אידיש
1
דָאס הָאבּ אִיךְ צוּ אַייךְ גֶערֶעדְט, כְּדֵי אִיר זָאלְט נִישְׁט גֶעבְּרַאכְט וֶוערְן צוּ קֵיין מִיכְשׁוֹל.
2
זֵיי וֶועלְן אַייךְ אוֹיסְשְׁלִיסְן פוּן קָהָל: יָא, סֶע קוּמְט אָן דִי שָׂעָה, וֶוען יֶעדֶער אֵיינֶער, וָואס וֶועט אַייךְ הַרְגֶענֶען, וֶועט מֵיינֶען, אַז עֶר דִינְט גָאט דֶערְמִיט.
3
אוּן דָאס וֶועלְן זֵיי טָאן, מַחְמַת זֵיי הָאבְּן נִישְׁט גֶעקֶענְט דֶעם פָאטֶער, אוּן נִישְׁט מִיךְ.
4
אוּן דָאס הָאבּ אִיךְ גֶערֶעדְט צוּ אַייךְ, כְּדֵי, וֶוען זֵייעֶר שָׂעָה וֶועט קוּמֶען, זָאלְט אִיר גֶעדֶענְקֶען, אַז אִיךְ הָאבּ אַייךְ דָאס גֶעזָאגְט. אִין אָנְהֵייבּ הָאבּ אִיךְ עֶס אַייךְ נִישְׁט גֶעזָאגְט, מַחְמַת אִיךְ בִּין גֶעוֶוען מִיט אַייךְ.
5
אָבֶּער אִיצְט גֵיי אִיךְ צוּ אִים, וָואס הָאט מִיךְ גֶעשִׁיקְט; אוּן קֵיינֶער פוּן אַייךְ פְרֶעגְט מִיךְ נִישְׁט: וואוּהִין גֵייסְטוּ?
6
אָבֶּער וַוייל אִיךְ הָאבּ דָאס גֶערֶעדְט צוּ אַייךְ, הָאט צַעַר אָנְגֶעפִילְט אַייעֶר הַארְץ.
7
אִיךְ זָאג אַייךְ אָבֶּער דֶעם אֶמֶת, עֶס אִיז גוּט פַאר אַייךְ, אַז אִיךְ גֵיי אַוֶועק; וָוארִים אוֹיבּ אִיךְ גֵיי נִישְׁט אַוֶועק, וֶועט דֶער טְרֵייסְטֶער נִישְׁט קוּמֶען צוּ אַייךְ; נָאר אוֹיבּ אִיךְ גֵיי, וֶועל אִיךְ אִים שִׁיקְן צוּ אַייךְ.
8
אוּן אַז עֶר וֶועט קוּמֶען, וֶועט עֶר אִיבֶּערְצַייגְן דִי וֶועלְט וֶועגְן זִינְד, אוּן וֶועגְן רֶעכְטְפַארְטִיקַייט, אוּן וֶועגְן מִשְׁפָּט:
9
וֶועגְן זִינְד, מַחְמַת זֵיי גְלוֹיבְּן נִישְׁט אִין מִיר;
10
וֶועגְן רֶעכְטְפַארְטִיקַייט, מַחְמַת אִיךְ גֵיי צוּ דֶעם פָאטֶער, אוּן אִיר וֶועט מִיךְ מֶער נִישְׁט זֶען;
11
וֶועגְן מִשְׁפָּט, מַחְמַת דֶער שַׂר פוּן דֶער דָאזִיקֶער וֶועלְט אִיז גֶעמִשְׁפָּט גֶעוָוארְן.
12
אִיךְ הָאבּ אַייךְ נָאךְ אַ סַך זַאכְן צוּ זָאגְן, נָאר אִיר קֶענְט זֵיי אִיצְט נִישְׁט פַארְטְרָאגְן.
13
אָבֶּער בְּעֵת דֶער גֵייסְט פוּן אֶמֶת וֶועט קוּמֶען, וֶועט עֶר אַייךְ אַרַיינְפִירְן אִין דֶעם גַאנְצְן אֶמֶת; וָוארִים עֶר וֶועט נִישְׁט רֶעדְן פוּן זִיךְ אַלֵיין, נַייעֶרְט וָואס עֶר וֶועט הֶערְן, וֶועט עֶר רֶעדְן; אוּן עֶר וֶועט אַייךְ אָנְזָאגְן דָאס, וָואס דַארְף עֶרְשְׁט קוּמֶען.
14
עֶר וֶועט מִיךְ פַארְהֶערְלְעכְן, וַוייל עֶר וֶועט נֶעמֶען פוּן מַיינֶעם, אוּן וֶועט עֶס אַייךְ דֶערְקְלֶערְן.
15
אַלְצְדִינְג, וָואס דֶער פָאטֶער הָאט, אִיז מַיינְס; דֶערִיבֶּער הָאבּ אִיךְ גֶעזָאגְט, אַז עֶר וֶועט נֶעמֶען פוּן דֶעם, וָואס אִיז מַיין, אוּן וֶועט עֶס אַייךְ דֶערְקְלֶערְן.
16
נָאךְ אַ קְלֵיינֶע וַויילֶע, אוּן אִיר זֶעט מִיךְ נִישְׁט מֶער; אוּן וִוידֶער אַ קְלֵיינֶע וַויילֶע, אוּן אִיר וֶועט מִיךְ זֶען.
17
הָאבְּן עֶטְלֶעכֶע פוּן זַיינֶע תַּלְמִידִים גֶעזָאגְט אֵיינֶער צוּם אַנְדֶערְן: וָואס אִיז דָאס, וָואס עֶר זָאגְט צוּ אוּנְדְז: נָאךְ אַ קְלֵיינֶע וַויילֶע, אוּן אִיר זֶעט מִיךְ נִישְׁט; אוּן וִוידֶער אַ קְלֵיינֶע וַויילֶע, אוּן אִיר וֶועט מִיךְ זֶען? אוּן: אִיךְ גֵיי צוּ דֶעם פָאטֶער?
18
זֵיי הָאבְּן דֶערִיבֶּער גֶעזָאגְט: וָואס אִיז דָאס, וָואס עֶר זָאגְט: אַ קְלֵיינֶע וַויילֶע? מִיר פַארְשְׁטֵייעֶן נִישְׁט, וָואס עֶר זָאגְט.
19
יֵשׁוּעַ הָאט בַּאמֶערְקְט, אַז זֵיי וִוילְן אִים עֶפֶּעס פְרֶעגְן, אוּן עֶר הָאט צוּ זֵיי גֶעזָאגְט: פָארְשְׁט אִיר צְוִוישְׁן זִיךְ וֶועגְן דֶעם, וָואס אִיךְ הָאבּ גֶעזָאגְט: נָאךְ אַ קְלֵיינֶע וַויילֶע, אוּן אִיר זֶעט מִיךְ נִישְׁט, אוּן וִוידֶער אַ קְלֵיינֶע וַויילֶע, אוּן אִיר וֶועט מִיךְ זֶען?
20
בֶּאֱמֶת, בֶּאֱמֶת, אִיךְ זָאג אַייךְ: אִיר וֶועט וֵויינֶען אוּן קְלָאגְן, אָבֶּער דִי וֶועלְט וֶועט זִיךְ פְרֵייעֶן; אִיר וֶועט זַיין טְרוֹיֶערִיק, אָבֶּער אַייעֶר טְרוֹיֶער וֶועט פַארְקֶערְט וֶוערְן צוּ פְרֵייד.
21
אַ פְרוֹי, בְּעֵת זִי גֵייט צוּ קִינְד, אִיז אוּמֶעטִיק, מַחְמַת אִיר שָׂעָה הָאט גֶענֶעעֶנְט; אָבֶּער נָאכְדֶעם וִוי זִי הָאט גֶעבּוֹירְן דָאס קִינְד, גֶעדֶענְקְט זִי נִישְׁט מֶער דִי יְסוּרִים פוּנְוֶועגְן דֶער שִׂמְחָה, וָואס אַ מֶענְטְשׁ אִיז גֶעבּוֹירְן גֶעוָוארְן אוֹיף דֶער וֶועלְט.
22
אוּן אַזוֹי הָאט אִיר אוֹיךְ אִיצְטֶער צַעַר, אָבֶּער אִיךְ וֶועל אַייךְ וִוידֶער זֶען, אוּן אַייעֶר הַארְץ וֶועט זִיךְ פְרֵייעֶן, אוּן אַייעֶר שִׂמְחָה וֶועט קֵיינֶער נִישְׁט אַוֶועקְנֶעמֶען בַּיי אַייךְ.
23
אוּן אִין יֶענֶעם טָאג וֶועט אִיר מִיךְ נִישְׁט פְרֶעגְן קֵיין קַשְׁיוֹת. בֶּאֱמֶת, בֶּאֱמֶת, אִיךְ זָאג אַייךְ, אוֹיבּ אִיר וֶועט עֶפֶּעס בֶּעטְן בַּיי דֶעם פָאטֶער, וֶועט עֶר עֶס אַייךְ גֶעבְּן אִין מַיין נָאמֶען.
24
לְעֵת־עַתָּה הָאט אִיר גָארְנִישְׁט גֶעבֶּעטְן אִין מַיין נָאמֶען; בֶּעט, אוּן אִיר וֶועט בַּאקוּמֶען, כְּדֵי אַייעֶר שִׂמְחָה זָאל זַיין פוּל.
25
דִי דָאזִיקֶע זַאכְן הָאבּ אִיךְ גֶערֶעדְט צוּ אַייךְ אִין מְשָׁלִים; עֶס קוּמְט אָן דִי שָׂעָה, וֶוען אִיךְ וֶועל מֶער נִישְׁט רֶעדְן צוּ אַייךְ אִין מְשָׁלִים, נַייעֶרְט אִיךְ וֶועל אַייךְ זָאגְן אָפְן וֶועגְן דֶעם פָאטֶער.
26
אִין יֶענֶעם טָאג וֶועט אִיר בֶּעטְן אִין מַיין נָאמֶען; אוּן אִיךְ זָאג אַייךְ נִישְׁט, אַז אִיךְ וֶועל בֶּעטְן דֶעם פָאטֶער פַאר אַייךְ,
27
וָוארִים דֶער פָאטֶער אַלֵיין הָאט אַייךְ לִיבּ, מַחְמַת אִיר הָאט מִיךְ לִיבּ גֶעהַאט, אוּן הָאט גֶעגְלוֹיבְּט, אַז אִיךְ בִּין אַרוֹיסְגֶעקוּמֶען פוּן דֶעם פָאטֶער.
28
אִיךְ בִּין אַרוֹיסְגֶעקוּמֶען פוּן דֶעם פָאטֶער, אוּן בִּין גֶעקוּמֶען אִין דֶער וֶועלְט אַרַיין; אוּן וִוידֶער פַארְלָאז אִיךְ דִי וֶועלְט, אוּן גֵיי צוּ דֶעם פָאטֶער.
29
אוּן זַיינֶע תַּלְמִידִים הָאבְּן גֶעזָאגְט: זֶע, אִיצְט רֶעדְסְטוּ אָפְן, אוּן גֶעבְּרוֹיכְסְט נִישְׁט קֵיין מָשָׁל.
30
אִיצְט וֵוייסְן מִיר, אַז דוּ וֵוייסְט אַלְצְדִינְג, אוּן דַארְפְסְט נִישְׁט, אַז עֶמִיצֶער זָאל דִיךְ פְרֶעגְן; דוּרְכְדֶעם גְלוֹיבְּן מִיר, אַז דוּ בִּיסְט אַרוֹיסְגֶעקוּמֶען פוּן גָאט.
31
הָאט יֵשׁוּעַ זֵיי גֶעעֶנְטְפֶערְט: אִיצְט גְלוֹיבְּט אִיר?
32
סֶע טוּט קוּמֶען דִי שָׂעָה, יָא, זִי הָאט גֶענֶעעֶנְט, אוּן אִיר וֶועט וֶוערְן צֶעשְׁפְּרֵייט, אִיטְלֶעכֶער צוּ זַיינֶע אֵייגֶענֶע, אוּן מִיךְ וֶועט אִיר לָאזְן אַלֵיין: אָבֶּער אִיךְ בִּין נִישְׁט אַלֵיין, מַחְמַת דֶער פָאטֶער אִיז מִיט מִיר.
33
דָאס הָאבּ אִיךְ גֶערֶעדְט צוּ אַייךְ, כְּדֵי אִין מִיר זָאלְט אִיר הָאבְּן שָׁלוֹם. אִין דֶער וֶועלְט הָאט אִיר צָרוֹת; אָבֶּער זַייט גֶעטְרֵייסְט, אִיךְ הָאבּ מְנַצֵחַ גֶעוֶוען דִי וֶועלְט.