאנֶען זֶעקְס שְׁטֵיינֶערְנֶע וַואסֶער־קְרוּגְן, לוֹיט דֶעם יִידִישְׁן מִנְהָג פוּן רֵיינִיקְן, אוּן וָואס יֶעדֶער אֵיינֶער הָאט גֶעהַאלְטְן צְוֵויי אָדֶער דְרַיי עֶמֶער.
7
אוּן יֵשׁוּעַ הָאט צוּ זֵיי גֶעזָאגְט: פִילְט אָן דִי וַואסֶער־קְרוּגְן מִיט וַואסֶער. אוּן זֵיי הָאבְּן זֵיי אָנְגֶעפִילְט בִּיזְן רַאנְד.
8
אוּן עֶר הָאט צוּ זֵיי גֶעזָאגְט: אִיצְט שֶׁעפְּט אָן, אוּן טְרָאגְט עֶס צוּ דֶעם בַּעַל־הַסְעוּדָה. אוּן זֵיי הָאבְּן עֶס צוּגֶעטְרָאגְן.
9
אוּן אַז דֶער בַּעַל־הַסְעוּדָה הָאט פַארְזוּכְט דָאס וַואסֶער, וָואס אִיז גֶעוָוארְן וַויין, אוּן נִישְׁט גֶעוואוּסְט פוּנְוַואנֶען עֶס אִיז גֶעקוּמֶען - דִי בַּאדִינֶער אָבֶּער הָאבְּן גֶעוואוּסְט, מַחְמַת זֵיי הָאבְּן אָנְגֶעשֶׁעפְּט דָאס וַואסֶער - הָאט דֶער בַּעַל־שִׂמְחָה גֶערוּפְן דֶעם חָתָן,
10
אוּן צוּ אִים גֶעזָאגְט: יֶעדֶער אֵיינֶער שְׁטֶעלְט קוֹדֶם דֶעם גוּטְן וַויין, אוּן בְּעֵת מֶע הָאט זִיךְ גוּט אָנְגֶעטְרוּנְקֶען, עֶרְשְׁט דֶעמָאלְט דֶעם עֶרְגֶערְן; דוּ אָבֶּער הָאסְט דֶעם גוּטְן וַויין גֶעהַאלְטְן בִּיז אַצִינְד.
11
דֶעם דָאזִיקְן אָנְהֵייבּ פוּן זַיינֶע צֵייכְנְס הָאט יֵשׁוּעַ גֶעטָאן אִין קָנָה פוּן גָלִיל, אוּן הָאט אַנְטְפְּלֶעקְט זַיין כָּבוֹד; אוּן זַיינֶע תַּלְמִידִים הָאבְּן גֶעגְלוֹיבְּט אִין אִים.
12
נָאךְ דֶעם הָאט עֶר אַרָאפְּגֶענִידֶערְט קֵיין כְּפַר־נָחוּם, מִיט זַיין מוּטֶער, אוּן זַיינֶע בְּרִידֶער, אוּן זַיינֶע תַּלְמִידִים; אוּן זֵיי זֶענֶען דָארְטְן פַארְבְּלִיבְּן עֶטְלֶעכֶע טֶעג.
13
אוּן דֶער יִידִישֶׁער יוֹם־טוֹב פֵּסַח הָאט גֶענֶעעֶנְט, אוּן יֵשׁוּעַ הָאט עוֹלֵה־רֶגֶל גֶעוֶוען קֵיין יְרוּשָׁלַיִם.
14
אוּן אִין דֶעם בֵּית־הַמִקְדָשׁ הָאט עֶר גֶעפוּנֶען יֶענֶע, וָואס הָאבְּן פַארְקוֹיפְט אָקְסְן אוּן שָׁאף אוּן טוֹיבְּן, אוּן דִי חַלְפָנִים זִיצְן.
15
אוּן עֶר הָאט גֶעמַאכְט אַ קַאנְטְשִׁיק פוּן שְׁטְרִיק, אוּן הָאט אַלֶעמֶען אַרוֹיסְגֶעטְרִיבְּן פוּן דֶעם בֵּית־הַמִקְדָשׁ, צוּזַאמֶען מִיט דִי שָׁאף אוּן דִי אָקְסְן; אוּן עֶר הָאט אוֹיסְגֶעשִׁיט דָאס גֶעלְט פוּן דִי חַלְפָנִים, אוּן אִיבֶּערְגֶעקֶערְט זֵייעֶרֶע טִישְׁן.
16
אוּן צוּ דִי, וָואס הָאבְּן פַארְקוֹיפְט טוֹיבְּן, הָאט עֶר גֶעזָאגְט: נֶעמְט דָאס צוּ פוּן דַאנֶען; מַאכְט נִישְׁט מַיין פָאטֶערְס הוֹיז אַ הוֹיז פוּן מִסְחָר.
17
זַיינֶע תַּלְמִידִים הָאבְּן זִיךְ דֶערְמַאנְט, אַז סֶע שְׁטֵייט גֶעשְׁרִיבְּן: דִי קִנְאָה פוּן דַיין הוֹיז הָאט מִיךְ פַארְצֶערְט.
18
אוּן דִי יִידְן הָאבְּן אִים גֶעעֶנְטְפֶערְט, אוּן גֶעזָאגְט: וָואסֶער צֵייכְן טוּסְטוּ אוּנְדְז וַוייזְן, אַז דוּ טוּסְט דִי דָאזִיקֶע זַאכְן?
19
הָאט יֵשׁוּעַ גֶעעֶנְטְפֶערְט, אוּן צוּ זֵיי גֶעזָאגְט: צוּבְּרֶעכְט דֶעם דָאזִיקְן הֵיכָל, אוּן אִין דְרַיי טֶעג וֶועל אִיךְ אִים אוֹיפְשְׁטֶעלְן.
20
דִי יִידְן הָאבְּן דֶערִיבֶּער גֶעזָאגְט: זֶעקְס־אוּן־פֶערְצִיק יָאר אִיז דֶער דָאזִיקֶער הֵיכָל גֶעבּוֹיט גֶעוָוארְן, אוּן דוּ וֶועסְט אִים אוֹיפְשְׁטֶעלְן אִין דְרַיי טֶעג?
21
עֶר אָבֶּער הָאט גֶערֶעדְט פוּן דֶעם הֵיכָל פוּן זַיין גוּף.
22
בְּכֵן, וֶוען עֶר אִיז אוֹיפְגֶעשְׁטַאנֶען פוּן דֶעם טוֹיט, הָאבְּן זִיךְ זַיינֶע תַּלְמִידִים דֶערְמַאנְט, אַז עֶר הָאט דָאס דָאזִיקֶע גֶעזָאגְט, אוּן זֵיי הָאבְּן גֶעגְלוֹיבְּט דִי כִּתְבֵי־הַקוֹדֶשׁ, אוּן אִין דִי רֵייד, וָואס יֵשׁוּעַ הָאט גֶערֶעדְט.
23
אוּן בְּעֵת עֶר אִיז גֶעוֶוען אִין יְרוּשָׁלַיִם אִיבֶּער דֶעם יוֹם־טוֹב פֵּסַח, הָאבְּן אַ סַך גֶעגְלוֹיבְּט אִין זַיין נָאמֶען, זֶעעֶנְדִיק זַיינֶע צֵייכוּנְגֶען, וָואס עֶר הָאט גֶעטָאן.
24
אָבֶּער יֵשׁוּעַ הָאט זִיךְ נִישְׁט פַארְטְרוֹיט אִין זֵיי, וָוארִים עֶר הָאט גֶעקֶענְט אַלֶע מֶענְטְשְׁן,
25
אוּן מַחְמַת עֶר הָאט זִיךְ נִישְׁט גֶענֵייטִיקְט, אַז עֶמִיצֶער זָאל עֵדוּת זָאגְן פוּנְוֶועגְן דֶעם מֶענְטְשְׁן; וָוארִים עֶר אַלֵיין הָאט גֶעוואוּסְט, וָואס ס׳אִיז גֶעוֶוען אִין דֶעם מֶענְטְשְׁן.