אידיש
1
דֶעמָאלְט הָאט פִּילַאטוּס גֶענוּמֶען יֵשׁוּעַ, אוּן הָאט אִים גֶעלָאזְט שְׁמַייסְן.
2
אוּן דִי זֶעלְנֶער הָאבְּן אוֹיסְגֶעפְלָאכְטְן אַ קְרוֹין פוּן דֶערְנֶער, אוּן זִי אַרוֹיפְגֶעזֶעצְט אוֹיף זַיין קָאפּ, אוּן אִים בַּאקְלֵיידְט אִין אַ פּוּרְפּוּר מַאנְטְל.
3
אוּן זֵיי הָאבְּן גֶענֶעעֶנְט צוּ אִים, אוּן גֶעזָאגְט: שָׁלוֹם דִיר, מֶלֶךְ פוּן דִי יִידְן! אוּן זֵיי הָאבְּן אִים גֶעפַּאטְשְׁט מִיט זֵייעֶרֶע הֶענְט.
4
אוּן פִּילַאטוּס אִיז וִוידֶער אַרוֹיסְגֶעגַאנְגֶען, אוּן הָאט צוּ זֵיי גֶעזָאגְט: אָט פִיר אִיךְ אִים אַרוֹיס צוּ אַייךְ, כְּדֵי אִיר זָאלְט וִויסְן, אַז אִיךְ גֶעפִין נִישְׁט אִין אִים קֵיין שׁוּם שׁוּלְד.
5
אוּן יֵשׁוּעַ אִיז אַרוֹיסְגֶעקוּמֶען, אוּן הָאט גֶעטְרָאגְן דִי קְרוֹין פוּן דֶערְנֶער אוּן דֶעם פּוּרְפּוּר מַאנְטְל. אוּן פִּילַאטוּס הָאט צוּ זֵיי גֶעזָאגְט: אָט אִיז דֶער מֶענְטְשׁ!
6
אוּן אַז דִי רָאשֵׁי־כֹּהַנִים אוּן דִי בַּאדִינֶער הָאבְּן אִים גֶעזֶען, הָאבְּן זֵיי אוֹיסְגֶעשְׁרִיגְן: קְרֵייצִיק אִים, קְרֵייצִיק אִים! זָאגְט צוּ זֵיי פִּילַאטוּס: נֶעמְט אִיר אִים אוּן קְרֵייצִיקְט אִים, וָוארִים אִיךְ גֶעפִין נִישְׁט אִין אִים קֵיין שׁוּם שׁוּלְד.
7
הָאבְּן אִים דִי יִידְן גֶעעֶנְטְפֶערְט: מִיר הָאבְּן אַ תּוֹרָה, אוּן לוֹיט דֶער תּוֹרָה אִיז עֶר חַיָיב־מִיתָה, מַחְמַת עֶר הָאט זִיךְ אַלֵיין גֶעמַאכְט פַאר דֶעם בֶּן־אֱלֹהִים.
8
אוּן וֶוען פִּילַאטוּס הָאט דָאס גֶעהֶערְט, הָאט עֶר נָאךְ מֶער מוֹרֶא בַּאקוּמֶען,
9
אוּן עֶר אִיז וִוידֶער אַרַיינְגֶעגַאנְגֶען אִין דֶעם פְּרֶעטָארְיוּם אַרַיין, אוּן הָאט גֶעזָאגְט צוּ יֵשׁוּעַ: פוּנְוַואנֶען בִּיסְטוּ? אָבֶּער יֵשׁוּעַ הָאט אִים נִישְׁט גֶעגֶעבְּן קֵיין תְּשׁוּבָה.
10
פִּילַאטוּס הָאט דֶערִיבֶּער צוּ אִים גֶעזָאגְט: צוּ מִיר טוּסְטוּ נִישְׁט רֶעדְן? וֵוייסְטוּ נִישְׁט, אַז אִיךְ הָאבּ רְשׁוּת דִיךְ פְרַיי צוּ לָאזְן, אוּן רְשׁוּת דִיךְ צוּ קְרֵייצִיקְן?
11
אוּן יֵשׁוּעַ הָאט אִים גֶעעֶנְטְפֶערְט: דוּ וָואלְטְסְט נִישְׁט גֶעהַאט קֵיין מַאכְט אִיבֶּער מִיר, אוֹיבּ זִי וָואלְט דִיר נִישְׁט גֶעגֶעבְּן גֶעוָוארְן פוּן אוֹיבְן; דֶערִיבֶּער הָאט דֶער, וָואס הָאט מִיךְ אִיבֶּערְגֶעעֶנְטְפֶערְט צוּ דִיר, אַ גְרֶעסֶערֶע זִינְד.
12
פוּן דֶעמָאלְט אָן הָאט פִּילַאטוּס גֶעזוּכְט אִים פְרַיי צוּ לָאזְן; אָבֶּער דִי יִידְן הָאבְּן אוֹיסְגֶעשְׁרִיגְן, אַזוֹי צוּ זָאגְן: אוֹיבּ דוּ לָאזְסְט פְרַיי דֶעם דָאזִיקְן מַאן, בִּיסְטוּ נִישְׁט דֶעם קֵיסָרְס פְרַיינְט; יֶעדֶער אֵיינֶער, וָואס מַאכְט זִיךְ אַלֵיין פַאר אַ מֶלֶךְ, אִיז מוֹרֶד־בְּמַלְכוּת.
13
אוּן וֶוען פִּילַאטוּס הָאט גֶעהֶערְט דִי דָאזִיקֶע רֵייד, הָאט עֶר אַרוֹיסְגֶעבְּרַאכְט יֵשׁוּעַ, אוּן הָאט זִיךְ אַנִידֶערְגֶעזֶעצְט אוֹיף דֶעם כִּסֵא־הַמִשְׁפָּט, אוֹיף דֶעם פְּלַאץ, וָואס הֵייסְט לִיתָּאסְטְרוֹטָאן, אוּן אוֹיף לָשׁוֹן־קוֹדֶשׁ, גַבְּתָא.
14
אוּן עֶס אִיז גֶעוֶוען עֶרֶב־פֶּסַח, אַרוּם דֶער זֶעקְסְטֶער שָׂעָה. אוּן עֶר הָאט גֶעזָאגְט צוּ דִי יִידְן: אָט אִיז אַייעֶר מֶלֶךְ!
15
אוּן זֵיי הָאבְּן גֶעשְׁרִיגְן: אַוֶועק מִיט אִים, אַוֶועק מִיט אִים, קְרֵייצִיק אִים! זָאגְט צוּ זֵיי פִּילַאטוּס: זָאל אִיךְ קְרֵייצִיקְן אַייעֶר מֶלֶךְ? אוּן דִי רָאשֵׁי־כֹּהַנִים הָאבְּן גֶעעֶנְטְפֶערְט: מִיר הָאבְּן נִישְׁט קֵיין מֶלֶךְ, אַחוּץ דֶעם קֵיסָר.
16
דֶעמָאלְט הָאט עֶר אִים אִיבֶּערְגֶעגֶעבְּן צוּ זֵיי, גֶעקְרֵייצִיקְט צוּ וֶוערְן.
17
זֵיי הָאבְּן דֶערִיבֶּער גֶענוּמֶען יֵשׁוּעַ. אוּן עֶר הָאט אַלֵיין גֶעטְרָאגְן זַיין קְרֵייץ, אוּן עֶר אִיז אַרוֹיסְגֶעגַאנְגֶען צוּ דֶעם פְּלַאץ, וָואס הָאט גֶעהֵייסְן דֶער שֵׁיידְל־פְּלַאץ, אוּן אוֹיף לָשׁוֹן־קוֹדֶשׁ הֵייסְט עֶר גָלְגָלְתָּא.
18
דָארְטְן הָאבְּן זֵיי אִים גֶעקְרֵייצִיקְט, אוּן מִיט אִים צְוֵויי אַנְדֶערֶע, אוֹיף יֶעדֶער זַייט אֵיינֶעם, אוּן יֵשׁוּעַ אִין דֶער מִיט.
19
אוּן פִּילַאטוּס הָאט אוֹיךְ אָנְגֶעשְׁרִיבְּן אַן אוֹיפְשְׁרִיפְט, אוּן הָאט זִי אַרוֹיפְגֶעטָאן אוֹיף דֶעם קְרֵייץ; אוּן דָארְט אִיז גֶעשְׁטַאנֶען: יֵשׁוּעַ הַנוֹצְרִי, דֶער מֶלֶךְ פוּן דִי יִידְן.
20
דִי דָאזִיקֶע אוֹיפְשְׁרִיפְט הָאבְּן גֶעלֵייעֶנְט אַ סַך יִידְן, וָוארִים דֶער פְּלַאץ, וואוּ יֵשׁוּעַ אִיז גֶעקְרֵייצִיקְט גֶעוָוארְן, אִיז גֶעוֶוען נָאעֶנְט פוּן דֶער שְׁטָאט; אוּן דָאס אִיז גֶעוֶוען גֶעשְׁרִיבְּן אוֹיף לָשׁוֹן־קוֹדֶשׁ, לַאטְיַינִישׁ, אוּן אִין גְרִיכִישׁ.
21
אוּן דִי רָאשֵׁי־כֹּהַנִים פוּן דִי יִידְן הָאבְּן גֶעזָאגְט צוּ פִּילַאטוּס: שְׁרַייבּ נִישְׁט: דֶער מֶלֶךְ פוּן דִי יִידְן, נַייעֶרְט אַז עֶר הָאט גֶעזָאגְט: אִיךְ בִּין דֶער מֶלֶךְ פוּן דִי יִידְן.
22
אוּן פִּילַאטוּס הָאט גֶעעֶנְטְפֶערְט: וָואס אִיךְ הָאבּ גֶעשְׁרִיבְּן, הָאבּ אִיךְ גֶעשְׁרִיבְּן.
23
אוּן דִי זֶעלְנֶער, בְּעֵת זֵיי הָאבְּן יֵשׁוּעַ גֶעקְרֵייצִיקְט, הָאבְּן גֶענוּמֶען זַיינֶע מַלְבּוּשִׁים אוּן גֶעמַאכְט פִיר חַלָקִים, פַאר יֶעדְן זֶעלְנֶער אַ חֵלֶק, אוּן אוֹיךְ זַיין רָאק. אוּן דֶער רָאק אִיז גֶעוֶוען אָן אַ נָאט, גֶעוֶועבְּט פוּן אוֹיבְן דוּרְךְ אוּן דוּרְךְ.
24
זֵיי הָאבְּן דֶערִיבֶּער גֶעזָאגְט אֵיינֶער צוּם אַנְדֶערְן: לָאמִיר אִים נִישְׁט צֶערַייסְן, נַייעֶרְט וַוארְפְן גוֹרָל אוֹיף אִים, וֶועמֶעס עֶר זָאל זַיין; כְּדֵי דֶער פָּסוּק זָאל מְקוּיָם וֶוערְן: זֵיי הָאבְּן צֶעטֵיילְט מַיינֶע בְּגָדִים צְוִוישְׁן זִיךְ; אוּן אִיבֶּער מַיין גֶעוַואנְט הָאבְּן זֵיי גֶעוָוארְפְן גוֹרָל.
25
אוּן אַזוֹי הָאבְּן דִי זֶעלְנֶער גֶעטָאן; אוּן בַּיי דֶעם צְלָב פוּן יֵשׁוּעַ זֶענֶען גֶעשְׁטַאנֶען זַיין מוּטֶער, אוּן זַיין מוּטֶערְס שְׁוֶועסְטֶער, מִרְיָם דָאס וַוייבּ פוּן קְלוֹפָס, אוּן מִרְיָם פוּן מַגְדָלָה.
26
אוּן בְּעֵת יֵשׁוּעַ הָאט גֶעזֶען זַיין מוּטֶער, אוּן דֶעם תַּלְמִיד, וֶועמֶען עֶר הָאט לִיבּ גֶעהַאט, שְׁטֵיין דֶערְבַּיי, הָאט עֶר גֶעזָאגְט צוּ זַיין מוּטֶער: אִשָׁה, אָט אִיז דַיין זוּן!
27
דֶערְנָאךְ הָאט עֶר גֶעזָאגְט צוּ דֶעם תַּלְמִיד: אָט אִיז דַיין מוּטֶער! אוּן פוּן יֶענֶער שָׂעָה אָן הָאט דֶער תַּלְמִיד זִי גֶענוּמֶען צוּ זִיךְ.
28
אוּן נָאכְדֶעם הָאט יֵשׁוּעַ, וַוייל עֶר הָאט גֶעוואוּסְט, אַז אַלְצְדִינְג אִיז שׁוֹין פַארְעֶנְדִיקְט, אוּן כְּדֵי דֶער פָּסוּק זָאל מְקוּיָם וֶוערְן, הָאט עֶר גֶעזָאגְט: אִיךְ בִּין דָארְשְׁטִיק.
29
אוּן דָארְט אִיז גֶעשְׁטַאנֶען אַ כֵּלִי פוּל מִיט עֶסִיק; אוּן זֵיי הָאבְּן אַרוֹיפְגֶעטָאן אַ שְׁוָואם פוּל מִיט עֶסִיק אוֹיף אַן אֵזוֹב־שְׁטֶענְגְל, אוּן עֶס דֶערְלַאנְגְט צוּ זַיין מוֹיל.
30
אוּן אַז יֵשׁוּעַ הָאט גֶענוּמֶען דֶעם עֶסִיק, הָאט עֶר גֶעזָאגְט: עֶס אִיז גֶעעֶנדִיקְט; אוּן עֶר הָאט גֶענֵייגְט זַיין קָאפּ, אוּן דֶעם גֵייסְט אִיבֶּערְגֶעגֶבְּן.
31
אוּן מַחְמַת עֶס אִיז גֶעוֶוען עֶרֶב־שַׁבָּת, אוּן כְּדֵי דִי גוּפִים זָאלְן נִישְׁט פַארְבְּלַייבְּן אוֹיפְן קְרֵייץ אִיבֶּער שַׁבָּת (וָוארִים יֶענֶער שַׁבָּת אִיז גֶעוֶוען אַ גְרוֹיסֶער טָאג), הָאבְּן דִי יִידְן גֶעבֶּעטְן בַּיי פִּילַאטוּס, אַז מֶען זָאל צֶעבְּרֶעכְן זֵייעֶרֶע פִיס, אוּן אַוֶועקְנֶעמֶען.
32
אוּן דִי זֶעלְנֶער זֶענֶען גֶעקוּמֶען, אוּן הָאבְּן צֶעבְּרָאכְן דִי פִיס פוּן דֶעם עֶרְשְׁטְן, אוּן פוּן דֶעם אַנְדֶערְן, וָואס אִיז מִיט אִים גֶעקְרֵייצִיקְט גֶעוָוארְן;
33
אָבֶּער וֶוען זֵיי זֶענֶען גֶעקוּמֶען צוּ יֵשׁוּעַ, אוּן הָאבְּן גֶעזֶען, אַז עֶר אִיז שׁוֹין טוֹיט, הָאבְּן זֵיי נִישְׁט צֶעבְּרָאכְן זַיינֶע פִיס.
34
אָבֶּער אֵיינֶער פוּן דִי זֶעלְנֶער הָאט מִיט אַ שְׁפִּיז גֶעשְׁטָאכְן זַיין זַייט, אוּן עֶס אִיז תֵּיכֵּף אַרוֹיסְגֶעקוּמֶען בְּלוּט אוּן וַואסֶער.
35
אוּן דֶער, וָואס הָאט עֶס גֶעזֶען, הָאט עֵדוּת גֶעזָאגְט - אוּן זַיין עֵדוּת אִיז אֶמֶת, אוּן עֶר וֵוייסְט, אַז עֶר זָאגְט אֶמֶת - כְּדֵי אוֹיךְ אִיר זָאלְט גְלוֹיבְּן.
36
וָוארִים דָאס אִיז גֶעשֶׁען, כְּדֵי דֶער פָּסוּק זָאל מְקוּיָם וֶוערְן: קֵיין בֵּיין פוּן אִים זָאל נִישְׁט וֶוערְן צֶעבְּרָאכְן.
37
אוּן וִוידֶער זָאגְט אַן אַנְדֶערֶער פָּסוּק: זֵיי וֶועלְן קוּקְן אוֹיף אִים, וֶועמֶען זֵיי הָאבְּן גֶעשְׁטָאכְן.
38
אוּן נָאכְדֶעם הָאט יוֹסֵף פוּן רָמָתַיִם, וָואס אִיז גֶעוֶוען אַ פַארְבָּארְגֶענֶער תַּלְמִיד פוּן יֵשׁוּעַ, אוֹיס מוֹרֶא פַאר דִי יִידְן, גֶעבֶּעטְן בַּיי פִּילַאטוּס, אַז עֶר זָאל מֶעגְן אַוֶועקְנֶעמֶען יֵשׁוּעַ׳ס גוּף, אוּן פִּילַאטוּס הָאט אִים גֶעגֶעבְּן דֶערְלוֹיבֶּענִישׁ. עֶר אִיז דֶערִיבֶּער גֶעקוּמֶען, אוּן הָאט אַוֶועקְגֶענוּמֶען זַיין גוּף.
39
אוּן אוֹיךְ נַקְדִימוֹן, וָואס אִיז קוֹדֶם צוּ אִים גֶעקוּמֶען בַּיינַאכְט, אִיז גֶעקוּמֶען אוּן הָאט גֶעבְּרַאכְט אַ מִישׁוּנְג פוּן מִירֶע אוּן אַלָאעֶן, אַן עֶרֶךְ פוּן הוּנְדֶערְט פוּנְט.
40
אוּן זֵיי הָאבְּן גֶענוּמֶען דֶעם גוּף פוּן יֵשׁוּעַ אוּן הָאבְּן אִים אַיינְגֶעוִויקְלְט אִין תַּכְרִיכִים צוּזַאמֶען מִיט דִי בְּשָׂמִים, וִוי עֶס אִיז דֶער מִנְהָג בַּיי יִידְן מְקַבְר צוּ זַיין.
41
אוּן אִין דֶעם אָרְט, וואוּ עֶר אִיז גֶעקְרֵייצִיקְט גֶעוָוארְן, אִיז גֶעוֶוען אַ גָארְטְן, אוּן אִין דֶעם גָארְטְן אַ נַייעֶר קֵבֶר, וָואס אִין אִים אִיז נָאךְ קֵיינֶער נִישְׁט גֶעלֵייגְט גֶעוָוארְן.
42
אוּן מַחְמַת עֶס אִיז שׁוֹין גֶעוֶוען עֶרֶב־שַׁבָּת בַּיי יִידְן, אוּן דֶער קֵבֶר אִיז גֶעוֶוען נָאעֶנְט, הָאבְּן זֵיי דָארְטְן אַרַיינְגֶעלֵייגְט יֵשׁוּעַ.